KINIERSADAN, KINITEKEN RAS PERBAHANEN

JAKUB 2:18-24

(Konfesi GBKP/Etika)

 

I. Penjelasen Teks Ogen

Konteks ogenta eme litna pemahamen pengajaren kerna hubungen kiniteken ras perbahanen selaku kalak Kristen. Jakub ngidah maka perpulungen enggo lepak erkiteken perpulungen menganggap maka asal ngaku tek man Yesus enggo cukup guna nelamatken ia padahal perukurenna la sendalanen ras kai siibahanna ibas ia ngikuti ibadah-ibadahna selaku kalak Kristen.

Jakub ngidah maka palas pengajaren sibage la payo, emaka ikatakenna man perpulungen maka sesekalak ibenarken labo hanya arah kiniteken tapi pe rikut ras perbahanen. Sementara Paulus nulis suratna man perpulungen i Roma (Roma 3:28), bagepe Galatia (Galatia 2:16), nina, “manusia banci rembak ras Dibata labo erdandanken ndalanken kai si ituntut Undang-undang tapi erdandanken tek man Yesus Kristus ngenca” Alu bage, tempa lit dua pengajaren si berbeda ibas paksa sie. Padahal masing-masing beda konteksna ibas ia nehken pengajarenna.

Tupung Paulus ngerana, manusia ibenarken erkiteken kinitekenna janah labo erkiteken ndalanken hukum Taurat, Paulus ngerana kerna “perbahanen” si berbeda ras kai si imaksudken Jakub, tapi labo kerna “kiniteken” si berbeda.

Paulus ngerana kerna perbahanen sinilakoken guna ndalanken hukum Taurat, janah ope manusia ngaloken kinitekenna kempak Injil, tambah sie Paulus harus ka berhadapen ras jelma sienterem si erpengakap ras menilai dirina HEBAT ibas perbahanenna janah dungna itulakna Injil.

Subuk Paulus bagepe Jakub, duana nekanken kiniteken kempak Injil (Yesus Kristus), sebab Injil saja ngenca banci sinelamatken ras mbenarken kita. Tapi Paulus nekanken maka ndalanken hukum taurat labo cukup ibandingken kiniteken man Yesus, ntahpe erlawanen ras pengajaren kerna pembenaren arah Yesus Kristus. Jakub nekanken kiniteken si seri ras Paulus, alu ncidahken kai kin seharusna icidahken (ihasilken) ras ikerjaken kiniteken e.

Jadi, kalak si mpebelin-belin Injil ras la ndalanken Taurat, bagepe kalak si mpebelin-belin Taurat ras la ngaloken Injil, duana papak. Harus lit Kiniteken kempak Yesus Kristus bagepe ngelakoken perbahanen simehuli sebagai produk kiniteken.

Pembenaren siicakapken Paulus berbeda ras pembenaren siicakapken Jakub.

Paulus ngerana kerna pribadinta siibenarken ilebe-lebe Dibata, sementara Jakub ngerana kerna kiniteken siibenarken iadep-adepen manusia.“ibas ayat 18, nina Jakub”…cidahkenlah man bangku kuga banci kalak erkiniteken adi la rikut ras perbahanenna”….Bahanlah maka kinitekenta ibenarken ilebe-lebe jelma sienterem arah perbahanenta“

Tapi Paulus ngerana kerna pembenaren iadepadepen Tuhan si hanya membenarken kalak si tek man Yesus Kristus si enggo nebus kerina dosa-dosanta. Jadi, jelas man banta maka, pribadinta ibenarken iadepadepen Tuhan arah kiniteken, tapi kinitekenta ibenarken iadep-adepen manusia arah perbahanenta. Enda me ikataken kiniteken si rikut ras perbahanen (usaha) ras kiniteken si erdahin arah kekelengen (Gal. 5:6; 1Tes. 1:3; Tit. 3:8)

Arah Abraham ras Rahab, kita iajari maka kiniteken siibenarken labo lit, adi la kin rikut ras perbahanen.

(1). Abraham, bapa kalak si erkiniteken, jadi contoh utama kerna pembenaren. Man Abraham me kalak Yahudi nehken kehamaten secara khusus. Abraham ibenarken erkiteken perbahanen-perbahanenna tupung ipersembahkenna anakna Ishak.

Arah kai sibahan Abraham teridah maka tuhu-tuhu ia tek. Kiniteken Abraham eme kiniteken si erdahin, janah arah perbahanen-perbahanenna e kinitekenna jadi sempurna. Ise saja si ersura-sura ndatken pasu-pasu bagi si aloken Abraham, harus nggit ngikutken kinitekenna.

(2). Rahab, sekalak diberu si dahinna ndayaken dirina e, Ia irembakken ras Dibata erdandanken perbahanenna asum ialo-alona mata-mata e ku rumahna, bagepe isampatina kalak e kompat arah dalan sideban (ayat 25).

Abraham eme contoh kerna sekalak si enggo erkiniteken alu paguh ibas geluhna. Sementara Rahab, sitandai ia erkiteken dosa-dosana, derajatna si rendah dingen kinitekenna si hina. Alu bage, subuk kiniteken si paguh bagepe si hina, la kepe banci adi la rikut ras perbahanen. Kiniteken banci nelamatken sesekalak si hina adi ibuktiken arah perbahanen si sepatutna. Sebalikna kiniteken labo banci nelamatken sesekalak amin kuga gia ia ulina, adi labo ibuktikenna alu perbahanenna arah ndalanken Undang-undang Dibata. Ibas diri Rahab teridah maka Luar biasa kuasa kiniteken ibas meperobahi ukur ras kegeluhen kalak perdosa.

II. Tema: Kiniersadan, Kiniteken ras Perbahanen

Kai pesan arah Kata Dibata si jadi ogenta rikut penjelasen idatas sue ras tema PJJnta?

1. Kiniersadan ras Tuhan jadi tanda maka kita erkiniteken man baNa, janah e sibuktiken arah ngelakoken perbahanen-perbahanen simehuli ibas geluhta.

2. Kalak si ngaku erkiniteken man Tuhan, labo hanya teridah arah kuga ia ndalanken ritual agamana alu payo (ersada ras Tuhan), tapi pe icidahkenna arah perbahanenna si payo si banci iidah jelma sienterem, janah erkiteken sie kinitekenta ibenarken.

3. Ngelakoken perbahanen simehuli mutlak ilakoken kalak si erkiniteken sebagai bukti makai a rembak ras Dibata. Jadi teluna enda sikawiten sada ras sidebanna.

III. Diskusi

1. Doni enda eme kuta siitetapken Dibata jadi inganta tading kentisik. Kuga dage enggo kepatuhenta man baNa selaku IA simada kita inganta tading enda?

Erlajarlah kita arah Abraham bagepe Rahab (kiniteken si paguh ras si hina), ibenarken erkiteken perbahanenna. Ingetlah maka waktu siibereken Dibata man banta guna ngisi kegeluhenta la kap ndekah, lit limitna. Pebuelah erbahan simehuli ibas geluhta bagepe nandangi doni enda gelah kinitekenta tuhu-tuhu teridah ilebe-lebe jelma sienterem.

2. Perbahanen si kuga dage tole nari silakoken si jadi tanda kita patuh man Tuhan?

Adi ngerana kerna perbahanen si kuga dage tole nari si lakoken, tentu labo lit batasenna guna ngelakoken perbahanen si mehuli e. Dalanken kerina perentah Tuhan, sebab tugas siibereken Dibata man banta eme gelah ibas ndalani kegeluhenta gelar Tuhan tetap ermulia. Kepatuhenta man Tuhan teridah arah perbahanen-perbahenenta simehuli.

 

Pdt. Philipus Tarigan-Runggun Cililitan

KEBUJURENLAH SINGKAWALI KITA

MAZMUR 25:21

(Nilai Hidup Dalam GBP/Jujur)

Mazmur 25:21 “Kiniulin dingen kebujurenlah singkawali aku, sabap aku ernalem man baNdu”

 

I. Lit sada ilustrasi si nggambarken kerna perluna kita ngelakoken kebujuren ibas sikugapana pe.

Ibas sada wari, sekalak kalak bayak mereken sada keranjang nakan pangan si enggo mali man sekalak si musil. Kalak si musil ndai cirem kal ngalokenca, janah minter itadingkenna istana kalak bayak ndai. Mulih ia janah kenca seh ia irumahna, minter ikosongkenna keranjang ndai jenari ibersihkenna. Kenca sie, isina keranjang ndai alu bunga-bunga si mejile ras merim, si ibuatna ibas kebunna nari. La ndekah kenca sie, minter ia mulihken ku istana kalak bayak ndai janah iberekenna keranjang si isina bunga-bunga si mejile ras si merim.

Kalak bayak ndai sengget dingen mamang kal atena ngidah sikap kalak musil ndai…

Ngerana ia man kalak musil ndai,…

Ndai kubereken man bandu sada keranjang nakan pangan si enggo mali,…kenca bage kuga maka iberekenndu man bangku bunga-bunga si mejile ras merim?

Kalak musil ndai pe mereken jawabenna, nina” Tep-tep manusia mereken kai si lit ibas pusuhna” Payo, ibas kulanta enda lit segumpal daging eme Hati (pusuh), adi hati (pusuh) ndai mejile, maka kerina bagin kulanta enda mehuli ka”, sebalikna adi hatita ndai la mehuli, tentuna kerina ringring kulanta e pe jadina lanai mehuli. (Bagenda me Ilustrasi enda ituriken man banta).

Pediat Dibata si menilai kita

Adi sibahan simehuli, kalak sideban mungkin curiga man banta bahwa lit sura-sura si la mehuli arah perbahanen simehuli sibahan kita. Aminpe bage, tetaplah bahan simehuli Maun-maun kalak rukur secara la masuk akal dingen egois (mentingken dirina sendiri). Aminpe bage, aloken saja ia bagi litna ia.

Adi sukses kam, mungkin lit imbangndu (atau tambah imbangndu) bagepe si ercian ate man bandu, tapi amin pe bage, teruskenlah kesuksesenndu e. Adi bujur kam janah terbuka, alu bage kalak sideban banci saja nebu-nebu kam, amin bagepe, tetaplah kam nggeluh alu bujur ras terbuka..

Kai si enggo ibahanndu/ipajekkenndu ertahun-tahun dekahna, banci saja i runtuhken kalak ibas sada berngi saja, aminpe bage teruslah ipajekkendu…Adi alokenndu kedamen ras kemalemen ate ibas pusuhndu, kalak sideban mungkin cian atena kempak kam, amin pe bage tetaplah malem atendu…

Kinibujuren si ibahanndu wari enda, mungkin pagi ilupaken kalak, amin pe bage, teruslah bahanndu kebujuren. Bereken simehulina arah kai si lit ibas kam,…janah e mungkin labo pernah cukup, aminpe bage tetaplah bereken simehulina..

Gejapkenlah maka kerina e lit antara kam ras Tuhan. labo pernah antara kam ras kalak sideban. Ula padah ambil pusing kai si ipikirken kalak kerna perbahanen simehuli sibahanndu. Tapi teklah, bahwa mata Tuhan terarah kempak kalak bujur ras IA ngasup ngidah pusuhndu sibersih, meciho.        

II. Tema: Kebujurenlah singkawali kita

Arah tema enda kita ibabai kubas sada perenungen simbages kerna kuga arusna kita nggeluhken geluhta ibas kebujuren.

1. Nggeluh ibas kebujuren tentu la mesunah erkiteken manusia secara umum nggeluh ibas

Kelabujuren. Adi ibas buku bimbingen PJJ ikataken sekalak pakar ilmu komunikasi, maka manusia erbual 10-200 kali sada wari. Tentu enda erbanca kita tek ras la tek. Enda ngatakenca maka kelabujuren e enggo semal ibas manusia.

2. Ibas ogenta Pemazmur nuriken kerna perbebenna, janah erkiteken sie, ituriken Pemazmur man banta maka lit dua sikap Pemasmur ibas ia nimai penampat Dibata eme:

a. Kerna kiniulin, si lit kawitenna ras integritas (sendalanen kata ras perbahanen)

b. Kerna Kebujuren, la erbual, ngerana kuga litna, pusuhna tulus (meciho)

Pemasmur ngelakoken kebujuren labo gelah idah kalak mehuli perbahanenna tapi erkiteken bage kin arusna kegeluhen kalak si erkemalangen man Tuhan.

3. Marilah tetap sidalanken kebujuren ibas geluhta amin pe respon kalak man banta la bagi ukurta. Bagepe mari siajari ras sibabai anak jabunta gelah semangat ia kerina ndalanken kebujuren ibas geluhna. Doni enda ras sura-surana seh kal jahatna guna ngkernepken kita manusia.

III. Diskusi

1. Kuga nge pengidahta kerna kebujuren sedekah enda, subuk irumah bagepe ibas lingkungen gereja ras masyarakat?

a. Kerna kebujuren tentu kita perlu bujur ibas piga-piga dampar eme:

• Bujur kempak dirinta sendiri (Bujur ibas perukuren)
• Bujur tupung ngerana
• Bujur tupung ngelakoken sada-sada hal
• Bujur ibas erpadan

Alu bage, kuga pengidahta ibas jabunta sekalak-sekalak bagepe ibas gereja ras masyarakat nandangi 4 dampar idatas? Apakah enggo bujur kita kerina ibas jabu, gereja bagepe ibas masyarakat? Adi langa tentu eme dalanta guna rukur dingen mpekena lagu langkahta kulebe enda gelah kebujuren e teridah jadi warna kegeluhenta kulebe enda ibas jabunta, gerejanta bagepe masyarakat.

2. Kai nge si jadi tantangen ibas ndalanken kebujuren ibas doni enda?

Kalak bujur ibas paksa enda jadi barang langka. Ndarami si haram saja susah apaika si halal. Jadi kalak bujur labo mesunah. E erkiteken ibas lingkungenta idemi kalak si munafik, bermuka dua: lain ibas babah lain ibas pusuh, manis ayona tapi pusuhna jahat. Tempa-tempa enggo ibahanna simehuli ras bujur padahal labo kai pe lit ibahanna. Jadi kalak bujur ternyata mbelinkal resikona. Budaya kompromi ibas si la mehuli jadi hal si lumrah ibas melala aktifitas silakoken manusia ibas geluhna.

Alu bage, engkai maka mesera kal siakap nggeluh ibas kebujuren? Erkiteken….

1. Langsung kita terbayang kempak “ejekan” kalak si lit isekelewetta.
2. Enggo nyaman siakap adi la kita bujur sebab alu bage geluhta la mbuesa tantangenna, sebab kita ngikuti arus doni enda
3. Mbiar kita urak temanta erkiteken kebujuren sibahan kita
4. La kita nggit ndengkehken pedah-pedah subuk kata Dibata bagepe ibas orangtua ras jelma sienterem.
5. La kita nggit ngalaken resiko ndatken ukumen arah ulih kita erbahan si bujur.

SELAMAT MELAYANI. DIBATA SIMASU-MASU KITA KERINA.

SETIA MAN TUHAN

JAKUB 4:1-10

 

I. Penjelasen Teks

Adi sinehen ibas bindu 3, ije Jakub ngerana kerna Iri hati (mengg ate) nangdangi sada ras sidebanna sebagai sumber perubaten. Ibas bindu 4 enda, sura-sura daging, ngergaken kesenangen doni ras erteman ras doni enda e pe banci mbaba perpecahen ibas perpulungen.

Ibas konteks surat Yakub enda, Kalak yahudi nggit kal menghasut kalak, berselisih ras memecah belah, malah sapih-sapih ia jine pe nggit ia rubat. Enterem ka nge si enggo jadi Kristen paksa sie, ikut terseret. Kerina e ilakokenna atas nama agamana sebab paksa sie, Israel ikuasai Romawi.

Kegeluhenta kulebe enda idemi alu persaingen ras perbandingen (nggit mbanding-mbandingken), sierbanca turah mengga ate (iri hati). Secara psikologis, kalak si ermengga ate, eme kalak si rendah diri ras gagal ibas geluhna. Salah sada dampak arah dosa silakoken manusia eme ikuasai mengga ate, palasna eme erteman ras doni bagepe erlua-lua ibas kiniteken (ermusuhen ras Tuhan).

Mengga ate merupaken ekspresi ketidakpuasan manusia nandangi posisina si enggo itetapken Dibata. Kerina pemere Dibata sialokenna langa akapna cukup, kurang lalap sebab kerinana labo erbanca puas akapna. Sura-sura doni ngkuasai dirina. Melala kal sura-surana tapi lanai ia ngasup ngendaliken sura-surana ndai.

Kalak si mengga ate, situhuna kalak si la ngidah pemere Dibata si enggo ialokenna. Lit kalak si erpengakap maka ertoto labo gelah kita ernalem man Dibata tapi sebagai sarana guna menuntut Dibata gelah ipuaskenna sura-surana si la terbatas (bd ayat 3). Emaka wajar nge adi labo idengkehken Dibata pertoton sibage rupana

Pusuh si merawa erbanca bene keriahen ukur. Mengga ate mpeturah penggejapen la meriah ukur erkiteken kai si lit ibas kalak sideban. Mengga ate banci teridah arah tindaken si lalit kekelengen, meriah ukurna adi kalak sideban cilaka, nggit bersaing la sehat, curiga, nggit ACC si ncedai gelar kalak sideban, nggit ngkritik ntah pe erbahan humor si sarkastik (make kata-kata si meser guna nakiti pusuh kalak sideban: ngejek ras mencemooh)

Dibata ngenca banci ngubahken biak mengga ate. Arah perkuah ateNa ipengasupna kita guna meteruk ukur. Ibas terang keleng ateNa ibahanNa kita sadar ise kin situhuna Dibata janah kita enda tinepaNa kap ngenca. Kesadaren e harusna mbabai kita kempak penyesalen, pengakun ras jera.

Jadi, Kerina sierbanca turah perjengilen ras perubaten ibas perpulungen ntahpe ibas perkade-kaden, erkiteken kita langa dewasa ibas rukur, ngerana bagepe ibas perbahanen. Masing-masing perlu ngidah biak si positip ibas litna perjengilen ras perubaten gelah tetap meteguh persadan perpulungen.

 

II. Tema: SETIA MAN TUHAN

- Arah tema enda ijembaken man banta maka KALAK SI SETIA MAN TUHAN, arus meteruk ukur dingen irembakkenna dirina ku Dibata, emaka IA pe ngerembakken diriNa man banta (Ayat 8) alu bage ipeganjangken Dibata kalak simeteruk ukur iadep-adepenNa (Ayat 10).

Sirembakkenlah dirinta ku Dibata alu kiniteken ras kepatuhen kempak kataNa alu bage ibebasken Dibata kita ibas kerina si erbanca kita italuken sura-sura dagingta.

- Kalak si ngerembakken dirina ku Dibata (SI SETIA MAN TUHAN), tentu ialokenNa me erbage-bage keuntungen ibas Dibata nari eme:

1. IpeganjangkenNa kita gelah pulah/ndarat ibas kerina perbebenta nari
2. IpeganjangkenNa kita alu mereken pengapul situhu-tuhu tupung kita lit ibas ceda ate
3. IpeganjangkenNa kita alu mpehaga kita dingen ijagaiNa kita ibas kuasa mara nari
4. IpeganjangkenkenNa kita kempak dalan ku surga (gelah kita ngasup naluken sura-sura doni enda)
5. ipeganjangkenNa kita seh maka kita ndatken kemulian. Kemulian simeganjangna i surga jadi upah man kalak si meteruk ukur. Setialah man Tuhan, sialoken me geluh situhu-tuhu.

III. Diskusi:

1). Turiken kai si erbanca maka sempat turah perjengilen ras perubaten ibas perpulungen/gerejanta?

- Kurang dewasa ibas perukuren, pengerana ras perbahanen

- La nggit ngakui kelebihen temanna sada perpulungen, ia akapna lebihen ibas kai pe

- La nggit mpeteruk ukur seh maka la nggit ngalemi salah temanna sada perpulungen

- Kurangna transfaransi (keterbukaan), seh maka perpulungen “penuh dengan kecurigaan”

Misalna: keuangen gereja.

- Sengaja iciptaken konflik guna meteh siapai si megegehna (sibenarna) ibas perpulungen.

2). Turiken kai nge untungna adi sinehen konflik arah sisi positip, ras kai ka rugina adi sinehen konflik arah sisi negative?

- Konflik arah sisi Positip:

a. Konflik banci nampati perpulungen guna mpegeluh mulihi kebiasan-kebiasan sindekah jadikebiasan simbaru

b. Konflik jadi dalan guna ngkurangi ketergantungen antar individu ras kelompok ibas perpulungen

c. Konflik banci nambah kekompaken antara kelompok-kelompok si ndai erkonflik.

d. Konflik banci mpetangkas aspek-aspek kegeluhen si langa jelas ntahpe si langa si siksiki.

e. Konflik erguna sebagai sarana gelah terjadi keseimbangen antara kelompok-kelompok si lit ibas perpulungen

- Konflik arah sisi Negatif

1. Konflik erbanca turah perpecahen ibas perpulungen si tangtangna ersada.
2. Konflik erbanca turah permusuhen/perjengilen ibas perpulungen. Perjengilen tentuna mpengaruhi kenyamanen ras kekompaken ibas perpulungen.
3. Konflik erbanca turah kekerasen si palasna erkiteken lit penyerangen ibas sada pihak ku pihak sidebanna.
4. Konflik erbanca si berkonflik ngalaken tekanen psikologis.
5. Konflik erbanca lit si jadi korban (pindah ku gereja sideban)

Ras sidebanna si banci itambahken…

Pdt. Philipus Tarigan-Runggun Cililitan