SUPLEMEN PJJ 28 AGUSTUS -03 SEPTEMBER 2022, OGEN EPESUS 4:1-3

NGGELUH I BAS KINIULIN

Epesus 4 : 1 – 3

---

I. Kata Perlebe

         “Nggeluh meteh mehuli ras nggeluh mehuli ya nakku”, nina pedah bapa/ nande man anakna si lawes ku perlajangen. Megati si idah ras si begi pedah-pedah orangtua man anakna lawes sekolah ku ingan si ndauh, anak ndarami dahin ras erdahin, lawes nguta-nguta, kekerja ras si debanna. Sada sura-surata gelah anakta nggeluh meteh mehuli ras nggeluh ibas kiniulin. Guna si e ertoto kita ras seisi jabuta gelah nggeluh alu mehuli. La terjeng notokenca ngenca, tapi seh pe ngajarkenca, rusur mpersingeti anak-anakta ibas tetap-tep kesempaten si lit. Meriah ukurta dingen nggedang ateta kune anakta, kesusurenta nggeluh alu mehuli. Uga kin nggeluh alu mehuli ras nggeluh ibas kiniulin bagi si ikataken Dibata? Mari erlajar kita arah Pustaka Si Badia.  

II. Penjelasen Kata Dibata

Arah suratna man perpulungen Epesus, rasul Paulus muji Dibata sekaligus ngerayaken kerna rencanaNa man doni enda. Rencana Dibata si imaksudken Paulus eme mpersadaken kerina si nasa lit, subuk i surga bagepe i doni, gelah Kristus jadi kepalana (Epesus 1:10). Rencana Dibata e icidahkenNa arah gereja. Gereja eme ingan persadan kalak si tek selaku anak-anak Dibata. Gereja sebage bagin rencana keselamaten Dibata tangkas teridah arah dahin Jesus selaku Mesias. Gereja lit lako menyataken kepentaren, perkuah ate, keleng ate ras kuasa Dibata si teridah ibas gambar Kristus selaku Pencipta.  

Guna persadan Gereja, rasul Paulus mindo gelah perpulungen nggeluh sue ras kecibalna bagi si enggo iaturken Dibata asum tangtangna ia idilo ngikutken Kristus. Si ipindo Paulus man perpulungen eme:

• Meteruk min ukurna. Arah meteruk ukur maka perpulungen ngasup nggeluh ersada. Meteruk ukur bagi Tuhan Jesus jine pe meteruk ukurNa. Selaku anak-anakNa, perpulungen arus ngusih biak/ karakter Kristus.
• Lemah lembut. Lemah lembut la seri ras lemah gemulai. Lemah lembut labo kelemahan. Lemah lembut eme ketenangen, ngeteh ncibalken perbahanen, kai man belasenken, katawari paksana ngerana ras sinik.
• Saber. Kalak si tek arus saber sada ras si debanna. La banci merudu-merudu. Labo banci bagi ukurta saja ngenca ateta. Ngasup ngkuasai diri ras emosina. Ngasup ngaloken teman uga litna janah sabar nimaisa.
• La pergelut erkiteken kekelengen. Ibas persadan banci si begi kata/ belas-belas si meser ras ntelap. Tapi erkiteken keleng ate mbelin ibas kalak si tek, la kita mesunah megelut. La iasuhina ras ibelinkenna atena mesui.
• Njaga kiniersadan tetap irakut nteguh ibas perdamen. Selaku anak-anak Dibata, kalak si tek idilo ras isuruh nggeluh dame ras maba perdamen bagi Tuhan Jesus (Matius 5:9). Kiniersadan si irakut alu perdamen meteguh kal.

III. Pengkenaina

1. Nggeluh ersada ras njaga kiniersadan Kesah alu meteguh eme pendilo ras persuruhen Dibata ibas Tuhan Jesus man banta kerina. Nggeluh ersada si keleng-kelengen dingen patuh man Kepalata eme Jesus Kristus. Sura-sura ras rencana Dibata kal gelah kerina si nasa lit ersada subuk i surga bagepe i doni. Guna nehi rencanaNa enda, kiniersadan e ibenaken ibas kiniersadanta kalak si tek. Kerina kita lanai erndobah sada ras si debanna. Kerina kita kalak si tek sada ibas Kristus Jesus (bdk. Galati 3:28). Emaka marilah ersada kita kerina kalak si tek. Si jaga dingen si pertahanken kiniersadanta alu meteguh.
2. Tema: “NGGELUH I BAS KINIULIN.” Nggeluh ibas kiniulin si imaksudken temata eme nggeluh ibas kiniersadan si meteguh. Kiniersadanta si meteguh ngenca jadi kesaksin si mehuli, si banci erbahanca doni enda pe dungna tek man Tuhan Jesus. Jenari doni enda pe dungna ersada ras kita kerina lako njadiken Tuhan Jesus jadi Kepala guna kemulian Dibata. Tuhan Jesus jine ertoto gelah kita ersada (Johanes 7:21). Ersada ibas keleng ate ras perdamen eme nggeluh ibas kiniulin. Sebalikna adi la kita ersada, la ngasup ersada, ras ncedai kiniersadan ngenca eme nggeluh ibas kinilaulin. Nggeluh si bage nggeluh si labo ibas rencana ras sura-sura Dibata.
3. Gelah ngasup nggeluh ibas kiniersadan Kesah, marilah nggeluh ibas meteruk ukur, lemah lembut, saber sada nangdangi si debanna, la pergelut ras nggeluh ibas perdamen. Alu mere dirita ikuasai, itegu ras ipimpin Kesah Si Badia maka buah Kesah Si Badia turah ras erbuah ibas kita (bdk. Gal. 5:22-23). Meteruk ukur, lemah lembut, saber, la pergelut erkiteken kekelengen ras erdame jadi biak ntah pe karakterta. Tole si pebelinlah biak-biak enda ibas geluhta wari lepas wari.
4. Metengetlah nangdangi godan si njemba ras ngajuk kita meganjang ukur, kasar, la saber dingen kesah perpecahen. La kal ate iblis kita nggeluh ibas kiniulin tapi ibas kinilaulin. Nina iblis, “Labo terban meteruk ukur, lemah lembut ras saber. Lemah lembut ras saber eme tanda kalak tertekan ras tanda kelemahen. Saber e pe lit saberna. 2 seh 3 kali banci saber. Tapi adi nggo lebih ajangna me.” Enterem denga kita kalak si tek mesunah megelut, nimpan kesalahen teman. Janah lenga alu maksimal si jaga kiniersadan alu perdamen. Ingetlah: nggeluh meganjang ukur, kasar, la saber dingen la erdame ncedai nggeluh ibas kiniulin ngenca.
5. Alu nggeluh meteruk ukur, lembah lembut, saber, la pergelut, erdame erbahanca kita nggeluh ibas kiniulin. Meteruk ukur, lembah lembut, saber, la pergelut ras erdame si ngerakut alu nteguh kiniersadan ras persadanta ibas Kesah. Biak-biak enda labo kelemahen tapi justru gegehta (kekuatan) subuk ibas kegeluhen bagepe ibas kiniersadan. Tuhan Jesus nggo leben ncidahken uga Ia nggeluh ibas biak-biak si isingetken Paulus enda. Jenari Paulus pe ngikutisa (3:8). Amin.  

 Pdt. Juris Tarigan, M.Th-Runggun Bogor