Ogen : Jop 42 : 11

Tema : Mediate Erkade-kade

Kita manusia itepa Dibata selaku makhluk sosial si la ngasup nggeluh si sada. Kita perlu kehadiren kalak sideban ibas kegeluhenta guna banci saling melengkapi, mendukung, mpersingetti erpalasken kekelengen. Erkiteken si e ibereken ras ihadirken Dibata man banta keluarga, sangkep nggeluh, teman meriah bagepe kerina kalak si lit isekelewetta sibanci mengisi ras “memberi warna” kegeluhenta arah kehadirenna. Labo saja teman guna ndalani kegeluhen si dem alu perbeben enda (ingan nuri-nuri ntah pe simereken semangat), ntah pe guna saling melengkapi ibas keterbatasen ras pe saling mpersingetti ibas kekurangenta saja tapi pe jadi teman ras inganta guna mewujudnyataken kinitekenta man Dibata arah kegeluhen sikeleng-kelengen.

Seiring ras perkembangen jaman bagepe tuntuten kegeluhen ras kesibuken megati jadi alasen sierbahanca enggo urak kel biak mediate, kepate ras sikeleng-kelengen ibas kegeluhenta genduari enda. Melala genduari si hanya fokus ku bas kegeluhen pribadi ras jabuna saja, nggeluh erjuang kuga segelah keperlun jabu tercukupi seh maka sangkep geluh bagepe sekelewet lanai iperdiateken; dahin-dahin ibas peradaten ras sosial pe lanai idahi bagepe persadan ibas kegeluhenta selaku gereja pe mawen enggo terabaiken. Wari-wari keri ipakeken hanya untuk erdahin, ngataken sibuk, seh maka lit nge deba kade-kadena pe lanai itandaina, termasuk tetangga bahken teman sada gereja pe la nandai ia. Ula lebe nehken penampat ras keleng ate, mereken waktunta saja pe mekatep mberat ras jadi beban siakap. Enggo tempa-tempa maka kita si sibukna ibas kegeluhen enda ntah pe kita me siakap si melalana dahinta bagepe si melalana perjuangen geluhta.

Ogenta nuriken kerna Dibata mpekena ras masu-masu mulihi kegeluhen Jop sindube ngenanami erbage-bage kiniseran. Jope me sekalak si bayak, mehuli dingen malang man Tuhan (Jop 1 : 1). Tapi kerina kebayaken Jop e keri erkiteken “intervensi” Iblis si iijinken Dibata guna muat kerina si lit ibas Jop (erta kebayakenna ras anak-anakna), termasuk pe kesehatenna (daging kulana ugahen) kecuali kesahna (Jop. 1 : 12, 2 : 6). La saja e, tapi ndeharana pe lanai jadi temanna rikut pe ras teman-temanna : Elipas – Bildad ras Sopar pe nuduh ras menghakimi Jop ibas kiniseranna. Ibas kiniseranna e Jop bergumul ras Dibata, janah aminna Jop pernah “mempertanyaken” kuasa Dibata tapi kedungennta isedarina kesalahenna, iakunina keterbatasenna ibas ngantusi ras ngertiken kerina rencana ras perbahanen Dibata ibas kegeluhenna (Jop. 42 : 1 – 6). Ipetangkas Dibata pe man teman-teman Jop maka kai siikatakenna kerna Dibata ras kerna Jop la tuhu, janah e erbahanca nembeh ate Dibata man bana teluna. Emaka isuruh Tuhan kalak enda nehken persembahenna, reh njumpai Jop dingen mindo segelah itotoken Jo pia teluna. Jop notoken teluna temanna e. Kegeluhen Jop pe ipasu-pasu Tuhan janah ibereken Tuhan erta-erta kebayaken dua kali lipat buena asa sienggona. Kesetian ras kebenaren Jop erbahanca ia jadi kalak si menang ibas pengujin dingen ndatken pujin pe ibas Dibata nari. Ibas pengogenta Jop 42 : 11 nuriken kerna kuga senina-senina ras turang Jop bagepe teman-temanna reh ndahi Jop. Ialo-alo Jop ia kerina alu dem keriahen ukur dingen ras-ras ia ije man-man. Icidahkenna pe kemediatenna ras keleng atena nandangi Jop alu nehken kata pergegeh ibas kiniseran si ijinken Dibata jadi ibas kegeluhen Jop bagepe sekalak-sekalak ia mereken duit ras sada cincin man Jop.

Arah Tema PJJnta sekali enda : “Metemue Erkade-kade” ngingetken kita mulihi kerna kuga kin seharusna orat geluhta selaku kalak sierkiniteken, selaku kalak Karo si erbudaya dingen keberadannta selaku manusia selaku mahkluk sosial ibas ndalani kegeluhenta dingen encibalken dirinta. Ula min situasi/ tuntuten geluh ras kesibukennta singatur kita tapi alu penampat Dibata ngasup dingen pentar min kita ngaturken kegeluhenta enda. Emaka lit piga-piga hal sijadi persinget ras perenungen man banta arah bahan PJJnta sekali enda :

• Arus siinget maka kuga kel gia sikapna kegeluhenta, ntah melala gia ertanta (rumah, mobil, taneh, deposito) tetap nge kita perlu kehadiren kalak sideban ibas kegeluhennta. Alu bage kuga kel pe kita sibukna ntah kuga kel gia buena tuntuten geluhta, la e erbahanca kita la ermediate dingen la kepate nandangi kade-kadenta, sangkep geluhta, teman sada perpulungenta bagepe sekelewetta.
• Amin pe mawen ibas kegeluhen persadanta baik keluarga, kade-kade, sangkep geluh, teman meriah bagepe lingkungen sekelewetta megati ka nge ije terjadi geseken, perbedaan pemahamen ras pendapat sibanci sierbahanca kita kecewa bagepe sikitiken ukur. E kerina sianggap min jadi sada kebayaken man banta bagepe jadi proses ibas mbentuk kita reh dewasana ibas rukur, ngaloken ras menyikapi kinierbagen kegeluhenta. Ula persoalen sikitik e lalap sipebelin, ula min kita ermenek-menek (dendam); adi lit si kurang payo e lah si man cakapenkenta.
• Jop la nginget-nginget salah lepak teman-temanna ndube, ngasup ia ngalemisa dingen ertoto kerna teman-temanna. Kita pe arusna bage selaku kalak sierkiniteken, ngasup kita ngelepasken pengampunen dingen dikune kita salah nggit ka kita meteruk ukur ngakui kesalahenta e. Alu bage hubungenta pe tetap mehuli, kedamen ras kesangapen pe ibereken Dibata ku bas kegeluhenta.
• Tetap min kita jadi kalak si mediate ras kepate ibas kegeluhen enda. Nggit kita jadi kalak si metemue man sangkep geluhta, la kita hitung-hitungen ibas kiniulin ras keleng ate, dikune lit si man sampaten ikut min kita muat bagin ije sue ras kengasupennta ntah si lang-langna hadir kita (arah kehadiren ras kata siipeseh kita pe banci kita nampati kade-kade, sangkep geluh, teman sada perpulungen bagepe sekelewetta)dingen ula kita rayo-ayo tapi seri min siidah ras perlakuanta nandangi kerina kade-kadenta e (sebab megati genduari sibayak niayak bas perkade-kaden e). Kerinana e silakoken erpalasken kekelengen sienggo isuhken Jesus man banta anak-anakna.

1 Timotius 5 : 8 “Adi lit si la mperdiateken kade-kadena, terlebih-lebih keluargana, enggo

   ipersokenna kinitekenna. Jahaten me ia asangken kalak si la tek man Jesus Kristus”

Pdt. Elba Pranata Barus

Ogen : 2 Raja-Raja 4 : 8 - 13

Tema : Nikapken Keperlun Suruh-Suruhen Dibata

Keadaan ras situasi kegeluhen si serba cukup, kegeluhen si nyaman, lit secara materi mekatep erbahanca kalak lupa diri. La sitik kalak si bayak dingen nggeluh ibas kelebihen dungna ngelupaken hal-hal si sifatna Rohani, lanai nggeluh ernalem man Dibata dingen cara geluhna pe ndauh ibas sura-sura Tuhan nari. Keterlibaten ibas dahin pelayanen gereja lanai ianggapna hal si penting, buang-buang waktu ras tenaga. Bahken lit ka nge si mberat kel niakapna guna ikut muat bagin ibas mendukung dahin-dahin pelayanen si lit ibas gereja aminpe lit ibas ia. Hal enda jadi erkiteken pusuhna enggo “leket” nandangi erta doni, Dibata lanai jadi siutama ibas ia dingen kerina si lit ibas ia pe niakapna bekas dingen ulih kebeluhen ras kinijingkatenna.

Ogenta nuriken kerna kerehen Elisa ku sada kuta eme Sunem si jarakna 40 km arah utara Samaria. Sanga Elisa i Sunem itenahken sekalak diberu ia guna man kurumahna. Diberu enda ras perbulangenna eme kalak si bayak dingen mehaga ibas kuta e. La saja pangan man Elisa isikapkenna tep-tep wari tapi pe ersada kel arihna ras perbulangenna guna nikapken bilik (kamar) i loteng rumahna man ingan Elisa tading dikune Elisa reh kesilang ku rumahna. Janah kerina perlengkapenna pe isikapken diberu bayak enda, eme ingan medem, sada meja, sada kursi ras sada lampu. Icidahken diberu enda ras keluargana kuga ia mediate ras erkekelengen nandangi Dibata, alu encidahken perhatian ras kekelengenna nandangi dahin pelayanen ras suruh-suruhen Dibata. Ipakekenna pasu-pasu ras pemere Dibata si lit ibas ia guna mendukung dahin suruh-suruhen Dibata, ia kalak si metemue dingen nggit makeken rumahna jadi ingan kesilang nandangi Elisa. Adi sipergermetken ogenta maka banci siidah maka keluarga diberu enda labo keluarga si biasa-biasa saja, tapi keluarga enda eme keluarga si erkiniteken siteridah arah “sesitifitasna” nandangi persuruhen Dibata (ay. 9 “Tek aku maka dilaki si rusur reh ku jenda dilaki badia”; Indonesia “Abdi Allah yang kudus ”). Kinitekenna e pe teridah arah kiniulin perbahanenna ras kekelengenna man Elisa.

Tema PJJnta sekali enda eme “Nikapken Keperlun Suruh-Suruhen Dibata”, ngingetken kita mulihi kerna tanggungjawabta ibas mendukung ras numpak-numpak dahin pelayanen si lit itengah-tengah gerejanta GBKP. Selaku anak-anak Dibata sienggo ngaloken perkuah ateNa, turah ukurna ersuruh ras ergiah-giah ibas mendukung dahin meritaken berita si meriah e ku sebelang-belang doni enda. Labo alu keterpaksaan ntah pe sekedar merasa e kewajiben ibas gereja tapi alu penggejapen maka e pendilo Dibata nandangi kita kerina. Erkiteken si e lit piga-piga hal sijadi perenungen ras persinget man banta arah bahan PJJnta sekali enda :

• Keterlibaten ras keaktifen ikut muat bagin ibas numpak-numpak dahin pelayanen gereja ras kininggiten nikapken kerina keperlun pelayanen eme respon nandangi perkuah ate Dibata sienggo sialoken ras sigejapken. Emaka la ateta kita ngenca ngaloken keselamaten e ras ngenanami kiniulin Tuhan, tapi kuga carana segelah reh teremna kalak si nggejapkenca ras ngalokenca.
• Hal-hal si banci silakoken ibas mendukung dahin erBerita si Meriah eme : mereken dirinta ras kerina potensinta jadi perkakas Dibata ibas nehken Berita Si Meriah, makeken kinilitenta (pasu-pasu siibereken Dibata) ibas nampati dahin pelayanen mendukung Tri tugas panggilen gerejanta (Koinonia, Marturia ras Diakonia), notoken kerina suruh-suruhen Tuhan dingen terlibat aktif pe arah kehadirenta selaku ngawan perpulungen (tenaga, waktu ras pikirenta).
• Ibas kita muat bagin ibas dahin-dahin pelayanen gerejanta, palasna eme ukur ersuruh, dem alu kemurnin ras ketulusen sebab melala ka nge genduari modus terselubung ibas ndahiken dahin pelayanen e bagepe ibas ikut muat bagin ibas nampati dahin pelayanen sibiakna ndarami kehamaten, pujin ntah pe pengakun ibas manusia nari. Diberu si bayak i sunem ilakokenna kerinana alu bulat ukur, le setengah-setengah ukur ntah pe terjeng ndarami gelar ras kehamaten.
• Dahin meritaken Berita si Meriah banci silakoken alu erbage-bage hal misalna : Membangun jejaring antar Runggun alu erbahan join program, banci ka adi megegeh Runggunta sisikapken ka tenaga Detaser si Runggun mbiayaisa dingen sibentuk TIM Pekabaran Injil guna banci siutus ku kuta-kuta siniakap kita perlu ije isehken Berita Si Meriah, ulanai min lit runggun e siterjeng ngukuri diri ras kenyamanenna saja tapi banci ngukuri kuga simegegeh banci nampati si kurang megegeh, rsd.
• Situasi kegeluhen (perbeben) labo jadi alasen guna la ikut muat bagin ibas nampati dahin pelayanen ras nampati dahin suruh-suruhen Dibata. Diberu siibas pengogenta tuhu secara ekonomi bayak tapi lit ka nge perbebenna si mbelin eme lenga lit tuah/ anak ibas jabuna. Bas paksa si e la ndatken anak ntah pe tuah ianggap sada kutuken ibas Dibata nari erkiteken dosa sinilakokenna. Tapi e la jadi penghalang nandangi diberu sunem ras perbulangenna guna tetap ergiah-giah muat bagin ibas dahin-dahin Dibata. Ulihna banci siidah maka kesangapen isehken Dibata ku bas jabuna, ipupusna sekalak anak dilaki sue ras siikataken Dibata erkelangken Elisa (ay. 17). La lit si sia-sia dahin sinidahiken kita ibas Tuhan, emaka ergiah-giahlah kita kerina ikut muat bagin ibas numpak-numpak suruh-suruhen Tuhan ras ndahiken dahin-dahin pelayanen ibas gerejanta.

Pdt. Elba Pranata Barus

Ogen : Esra 7 : 6 - 10

Tema : Mpelajari, Makeken Ras Ngajarken

             (Tata Gereja : Pengenalan dan memiliki Tata Gereja GBKP)

Jadi sekalak pengajar e labo sada hal simesunah guna idalanken. Sekalak pengajar ituntut la saja guna njadiken ajar-ajarna erpengangkan kerna kai siniajarken e tapi pe ngasup encidahken dingen ngelakoken kerna siniajarkenna ibas kegeluhenna. Pengajaren ras keteladanen eme dua hal si la banci ipulahi ibas kegeluhen sekalak pengajar.

Esra eme sekalak ahli kitab singgeluh ibas masa pembuangen Israel i Babil. Masa pembuangen eme masa s idem alu kiniseran ras kesusahen. Tapi aminpe lit ibas pembuangen, Esra tetap ndarami Dibata ibas geluhna, ia tetap tutus er-Dibata ndingen ndalanken sura-sura Dibata. Kenca Kores raja Persia mereken perentah guna mulahi Israel, mulih me Israel ku Jerusalem. Janah ibas tahun pepituken pemerentahen Artasasta berkat Esra I Babil nari ku Jerusalem raduken piga-piga kalak Israel, imam-iman, kalak Lewi, tukang music ibas Rumah Pertoton, pengawal rumah pertoton ras sierdahin ibas rumah pertoton. Kegeluhen Esra eme kegeluhen si patut guna iusih. Tangkas man banta ibas pengogenta kuga Esra gelgel nari tutus kel atena mpelajari Undang-undang Tuhan, makekenca ibas kegeluhenna dingen ngajarken pedah ras peraturen si lit ibas undang-undang e man kalak si deban (ay. 10). Esra jadi sekalak si meganjang pemeteh ras pengertinna kerna undang-undang sienggo ibereken Dibata Israel man Musa. Ia sekalak siipasu-pasu Dibata dingen ngena ate raja pe ngenen ia seh maka ibereken raja kerina siipindona (ay. 6-7)

Seharusna kegeluhenta selaku kalak sierkiniteken, anak-anak Dibata sienggo ngaloken perkuah ate Dibata ibas kita ndalani kegeluhenta enda. Pendilonta jadi sira ras terang nandangi doni enda sidem alu kegelapen ras kinilabenaren enda harus sicidahken labo saja arah ngasup kita nuriken kebenaren e tapi pe ngasup ndalanken kebenaren erpalasken kata Dibata bas kegeluhenta. Pertumbuhen kiniteken si sehat labo teridah adi kita terjeng meteh dingen ngangkai kerna Kata Dibata, hafal kerina ayat ras isi Pustaka si Badia, beluh ngajarken ras nuruken kata Dibata alu mbages ntah pe meganjang sekolahta (titelta) ibas bidang Theologia tapi pe teridah aplikasi nyata kerna kata Dibata e ibas kegeluhenta. Tutus ateta ibas ngoge ras ngertiken/ niksiki kata Dibata, megenggeng ras konsisten kita ibas ndalankenca, dingen pentar kita ibas nehkenca ras ngajarkenca man kalak si deban. Alu bage teridah integritasta selaku kalak si erkiniteken, teridah kinitekenta arah perbahanenta (Jak. 2 : 17) seh maka kalak si deban pe merincuh ia mpelajarisa, megikenca, niksikisa ras makekenca ka ibas kegeluhenna.

Undang-Undang Dibata si tertulis ibas Pustaka Si Badia e jadi alu kegeluhenta, ulu kepentaren ras pengertin man banta kalak sierkiniteken, jadi palas ras aturen ibas kegeluhenta la saja secara pribadi tapi pe itengah-tengah pelayanen gerejanta. Selain e, ibas pelayanen gerejanta selaku persadan ntah pe organisasi/ institusi lit aturen si arus sidalanken, sienggo si sepakati ras-ras secara Sinodal eme : Tata Gerejanta. Tata Gerejanta enda batang belinna lit 3 eme : Pembukaan (10 Butir), Tata Dasar (12 Pasal) ras Tata Laksana (208 Pasal ibas 44 Bab) janah kerina e isusun erpalasken Pustaka si Badia bagepe kajian-kajian pengalamen kegeluhen erkiniteken bagepe gereja secara organinasi. Tujunna eme segelah lit kiniraturen itengah-tengah gerejanta, lit acuan kerna penataan pelayanen gerejanta GBKP ibas kehadirenna itengah-tengah doni enda termasuk pe menjawab erbage persoalen si jadi ibas pelayanen, bagepe mbangun kegeluhen perpulungen sue ras sura-sura Dibata selaku kula ni Kristus. Emaka lit piga-piga hal sijadi persinget man banta arah PJJnta sekali enda eme :

• Gerejanta GBKP ibas nehken pelayanenna lit palas sijadi acuan ras aturenna, eme : Pustaka Si Badia ras Tata Gereja, emaka labo banci bagi ate-ateta saja ibas kita nehken pelayanenta.
• Perlu kel kerina Serayan Tuhan, Pengurus Kategorial ras Pengurus Sektor bagepe kerina perpulungen meteh ras ngangkai kerna isi Tata Gerejanta GBKP (Banci situkur buku Tata Gerejanta bagepe si download ibas bentuk Pdf). Sioge, sipelajari, sipahami, siterapken ibas kegeluhen pelayanenta dingen siajarken ka pe man kalak sideban silenga metehsa segelah lit kiniraturen ibas gerejanta dingen seri pengidah ras pengertinta kerna pelayanen gerejanta.
• Kerina min kita ngergai Tata Gereja si enggo si sepakati ras-ras ibas penataan ras pengelolaan gerejanta. Mekatep jadi persoalen ibas pelayanen gerejanta erkiteken la siangka ras si erti Tata Gerejanta, beda pengertin ras pengangkanta, dingen beda penerapenna antara sada runggun ras runggun si deban. Banci jadi lit denga Runggun e si la menerapken aturen sue ras Tata Gereja (khususna ibas : Keuangen ras Disiplin Gereja). Bahken mekatep ka niakap maka si menerapken Tata Gereja enda alu benar si ianggap lepak ntah salah.

Pdt. Elba Pranata Barus-Runggun Sitelusada