NGELITKEN SINIPERLUKEN
II Kronika 1:13-17

Menaken masa pemerintahenna sebagai raja, Salomo nerusken sura-sura bapana Daud guna majekken Rumah Pertoton. Tuhan masu-masu raja Salomo emaka paguh kuasana ibas kerajaan Israel. Taneh Gibeon eme ipilih Salomo guna ingan majekken rumah pertoton, sebab ibas daerah enda me Kemah Perjumpaan Dibata si ibahan Musa, emaka Taneh Gibeon penting kal man Salomo ibas menai kepeminpinena raduken majekken Rumah pertoton man Dibata. Raja Salomo ras kerina bangsa Israel ersembah man Tuhan I lebe-lebe kemah perjumpaan ras Tuhan, alu mpersembahken persembahan i babo batar-batar tembaga. Igelehna seribu asuh-asuhen jenari itutungna kerina ibabo batar-batar.

Ibas sada berngi icidahken Dibata baNa man Salomo nina, “Kai atendu kubereken man bandu ? (ay.7). Ije ituriken Salomo sura-surana man Dibatag una minpin ras ngerunggui kerina bangsa Israel. Nina Salomo “ O Tuhan Dibata, she ken dage padan si enggo ibahanndu man bapangku, emeka bereken man bangku kepentaren ras pemeteh si kuperluken guna ngerajai ia kerina (ay.9-10). Pemindon raja Salomo enda eme ertujun guna majekken Rumah Pertoton, sebab tupung sie peti perpadanen enggo itamaken Daud I Jerusalem, janah kemah perjumpaan e lit I denga I Gibeon. Salomo ersura-sura guna mpersada peti perpadanen ras kemah perjumpaan enda banci ersada.
Kai si jadi sura-sura raja Salomo i “respon” Dibata alu mehuli, Ia mereken kesempaten man raja Salomo guna mindo kai si iperlukenna eme kepentaren guna minpin ras ngerunggui bangsa Israel. Si enda ncidahken man bantam aka kai si ipindo Salomo labo terjeng kepentingenna tapi guna kepentingan rakyat eme keadilen ras kesejahteraan ibas masa pemerintahenna sebagai raja.

Guna encibalken sura-sura simehuli enda, raja Salomo mulai mperdiateken ekonomi rakyatna ras meningkatken pertahanen bangsa Israel. Salomo nambahi gegeh tentarana alu mpepulung 1.400 gereta kuda, rikut ras 12.000 tentara si erkuda. Salomo mengembangken sistem perdagangen ku wilayah-wilayah darat Israel si lenga pernah iban raja-raja sebelumna. Iaturkenna suruh-suruhenna guna ngkuasai perbinagaan kuda man raja-raja sideban. Sada gereta kuda idayaken 600 duit pirak, dingen kuda alu erga 150 duit pirak. Guna menjaga stabilitas keamanen raja Salomo namaken gereta tentarana I ibu kota Jerusalem, deba itamakenna ku kuta-kuta si deban.

Guna keperluan majekken Rumah Pertoton raja Salomo mbangun kerja sama perdagangan ras bagsa-bagsa si deban. Salomo mengimpor bahan-bahan bangunen, emas, perak bage pe kayu si mejile guna keperlun majekken rumah pertoton. Raja Salomo memajuken bidang perdagangan erkiteken letak Israel strategis ibas jalur perdagangan darat eme Mesir nari she ku Mesopotamia ras Asia kitik arus mentasi daerah si ikuasai Salomo, jadi arah upeti si idatken raja Salomo melala ndatken keuntungen man bangsa Israel.

Tema ta ibas perpulungen jabu-jabu enda eme ngelitken siniperluken, tentu sebagai jabu melala si iperluken kita guna kelangsungen geluh isi jabuta, bage pe uga ka kita ngelitken keperluan ibas perpulungen jabu-jabuta. Adi erlajar kita arah raja Salomo ibas ia minpin Israel guna keamanan ras kesejahteraan rakyatna, Salomo pang ngelakoken perbaikan system pemerintahen bage pe perdagangan. Pembaharuan enda icidahken alu mengali potensi/ kebayaken si lit ibas bangsa Israel, termasuk memanfaatken letak wilayah Israel si strategis. Ibas pendahin ras usaha bage pe guna kemajuan perpulungen perlu lalap ilitken sada pembaharuan/inovasi, gelah ibas pendahin bage pe usaha banci terlitken kerina kai si ibutuhken. Asa bancina lit lalap teridah hal simbaru si ilakoken kita ibas pendahin bage pe kemajun perpulungenta, ula ernalem man cara-cara atau program sidekah si lanai mendukung ibas kebutuhen jabu bagepe perpulungen.

Pdt. Rena Tety Br Ginting-GBKP Runggun Bandung Barat

DIBATA NGATURKEN KULA ALU SERASI
I Korinti 12:20-26

Ibas sada bangunen Gedung si mejile ras kokoh, lit ije erbage-bage bahan bangunen si banci erbahanca bangunen e banci pantek alu mejile ras nteguh. Ibas kerina bahan-bahan e lit semen, batu bata, besi, kersik, seng, kayu, cat tembok, baut, batu galang, kerikil, paku rsd. Kerina bahan-bahan enda i persada guna banci pajek bangunen ndai. Ibas kerina bahan-bahan ndai megati lit iakap bahan si paling penting guna banci ndatken bangunen si mehuli. Umpamana semen na arus simejile ntah pe meherga, cat tembokna arus si paling mbaru. Padahal adi iukurken kai ertina semen si mejile adi kersikna la lit, kai gunana cat tembok si paling mbaru ibas gedung adi baut-baut na lalit, tentu bangunen e banci mbulak.

Ibas bahan Perpulungen jabu-jabu ta paksa enda Paulus nuduhken gambaren kula manusia arah lit na pengangkaan maka lit bagin-bagin kula tertentu simerasa kurang meherga ras la tama bagin ibas mejile na sada kula. Sendalanen ras sie lit ka bagin-bagin kula si “merasa” dirina sangat penting ibas kula, sierbahanca lanai ia perlu kula sideban. Paulus mereken penjelasan maka pengejapen sib age salah ras lanai sue ras tujun Dibata ibas mbuena bagin-bagin ibas sada kula.

Mata ras takal ibas ayat 21 i bandingken/ikontrasken ras tan ras nahe si ncidahken mata ras takal eme hal si meganjang ras tan ras nahe sada hal simetruk. Gambaren posisi kula enda nuduhken posisi kepeminpinen (tuan ntah kalak bayak), janah tan ras nahe nuduhken ku bas perpulungen si pendahinna buruh ntah pe budak. Enda sada contok maka lit pengejapen kalak si erkuasa ras pengejapen i kuasai kalak. Ibas Kor.11:17-34 i cidahken uga perpulungen si bayak “merendahkan” perpulungen si musil. Ibas Lakon Persadaan Sibadia, perpulungen si lit buatenna “merasa” la perlu perpulungen sideban. Kalak enda man ras minem sampai mabuk tanpa merasa perlu nimai kalak sideban. Lit sikap diskriminatif, membanding-bandingken ras milih-milih teman eme sumber perpecahen bas perpulungen.

Paulus ngajarken perpulungen I korinti maka bagin kula si iakap la meherga justru e nge si mehergana “ tapi sebalikna ring-ring si tempa-tempa la megegeh, e nge la la banci lang na” (ay.22). Alu kata sideban Paulus ngajarken bahwa penampilan si le ergegeh/lemah la berhubungen ras “nilai yang sesungguhnya: ibas bagin kula. Nilai si lit ibas kula la tergantung ibas posisi ras bentuk , tapi kerinana mereken fungsi si berbeda simereken kiniersadaan ibas megegeh ras paguhna sada kula. Bagi sada pepetah ngataken:Jangan menilai buku dari sampulnya.

Dibata ngaturken kerina alu serasi, ring-ring si la meherga siakap ibas kula, eme si lebih ipehaga, janah ring-ring simehangke ncidahkenca, si e nge lebih iuisi alu mehuli. Jnah gelah kula e la erbelah-belah, tapi sada-sadai ring-ring e radu seri mperdiateken ring-ring sideban. Kalak si lit ibas status sosial si meganjang menurut ukuren doni (bayak), maka secara otomatis ia ngo ndatken perhatian ibas doni enda nari. Biasana doni enda melala mereken penghormatan, keistimewaan man kalak sim elala erta na, bahkan melala kalak si mengantungkan hidup ku bas kalak si melala ertana. Ibas konteks perpulungen Tuhan, kalak bayak (status sosial tinggi) lanai arusna ndarami, ndatken hal-hal (status sosial) ibas gereja/perpulungen sebab sienda enggo idatkenna ibas doni.

GBKP ibas tanggal 21 juli enggo 78 tahun njayo, ertina ngasup ngeluh mandiri ibas teologia, daya ras dana. Ngawan perpulungen ibas gereja labo seri, beda laatar belakang kegeluhen ras pendahin. Lit tading i kuta she ku kota besar, pendahi ta pe pelain-lain, lit erbinaga, ku juma, pegawai ras pengusaha. Ibas kerina si berbeda enda lalit si la penting man pertumbuhan gereja ta. Perbedaan si lit la jadi halangen untuk terus ndahiken dahin Tuhan. Taanda-tanda perpulungen Tuhan si dewasa eme mpebelin biak kiniersadaan, ras mpekitik perbedaan si lit. Dikune lit ibas runggunta sector-sektor si man sampaten, minterlah si sisampati, adi lit si kurang mari si sampati, ula sipandangi saja, sebab kai ertina lit ibas kita adi lakin radu ras si akapi kiniliten si lit ibas kita raduken ras kerina perpulungenta. Majeken kula Kristus bas perpulungen la banci lit si menonjol ras lalit si merasa la perlu, la pantas (la ngasup) kerina kita sada ring-ring guna majekken kula Kristus.

Pdt. Rena Tety br Ginting-GBKP Runggun Bandung Barat

PERBAHANEN KALAK PENTAR
Pengerana 11:1-6

Kitab Pengerana eme perukuren-perukuren sekalak pengerana tah pe perpilsapat, si enggo rukur alu mbages uga gendekna ras gulutna kegeluhen manusia, s idem alu kinilabujuren ras kecedaan ate. Ibas ujung perukurenna ikatakenna maka sia-sia geluh enda. La iangkana perbahanen Dibata singkuasai nasip manusia. Aminna bage pe, iajarkenna nge gelah igegehi dingen tutuslah ate manusia erdahin, janah nggeluh ia alu meriah ngaloken pemere-pemere Dibata.

Ibas ayat 1 ikataken “berekenlah ertandu man kalak sindauh ikepar lawit” ngatakenca benakenlah dahin e anem gia ndauh denga ndatken hasil entahpe mungkin la rulih, sipenting dahikenlah, ula minter arapken untung. Ula dekahen rukur asangken ndahikenca. Ayat 2 ikataken “tamaken duitndu ibas piga-piga usaha-tuhu ibas mbue usaha” ngatakenca tupung lit kesempaten erdahin ntah pe erusaha harus ipakeken alu mehuli, ula puas ndahiken dahin e alu cara-cara bsindekah, tapi kembangken pendahin, usaha alu cara-cara simbaru. Seh maka la hanya kita singakapi ulih pendahin e, tapi kalak sideban pe tersampat arah kai siidahiken. Ayat-3-5 ngatakenca makai bas erdahin ras erusaha la banci kita bersikap pasif, tapi harus aktif, tutus, anem gia lit tantangen tapi la banci ngadi ndahikenca. Tapi harus si inget kai pe si idahiken kita harus ersukuten man Dibata, sebab Ia kap singkuhi ras masu-masu pendahinta. Ayat 6 ngatakenca maka erdahinlah tupung lit kesempaten guna ndahikenca, baik erpagi-pagi ntah berngi, mejingkat ras tutus ate ndahikenca pasti lit nge ulih pendahin si idahiken. Lit si idah kalak sindahiken dua dahin sekaligus, umpamana sekalak pegawai tapi lit ka usaha sideban, e mrjuma ntah pe lit ka asuh-asuhenna. Erdahinlah tupung lit denga kesempaten, ula milih-milih dahin, dahin ntah pe usaha si kitik adi dahiken alu tutus, pasti berkembang (bdk.Luk.16:10).

Tema ta paksa enda eme perbahanen kalak pentar, nuduhken uga sikapta sebagai kalak sierkiniteken ibas makeken pendahin sebagai alat guna ncukupi kebutuhenta ras mpermuliaken Dibta. Sada sisi dahin eme sada hal siarus i perjuangken, latih, mbue pengorbanen, sisi sideban pendahin eme pasu-pasu Dibata si banci ialoken arah ulih pendahin. Engkai maka kita arus erdahin, erkiteken Tuhan jine pe erdahin. Ia njadiken langin ras doni enda ras kerina isina, ras mereken mandat man manusia guna njaga ras ngusahai doni enda, emaka kita harus erdahin. Ibas kita erdahin arus i lakoken alu bertanggung jawab, alu cara ngasup mengembangken pendahin, meningkatken pendapaten ibas ulih pendahin alu cara si payo. Ibas ndahiken dahin la banci itunda-tunda, tapi lit kenca kesempaten minterlah dahiken.

Ibas mengembangken diri ibas ndahiken dahin bagepe usaha tetap harus erlajar uga maka pendahin ras usaha si idahiken kita banci berkembang, ngasup njabab tantangen ras kemajuan zaman. Kreatifitas ibas ndahiken dahin guna ncukupi kebutuhen kegeluhen sangat ibutuhken. Umpamana sekalak moria lit ibas ia talenta guna erdakan masakan khas karo, emaka ibas ia mengembangken talenta enda ibuka na usaha (catering) khusus masakan karo. Ijenda ibutuhken kreatifitas guna mengembangken usahana, umpamana uga maka gulen si itangerken ntabeh, bersih, kemasenna arus menarik, ras la mesera guna ndatken masaken enda (promosi, banci idatken arah media sosial). Uga maka cimpa kalak karo banci laris bagi pangan khas daerah sideban (bandingken ras tape kuningan, brownies bandung) tentu kalak karo harus mengembangken kreatifitas na erban pangan enda. Uga maka tupung man cimpa la melket tan ta adi sipan, adi tape kuningen ntebu ras kitik emaka keri sekali ipan, banci ka nge iban cimpa ula galangsa gelah keri sekali ipan, ntah pe uga adi cimpa isina/inti la hanya gula tualah, tapi banci ka keju, kacang, strawberry rsd. Kalak si kreatif , idahna peluang kai si banci untung ibas usahana. Pang ia muat resiko, labo minter untung lebe iukurken tapi bas proses na git ia mengembangken diri ibas erdahin.

Pdt. Rena Tety br Ginting-GBKP Runggun Bandung Barat