Nats         : Ester 4 : 12 - 17

Tema      : IANGKAT GUNA NAMPATI

Kitab Ester enda eme kitab si cukup unik ibas Pustaka Si Badianta erkiteken kitab enda la lit nuratken gelar Dibata/ Tuhan. Tapi amin bage arah kitab Ester enda banci tetap siidah kuga Dibata erdahin guna kiniulin ras kebebasen bangsaNa ibas sura-sura si jahat siatena engkernepken bangsana. Tokoh utama siniangkatken ibas kitab enda eme sekalak anak melumang si tergelar Ester (Heber : Hadasa), siipebelin turangna sembuyak bapa desken sekalak anak sitergelar Mordekai. Kenca kin bangsa Babel si ndube naban Isarel italuken bangsa Persia ibas masa Raja Koresh, kerina kalak Jahudi isuruh guna mulih ku Jerusalem. Tapi la kerina kalak Jahudi nadingken Persia, lit si tetap tading i Persia seh ngasa jaman pemerintahen Raja Ahasweros (485-465 SM) sebab enggo sikap akapna tading i Persia, termasuk pe Mordekai ras Ester.

Paksa si e raja Ahaaweros si ngerajai Persia. Raja enda nirangken ndeharana si tergelar ratu Wasti erkiteken la ia patuh nandangi perintah raja (Ester 1 : 12, 16 – 22). Kenca si e raja Ahaweros ersura-sura guna ndarami ratu si mbaru gancih Wasti, emaka iperentahken me pejabat-pejabat istana guna mpepulung kerina singuda-nguda si mejile ibas kerajaan e, termasuk pe ije Ester. Ester sekalak si nguda-nguda si mejile rupana janah potongenna pe sikap (Est. 2 : 7b). Kenca Ester ibaba ku adepen Ahaweros, malem kel ate raja ibahan Ester emaka Erter atena singenana ras si kelengna atena (Est. 2 : 16 – 17). Eme dalan-dalanna Ester iangkat jadi ratu man raja Ahaweros.

Ibas masa pemerintahen Ahaweros, iangkatna sekalak perdana mentri sitergelar Haman. Sue ras perentah raja maka kerina pegawaina arus ngehamati Haman alu erjimpuh ilebe-lebena tapi Mordekai la nggit ngelakokenca sebab prinsipna maka Dibata ngenca si pantas i sembah ras i hamate labo manusia (Est. 3 : 3 – 4). Megi berita e ibas pegawaina nari erbahanca turah rawa ras ate nembeh Haman man Mordekai bagepe kerina kalak Jahudi si tading ije paksa e (Est. 3 : 6) emaka ibahanna tikam tanduk si igelari “purim” lako nentuken katawari paksana guna engkernepken kalak Jahudi (Est. 3 : 7). Kebaradaan ras kegeluhen Mordekai bagepe kerina kalak Jahudi si tading i Persia terancam erkiteken Haman. Ceda ate Mordekai emaka ipakena uis guni, icaburkenna ab uku takalna, erdalan ia itengah-tengah kuta janahna ngandung (Est. 4 : 2). Ndatken berita kerna kai sinilakoken Mordekai erbahanca lesek ate Ester emaka iutusna suruh-suruhenna njumpaisa, emaka ibereken Mordekai surat man Ester radu ras salinen surat perentah ibas Haman nari guna engkernepken kalak Jahudi. Ipindoken Mordekai maka Ester banci min ngerana man raja Ahasweros lako mindo perkuah atena man kalak Jahudi.

Ibas pengogenta teridah kerna pertenget siipeseh Mordekai man Ester segelah Ester la ngukurken dirina ras kenyamanenna saja (ay. 13), amin pe Ester sinik Mordekai tek maka lit nge cara Dibata nampati ras mulahi kalak Jahudi (ay. 14a), Ester arusna “rukur alu mbages” kerna sura-sura/ tujun Dibata njadiken ia jadi ratu Persia paksa e eme guna nampati bangsana (ay. 14b). Ester lit ibas “dilema” sebab kebiasaan raja maka adi lit kalak si ndahi raja tanpa idilona ku istana arus iukum mate (Est. 4 : 11). Emaka isuruhna Mordekai mpepulung kerina kalak Jahudi segelah sope Ester berkat ndahi raja ku istana kerina kalak Jahudi ertoto ras erpuasa guna ia (Ester ras suruh-suruhenna pe ilakokenna bage). Siap Ester ngalaken kematen guna keselamaten kegeluhen bangsana (ay. 15-17). Adi siterusken ngoge seh kedungen kita Ester enda teridah maka tuhu-tuhu Dibata erdahin membalikken keadaan bangsana ibas keterancamen ras sura-sura jahat nari ku bas keadaan keselamaten ras kiniulin. Dibata makeken Ester ras Mordekai jadi alatNa guna mulahi kalak Jahudi.

Temanta PJJnta : Iangkat Guna Nampati” ngingetken kita maka kita la nggeluh si sada ibabo doni enda dingen labo kin kita ngasup pe adi ngeluh si sada. Emaka kita selaku kalak si erkiniteken man Tuhan la banci terjeng nggeluh guna dirinta saja.

• Bas kerina sienggo sialoken bas kegeluhen enda lit sura-sura Tuhan man banta. Kegeluhenta ras kerina sinibereken Dibata man banta labo ate Dibata segelah ngadi ntah erguna man banta saja tapi pe segelah arah kita kalak si deban pe nggejabken kinulin ras keleng ate Dibata. Ate Tuhan maka kita banci min jadi “perkakasNa” guna ndahiken dahin si mehuli sienggo irancangkenNa guna sidalanken (Epesus 2 : 10).
• Kita iangkat guna nampati, i kelengi Dibata guna ngasup naksiken kekelengen e man doni enda, ipasu-pasu guna jadi pasu-pasu, ipehaga Tuhan guna ngasup pe mpehaga teman, ialemi guna ngasup ngalemi, i selamatken/ bebasken guna ngasup pe mbebasken kalak si deban “sitertaban” denga ibas kegeluhen enda, rsd.

Ertina maka kegeluhenta arus ernanam ras tergejab man kalak si deban

• Lit min biak simpati – empati ras Aksi ibas kita anak-anak Dibata amin pe memang banci saja resiko si arus sialaken e cukup mberat atau mungkin banci jadi kegeluhenta pe terancam bagi Ester. Banci ka pe ibas ukurta mehuli e la ka mehuli respon kalak singalokenca, tapi la e erbahanca kita surut guna nehken kekelengen ras kiniulin bas geluh enda.
• Bali ras Mordekai bagepe Ester, kita pe “hanya alat” Dibata. Dibata nge ulu sinasana, emaka ibas kerina si banci silakoken siulihken e kerina guna kemulian Dibata (itandai kalak Dibata e arah kekelengenta ntah penampatta) labo guna ndarami pujin/ kemulian man dirinta. (Jangan mencuri kemuliaan Tuhan)
• Segelah kita ngasup ndalankenca si la banci lang si lakoken eme njaga hubungenta ras Dibata segelah alu penampat Kesah Si Badia kita ipengasup nehi sura-sura Dibata

Pdt. Elba Pranata Barus-Runggun Bandung Timur

Nats         : 1 Korinti 14 : 33, 40

Tema      : LAKOKEN ALU METUNGGUNG DINGEN RATUR

Kota Korinti eme kota pelabuhen si maju ibas jamanna, erkiteken si e kota enda melala ipengaruhi oleh kebudayaan, cara nggeluh (1 Kor. 5 – 8) bagepe kiniteken ibas erbage-bage bangsa (1 Kor. 10) si cukup melala ertentangen ras sura-sura Dibata. Emaka arah suratna sipemena man perpulungen Korinti enda, Paulus mpersingetti perpulungen dingen mereken pengertin si payo nandangi perpulungen Tuhan kerna kuga kin arusna anak-anak Dibata erkiniteken dingen ndalani kegeluhenna alu benar, mehuli ras badia.

Selaku kota maju, Korinti la saja iiani erbage-bage suku ras lapisen masyarakat (kota majemuk) tapi perpulungen Korinti pe perpulungen si tuhu-tuhu melala ngaloken pasu-pasu ibas Dibata nari (2 Kor. 8 : 7 “Kam sampur kap ibas kai pe : ibas kiniteken, ibas ngerana, ibas pemeteh, ibas ketutusen ibas kai-kai pe,…..”). La saja pasu-pasu ibas bentuk materi tapi pe pasu-pasu ibas erbage-bage bentuk kengasupen ras talenta si rehna ibas Dibata nari/ pemere Kesah si Badia (1 Kor. 12 : 1 – 11 : Kesah mereken berita si mbages pengertinna ntah pe s idem pemeteh, Kesah e ka nge si mereken kiniteken, kengasupen mpepalem kalak si pinakiten, kengasupen ngelakoken perbahanen si ngelebihi asa kuasa manusia, kengasupen ernubuat, kengasupen ngerana ibas erbage-bage cakap, kengasupen nuriken antusen cakap Kesah e, rsd). Kerina pemere-pemere e ibereken rikutken sura-sura Dibata man anak-anakna (1 Kor. 12 : 11b) segelah sikap guna ndahiken dahin Dibata eme majekken kula ni Kristus (1 Kor. 12 : 12 – 13).

Tapi kinata kegeluhen perpulungen Korinti la sue ras peraten Dibata, pemere-pemere Dibata sinialokenna e erbahanca terjadi kekacauan ibas perpulungen khususna ibas kebaktin-kebaktinna. Penggunaan pemere-pemere Kesah e erbahanca terjadi persaingen si la sehat erkiteken ipakeken guna kesenangen diri ras menyombongken diri. Emaka ibas 1 Kor. 14 : 16 – 40 enda Paulus mpersingetti kuga kin arusna perpulungen e. Arusna min :

• Kalak si ngaloken pemere Kesah e geluhna terpusat ku Dibata labo ku dirina. Labo ia asyik guna dirina saja tanpa ngukurken keberadaan kalak si deban
• Kalak si ngaloken pemere Kesah e nggit i pimpin ras i tegu Kesah segelah tersehi sura-sura Dibata, nggit siergan ras saling ngelengkapi seh maka tercipta kiniraturen.
• Kalak siidemi Kesah si Badia arusna nggeluh ibas kekelengen, eme mengutamaken kalak si deban asangken dirina sebab eme hakikat kekelengen

Temanta : Lakokenlah Alu Metunggung dingen Ratur ngingetken ras ngajuk kita selaku perpulungen ni Tuhan Yesus segelah ibas kinierbagen kegeluhenta; subuk kerna pemere Dibata, gegeh ras kengasupen bagepe kinierbagen kengasupen ras talentata banci min tetap sipakeken alu mehuli guna kiniraturen kegeluhen persadanta itengah-tengah gereja. Alu bage sikap dingen mehuli perdalanen pelayanen gerejanta dingen itengah-tengah perpulungenta pe tercipta Susana si dame ras dem kemalemen ate. Arus min maka sicidahken maka Kristus eme takal gerejanta s idem kiniraturen sebab Dibata si isembah kita epe Dibata s idem kedisplinen ras kiniraturen. Enda banci siidah menaken kin ndube Dibata nepa ras njadiken doni enda ras kerina isina alu dem kiniraturen.

Kai si arus silakoken segelah kerina banci silakoken alu metunggung ras ratur ?

1. Litna kesadaren maka kerina kita lit kelebihen ras kekurangen sinibereken Dibata. Ngasup kita nandai dirinta ras ngaloken (kelebihen ras kekurangen) dirinta alu bage ngasup ka kita ngaloken temanta ibas kelebihen ras kekurangenna.
2. Ngasup kita siergan sada ras sidebanna itengah-tengah kinierbagenta. Mbicara lit pe kekurangen temanta sipersingetti alu dem keleng ate. Alu bage kinierbagenta e jadi kebayaken ras gegeh si saling melengkapi ibas pelayanenta (erbahanca metunggung pelayanenta).
3. Arus tetap siinget maka amin pe erbage-bage kita tapi sada kula. Sada ringring labo ngasup adi la itopang ring-ring si deban. Dingen tujunta pe tetap sada eme majekken kula Kristus.
4. Masing-masing siangkai min kai si jadi tugasta dingen sidahiken min e alu dem tanggungjawab alu palas malang ras mehamat man Tuhan
5. Si dalanken min kerina sue ras aturen nggeluh selaku gereja secara pribadi bagepe gereja secara organisasi (lit aturenta erpalasken : Pustaka Si Badia, Tata Gereja, GBP, Keputusen Konpen ras SKMS, Keputusen Sidang Majelis Klasis, Keputusen Sidang Majelis Runggun, rsd).

 Pdt. Elba Pranata Barus-Runggun Bandung Timur

Nats         : Kuan-Kuanen 7 : 1 - 5

Tema      : Kepentaren Jadi Teman

Kitab Kuan-Kuanen enda isina eme pedah-pedah, pertenget, persinget bage pe pengajaren kerna kuga ndalani kegeluhen si payo ras benar itengah-tengah erbage-bage godaan, cara geluh ntah pe erbage-bage situasi si terjadi ibas kegeluhen enda. Kegeluhen enda banci idalani alu payo ras benar di kune lit kepentaren ibas kita, janah kepantaren situhu-tuhu e si datken ibas Dibata nari.

Pengogenta enda erkawiten ras Pasal 6 bagepe pasal 7 : 6 – 27, eme pedah sekalak bapa nandangi anakna singuda segelah la terpengaruh ku bas pergaulen si la mehuli si mabai kecedan geluh. Secara khusus memang isingetken segelah ola erlua-lua bagepe ola tergoda nandangi rayon diberu perlua-lua si mabai ku bas kebenen. Gendekna banci sikataken maka penulis mpersingetti segelah tetap njagai kebadian kegeluhen selaku kalak sitek man Dibata. Enda sada hal si sangat penting iakap kami ibas jamanta genduari enda pe, ija melala kel genduari pergaulen si encedaken kubas kegeluhen. Kebadian lanai niakap sada hal si meherga si perlu ijaga ras iperjuangken genduari enda. Si man kemelanken e ka ianggap genduari sada prestasi ntah pe prestise, khususna ibas anak-anak muda gundari. Pergaulen ras cara nggeluh si la mehuli jadi kebanggan “si ipamerken tanpa ras malu”, sementara si tetap nggeluh ibas kebenaren ras kebadian ianggap “ketadingen jaman” ras la gaul (la ngikuti perkembangen jaman). Emaka labo ateta mamang maka menjamur kel genduari pinakit-pinakit sosial siencedaken ibas kegeluhenta, melala anak perana singuda-nguda sienggo arus “i oratken ras ipejabu” erkiteken enggo lalar perdalanna, rumah tangga pe hancur erkiteken labo ipalasi ku bas ate keleng ras kiniteken man Dibata, kejahaten pe reh buena, dingen la sitik orang tua erbebe kerna anak-anak sienggo salah pergaulen ras perdalan.

Arah bahan PJJnta sekalenda iajuk ras ipersingetti kita mulihi kerina (khususna orang tua) kuga kita ertanggungjawab nuanken kiniteken ras kata Dibata man anak-anakta segelah ia mbelin jadi kalak si malang man Tuhan. Kalak si malang man Tuhan tentu lit kepentaren ibas ia guna nulak cara nggeluh ras pergaulen si la mehuli, lit pertimbangenna si mbages erpalasken sura-sura Dibata ibas ia menyikapi hal-hal sijadi ibas kegeluhenna bagepe muat keputusen, bagepe lit daya tahan (karakter) si mehuli ras paguh ibas ngalaken erbage perbeben ras pengajuk sijahat erkiteken kinitekenna man Dibata seh maka la ia terpengaruh kubas hal-hal si la ngena ate Dibata. Arus menda kita pe terus erlajar kerna kegeluhen enda, dingen nggit tetap ersukuten man Dibata ibas kita ndalanken tanggungjawabta nandangi anak-anakta e. Alu bage anak-anakta e jadi anak-anak sitetap nggeluh ibas kepentaren, tetap ia jadi rudang-rudang si merim itengah jabunta, gereja bagepe masyarakat.

Temanta : Kepentaren Jadi Teman; teman ibas kita ndalani kerina situasi kegeluhen enda bagepe teman ibas kita ngajarken ras ndidik anak-anakta (ay. 4-5). Janah kepentaren e banci lit bas kita dingen jadi temanta dikune :

• 1 : kita tetap nginget perentah-perentah Dibata man banta. Perentah Dibata e jadi patron man banta ibas ndalani kegeluhen enda, emaka ketutusen ras kesetiannta ngoge Kata Dibata banci mpelimbarui kiniteken ras kegeluhenta. Bagepe selaku orang tua ertanggungjawab kita ibas nehken pengajaren kerna perentah Dibata man anak-anakta. Kuga banci siajarken man anakta adi kita pe kurang pemeteh ras pengertinta kerna Kata Dibata e, labo kita merincuh ngoge Pustaka pe.
• 2 : Kita tetap ngelakoken perentah/ pedah Dibata e. Kata Dibata e la banci terjeng iinget-inget ntah pe ieteh saja tapi arus idalanken sebab ndalanken Kata Dibata e jadi latihen pertendin man banta. Alu ndalanken ntah pe mem-praktekken kata Dibata em tandana kinitekenta nggeluh,janah ije ka me kita nehken usihen man anak-anakta segelah anakta epe jadi pelaku Firman ibas kegeluhenna.

Kalak sindalanken perentah Dibata mabai bana metenget (bersikap berhati-hati/ mawas diri) ibas ndalani kegeluhenna (1 Pet. 5 : 8).

• 3 : nginget lalap (Ind. “tabatkanlah semua itu pada jarimu) ertina kata Dibata e lalap jadi persinget guna ngingetken kita kerna tanggungjawabta. Kata Dibata e jadi simeherga ibas kegeluhenta si mabai kita kubas kemulian Dibata.

Suratkenlah ibas pusuhndu (Ind. : “tulislah itu pada loh hatimu”) ertina maka kata Dibata e tetap ngiani dingen nggeluh ibas pusuhta alu bage pusuh peraten ras perukurenta ikuasai sura-sura Dibata (Heber 8 : 10). Adi pusuhta ikuasai sura-sura Tuhan enggo tentu maka kerina kegeluhenta (pengerana ras perbahanennta) bagi sura-suraNa sebab pusuh eme pusat kegeluhen (Mat. 15 : 18 – 19).

 Pdt. Elba Pranata Barus-Runggun Bandung Timur