AKU REH NDAHI KAM

1 Korinti 16:5-12

(Tuhan Yesus Nangkih Ku Surga/Pra Pekan Doa)

 

Rasul Paulus mpeseh rencana perdalanenna ku perpulungen Korinti. Tangtangna ibahanna perdalanenna ku Makedoni guna ngelai ijah. Ngarap kal Paulus gelahna ia banci tading ndekah i Korinti. Kepeken perpulungen Korinti pe meriah kal ukurna mbegi rencana Paulus e, tapi sayang, rencana Paulus berubah sebab Paulus ngidah maka lit kesempaten si terbelinen ras si lebih penting si icidahken Dibata man bana guna mberitaken Berita Simeriah (Ayat 8-9). Em sababna Paulus la surung ku Kotinti.

Bageme Paulus, ibas ia erbahan kujungan, pelayanen ntah pe perjumpan, Paulus ngidah pintu pelayanen terbuka i Efesus janah metedeh kal atena mberitaken Berita simeriah dingen memenangken jiwa-jiwa si tersesat i Efesus, labo guna memanjaken kalak si enggo selamat eme perpulungen Korinti. Paulus lebih mengutamakan agenda Tuhan asangken agenda pribadina. Man Paulus, kesempaten siibereken Tuhan guna memenangken jiwa, jauh lebih penting.

Paulus ibas ngerencanaken pelayanenna tuhu-tuhu kal irencanakenna alu mehuli. Bali ras Yesus ibas ngajarken ajar-ajarNa, gelah iukurkenna lebe alu mbages-mbages ope iputuskenna ngikut Yesus (Luk. 14:28-32).

Adi siperdiateken menaken ibas ayat 1 nari, teridah maka Paulus tuhu-tuhu kepate nandangi perpulungen bagepe teman-temanna serayan Tuhan.

Ayat 1-4, Paulus kepate kempak kalak si tek si menderita erkiteken kinitekenna. Ngarap kali a gelahna perpulungen i Korinti bagepe Galatia muat bagin ia ibas mpepulung dana guna mpenahang kecibal perpulungen i Jerusalem si ikucilken erkiteken kinitekenna man Kristus.

Ayat 5-9, Paulus ncidahken kepedulianna kempak teman sepelayanenna. Mindo kal ia man perpulungen Korinti gelahna perdiatekennalah kecibal teman-temanna serayan Tuhan alu mehuli eriketeken nehken Berita Simeriah, eme: Timotius, Stefanus, Fortunatus, Akhaikus, Akwila ras Friskila.

Ayat 10-12 bagepe 16-19, Paulus ncidahken kepedulianna nandangi kecibal kiiniteken perpulungen silayanina. Iberekenna erbage-bage pengajararen/pedah-pedah gelah tetap paguh ibas kiniteken ras setia ngelai Tuhan (13-15) peduli dengan kondisi iman dan kerohanian jemaat yang dilayaninya. Ia memberi berbagai nasihat rohani agar mereka berdiri teguh dalam iman dan setia melayani Tuhan (13-15).

Teladan Paulus ibas bindu 16 enda sangat ibutuhken kalak si tek ibas paksa enda. Situasi kegeluhen si semakin keras bagepe persaingen si semakin ketat ibas geluh sitep-tep wari, secara langsung enggo mempengaruhi kegeluhen perpulungen. Banci jadi, serayan-serayan Tuhan ibas paksa genduari enda lebih peduli ngukurken kebutuhenna sendiri. Enggo seh kal kurangna waktuna guna ncidahken kepedulianna nandangi temanna manusia. Emaka marilah kita erlajar arah teladan Paulus.

Menurut kita masing-masing, guna menakenca, kai nge si perlu silakoken?

Kai-kai saja nge siakap si paling ibutuhken ibas gereja ibas paksa genduari enda?  

DISKUSI

1. Turiken engkai maka Paulus semangat kal er PI rikut njagai kemurnian ajaren gereja?

• Paulus nandai dirina si enggo ipilih Dibata guna nehken Berita Simeriah, seh maka ertanggung jawab kal ia njagai ras mpertahanken kemurnian ajaren gereja.
• Paulus ngidah maka pengaruh ajaren papak enggo bengket kubas perpulungen, emaka harus itangani sesegara mungkin gelah ula sempat perpulungen murtad mulihken.
• Paulus pe ngajuk serayan Tuhan sidebanna gelah radu ras njagai perpulungen si terancam kinitekenna erkiteken situasi si la kondusif arah tekanen ibas pihak-pihak si la senang kempak kehadiren gereja paksa sie.
• Paulus pe ngajuk perpulungen gelah radu ras njagai kiniteken si enggo ipelajari ras idengkehkenna gelah ula sempat italuken pengajaren si papak

2. Turiken kai-kai saja aksi nyata sibanci sibahan secara pribadi, sektor, kategorial bagepe Runggun tanda kita setia nimai kerehen Tuhan Yesus sipeduakaliken ihubungken ras dahin PI.

• ahin er-PI eme perintah si harus idahiken kerina kalak si tek man Yesus Kristus. Erkiteken perintah emaka kerina harus ertanggung jawab guna er-PI.
• Nginget kesibuken anggota perpulungen ibas pendahin, usaha bagepe kegiatenna ibas doni enda, erbanca kurang (la lit) waktuna guna Er-PI ibas konteks gundari enda.
• Emaka, gelah kerina banci er-PI subuk secara langsung (eme terjun langsung ku pelayanen PI lako ngajari ras mbabai kalak gelah nandai Yesus Kristus) bagepe secara la langsung (alu mereken dana, pemikiren ras toto) iarapken maka perpulungen berpartisipasi aktif ibas dua dampar idatas (langsung/la langsung).
• Ibas konteks gerejanta GBKP, piga-piga Klasis erbahan program PI klasis ku klasis tertentu si perlu isampati ibas er-PI guna mbabai kalak Karo si langa ku GBKP gelah bengket ku GBKP. Bagepe Gerejanta GBKP sangat membutuhkan partisipasi aktif perpulungen (subuk pribadi, keluarga, kategorial bagepe Runggun) guna nampati gerejanta membiayai ras nempatken tenaga detaser ku Perpulungen (perminggun) ntah pe Runggun si langa denga lit Pendeta ntah pe Vicaris guna ngelai ibas perpulungen.
• Perpulungen harus tetap erjaga-jaga guna nimai kerehen Tuhan sipeduakaliken alu tetap erbahan simehuli ibas geluhna sebagai wujud kintekenna man Tuhan Yesus kristus.

(SELAMAT MELAYANI PERPULUNGENTA IBAS PJJ MINGGU ENDA)

 

Pdt. Philipus Tarigan-Runggun Cililitan

KINIERSADAN, KINITEKEN RAS PERBAHANEN

JAKUB 2:18-24

(Konfesi GBKP/Etika)

 

I. Penjelasen Teks Ogen

Konteks ogenta eme litna pemahamen pengajaren kerna hubungen kiniteken ras perbahanen selaku kalak Kristen. Jakub ngidah maka perpulungen enggo lepak erkiteken perpulungen menganggap maka asal ngaku tek man Yesus enggo cukup guna nelamatken ia padahal perukurenna la sendalanen ras kai siibahanna ibas ia ngikuti ibadah-ibadahna selaku kalak Kristen.

Jakub ngidah maka palas pengajaren sibage la payo, emaka ikatakenna man perpulungen maka sesekalak ibenarken labo hanya arah kiniteken tapi pe rikut ras perbahanen. Sementara Paulus nulis suratna man perpulungen i Roma (Roma 3:28), bagepe Galatia (Galatia 2:16), nina, “manusia banci rembak ras Dibata labo erdandanken ndalanken kai si ituntut Undang-undang tapi erdandanken tek man Yesus Kristus ngenca” Alu bage, tempa lit dua pengajaren si berbeda ibas paksa sie. Padahal masing-masing beda konteksna ibas ia nehken pengajarenna.

Tupung Paulus ngerana, manusia ibenarken erkiteken kinitekenna janah labo erkiteken ndalanken hukum Taurat, Paulus ngerana kerna “perbahanen” si berbeda ras kai si imaksudken Jakub, tapi labo kerna “kiniteken” si berbeda.

Paulus ngerana kerna perbahanen sinilakoken guna ndalanken hukum Taurat, janah ope manusia ngaloken kinitekenna kempak Injil, tambah sie Paulus harus ka berhadapen ras jelma sienterem si erpengakap ras menilai dirina HEBAT ibas perbahanenna janah dungna itulakna Injil.

Subuk Paulus bagepe Jakub, duana nekanken kiniteken kempak Injil (Yesus Kristus), sebab Injil saja ngenca banci sinelamatken ras mbenarken kita. Tapi Paulus nekanken maka ndalanken hukum taurat labo cukup ibandingken kiniteken man Yesus, ntahpe erlawanen ras pengajaren kerna pembenaren arah Yesus Kristus. Jakub nekanken kiniteken si seri ras Paulus, alu ncidahken kai kin seharusna icidahken (ihasilken) ras ikerjaken kiniteken e.

Jadi, kalak si mpebelin-belin Injil ras la ndalanken Taurat, bagepe kalak si mpebelin-belin Taurat ras la ngaloken Injil, duana papak. Harus lit Kiniteken kempak Yesus Kristus bagepe ngelakoken perbahanen simehuli sebagai produk kiniteken.

Pembenaren siicakapken Paulus berbeda ras pembenaren siicakapken Jakub.

Paulus ngerana kerna pribadinta siibenarken ilebe-lebe Dibata, sementara Jakub ngerana kerna kiniteken siibenarken iadep-adepen manusia.“ibas ayat 18, nina Jakub”…cidahkenlah man bangku kuga banci kalak erkiniteken adi la rikut ras perbahanenna”….Bahanlah maka kinitekenta ibenarken ilebe-lebe jelma sienterem arah perbahanenta“

Tapi Paulus ngerana kerna pembenaren iadepadepen Tuhan si hanya membenarken kalak si tek man Yesus Kristus si enggo nebus kerina dosa-dosanta. Jadi, jelas man banta maka, pribadinta ibenarken iadepadepen Tuhan arah kiniteken, tapi kinitekenta ibenarken iadep-adepen manusia arah perbahanenta. Enda me ikataken kiniteken si rikut ras perbahanen (usaha) ras kiniteken si erdahin arah kekelengen (Gal. 5:6; 1Tes. 1:3; Tit. 3:8)

Arah Abraham ras Rahab, kita iajari maka kiniteken siibenarken labo lit, adi la kin rikut ras perbahanen.

(1). Abraham, bapa kalak si erkiniteken, jadi contoh utama kerna pembenaren. Man Abraham me kalak Yahudi nehken kehamaten secara khusus. Abraham ibenarken erkiteken perbahanen-perbahanenna tupung ipersembahkenna anakna Ishak.

Arah kai sibahan Abraham teridah maka tuhu-tuhu ia tek. Kiniteken Abraham eme kiniteken si erdahin, janah arah perbahanen-perbahanenna e kinitekenna jadi sempurna. Ise saja si ersura-sura ndatken pasu-pasu bagi si aloken Abraham, harus nggit ngikutken kinitekenna.

(2). Rahab, sekalak diberu si dahinna ndayaken dirina e, Ia irembakken ras Dibata erdandanken perbahanenna asum ialo-alona mata-mata e ku rumahna, bagepe isampatina kalak e kompat arah dalan sideban (ayat 25).

Abraham eme contoh kerna sekalak si enggo erkiniteken alu paguh ibas geluhna. Sementara Rahab, sitandai ia erkiteken dosa-dosana, derajatna si rendah dingen kinitekenna si hina. Alu bage, subuk kiniteken si paguh bagepe si hina, la kepe banci adi la rikut ras perbahanen. Kiniteken banci nelamatken sesekalak si hina adi ibuktiken arah perbahanen si sepatutna. Sebalikna kiniteken labo banci nelamatken sesekalak amin kuga gia ia ulina, adi labo ibuktikenna alu perbahanenna arah ndalanken Undang-undang Dibata. Ibas diri Rahab teridah maka Luar biasa kuasa kiniteken ibas meperobahi ukur ras kegeluhen kalak perdosa.

II. Tema: Kiniersadan, Kiniteken ras Perbahanen

Kai pesan arah Kata Dibata si jadi ogenta rikut penjelasen idatas sue ras tema PJJnta?

1. Kiniersadan ras Tuhan jadi tanda maka kita erkiniteken man baNa, janah e sibuktiken arah ngelakoken perbahanen-perbahanen simehuli ibas geluhta.

2. Kalak si ngaku erkiniteken man Tuhan, labo hanya teridah arah kuga ia ndalanken ritual agamana alu payo (ersada ras Tuhan), tapi pe icidahkenna arah perbahanenna si payo si banci iidah jelma sienterem, janah erkiteken sie kinitekenta ibenarken.

3. Ngelakoken perbahanen simehuli mutlak ilakoken kalak si erkiniteken sebagai bukti makai a rembak ras Dibata. Jadi teluna enda sikawiten sada ras sidebanna.

III. Diskusi

1. Doni enda eme kuta siitetapken Dibata jadi inganta tading kentisik. Kuga dage enggo kepatuhenta man baNa selaku IA simada kita inganta tading enda?

Erlajarlah kita arah Abraham bagepe Rahab (kiniteken si paguh ras si hina), ibenarken erkiteken perbahanenna. Ingetlah maka waktu siibereken Dibata man banta guna ngisi kegeluhenta la kap ndekah, lit limitna. Pebuelah erbahan simehuli ibas geluhta bagepe nandangi doni enda gelah kinitekenta tuhu-tuhu teridah ilebe-lebe jelma sienterem.

2. Perbahanen si kuga dage tole nari silakoken si jadi tanda kita patuh man Tuhan?

Adi ngerana kerna perbahanen si kuga dage tole nari si lakoken, tentu labo lit batasenna guna ngelakoken perbahanen si mehuli e. Dalanken kerina perentah Tuhan, sebab tugas siibereken Dibata man banta eme gelah ibas ndalani kegeluhenta gelar Tuhan tetap ermulia. Kepatuhenta man Tuhan teridah arah perbahanen-perbahenenta simehuli.

 

Pdt. Philipus Tarigan-Runggun Cililitan

KEBUJURENLAH SINGKAWALI KITA

MAZMUR 25:21

(Nilai Hidup Dalam GBP/Jujur)

Mazmur 25:21 “Kiniulin dingen kebujurenlah singkawali aku, sabap aku ernalem man baNdu”

 

I. Lit sada ilustrasi si nggambarken kerna perluna kita ngelakoken kebujuren ibas sikugapana pe.

Ibas sada wari, sekalak kalak bayak mereken sada keranjang nakan pangan si enggo mali man sekalak si musil. Kalak si musil ndai cirem kal ngalokenca, janah minter itadingkenna istana kalak bayak ndai. Mulih ia janah kenca seh ia irumahna, minter ikosongkenna keranjang ndai jenari ibersihkenna. Kenca sie, isina keranjang ndai alu bunga-bunga si mejile ras merim, si ibuatna ibas kebunna nari. La ndekah kenca sie, minter ia mulihken ku istana kalak bayak ndai janah iberekenna keranjang si isina bunga-bunga si mejile ras si merim.

Kalak bayak ndai sengget dingen mamang kal atena ngidah sikap kalak musil ndai…

Ngerana ia man kalak musil ndai,…

Ndai kubereken man bandu sada keranjang nakan pangan si enggo mali,…kenca bage kuga maka iberekenndu man bangku bunga-bunga si mejile ras merim?

Kalak musil ndai pe mereken jawabenna, nina” Tep-tep manusia mereken kai si lit ibas pusuhna” Payo, ibas kulanta enda lit segumpal daging eme Hati (pusuh), adi hati (pusuh) ndai mejile, maka kerina bagin kulanta enda mehuli ka”, sebalikna adi hatita ndai la mehuli, tentuna kerina ringring kulanta e pe jadina lanai mehuli. (Bagenda me Ilustrasi enda ituriken man banta).

Pediat Dibata si menilai kita

Adi sibahan simehuli, kalak sideban mungkin curiga man banta bahwa lit sura-sura si la mehuli arah perbahanen simehuli sibahan kita. Aminpe bage, tetaplah bahan simehuli Maun-maun kalak rukur secara la masuk akal dingen egois (mentingken dirina sendiri). Aminpe bage, aloken saja ia bagi litna ia.

Adi sukses kam, mungkin lit imbangndu (atau tambah imbangndu) bagepe si ercian ate man bandu, tapi amin pe bage, teruskenlah kesuksesenndu e. Adi bujur kam janah terbuka, alu bage kalak sideban banci saja nebu-nebu kam, amin bagepe, tetaplah kam nggeluh alu bujur ras terbuka..

Kai si enggo ibahanndu/ipajekkenndu ertahun-tahun dekahna, banci saja i runtuhken kalak ibas sada berngi saja, aminpe bage teruslah ipajekkendu…Adi alokenndu kedamen ras kemalemen ate ibas pusuhndu, kalak sideban mungkin cian atena kempak kam, amin pe bage tetaplah malem atendu…

Kinibujuren si ibahanndu wari enda, mungkin pagi ilupaken kalak, amin pe bage, teruslah bahanndu kebujuren. Bereken simehulina arah kai si lit ibas kam,…janah e mungkin labo pernah cukup, aminpe bage tetaplah bereken simehulina..

Gejapkenlah maka kerina e lit antara kam ras Tuhan. labo pernah antara kam ras kalak sideban. Ula padah ambil pusing kai si ipikirken kalak kerna perbahanen simehuli sibahanndu. Tapi teklah, bahwa mata Tuhan terarah kempak kalak bujur ras IA ngasup ngidah pusuhndu sibersih, meciho.        

II. Tema: Kebujurenlah singkawali kita

Arah tema enda kita ibabai kubas sada perenungen simbages kerna kuga arusna kita nggeluhken geluhta ibas kebujuren.

1. Nggeluh ibas kebujuren tentu la mesunah erkiteken manusia secara umum nggeluh ibas

Kelabujuren. Adi ibas buku bimbingen PJJ ikataken sekalak pakar ilmu komunikasi, maka manusia erbual 10-200 kali sada wari. Tentu enda erbanca kita tek ras la tek. Enda ngatakenca maka kelabujuren e enggo semal ibas manusia.

2. Ibas ogenta Pemazmur nuriken kerna perbebenna, janah erkiteken sie, ituriken Pemazmur man banta maka lit dua sikap Pemasmur ibas ia nimai penampat Dibata eme:

a. Kerna kiniulin, si lit kawitenna ras integritas (sendalanen kata ras perbahanen)

b. Kerna Kebujuren, la erbual, ngerana kuga litna, pusuhna tulus (meciho)

Pemasmur ngelakoken kebujuren labo gelah idah kalak mehuli perbahanenna tapi erkiteken bage kin arusna kegeluhen kalak si erkemalangen man Tuhan.

3. Marilah tetap sidalanken kebujuren ibas geluhta amin pe respon kalak man banta la bagi ukurta. Bagepe mari siajari ras sibabai anak jabunta gelah semangat ia kerina ndalanken kebujuren ibas geluhna. Doni enda ras sura-surana seh kal jahatna guna ngkernepken kita manusia.

III. Diskusi

1. Kuga nge pengidahta kerna kebujuren sedekah enda, subuk irumah bagepe ibas lingkungen gereja ras masyarakat?

a. Kerna kebujuren tentu kita perlu bujur ibas piga-piga dampar eme:

• Bujur kempak dirinta sendiri (Bujur ibas perukuren)
• Bujur tupung ngerana
• Bujur tupung ngelakoken sada-sada hal
• Bujur ibas erpadan

Alu bage, kuga pengidahta ibas jabunta sekalak-sekalak bagepe ibas gereja ras masyarakat nandangi 4 dampar idatas? Apakah enggo bujur kita kerina ibas jabu, gereja bagepe ibas masyarakat? Adi langa tentu eme dalanta guna rukur dingen mpekena lagu langkahta kulebe enda gelah kebujuren e teridah jadi warna kegeluhenta kulebe enda ibas jabunta, gerejanta bagepe masyarakat.

2. Kai nge si jadi tantangen ibas ndalanken kebujuren ibas doni enda?

Kalak bujur ibas paksa enda jadi barang langka. Ndarami si haram saja susah apaika si halal. Jadi kalak bujur labo mesunah. E erkiteken ibas lingkungenta idemi kalak si munafik, bermuka dua: lain ibas babah lain ibas pusuh, manis ayona tapi pusuhna jahat. Tempa-tempa enggo ibahanna simehuli ras bujur padahal labo kai pe lit ibahanna. Jadi kalak bujur ternyata mbelinkal resikona. Budaya kompromi ibas si la mehuli jadi hal si lumrah ibas melala aktifitas silakoken manusia ibas geluhna.

Alu bage, engkai maka mesera kal siakap nggeluh ibas kebujuren? Erkiteken….

1. Langsung kita terbayang kempak “ejekan” kalak si lit isekelewetta.
2. Enggo nyaman siakap adi la kita bujur sebab alu bage geluhta la mbuesa tantangenna, sebab kita ngikuti arus doni enda
3. Mbiar kita urak temanta erkiteken kebujuren sibahan kita
4. La kita nggit ndengkehken pedah-pedah subuk kata Dibata bagepe ibas orangtua ras jelma sienterem.
5. La kita nggit ngalaken resiko ndatken ukumen arah ulih kita erbahan si bujur.

SELAMAT MELAYANI. DIBATA SIMASU-MASU KITA KERINA.