SUPLEMEN PJJ 04-10 SEPTEMBER 2022, OGEN MAZMUR 8:1-10
IPEKENA-KENA TUHAN
Masmur 8 : 1 – 10
(Etika/ Ipekena Guna Mehuli)
I. Kata Perlebe
‘Mpekena-kena’ ibas cakap Indonesia eme ‘merawat dan memelihara sedemikian rupa.’ TUHAN Dibata la terjeng nepa langit, doni ras kerina isina termasuk kita manusia, tapi pe mpekena-kenasa. Selaku tinepaNa, terlebih selaku anak-anakNa, bangsaNa kita pe idilo lako mpekena-kena tinepaNa. Nina kuan-kuanta Karo, “Adi la beluh pehuliken, ola ngerontangi.” Kata bijak ntah pe kuan-kuan enda seh kal mehulina ras payona. Geluh ras pengkebetta/ perbahanenta arus maba kiniulin. Kita arus beluh erbahan mehuli, pehuliken dingen pejoreken. Ola kal sempat terjadi nggo ka la beluh pehuliken ras pejoreken, ibahan ka ncedai ras ngerontangi. Kita irancang ras itepa Dibata guna mepekena-kena kegeluhen ras kerina tinepaNa. Kita idilo ras isuruh Tuhanta lako erdiate, njaga, ras ngusahai doni tinepaNa (bdk. Kejadin 2:15). Doni ras kerina tinepa Dibata seh kal ndube ulina. Tapi erkiteken penggaya manusia, piah nggo seh kal cedana. Erkiteken si enda, arus maka si jaga kal etika ntah pe perbahanenta tep-tep wari.
II. Penjelasen Kata Dibata
Masmur 8 eme masmur puji-pujin Daud man Dibata si mulia dingen erkuasa. Masmur 8 enda banci si bagi ku bas 2 bagin: sipemena: Pemasmur muji Tuhan si nggo encidahken kemulianNa teridah i belang-belang doni (ayat 1-3). Kemulian Dibata teridah la terjeng i doni ngenca tapi seh ku surga. Ia Dibata si merentah i doni bagepe i surga. Ia merentah alu kuasaNa si la ersibar sabab Ia me si mbelinna, Ia belinen asa kerina si nasa lit. Sabab kerina si nasa lit bekas tinepaNa kap (ayat 1, 2). Kemulian Dibata si mbelin dingen erkuasa e tole teridah arah danak-danak ras si gara-gara. Tuhan nggit megiken pujin danak-danak ras gara-gara si ikataken doni selaku kalak si lemah ras la ergegeh. Kemulian Tuhan teridah arah Ia ngergai ras ngaloken pujin anak-anak ras gara-gara si megati la ianggap. Bahkan, Tuhan makeken anak-anak ras gara-gara enda ngelawan ras naluken imbangNa alu nompel babah musuhNa (ayat 3). Sipeduaken: Manusia ijadiken Dibata selaku mahkota tinepa (ayat 4-10). Pemasmur Daud mbandingken tinepa Dibata eme jagat raya (matawari, bulan ras bintang-bintang) ras manusia. Seh kal kap belangna langit ras doni enda. La kita ngasup ngidahsa kerina. Buen si la si idah asangken si ngasup manusia ngidahsa. Manusia nggeluh ibas bumi eme sada ibas ermilyar benda-benda si lit. Seh Daud ku bas tampuk perukurenna maka labo kai kal pe manusia e adi ibandingken ras langit, bulan ras bintang-bintang si itamaken Dibata kerina ibas inganna. Tapi justru Dibata nginget manusia. Ipekena-kenaNa manusia. IjadikenNa ia jadi mahkota tinepaNa alu mereken kemulian ras kehamaten. ItangkuhkenNa manusia jadi raja lako merentah kerina tinepaNa subuk si lit i babo taneh, i awang-awang ras i ibas lau/ lawit. Kemulian Dibata tangkas teridah arah makeken manusia jadi si mpekena-kena tinepaNa.
III. Pengkenaina
1. Ibas kantor, lembaga, yayasan ras si debanna guna mpekena-kena barang/ inventaris biasana lit bagin ntah pe seksi perawaten. TUPOKSI (tugas pokok ras fungsina) eme mpekena-kena barang, benda subuk si nggeluh bagepe si la nggeluh. Barang-barang, bangunen, kesain, sinuan-sinuan ras asuh-asuhen, lingkungen seh ku bas teman manusia ras kerina tipe si debanna perlu tetap ipekena-kena. Barang/ benda ras kerina si nggeluh si ipekena-kena erbahanca kerinana jadi mehuli, mejile, terawat ras sikap. Kesain ras lingkungen jadi mejile ras bersih adi ipekena-kena terus ras tetap. Gedung/ bangunen jadi terawat, awet ras melikas adi ipekena-kena. Sinuan-sinuan ras asuh-asuhen turah ras nggeluh alu mehuli, sehat, mbor ras mbornis adi ipekena-kena alu payo. Kebalikenna, kerina si la ipekena-kena alu mehuli erbahanca jadi murde, melket, murmak, la ratur ras sakit. Motor si la ipekena jadi mogok dungna ceda mekelek.
2. Tema: “IPEKENA-KENA TUHAN.” La sekali dua kali ngenca Dibata mpekena-kena doni ras kerina isina termasuk kita manusia. Kita lit ras seh ibas wari enda erkiteken Tuhan mpekena-kena kita, geluhta ras doni enda. Tangkas dingen jelas uga Dibata mpekena-kena kita alu mereken AnakNa Sitonggal eme Tuhan Jesus lako nebusi kita (bdk. Johanes 3:16). Tuhan nggo mpekena-kena geluhta manusia alu ngergai, nginget, engkelengi ras engkelini kita manusia ras doni enda. Tuhan la ngadi ibas mpekena-kena kita kenca itebusi dingen ikeliniNa. Tapi Dibata terus mpekena-kena geluhta alu mereken KesahNa Si Badia si ngajari ras mereken kuasa man banta.
3. Kita ipekena-kena Tuhan labo alu la lit maksud ras tujun Tuhan. Adam itama Dibata i peken Eden guna njaga ras ngusahaisa (Kejadin 2:15). Kita eme penatalayan nangdangi doni tinepa Dibata. Kita ipekena-kenaNa lako jadi alat/ perkakasNa ibas mpekena-kena doni ras kerina tinepaNa. Kita ipekena-kenaNa gelah jadi galah gedang Dibata lako mpekena-kena tinepaNa. Kita ipekena-kenaNa guna mpekena-kena. Bagi Tuhan enggo ras terus mpekena-kena geluhta, kita pe isuruh Tuhan lako mpekena-kena kerina tinepaNa. Emaka marilah silakoken dahinta guna mpekena-kena geluhta, temanta manusia ras lingkungen hidupta. Ola kita lupa kerna maksud ras tujun Dibata ibas mpekena-kena kita.
4. Emaka perdiatekenlah tep-tep paksa ras wari ku wari kerna etikata. Ola erkiteken perbahanen ras pengelakota seh maka lingkungenta melket, ceda ras rontang. Ola erkiteken etikata si la payo dingen la mehuli seh maka rate mesui ras kelsehen kalak si deban dingen lingkungenta. Dage, kai pe ateta si ban subuk arah pengerana ntah ibas perbahanen, bahanlah e ibas gelar Tuhan Jesus gelah la kita ncedai tapi mpekena-kena tinepa Dibata (bdk. Kolose 3:17), amin.
Pdt. Juris Tarigan, M.Th-Runggun Runggun Bogor
