OGEN: Kolose 3:16-17

TEMA: SIAJAR-AJAREN ALU KEPENTAREN

(Musyawarah Warga Sidi Runggun)

I. KATA PENARUH

Situhuna budaya runggu bas kalak Karo merupaken sada dahin simehuli kel sebab uga radu ras pulung encakapken sada hal guna erban jalan keluarna. Emaka bas GBKP enda pe situhuna labo banci lit masalah adi kerina irungguken alu mehuli si igelari alu MUSYAWARAH WARGA SIDI RUNGGUN.

Emaka ibas kalak Karo lalit masalah si la dung erkiteken anak beru e mis kel muat bagin adi kune kenca lit idahna jabu kalimbubuna e lit si man pesikapen. Adi anak perana singuda-nguda mbarenda pe, minter ietehna, kune kenca erjabu atena janah salah sada orang tua la setuju, entah erkiteken lit masalah sideban, minter ia reh ku rumah bengkilana (anak beruna) gelah dungina masalahna e. Janah anak beru e ngadi dung kari persoalen e idampingina. Maun-maun meling ka anak beru e ban kalimbubu e erkiteken nggit anak beru e ngeranakennca aminna gia kalimbubuna e la setuju.

Bagepe ibas kerja-kerja subuk kerja erdemu bayu bagepe simate-mate, ibas kalak Karo janah ibas kuta tertentu melala denga bas kuta e anak beru e tuhu-tuhu jadi tahan turu Kalimbubu e. La kel pediat anak beru e Kalimbubu e meling entah pe kemalun. Emaka lit istilah Runggu buat-buaten. Kenca enggo dung Maba Belo Selambar, emaka ipepulung Kalimbubu e kerina anak beruna, emaka ije me ia ercakap kerna kai siman pekenan kerina ibas kerja e, umapamana perlu ranting, reh nina anak beru e, “rumah ku ah melala ranting”, rsd.

Tentu bas GBKP enda pe, adi sipakelah budaya runggu enda alu payo tentu pasti maba keriahen ukur ras kedamen man banta kerina. Emaka bas bahan PJJ ta enda pe erlajar kita, uga kita banci siajar-ajaren alu Kepentaren ibas ngelakoken Musyawarah Warga Sidi Runggun GBKP tahun 2025 enda.

II. PEBAGESI PENGANGKAAN KERNA TEKS

Perpulungen sikelengi Tuhan Kota Kolose lit i deher Laodikea (bdk. Kol 4:16) i barat daya Asia kitik, kira-kira 160 kilometer langsung arah timur kota Epesus. Teridah maka perpulungen Kolose enda pajek eme hasil pelayanen Paulus si luar biasa sedekah telu tahun i Epesus (Perb. Rasul 20:31). Pengaruh pelayanenna tuhu-tuhu mbelin ras ndauh seh maka “kerina kalak si ringan i Propinsi Asia, subuk kalak Jahudi bage pe kalak Junani megi kata Tuhan” (Perb. Rasul 19:10). Aminna pe Paulus sendiri mungkin la pernah ndahi Kolose (Kol 2:1), tapi ia enggo njaga kontak ras perpulungen e arah Epapras, sekalak si enggo bertobat i teruh pelayanenna ras teman sada dahinna i Kolose nari (Kol 1:7; Kol 4:12).

Amin gia labo Paulus si majekken perpulungen enda, tapi labo erkiteken si e la iperdiatekenna. I bas nulisken surat-suratna e la lit perbedanna perpulungen enda ras perpulungen si deban. Perpulungen Kolose si jadi kalak Kristen erkiteken pelayanen Epapras seri meherga man bana, janah ia pe ermediate man kesejahteraan kalak enda, bagi kalak Pilipi, ntah pe perpulungen si deban si jadi kalak Kristen erkiteken pelayanenna.

Alasen surat enda itulis eme erkiteken turah pengajaren-pengajaren si papak si mengancam masa depan rohani perpulungen Kolose (Kol 2:8). Sanga Epapras, sekalak pemimpin perpulungen Kolose ras mungkin pendiri perpulungen e, erdalan ndahi Paulus ras mpebetehken situasi i Kolose (Kol 1:8; Kol 4:12), Paulus merespon alu nulisken surat enda. Paksa sie ia sangana ibas penjara (Kol 4:3,10,18).

Paulus ngirim surat enda alu tujun:

1. Guna ngkernepken ajaren palsu si berbahaya i Kolose si sangana menggantiken keunggulen ras keduduken Kristus selaku pusat penciptaan, wahyu, penebusen, ras perpulungen.
2. Guna nekanken situhuna sifat kegeluhen si mbaru i bas Kristus ras tuntutenna man kalak si tek.

Ibas ogenta enda, Paulus nuriken kerna kegeluhen si male ras kegeluhen si mbaru si tuhu-tuhu bertentangan, la lit biak ras perbahanen si banci erdalan radu ras, emaka si male arus itadingken ras si mbaru igantiken. Uga Paulus menjelasken penerapan kegeluhen kalak Kristen si tuhu-tuhu jadi cermin man kalak Kristen?

Si pemena, kegeluhen si ndekah egois ras doni, sedangken kegeluhen si mbaru e me Kristus ras dem kekelengen. Mbarenda kegeluhen ikuasai hawa nafsu, erta-erta, bagepe dosa pusuh ras dilah (ayat 5, 8-9), tapi genduari arusna ikuasai kekelengen (ayat 14) si mpengasup kalak kristen ngasilken buah pertendin.

Si peduaken, i bas Kristus lanai lit celah ras perbedaan (ayat 11): kebangsaan, agama, budaya, ras status sosial. Kristus enggo naluken kerina kesombongen manusia si menegakken hal-hal enda, sebab ibas Kristus kita menyadari maka kerina manusia memiliki sifat yang sama eme la layak.

Sipeteluken, sada pedoman guna ndalani kegeluhen kalak Kristen : idemi alu perkuah ate (ayat 12), pusuh si dem alu pengalemi dosa (ayat 13), kekelengen (ayat 14), dame (ayat 15), kataNa jadi lampu kegeluhen seh maka pusuh meluap alu pujin ras pengataken bujur (ayat 16), ras aktivitas kegeluhen si berpusat pada Kristus.

Bahan PJJ ta enda pe situhuna ngajarken man banta kerna manifestasi transformasi kegeluhen. Transformasi banci terjadi adi enggo terjadi identifikasi. Terus identifikasi ras Kristus maka mabai transformasi jadi lebih mirip ras Kristus. Dua hal enda la terpisahken. Ibas perikop enda siidah kuga perubahen e iterusken alu ngelakoken perbahanen si mulia (ayat 16-17) ras mpeturah biak si erkemalangen man Dibata (ayat 12-15).

Si pemena, pebelinlah biak si mehuli. Karakter-karakter si ituriken i bas 12-15 e me karakter-karakter Kristus bagi si idalankenNa segedang-gedang geluh ras pelayanenNa i doni enda, eme:

1. Kam anak-anak Dibata. Kam ikelengi dingen ipilih Dibata jadi SikerajangenNa. Emaka pakekenlah paken ate perkuah, mehuli, rukur meteruk, lemah-lembut dingen saber.
2. Ula kam pergelut dingen si alem-alemen salah adi kitik ukurndu ibahan kalak.
3. Kam arus sialem-alemen salah bagi Tuhan nggo ngalemi salahndu.
4. Janah i babo si e kerina, arus kam sikeleng-kelengen sabap keleng ate mpersadaken kerinana alu serta.
5. Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sabap guna dame kam ipilih Dibata jadi sada kula. Emaka ngataken bujurlah.

Si peduaken, ndalanken perbahanen si mulia. Siajar-ajaren dingen saling mpersingeti selaku anak-anak Dibata (ayat 16a); nehken pujin ras pengataken bujur man Dibata (ayat 16b); ngelakoken perbahanen (si mehuli) ras melasken ranan si membangun ibas gelar Tuhan Yesus (ayat 17).

Bagepe Kata Kristus nggeluhlah i tengah-tengahta (ay. 16). Berita Si Meriah eme kata Kristus, si enggo seh man banta. Tapi, reh saja labo cukup, Berita Si Meriah pe arus ringan i tengah-tengahta, ntah pe ngaturken rumah e alu ratur. Labo bagi sekalak juak-juak i bas sada rumah, si iteruh kuasa kalak si deban, tapi bagi sekalak tuan, si berhak n gatur ras merentahken kerina kalak si tading i teruh tarumna.

III. PENGKENAINA

Temata eme SIAJAR-AJAREN ALU KEPENTAREN. Siajar-ajaren tentu banci kang i artiken saling mengajar. Pentar ibas cakap Indonesia ertiken alu berhikmat. Hikmat ibas pustaka si Badia ertina mbiar ras erkemalangen man Tuhan. Emaka nina ibas Kuan-kuanen 9:10-11 nina, “Maka banci kalak jadi pentar la banci lang erkemalangen ia lebe man Tuhan. Adi itandaindu Dibata si Badia e lit kap pengertinndu. Janah kepentaren erbahansa umurndu reh gedangna.” Alu kata sideban tema enda mereken pengertin man banta maka selaku kalak si erkiniteken kita harus nggit siajar-ajaren alu erkemalangen man Dibata.

Arah bahan PJJ ta enda pentar iertiken alu litna bas kita biak-biak Kristus eme:

1. Selaku anak-anak Dibata harus sipakeken paken ate perkuah, mehuli, rukur meteruk, lemah-lembut dingen saber.
2. La pergelut dingen si alem-alemen salah adi kitik ukurta ibahan kalak.
3. Arus sialem-alemen salah bagi Tuhan nggo ngalemi salahta.
4. Janah i babo si e kerina, arus kita sikeleng-kelengen sabap keleng ate mpersadaken kerinana alu serta.
5. Dame si ibereken Kristus i bas pusuhta min si ngajari kita i bas erbahan keputusen-keputusenta labo alu dameta.

Tentu adi biak-biak Kristus enda lit bas kita, la banci lang ngasup kita siajar-ajaren sada ras sidebanna ibas kekurangen si lit ibas kita. Bagepe adi biak-biak Kristus enda lit ibas kita tentu kai pe siilakoken kita pasti kerina e silakoken guna kemulian Tuhan labo guna kemulianta secara pribadi.

Emaka marilah kita kerina mengketi nusyawarah sidi Runggunta alu makeken biak-biak Kristus e, gelah alu bage subuk selaku serayan bagepe selaku perpulungen, siajar-ajaren sada ras sidebanna, dingen ibas kekurangen radu ras arih-arih mpekenasa, dingen ibas lalit gegeh ras-ras ndungisa. Alu bage la banci lang pasti dahin-dahin itengah-tengtah Runggunta pasti reh ulina dingen ermulia gelar Tuhan bagepe reh paguhna kinitekenta kerina. Selamat mengketi musyarawah warga sidi Runggunta kerina Tuhan simasu-masu kita kerina.

Pdt. Jaya Abadi Tarigan-Runggun Bekasi

Ogen: 1 Samuel 25:9-35,                             

Tema: NGELAKOKEN PURPURSAGE

(Sasaran pelayanan GBKP tahun 2025 poin II: setiap pelayan menjadi juru damai dalam konflik bukan sumber konflik)

I. KATA PENARUH

• Secara umum sosok orang yang berperan guna mendamaikan tuhu-tuhu kel iarapken kalak kune kenca lit persoalen ibas sada ingan. Bahken berita penebusen dosa manusia pe erkiteken tubuh Yesus Kristus ku doni enda guna mendamaiken manusia ras Dibata erkiteken dosa-dosa manusia.

1. Bahken ibas kalak Karo sendiri pe lit siertugas ndamaiken kalak si erselisih eme Kalimbubu. Salah sada tugas dan kewajiban Kalimbubu eme ndameken anak beruna si la siangkaan. Sada sumber buku ngatakenca. Tugas dan kewajiban dari kalimbubu eme:
2. Memberikan saran-saran kalau diminta oleh anakberunya
3. Memerintahkan pendamaian kepada anakberu yang saling berselisih
4. Sebagai lambang supremasi kehormatan keluarga
5. Mengosei anak berunya (meminjamkan dan mengenakan pakaian adat) di dalam acara-acara adat
6. Berhak menerima ulu mas, bere-bere (bagian dari mahar) dari sebuah perkawinan, maneh-maneh (tanda mata atau kenang-kenangan) dari salah seorang anggota

• Bagem pentingna sindameken kune kenca lit persoalen itengah-tengah kegeluhen manusia. Emaka metedeh kel ate kalak litna juru dame ibas kegeluhen manusia. Erkiteken litna perdamen e erbahansa turah keriahen ukjur ras kemalemen ate. Emaka arah bahan PJJ ta enda erlajar kita uga ngelakoken purpursage entah pe perdamen ibas kegeluhenta.

II. PEBAGESI PENGANGKAAN KERNA TEKS

Perpulungen sikelengi Tuhan, bahan PJJ ta enda nuriken kerna kehadiren Abigail guna mendameken Daud ras perbulangenna Nabal erkiteken perbulangen Abigail enda la meteh mehuli. Kehadiren Daud ras pengikut-pengikutna si lalit inganna tading tetap, membutuhken penampat ibas kalak sideban nari eme penduduk kota sideherna guna encukupi keperlun geluhna. Janah sebalikna kehadiren Daud ras pengikut-pengikutna seh kel perluna penduduk kota e guna ngkawali ia ibas kalak jahat nari. Emaka lit sekalak penduduk kota e si seh kel bayakna tapi perbahanenna pas kel bagi erti gelarna eme Nabal si ertina bebal. Janah Nabal la nggit nampati Daud ras pengikutna padahal Nabal ras keluargana enggo nggejapken uga Daud njaga ras ngkawali ia ibas kalak jahat nari. Perbahanen Nabal e erbahansa daud merawa seh maka ersura-sura Daud guna engkernepken Nabal ras kerina keluargana. Untungkel ndehara Nabal si gelarna Abigail pedas tanggap sope lenga isehken Daud sura-surana ngkernepken Nabal ras keluargana.

Ija paksa Daud cebuni erkiteken iayak-ayak Saul emeka Daud tading ipadang belantara ras 600 prajuritna si setia. Nabal tading i Maon tapi erdahin deher Karmel ras kemungkinen lit tanehna ije. Nabal kalak bayak janah lit 3.000 dombana, sekitar tanehna e liar denga janah melala kalak si rusur ngganggu permakan dingen nangko biri-birina. Arah selatan ingan e padang belantara si mbelang kel, arah sebelah timur, lit dalan kempak Laut Garam si mentasi gurun tandus si la lit penghuni na si erjurang ras melala ije gua-gua. Ibas daerah eme Daud cebuni ras anak buahna dingen ertahan nggeluh. Emaka rusur kel Daud ras anak buahna jumpa ras anak perana si dahinna permakan biri-biri Nabal kalak bayak e. Banci saja daud ngerampuk permakan e ras buatina biri-biri siipermakanina e guna ia ras anak buahna. Tapi Daud ras anak buahna malah jadi pelindung man permakan ras biri-biri Nabal erkiteken ibas ingan e melala binatang buas, pinangko, perampok, rsd, (1 Samuel 25:15, 16).

Erkiteken Daud perlu kel melala pangan man bana ras perajuritna emaka iutusna 10 kalak ku rumah Nabal guna mindo penampat. Daud la mejarjar mindo penampat man Nabal eme alu ndahi Nabal paksa sangana gunting bulu biri-biri e sebab ibas paksa sie me paksa-paksa keramahen si mada biri-biri, erban pesanna alu hati-hati janah la mejarjar bagepe make kalimat si sopan bahken iposisikenna dirina sebagai anak Nabal (1 Sam. 25:5-8). Megi sie ngamuk Nabal janah ipelawesna utusen Daud e janah la ia nggit mereken roti, lau ras daging sembelihenna. Menurut Nabal, Daud labo penting man bana janah ipeserina Daud ras kalak si melariken diri bas tuanna nari. Kenca utusen si sepuluh kalak e mulihken ku Daud janah ikatakenna kai si ilakoken Nabal man bana, emaka merawa Daud megi berita e. Emaka iperintahken Daud man 400 kalak perajuritna si setia gelah ibabana pedangna guna nerang Nabal ras keluargana kerina. Daud ersumbah maka kerina si dilaki si lit irumah Nabal ibunuhna (1 Sam. 25:12, 13, 21, 22).

Emaka sekalak permakan Nabal reh erkata man ndehara Nabal eme Abigail kerna sura-sura Daud engkernepken Nabal ras kerina si dilaki ibas rumahna. Ituriken Permakan e uga Daud selama enda enggo engkawali permakan-permakan Nabal suari ras berngi, janah erkiteken Daud ras perajuritna, sada pe la kalak pang ngganggu ia dingen la pernah bene barangna. Tapi Nabal enggo megombang man Daud. Emaka megi berita e minter ipepulung Abigail:

1. 200 engkibul roti,
2. 2 guci kuling-kuling dem isin lau anggur,
3. lima biri-biri siipanggang,
4. sepulu 17 kg buah gandum si isauk,
5. 100 tandan buah anggur ras
6. 200 kue buah ara si enggo ikerahken,

jenari itamakenna kerina ku das kalde. Kenca idah Abigail Daud minter erjimpuh ia ku taneh i tapak-tapak Daud janahna mindo maaf. Emaka ialemi Daud Nabal ras keluargana kerina.

III. PENGKENAINA

Temana ta eme NGELAKOKEN PURPURSAGE. Ibas Kamu Karo Purpursage ertina saling memaafkan. Ibas Buku ADAT KARO yang ditulis oleh Darwan Prinst, S.H ngataken maka Purpursage eme suatu upacara perdamaian antara orang yang berseteru menurut adat Karo. Misalnya mendamaikan perselisihan antara sesama anggota keluarga, atau antara orang orang dengan lain. Pelaksanaanya dihadiri oleh sangkep nggeluh (sembuyak, anak beru, dan kalimbubu) dari masing-masing pihak. Oleh karena itu sebelumnya terlebih dahulu diadakan musyawarah (runggu) antara pihak yang berselisih dengan disaksikan oleh masing-masing sangkep nggeluh-nya.

Tujuan Purpursage adalah untuk mengadakan perdamaian atau pemulihan keadaan yang telah terganggu karena adanya perselisihan tersebut. Perdamaian dimaksud tidak semata bersifat duniawi, akan tetapi juga bersifat religius, yakni menenteramkan tendi atau roh.

Dalam pelaksanaannya pada masyarakat Karo, purpur sagé dapat dibagi dalam beberapa jenis, seperti:

1. Persada man

Adalah upacara perdamaian antara orang yang berselisih dengan melaksanakan makan bersama dari satu piring yang sama. Untuk itu biasanya dibuat lauknya adalah sangkep, yakni ayam yang digulai secara khusus dan seluruh bagian badannya utuh, berikut sebutir telur ayam.

1. Nunggahken lau erpagi-pagi

Adalah upacara perdamaian dengan menyuapkan air atau saling menyuapkan air. Untuk itu air yang dipergunakan adalah air bunga lau, yakni air yang di ambil pada subuh hari, di mana orang belum ada ke pemandian dan air yang pertama keluar dari pancuran disebut bunga lau.

1. Nabéi

Adalah upacara perdamaian dengan memberi sabe atau pakaian adat karo kepada pihak yang isabéi, misalnya kepada kalimbubu. Untuk itu biasanya juga diperlukan kerbau atau lembu atau babi sebagai lauknya.

1. Putar dareh

Adalah upacara perdamaian dengan membuat putar dari darah orang yang bersalah. Dalam cerita Karo disebutkan, bahwa barangsiapa yang membuat kampung terbakar, maka darahnya harus dijadikan menjadi putar dan ditaruh di dahi penduduk kampung

Tentu cara purpursage siituriken ibas bahan PJJ ta enda eme purpursage siilakoken Abigail nandangi Daud ras Nabal. Daud ras Abigail eme kalak si pentar/ bijaksana menempatken dirina. Ija Daud aminna gia ia megegeh ras enterem perajuritna si setia tapi la ia nggit semena-mena man permakan ras asuh-asuhen Nabal. Malah Daud ras perajuritna njagai permakan ras asuh-asuhen Nabal seh maka lalit si bene dingen la lit kalak si pang nangkosa dingen ngganggu permakan-permakan Nabal. Tapi Nabal kalak si meganjang rukur, sombong ras angkuh ras kalak si la meteh ngataken bujur ibas kalak enggo nampati ia bahken ihinana dingen megombang ia man kalak si enggo nampati ia.

Abigail sekalak si penengah ibas ngelakoken purpursage enda sangat bijak. Ija kenca ieteh Abigail kesalahen siilakoken perbulangenna labo ia ikut mbela dingen mbenarken perbahanen perbulangenna tapi minter ia muat keputusen janah mindo maaf ia man Daud si enggo igombangi perbulangenna. Abigail langsung mengambil inisiatif guna nelamatken isi jabuna ibas rawa Daud nari. Nggit ia alu meteruk ukur mindo maaf man Daud, nggit ia nehken pengataken bujurna man Daud si enggo engkawali kerina permakan ras biri-birina seh maka Abigail ras keluargana selamat ibas rawa Daud nari.

Emaka ibas PJJ ta enda, marilah kita kerina terlebih-lebih serayan Tuhan, jadilah kita Abigail-abigail si mbaru (Juru Damai) subuk ibas jabuta, sektorta, runggunta, bagepe ijapa pe kita ringan. Jadilah kita jarum si katawari pe berusaha untuk menyatukan janah labo jadi gunting si katawari pe nirangken. Amin

Pdt. Jaya Abadi Tarigan-Runggun Bekasi

“NGASUP NGIDAH RAS NGALOKEN SI MEHULINA”

Lukas 10 : 38 – 42

(Sasaren Pelayanan GBKP tahun 2025 poin I: Tidak alergi pada perbedaan)

I. Kata Perlebe

Cicero, sekalak filsuf ras negarawan Romawi nuriken maka lit 6 kesalahen manusia. 1 ibas 6 kesalahen manusia eme, “Mendesak orang lain untuk hidup dan berpikir seperti yang kita kehendaki.” Bagi ukurta min ateta teman ras si lit i sekelewetta. Bagi sura-surata min ateta kalak si deban. La terjeng bas pusuh ras ukurta tapi pe si desak gelah kalak si deban nggeluh ras rukur bagi kita. Lupa kita maka kerina jelma la seri. Kerina kita unik/ khas ras berbeda sada nangdangi si deban. Inget lirik lagu Kristine Panjaitan nina, “Biarlah yang hitam menjadi hitam, jangan harapkan jadi putih.” Si mbiring tetaplah mbiring. Si mbentar pe bage. Ola arapken apai ka paksaken si mbentar jadi mbiring; ras sebalikna.                             

II.   Isi

Berita Si Meriah (Injil) Lukas isuratken Lukas jine. Lukas e sekalak si labo Jahudi (non Jahudi). Tema utama Injil Lukas eme Jesus Juruselamat kerina doni. Jesus me si nggo nggenepi kerina padan (nubuat) Dibata ija ikataken maka keselamaten seh ku kerina jelma arah kesusuren Abraham (Kejadin 12:1-3). Tupung Injil isuratken bas abad pemena, kalak si labo Jahudi la ianggap subuk secara sosial bagepe agama. Kalak non Jahudi la dat bagin ras la lit inganna ibas Kinirajan Dibata. Kecibal si bagenda me erbahanca maka Lukas si non Jahudi e tuhu-tuhu mpelajari uga Tuhan Jesus tuhu-tuhu erdiate man kalak si la Jahudi. Injil Lukas pe tuhu-tuhu mperdiateken kalak si terabaikan, termasuk diberu-diberu, pemungut cukai, si gadamen/ kusta ras kalak musil. Maksud ras tujun Injil Lukas isuratken banci si idah ibas Lukas 4:18-19.

Turi-turin kerna Marta ras Maria ngelengkapi perumpaman kerna kalak Samaria si erkuah ate. Perumpaman kerna kalak Samaria ngerana kerna kiniteken si aktif, kiniteken rikut ras perbahanen. Sementara kisah Marta ras Maria ngerana kerna kiniteken si nggit megiken Kata Tuhan. Duana (kiniteken si aktif ras kiniteken si nggit megi) desken 2 sisi bas sada koin. Duana sada kinisersadan. Megiken Kata Dibata sebage palas kerina perbahanen. Arah perbahanen ras pelayanen Kata Dibata jadi lebih tangkas. Metemue/ keramahtamahan la kepe terjeng ngelai bas meja ngenca tapi pe kerna megiken ras ngaloi kata Tuhan Jesus. Marta ngalo-ngalo Jesus ku rumahna. Maria seninana minter kundul i deher nahe Jesus lako megiken Kata ras pengajarenNa. Marta justru kuskas nikapken pangan. Erkiteken kuskasna piah suhsah dingen gulut ukurna janah murkas ia. Jesus ipergogoina alu ngataken maka Jesus la mperdiateken uga Maria mpeturut ia sisada ndahiken kerina dahin nikapken pangan ras adumna. Tole mindo Marta gelah isuruh Jesus Maria nampati ia. Jesus njabab Marta alu lemah lembut. Ikataken Jesus maka Marta nggo nuhsahi bana ras ngguluti ukurna jine sabab melala atena ibahanna. Lupa Marta ngidah ras milih si mehulina eme megiken Kata ras pengajaren Jesus. Justru enda me si nggo iidah ras ipilih Maria. Si mehulina nggo ilakoken Maria janah enda lanai banci ibuat ibas ia nari.

III.     Pengkenaina

1. Nina sada kata bijak, “Nggeluh eme pilihen” (hidup adalah pilihan). Dibata jine benana nepa manusia mereken kehendak bebas man bana. Tuhan la pernah maksa, mendikte kita tapi iberekenNa kita kebebasen lako milih, nentuken pilihen kai ateta si pilih ras si bahan. Erkiteken si e perlu kal kita pentar. Gelah kita pentar tentu perlu kita terus erlajar, megermet ras metenget. Alu bage me maka payo ras tepat pilihenta. La kita salah pilih tapi pilihen si mehulina ras si mejilena si idatken kita. Bageme ndube Marta ras Maria pe nggo milih kai si bahanna man Tuhan Jesus.
2. Tema: “NGASUP NGIDAH RAS NGALOKEN SI MEHULINA”. Marta ras seninana Maria nggo nentuken pilihen, kai atena ibahanna tupung Tuhan Jesus seh ku Betani. Duana ia ngalo-ngalo Tuhan Jesus ku rumahna alu meriah ukur. Tapi duana ia ngelakoken tindaken si lain. Marta ngidah bahwa nikapken pangan ras adumna dingen erbahan melala hal lahiriah si perlu. Sementara Maria ngidah maka kundul ndeher ras Tuhan Jesus me si mehulina. Rembak ras Jesus dingen megiken pengajarenNa me si pentingna lebe ilakokenna. Kengasupenta ngidah si mehulina dingen ngelakoken si mehulina mahanca banci sialoken si mehulina. Metenget kita make mateta terlebih mata pertendinta gelah si idah si mehulina. “Mata kap tendang kula.Adi terang pengidahndu, kulandu pe terang kap. Tapi adi gelap pengidahndu kulandu pe gelap…” (Matius 6:22-23)
3. Sasaren pelayanenta tahun 2025: “Dewasa Menerima Perbedaan.” Kita warga GBKP ngasup ngaloken perbedan si lit subuk ibas jabu, perpulungen, lingkungen, ingan dahin, bangsa ras negara. La si seri ras kita ngenca kita ngasup ngalokenca tapi pe si la bali. La bas persaman ngenca kita dewasa tapi pe bas perbedan. Dibata nepa kita beda sada ras si debanna. Kita kerina berbeda subuk kerna: gender, suku, agama, ras/ warna kulit, golongen. Kita pe pelain-lain bas merga/ beru, kuta, budaya, adat/ kebiasan, kepribadian, pemeteh, gegeh, cara rukur, kiniliten ras kengasupen (bdk. Kolose 3:11). Kinierbagen ras perbedan sada ras si debanna eme kinata kegeluhen si la banci si tulak.    
4. Mari si aloken perbedan alu meriah ukur. Siaminken ras sialoken perbedan alu dewasa. Dewasa kita ngaloken bahwa kita ras teman, kalak si deban lain. Ola alergi nangdangi perbedan. Ola minter anti kune kita la seri ras si deban. Ola kita bagi Marta. La kenca bagi ia si Maria erbahanca suhsah akapna dingen gulut ukurna. Ola gulut ukurta kune kalak si deban lain ras kita. Ola pandangen, kelsehen ras jungut-jungut kita man kalak si mengambil sikap ras perbahanen si lain asangken kita. Asangken alergi pangen kita adaptasi ras mere apresiasi. ‘Tapi si pentingna kal, daramilah lebe KinirajanNa, janah dalankenlah si ngena ateNa, maka icukupkenNa kai si perlu man bandu’ (Matius 6:33).
5. Perbedan labo berarti nggo pasti bertentangan, pertentangen ras permusuhen. Berbeda labo berarti nongkahi (pembangkang), imbang ras musuh. Ola minter silawan ras simusuhi kalak si la seri ras kita. Perbedan e kinibayaken kap. Si la lit bas kita banci lit bas teman. Si la lit bas teman banci jadi lit bas kita. Perbedanta guna kita si kuhen. perbedanta guna kita banci si sampat-sampaten dingen si tumpak-tumpaken. Dage, marilah si rayaken perbedan si lit, amin.

Pdt. Juris Tarigan, GBKP RG Bogor