Pindolah Man Tuhan

Sakaria 10: 1-3
(Entrepreneurship: Okultisme)

Piga-piga waktu si lewat, Indonesia sempat ngenanami kemarau/kekeringan si luar biasa. Biasana kenca seh bulan alu akhiren “-ber”, Indonesia memasuki musim perudan. Tapi ibas paksa si udan pe tempa-tempa segan nusur i Indonesia enda. Sempat sekali jadi piga-piga daerah khususna si ingani kalak karo erbahan ritual ndilo wari udan. Turah penungkunen ije, adi silakoken ritual sibage, situhuna kita sangana mindo udan man ise ?

Peristiwa si e hamper mirip ras kai si jadi bahan oratenta sekalenda. Ibas negaranta Indonesia, dua ngenca lit musim. Musim perudan ras musim kemarau. Tapi i Israel bagepe daerah-daerah si beriklim Sub-Tropis, lit 4 musim eme : musim semi, musim panas, musim gugur ras musim dingin. Ibas musim semi, tentuna sinuan-sinuan mulai bersemi, bunga-bunga terlak ras biasana melala udan paksa musim semi, sementara kenca mulai masuk kubas paksa musim panas, udan biasana mulai berkurang, janahpe suhu udara lebih lasna asa si biasa. Logikana, enterem jelma ngarapken udan ibas pendungi musim semi guna jadi persiapen ibas memasuki musim panas.

Masalahna man ise kita mindo udan e ? kata Dibata jelas ngataken maka kita arus mindo udan man Tuhan Dibata, arusna kin pe man Dibata ngenca (ay. 1a). engkai maka bage? Tentuna erkiteken Dibata nge si njadiken doni ras kerina isina (kej. 1:1-31). Adi Dibata si njadikensa, emaka ia nge si erkuasa penuh nandangi iklim ra smusim. Dibata ngasup penusur kemarau si la erngadi-ngadi seh telu tahun la nusur udan (Jak. 5:17, 1 Raj. 18:1), tapi Dibata pengasup penusur udan simeder guna ndungi kemarau e (1 Raj. 18:45). Lebih asa si e, Dibata pengasup penusur udan 40 wari 40 berngi seh maka lau ndemi doni ras engkernepken tinepa si lit ibassa seakatan tinepa si ringan ibas Bahtera Nuh (Kej. 7:12).

Dibata erpadan penusur udan meder man kerina kalak si mindo man bana (ay. 1b). lit tersurat ibas pustaka si Badia “Pindolah tentu idatndu” (Mat. 7:7). Pindolah man Dibata kai saja pe keinginenta banci sipindo man baNa. Aminpe banci saja labo kerinap emindonta e ijababNa alu kata “Yes” tapi silang-langna kita enggo mindo man baNa ras e encidahken maka si akui Dibata e selaku Dibata si erkuasa nandangi kegeluhenta. Bali bagi sekalak anak si mindo man bapana, tentuna bapa e labo mungkin mereken batu adi anakna mindo Roti (Mat. 7:9-11).

Dibata ngelarang kita mindo man sideban seakatan man baNa saja. Ibas konteks penulisen kitab sakaria enda, senangen iakap bangsa Israel mindo petunjuk ras mindo pasu-pasu nandangi gana-gana si ipajuh, guru sibeluh ngoge nasip, ras guru sibaso. La ia nungkun man Dibata, situhu-tuhu jadi Dibata si erkuasa nandangi kegeluhen bangsa Israel. Tekkal bangsa e nandangi kai si ibelasken guru si beluh ngoge nasip ras guru sibaso e. Padahal kai siikataken guru-guru e labo tuhu. Lalit kepeken gunana mindo petunjuk ntahpe nasehat man guru sibeluh ngoge nasip ras guru sibaso e. alu ngelakoken hal sibage akhirna bangsa Israel pe ndauh ibas Dibata nari, merap marpar bagi biri-biri si lalit permakanna. Uga ningen Dibata mpermakani bangsa Israel adi bangsa Israel sendiri pe la nggit ipermakani Dibata ? Senangen iakapna ndarami si erbahanca senang pusuhna arah belas-belas guru si beluh ngoge nasip e.

Bahan renungen enda, ngajuk kita guna niksiki dirinta, ntah pernah sekali jadi sipindo petunjuk man dukun, peramal ntah “orang pintar” sideban. Tapi arusna, paksa kita netapken pusuh ras kinitekenta guna tek man Dibata, ertina kita pe arus tek sepenuhna man Dibata. Ibas situasi si kugapanape, arus me kita erpengendes man Dibata. Teklah kita tuhu-tuhu man Dibata sebab Ia me Dibata si erkusa ras si mereke geluhen man banta kerina manusia tinepaNa.

Pdt. Abdi Edinta Sebayang, M.Th
Runggun Graha Harapan

Aku Arus Erdahin

Mazmur 121:4-8; Johanes 5:17
(Enterpreneurship : Erbintuas)

Mazmur 121enda menggambarkan Dibata penampat, sekawal Israel, ras njagai Israel. Pemazmur meteh tuhu-tuhu keuntungena adi Dibata , Ia sinjamini kerina perdalinen kegeluhenta. Sanga pemazmur natap kudeleng-deleng si jadi ingan si Badia eme Deleng Dibata, tersungkun-sungkun ia ija nari nge rehna penampat? Ay. 2 eme jawaben si penuh kepastin kerna Dibata. Ate pemazmur nuriken maka Dibatana la bali ras dibata si deban, si isembah nabi-nabi Baal. Terbagesen ibas ay.4 ikataken maka Dibata si isembahna e eme Dibata si sepanjang sejarah lalap ngkawali bangsaNa.“…..la pernah madat mataNa, la tertunduh pe Ia”.Dibata si jadi sekawal man manusia e konsisten ras berkomitmen, ngelebihi asa sekalak nande si njagai anakna. Sanga kitik denga anak-anak rusur tangis tengah berngi, biasana sekalak nande minter medak ia guna mpesikap anakna tapi rusurka nge erkiteken latihna pernanden e tetap terpedem seh maka medaka erpagi-pagi je maka gantina ampan anakna.

Dibata eme Dibatasi la pernah tunduh. Alu bage tentuna Ia me si memelihara kita sepanjang sejarah geluhta. Lit hal si harus silakoken perban Ia eme Dibatasi la pernah medem. IetehNa kerina si ilakoken kita. Sadar nge ndia kita maka kai pe si ilakoken kita iteruh pengawasen Dibata?

Adi I kantor biasana bos namaken kamera tersembunyi guna ngenehen kinerja pegawaina, tep-tep pegawai la pang berkutik. Pegawaina la pang ngeranai sanga erdahin, la pang chatingen, apaika cipangan sanga erdahin. Adi nandangi bos ibas inganta erdahin pe kita mbiar, tentuna lebih sieteh njagai perbahanenta sebab bos besarta eme Dibata tetap ngawasi kerina gerak-gerik manusia.

Kitab Johanes si jadi pengogen sipeduaken, konteksna eme kritik kalak Jahudi man Jesus kerna undang-undang wari Sabat. Erkiteken ibas wari sabat Jesus mpepalem kalak si pinakiten ideher kolam Betesda, kenca malem kalak ndai isuruh Jesus iangangkat amakna. Lit ngendia Jesus ngelanggar undang-undang taurat kerna wari sabat? Situhuna Jesus la ngelanggar undang-undang kerna wari sabat erkiteken si imaksudken ibas Jeremia 17:21-22 eme maba barang-barang si berhubungen ras pendahin bagi si tersurat ibas Nehemia 13:15. Sanggahen Jesus man kalak Jahudi si mengkritik Ia tepat kal, “…BapangKu erdahin kaplalap…”. Kata-kata Jesus e ncidahken maka ibas Kej 2:2-3 ija Dibata ngadi ibas pendahinna eme nepa, tapi Ia la pernah ngadi erdahin guna njagai tinepaNa.

Temata sekalenda ngajuk kita guna erdahin, Aku arus Erdahin. Erdahin labo mpekeri gegeh erkiteken kekhawatiren kerna kebutuhen nggeluh, tapi kita arus erdahin sebab arah pendahinta pe kita arus teridah selaku kalak sierkiniteken man Dibata. Kalak sierkiniteken man Dibata si tetap erdahin maka ia pe arus tetap erdahin (erbintuas). Adi kita kalak karo umumna la palah nari siajari kerna erbintuas, tapi ulaka ndabuh kubas pemahamen terus-menerus bekerja keras guna ndarami kebutuhen geluh piah dungna la nari sempat menikmati geluh enda: la lit waktu istirahat, pulung ras keluarga, la nari sempat pulung ibadah minggu ras kegiaten si deban si enggo iaturken gerejanta. Ula sempat tarum ngayak-ngayak si man tadingen, tading si man baban, eme kinitekenta.

Pdt. Abdi Edinta Sebayang, M.Th
Runggun Graha Harapan

Dibata Kap Si Erbahan Keputusen
Kuan-kuanen 16: 1-2
(Entrepreneurship: Pang Ngalaken Resiko)

Man nterem jelma, manusia ngasup nentuken masa depan ras dalin geluhna sendiri. Enterem jelma si erpengakap maka kerinana murni rasionalisme ras kegeluhen enda lebih mirip bagi kalkulator. Darami data, ban perkiranna emaka dat me hasilna. Sudut pandang si enda tuhu-tuhu mengesampingken Dibata, mengesampingken Ia si jadi penentu akhir kerinana. Mawen-mawen iperhadapken ilebe-lebeta melala dalin si tersedia. Banci jadi melala ka pertimbangen ras penungkunen ibas pusuhta kerna si e, tapi pustaka si Badia ngatakensa maka amin pe melala penungkunen, ieteh Dibata nge cara guna mimpin kita. Banci ka sekali jadi muncul ibas pikirenta kerna hal-hal tertentu, “engkai maka jadi bagenda?” janah si e memicu kita guna menyalahken dirinta sendiri, merasa maka lenga si lakoken si terbaik ibas geluh enda. Padahal situhuna la patut kita ngelakoken si bage rupa, sebab Dibata, Sang Kapten kegeluhen, si man baNa kita tek, ia si nentuken kerina si terjadi ibas geluhta.

Tep-tep jelma lit gambaren kerna keadaan masa depan siatena icapaina. Kai pe si lit ibas gambaren e la perlu ipersoalken, erkiteken tep-tep jelma nentuken ‘sada keadaan’ sue ras pengertinna masing-masing. Manusia banci nusun rencana, tapi Dibata me sierbahan keputusen. Tep-tep pebahanenta mungkin siakap mehuli ibas pandangenta sendiri, tapi Dibata me si menilai maksud ibas pusuh. Endesken kerina man Dibata kerina rencana-rencana kegeluhenndu maka kam pasti berhasil ndalankensa.

Arah kitab Kuan-kuanen Salomo, ipersingeti kita kerna “Manusia ersura-sura, tapi Dibata kap si erbahan keputusenna.” Enda merupaken sada statement si tegas maka ugapa pe hebatna kita, labo banci kita ngelawan sura-sura Dibata. Banci si cubaken ndalanken rencanata sendiri janah pe banci jadi berhasil ka me kita seh kubas tingkaten tertentu, tapi amin bage gia, kerina si la erdalan sue ras sura-sura Dibata tentu hasilna pe tidak akan sebaik bagi sanga kita erdalin iteruh sura-sura Dibata. Pusuh ras pikirenta banci ngukurken kerna dalin si iakap kita mehuli, tapi ibabo si e tentuna Dibata silebih meteh kerna kita, erkiteken ia me sinjadiken kita mulai ibas bertin nandenta nari. Selaku sinepa kita, tentu Dibata lebih meteh kerinana kerna kita. Dauhen nge lebih ietehNa siterulin man banta asangken kai si niakap kita mehuli man banta. Berita mejuah-juahna eme`Dibata ngenca meteh sura-suraNa nandangi kita, eme gelah kita senang, labo gelah cilaka. rencanaNa eme mereken wari sipepagi s idem pengarapen (Band. Jeremia 29:11).

Ngkai maka kita harus ngendesken kerina man Dibata? Sebab alu ngendesken sura-sura ras rencana geluhta man Dibata, si enda encidahken sikap kebergantungan diri kita ras penalemen tuhu-tuhu man baNa. Labo si eteh kai si bakal terjadi ku lebe wari enda, keterbatasen diri mahanca kita la banci bertindak ras ngandalken gegeh sendiri, emaka sura-sura Tuhan ngenca ngasup ngelakoken kai si la ngasup kita erbahansa.

Pdt. Abdi Edinta Sebayang, M.Th-Rg.Graha harapan