PERGUNAKEN KESEMPATEN ALU MEHULI

EPESUS 5:16-20

(Manajemen Waktu)

Arah bahan Pjj ta enda kita kita iajuk segelah makeken kesempaten si ibere Tuhan alu mehuli. Kegeluhen manusia I doni enda banci kataken kentisik ngenca, labo kita banci selamana ngeluh, bagi nina pemazmur “dekahna kami ngeluh lit pitu puluh tahun, adi kami megegeh banci jadi seh waluh puluh tahun”. Ibas waktu si singkat enda penting kal sipake kesempaten si ibereken Tuhan man banta alu mehuli. La banci sipungkiri maka ibas kegeluhenta enda kita megatikal iperhadapen kubas erbage-bage pilihen. Kita banci milih, ngeluh alu mereken makna entah ngeluh alu sia-sia. Kita banci memilih ngeluh empermuliaken Tuhan entah ngeluh encurnaken gelar Tuhan. Sebab wari-wari enda la kap mehuli, si iblis setiap waktu menintai kita gelah kita ndabuh kubas hal-hal si la mehuli. Kesempaten (waktu) seh kal mergana, emaka isiruh Dibata kita makekensa alu mehuli, sebab kesempaten (waktu) adi enggo lewat lanai banci ulihken. Labo si eteh uga dekahna kita ngeluh ibas doni enda, emaka sipakekenlah kesempaten si lit gundari enda guna ngelakoken simehulina asa ngasup kita ngelakokensa, ula sitangung-tangungi, sebab kesempaten labo reh dua kali.

Ibas ndalani wari-wari kegeluhenta I doni enda harus kita megermet gelah ula sempat kita salah langkah entah pe salah pilih. Kita harus mpergunaken waktu si lit alu megermet gelah ula sempat turah penyesalen arah pudi ulih kita la makeken kesempaten si lit. Ula sempat keri waktuta guna hal-hal si labo erguna entah pe encedai kegeluhenta eme salah sadana mabuk ibahan anggur. Pindo gegeh man Tuhan gelah kita tetap idemi Kesah Si Badia gelah ngasup kita ngisi wari-warita alu dahin si erguna eme ercakap-cakap sapih-sapih kita alu make masmur, rende muji Tuhan alu dem pengataken bujur. Alu bage bicara kai gia jadi bas geluhta tetep kita megegeh sebab si eteh Tuhan tetap nemani kita.

Temata ngatakensa “pargunakenlah kesempaten alu mehuli” ngajuk kita maka kita ulanai menunda-nunda waktu kune lit ateta harus ilakoken. Kune lit sinungkun man banta, “Ndigan waktu si paling penting?” kira-kira kai nge jawabenta? Mungkin sepintas mbue kal jawaben si banci sibereken, tapi tentu saja waktu si paling penting eme “gundari”. Eme waktu si sangana lit bas kita, sebab si nberbih ngo lewat, si pagi langa reh. Alu bage adi lit ateta sikataken, silakoken man kalak si kelengi kita lakokenlah gundari, ula timai kari, ula timai lima menit nari entah pagi, banci saja kari, lima menit nari tah pagi enggo terlambat. Dikune paksa enda kita sangan bergulat, terlibat ibas perbahanan si ndauh ras si ngena ate Tuhan, ulanai timai kari, ulanai timai pagi, minterlah tadingken selagi Tuhan mereken kesempaten denga man banta. Perlu kal si ergai waktu (kesmpaten) sebab kesempaten e lanai bo banci mulihken, ia terus erdalin, labo kita timaina. Man banta sekalak-sekalak Tuhan bereken waktu si seri alu la membeda-bedaken status ocial ras suku bangsa, kerina kita ibere waktu sada wari eme 24 jam, tapi labo kerina kalak banci makeken waktu e alu mehuli.

Pdt Rahel br Tarigan-Rg. Denpasar

UKURI LEBE MAKA BELASKEN

Kuan-kuanen 15:23,28

Komunikasi

Mungkin kita pernah menyesali kai si enggo sibelasken, uga maka ndai bage ningku, uga maka ndai sempat kubelasken bagah ndai. Kalak si bijaksana tentu pas bagi temata enda “ukurina lebe maka belaskenna”, gelahna ula sempat terjadi penyesalen arah pudi. Sekalak filsuf Yunani si tergelar Publisius ngataken “Saya sering menyesali perkataan saya, tetapi saya tidak pernah menyesali sikap diam saya”. Enda ngatakensa maka perlu kal memang si ukuri lebe maka sibelasken, atau lebih baik diam asngken pada akhirnya kita menyesali kai si enggo si belasken. Pribahasa Tiongkok pe ngataken maka “ Perkataan yang keluar dari mulut kita itu ibarat anak panah yang kita lepaskan dari busurnya. Jika yang kita lepaskan adalah perkataan yang menyakiti orang lain maka sekalipun kita sudah meminta maaf akan tetapi bekasnya masih ada.” Pribahasa enda ngajuk kita gelah tuhu-tuhu berhati-hati mbelasken ranan sebab banci jadi alu la sisadari e banci erbahansa luka batin ras erdampak mbelin man kalak sideban. Emaka arah bahan PJJ ta sekali enda kita iajari arah Kitab kuan-kuanan  singataken “Seh kal riahna ukur adi terbelasken, kata si payo ibas paksa si payo.”  Kata si belasken kita banci min peturah keriahen ukur man banta sebab kata sibelasken kita e eme kata si banci membangun hubungen si mehuli ras kalak sideban, kata si banci mereken semangat man kalak si sangana kote, kata si mereken pengapul man kalak sisangana ibas kesusahen. Kita perlu tetap erlajar guna melasken kata si perlu ibelasken ibas paksa si payo. Ibaratken kulata enda, adi ateta sehat maka sipilih pangan si berkualitas ras bergizi, bage ea di ateta sehat jiwata maka sipilihlah kata-kata sibanci membangun ras banci mereken damai suka cita baik man banta bage pe man kalak si megikensa.

Ayat 28 “ Kalak si mehuli, iukurina lebe maka ibelaskenna jabapna, kalak jahat pedas ijabapna tapi ipeturahna kesusahen”. Arah kata enda icidahken dua karakter si sangat berbeda arah ia mereken jawaben, eme kalak mehuli ras kalak jahat. Kalak simehuli penuh dengan pertimbangen ibas ia mereken jawaben tapi kalak jahat labo iukurina, iembusina saja, la ranakenna ukur kalak simbegikensa. Arah kata enda kita iajuk gelah ngasup njaga babahta gelah ula sempat kata si ndarat arah babahta kata si menyayat, menyakitkan dan memedihkan perasaan orang lain tapi kata si ndarat ibas babahta nari arusna min kata si banci membangun, mpergegeh, menenangken ras menyejukkn pusuh kalak simegikensa.

Mulutmu adalah harimaumu eme ungkapen si megatikal si begi bas kegeluhenta tep-tep wari. Ungkapen enda megatikal iertiken sebagai persinget man manusia segelah banci njagai kata-kata sindarat arah babahna, sebab dikune kata-kata si nadart bas babahna nari la mehuli banci ngerehken silamehuli ka man bana. Emaka pas kal arah bahan PJJ ras temata enda iajuk kita kerina segelah tetap bijak ibas ngerana, si ukuri lebe maka si belasken segelah kita pe malem ateta, simegi-megi pe malem atena.

Pdt Rahel br Tarigan-Rg. Denpasar

UMUR SI GEDANG
MAZMUR 91:16
(HUT Kategorial: KAKR, PERMATA, MORIA, MAMRE ras SAITUN)

Masmur 91 enda ngerana kerna kalak si mengandalken Tuhan inganna cicio seh maka ia banci pulah arah erbage-bage kebiaren nari janah ndatken kejuah-juahen. Salah sada hal si idatken kalak si tetap ernalem man Tuhan arah bahan PJJ ta enda eme umur si gedang. Pada umumna manusia, merincuh kal maka gedang umurna tapi la lit sekalak pe jelma banci mempredisiken uga gedangna umurna sebab umur eme anugrah Tuhan. “Kubereken umur si gedang jadi upahna,” enda ngataken maka umur manusia eme pemere Tuhan kap, labo banci sitik pe itambahi entah ikurang manusia adi enggo itetapken Dibata. Kalak si ernalem man Tuhan la hanya ibere umur si gedang tapi pe nina Tuhan “Kukelini ia”. Enda ngatakensa labo asal gedang saja tapi pe ikelini dingen ijagai, ikawali Dibata ia segedang geluhna.

Ibas Pustaka Si Badia melala si idah tokoh si umurna seh gedangna, labo terjeng 100 tahun, lit pe si she umurna 900 tahun. Tapi zaman genduari enda hamper lanaibo lit si jumpai umur sibagenda gedangna. Lit piga-piga memang si she umurna 100-an tahun, epe enggo jarang kal si jumpai. Kerinduan setiap manusia eme banci ibereken waktu si gedang geluh ras kalak si ikelengina seh maka megati kal sibegi pertoton gedang umur baik man banta bage pe man kalak si ikelengi kita. Tapi sipaling penting genduari eme labo uga dekahna umurta tapi uga kita ngisi wari-wari si ibereken Tuhan man banta alu hal si bermakna ras mempermuliaken Tuhan. Tupung kita ibere denga kesempaten ngeluh I doni enda, pakekenlah kesempaten e sebaik mungkin guna kemulian Tuhan. Bagi nina lagu rohani “hidup ini adalah kesempatan, hidup ini untuk melayani Tuhan, jangan sia-siakan waktu yang Tuhan bri, hidup ini harus jadi berkat”. Arah lagu enda kita iingetken makeken umur sibereken Tuhan guna jadi pasu-pasu guna ngelai Tuhan.

Perpulungen Jabu-jabuta minggu enda eme mperingeti Hari Ulang Tahun kerina kategorial si lit bas GBKP enda. Alu bertambahna usia tiap-tiap Kategorial maka iarapken reh sikapna kerina pelayanenna, seh maka banci terlayani alu mehuli kerina perpulungen. Iarapken pe man kerina ngawan perpulungen tetap mendukung arah ngit muat bagin ibas kategorialna masing-masing. Arah kategorial KAKR iarapken maka masa depan gerejata eme anak-anakta semakin terbentuk karakter yang takut akan Tuhan. Bagepe arah kategorial Permata iarapken maka anak-anak permatata tuhu-tuhu banci jadi rudang-rudang gereja, si erbahansa merim gelar Tuhan arah kegeluhenna, la tercurna gelar Dibata arah geluhna. Kategorial Moria iarakep banci erbahansa Moria selaku ndehara ras nande banci reh gegehna, reh pagunda guna ingan tertade ras tiang doa man isi jabu. Kategorial Mamre iarapken banci erbahan Mamre selaku perbulangen ras bapa si banci mengayomi isi jabu, banci jadi usihen ras jadi imam itengah jabu. Arah litna Kategorial Saitun iarapken maka orangtuata si enggo lanjut umurna pe tetap ngejabken keleng ate Tuhan ibas gegehna si enggo kurang ras reh ngasupna ngendesken kegeluhenna man Tuhan ibas erbage-bage kecibal kegeluhen.

Pdt Rahel br Tarigan-Rg. Denpasar