Ogen : 2 Raja-Raja 4 : 8 - 13

Tema : Nikapken Keperlun Suruh-Suruhen Dibata

Keadaan ras situasi kegeluhen si serba cukup, kegeluhen si nyaman, lit secara materi mekatep erbahanca kalak lupa diri. La sitik kalak si bayak dingen nggeluh ibas kelebihen dungna ngelupaken hal-hal si sifatna Rohani, lanai nggeluh ernalem man Dibata dingen cara geluhna pe ndauh ibas sura-sura Tuhan nari. Keterlibaten ibas dahin pelayanen gereja lanai ianggapna hal si penting, buang-buang waktu ras tenaga. Bahken lit ka nge si mberat kel niakapna guna ikut muat bagin ibas mendukung dahin-dahin pelayanen si lit ibas gereja aminpe lit ibas ia. Hal enda jadi erkiteken pusuhna enggo “leket” nandangi erta doni, Dibata lanai jadi siutama ibas ia dingen kerina si lit ibas ia pe niakapna bekas dingen ulih kebeluhen ras kinijingkatenna.

Ogenta nuriken kerna kerehen Elisa ku sada kuta eme Sunem si jarakna 40 km arah utara Samaria. Sanga Elisa i Sunem itenahken sekalak diberu ia guna man kurumahna. Diberu enda ras perbulangenna eme kalak si bayak dingen mehaga ibas kuta e. La saja pangan man Elisa isikapkenna tep-tep wari tapi pe ersada kel arihna ras perbulangenna guna nikapken bilik (kamar) i loteng rumahna man ingan Elisa tading dikune Elisa reh kesilang ku rumahna. Janah kerina perlengkapenna pe isikapken diberu bayak enda, eme ingan medem, sada meja, sada kursi ras sada lampu. Icidahken diberu enda ras keluargana kuga ia mediate ras erkekelengen nandangi Dibata, alu encidahken perhatian ras kekelengenna nandangi dahin pelayanen ras suruh-suruhen Dibata. Ipakekenna pasu-pasu ras pemere Dibata si lit ibas ia guna mendukung dahin suruh-suruhen Dibata, ia kalak si metemue dingen nggit makeken rumahna jadi ingan kesilang nandangi Elisa. Adi sipergermetken ogenta maka banci siidah maka keluarga diberu enda labo keluarga si biasa-biasa saja, tapi keluarga enda eme keluarga si erkiniteken siteridah arah “sesitifitasna” nandangi persuruhen Dibata (ay. 9 “Tek aku maka dilaki si rusur reh ku jenda dilaki badia”; Indonesia “Abdi Allah yang kudus ”). Kinitekenna e pe teridah arah kiniulin perbahanenna ras kekelengenna man Elisa.

Tema PJJnta sekali enda eme “Nikapken Keperlun Suruh-Suruhen Dibata”, ngingetken kita mulihi kerna tanggungjawabta ibas mendukung ras numpak-numpak dahin pelayanen si lit itengah-tengah gerejanta GBKP. Selaku anak-anak Dibata sienggo ngaloken perkuah ateNa, turah ukurna ersuruh ras ergiah-giah ibas mendukung dahin meritaken berita si meriah e ku sebelang-belang doni enda. Labo alu keterpaksaan ntah pe sekedar merasa e kewajiben ibas gereja tapi alu penggejapen maka e pendilo Dibata nandangi kita kerina. Erkiteken si e lit piga-piga hal sijadi perenungen ras persinget man banta arah bahan PJJnta sekali enda :

• Keterlibaten ras keaktifen ikut muat bagin ibas numpak-numpak dahin pelayanen gereja ras kininggiten nikapken kerina keperlun pelayanen eme respon nandangi perkuah ate Dibata sienggo sialoken ras sigejapken. Emaka la ateta kita ngenca ngaloken keselamaten e ras ngenanami kiniulin Tuhan, tapi kuga carana segelah reh teremna kalak si nggejapkenca ras ngalokenca.
• Hal-hal si banci silakoken ibas mendukung dahin erBerita si Meriah eme : mereken dirinta ras kerina potensinta jadi perkakas Dibata ibas nehken Berita Si Meriah, makeken kinilitenta (pasu-pasu siibereken Dibata) ibas nampati dahin pelayanen mendukung Tri tugas panggilen gerejanta (Koinonia, Marturia ras Diakonia), notoken kerina suruh-suruhen Tuhan dingen terlibat aktif pe arah kehadirenta selaku ngawan perpulungen (tenaga, waktu ras pikirenta).
• Ibas kita muat bagin ibas dahin-dahin pelayanen gerejanta, palasna eme ukur ersuruh, dem alu kemurnin ras ketulusen sebab melala ka nge genduari modus terselubung ibas ndahiken dahin pelayanen e bagepe ibas ikut muat bagin ibas nampati dahin pelayanen sibiakna ndarami kehamaten, pujin ntah pe pengakun ibas manusia nari. Diberu si bayak i sunem ilakokenna kerinana alu bulat ukur, le setengah-setengah ukur ntah pe terjeng ndarami gelar ras kehamaten.
• Dahin meritaken Berita si Meriah banci silakoken alu erbage-bage hal misalna : Membangun jejaring antar Runggun alu erbahan join program, banci ka adi megegeh Runggunta sisikapken ka tenaga Detaser si Runggun mbiayaisa dingen sibentuk TIM Pekabaran Injil guna banci siutus ku kuta-kuta siniakap kita perlu ije isehken Berita Si Meriah, ulanai min lit runggun e siterjeng ngukuri diri ras kenyamanenna saja tapi banci ngukuri kuga simegegeh banci nampati si kurang megegeh, rsd.
• Situasi kegeluhen (perbeben) labo jadi alasen guna la ikut muat bagin ibas nampati dahin pelayanen ras nampati dahin suruh-suruhen Dibata. Diberu siibas pengogenta tuhu secara ekonomi bayak tapi lit ka nge perbebenna si mbelin eme lenga lit tuah/ anak ibas jabuna. Bas paksa si e la ndatken anak ntah pe tuah ianggap sada kutuken ibas Dibata nari erkiteken dosa sinilakokenna. Tapi e la jadi penghalang nandangi diberu sunem ras perbulangenna guna tetap ergiah-giah muat bagin ibas dahin-dahin Dibata. Ulihna banci siidah maka kesangapen isehken Dibata ku bas jabuna, ipupusna sekalak anak dilaki sue ras siikataken Dibata erkelangken Elisa (ay. 17). La lit si sia-sia dahin sinidahiken kita ibas Tuhan, emaka ergiah-giahlah kita kerina ikut muat bagin ibas numpak-numpak suruh-suruhen Tuhan ras ndahiken dahin-dahin pelayanen ibas gerejanta.

Pdt. Elba Pranata Barus

Ogen : Esra 7 : 6 - 10

Tema : Mpelajari, Makeken Ras Ngajarken

             (Tata Gereja : Pengenalan dan memiliki Tata Gereja GBKP)

Jadi sekalak pengajar e labo sada hal simesunah guna idalanken. Sekalak pengajar ituntut la saja guna njadiken ajar-ajarna erpengangkan kerna kai siniajarken e tapi pe ngasup encidahken dingen ngelakoken kerna siniajarkenna ibas kegeluhenna. Pengajaren ras keteladanen eme dua hal si la banci ipulahi ibas kegeluhen sekalak pengajar.

Esra eme sekalak ahli kitab singgeluh ibas masa pembuangen Israel i Babil. Masa pembuangen eme masa s idem alu kiniseran ras kesusahen. Tapi aminpe lit ibas pembuangen, Esra tetap ndarami Dibata ibas geluhna, ia tetap tutus er-Dibata ndingen ndalanken sura-sura Dibata. Kenca Kores raja Persia mereken perentah guna mulahi Israel, mulih me Israel ku Jerusalem. Janah ibas tahun pepituken pemerentahen Artasasta berkat Esra I Babil nari ku Jerusalem raduken piga-piga kalak Israel, imam-iman, kalak Lewi, tukang music ibas Rumah Pertoton, pengawal rumah pertoton ras sierdahin ibas rumah pertoton. Kegeluhen Esra eme kegeluhen si patut guna iusih. Tangkas man banta ibas pengogenta kuga Esra gelgel nari tutus kel atena mpelajari Undang-undang Tuhan, makekenca ibas kegeluhenna dingen ngajarken pedah ras peraturen si lit ibas undang-undang e man kalak si deban (ay. 10). Esra jadi sekalak si meganjang pemeteh ras pengertinna kerna undang-undang sienggo ibereken Dibata Israel man Musa. Ia sekalak siipasu-pasu Dibata dingen ngena ate raja pe ngenen ia seh maka ibereken raja kerina siipindona (ay. 6-7)

Seharusna kegeluhenta selaku kalak sierkiniteken, anak-anak Dibata sienggo ngaloken perkuah ate Dibata ibas kita ndalani kegeluhenta enda. Pendilonta jadi sira ras terang nandangi doni enda sidem alu kegelapen ras kinilabenaren enda harus sicidahken labo saja arah ngasup kita nuriken kebenaren e tapi pe ngasup ndalanken kebenaren erpalasken kata Dibata bas kegeluhenta. Pertumbuhen kiniteken si sehat labo teridah adi kita terjeng meteh dingen ngangkai kerna Kata Dibata, hafal kerina ayat ras isi Pustaka si Badia, beluh ngajarken ras nuruken kata Dibata alu mbages ntah pe meganjang sekolahta (titelta) ibas bidang Theologia tapi pe teridah aplikasi nyata kerna kata Dibata e ibas kegeluhenta. Tutus ateta ibas ngoge ras ngertiken/ niksiki kata Dibata, megenggeng ras konsisten kita ibas ndalankenca, dingen pentar kita ibas nehkenca ras ngajarkenca man kalak si deban. Alu bage teridah integritasta selaku kalak si erkiniteken, teridah kinitekenta arah perbahanenta (Jak. 2 : 17) seh maka kalak si deban pe merincuh ia mpelajarisa, megikenca, niksikisa ras makekenca ka ibas kegeluhenna.

Undang-Undang Dibata si tertulis ibas Pustaka Si Badia e jadi alu kegeluhenta, ulu kepentaren ras pengertin man banta kalak sierkiniteken, jadi palas ras aturen ibas kegeluhenta la saja secara pribadi tapi pe itengah-tengah pelayanen gerejanta. Selain e, ibas pelayanen gerejanta selaku persadan ntah pe organisasi/ institusi lit aturen si arus sidalanken, sienggo si sepakati ras-ras secara Sinodal eme : Tata Gerejanta. Tata Gerejanta enda batang belinna lit 3 eme : Pembukaan (10 Butir), Tata Dasar (12 Pasal) ras Tata Laksana (208 Pasal ibas 44 Bab) janah kerina e isusun erpalasken Pustaka si Badia bagepe kajian-kajian pengalamen kegeluhen erkiniteken bagepe gereja secara organinasi. Tujunna eme segelah lit kiniraturen itengah-tengah gerejanta, lit acuan kerna penataan pelayanen gerejanta GBKP ibas kehadirenna itengah-tengah doni enda termasuk pe menjawab erbage persoalen si jadi ibas pelayanen, bagepe mbangun kegeluhen perpulungen sue ras sura-sura Dibata selaku kula ni Kristus. Emaka lit piga-piga hal sijadi persinget man banta arah PJJnta sekali enda eme :

• Gerejanta GBKP ibas nehken pelayanenna lit palas sijadi acuan ras aturenna, eme : Pustaka Si Badia ras Tata Gereja, emaka labo banci bagi ate-ateta saja ibas kita nehken pelayanenta.
• Perlu kel kerina Serayan Tuhan, Pengurus Kategorial ras Pengurus Sektor bagepe kerina perpulungen meteh ras ngangkai kerna isi Tata Gerejanta GBKP (Banci situkur buku Tata Gerejanta bagepe si download ibas bentuk Pdf). Sioge, sipelajari, sipahami, siterapken ibas kegeluhen pelayanenta dingen siajarken ka pe man kalak sideban silenga metehsa segelah lit kiniraturen ibas gerejanta dingen seri pengidah ras pengertinta kerna pelayanen gerejanta.
• Kerina min kita ngergai Tata Gereja si enggo si sepakati ras-ras ibas penataan ras pengelolaan gerejanta. Mekatep jadi persoalen ibas pelayanen gerejanta erkiteken la siangka ras si erti Tata Gerejanta, beda pengertin ras pengangkanta, dingen beda penerapenna antara sada runggun ras runggun si deban. Banci jadi lit denga Runggun e si la menerapken aturen sue ras Tata Gereja (khususna ibas : Keuangen ras Disiplin Gereja). Bahken mekatep ka niakap maka si menerapken Tata Gereja enda alu benar si ianggap lepak ntah salah.

Pdt. Elba Pranata Barus-Runggun Sitelusada

Ogen : Epesus 4 : 7 - 16

Tema : Iranggut Dingen Ipersada (Sinergi dan Kolaborasi SDM Gereja)

Biasana orang tua meriah kel ukurna ngidah perkembangen ras pertumbuhen anak-anak itengah jabuna, baik perkembangen secara fisik, karakter, sikap, pemeteh ras pengetin terlebih ibas perkebangen kiniteken. Bage ka me Paulus arah nats Pjjnta sekalenda encidahken pengarapenna si mbelin kerna perkembangen perpulungen Epesus eme perkembangen kiniteken perpulungen si reh dewasana dingen reh bagesna pendaina nandangi anak Dibata janah dungna seh ku tingkat kedewasan Kristus si serta (ay. 13). Alu bage perpulungen e jadi perpulungen si paguh ibas ngalaken erbage-bage tantangen situasi nggeluh, la jadi perpulungen si mesunah ipengaruhi ras ijolah-joleken pengajaren sipapak siertentangen ras Kata Dibata (ay. 14).

Bage ka me arusna pe kegeluhenta selaku kalak sierkiniteken man Dibata, subuk secara pribadi bagepe secara persadan (gereja). Secara pribadi : reh dekahna kita jadi kalak Kristen reh paguhna min urat kinitekenta e, reh dewasana min kita ibas ngalaken erbage-bage tantangen ras kiniseran geluh enda, reh ngasupna min kita ngataken bujur man Tuhan ibas kerina paksa, reh pentarna kita ibas ngaloken ras menyikapi kerina keadaan kegeluhenta enda, lanai mesunah ipengaruhi pengajaren doni enda erkiteken lit prinsip ras gelementa ibas ndalani geluh eme Kata Dibata. Bagepe secara kegeluhen persadan itengah-tengah gerejanta : teridah min kedewasaanta alu ngasup nggejapken maka kerina kita eme ringring kula Kristus si irakut alu keleng ateNa, ngasup nggeluh ibas kiniersadan itengah-tengah kinierbagenta, ngasup mengelola konflik si lit ibas perpulungen seh maka tetap teridah kegeluhen perpulungen singgeluh ibas kedamen bagepe ngasup min gereja tetap encidahken panggilen keilahianna itengah-tengah doni enda alu pang tetap menyuaraken sora kebenaren [berbeda dengan dunia denga ketidakbenaran dan ketidakadilannya] dingen ngasup pe ngelaken keleng ate Dibata man kerina manusia ras isi doni enda.

Segelah kedewasaan ibas kegeluhen gereja banci tercipta ras teridah bagepe kiniersadanta selaku kula Kristus banci terwujud, lit piga-piga hal siperlu sirenungken ras silakoken eme :

• 7 - 8 : arus sisadari maka man banta sekalak-sekalak enggo ibereken Dibata kengasupen sue ras baginta sipatut iakap Kristus merekenca man banta. Enda me siharus sigali ras si siksiki ibas kegeluhenta. Ula sikataken maka la lit pemere ntah pe kengasupen siibereken Dibata man banta. Kita harus terus menggali ras niksiki kengasupen ras pemere Dibata si lit ibas kita. Dikune enggo sieteh kengasupen siibereken Dibata man banta, inget maka e iberekenNa erpalasken lias ateNa labo erkiteken tunggungta, beluhta, jagota ntah kengasupenta.
• 9 – 10 : kai siilakoken Kristus e jadi usihen man banta bagepe gereja selaku persadan.

*. IA nusur ku ingan simeterukna.

   Kiniersadan banci jadi sikune ipalasi kubas kiniteruken ukur, la mpejangjang biak-biak ras sura-suranta.

*. IA nangkih kuingan simeganjangna

   Kegeluhen perpulungen ras gereja arus naksiken kerna kemulian Tuhan, la lit ije si banci mpeganjangken baNa ntah merasa lebih dominan asangken kalak si deban.

• 11 – 12 : Kinierbagen pemere Dibata e jadi gegeh ras kebayaken guna saling ngelengkapi ras menyempurnaken sada ras sidebanna, labo segelah sipekitiken [labo ka guna ipertentangken ntah pe guna mpeganjangken diri]. Kerinana arus iranggut dingen ipersada jadi sada guna ndahiken dahin pelayanen eme majekken kula Kristus. Labo soal belin kitikna kengasupen siibereken Dibata sebab kerina seri ergana ibas IA.
• 15a : ngasup kita ngaloken kata tuhu sidem keleng ate dingen nggit ka pe nuriken situhu-tuhu sue ras kata Dibata. Salah sada ciri kalak sienggo dewasa ibas kiniteken ras karakter eme ngasup ngaloken kata tuhu si benar sebab ietehna maka kebenaren e mpegeluhken ia. Beda ras kalak lenge, si merincuh kel megiken kata tengteng si terjeng entabeh guna ibagiken tapi maba kematen.
• 16 : arus tetap si inget maka ibas persadanta itengah-tengah perpulungen/ gereja Kristus nge sijadi takal perpulungen e, emaka ku IA me i ranggut ras ipersada kerina ringring e. Keutamaan Kristus ras kemulianNa la banci igeser itengah-tengah pelayanen gerejanta, sura-suraNa dingen kemulianNa tetap jadi perayaken pelayanen gerejanta.

Pdt. Elba Pranata Barus-Runggu Sitelusada