SUPLEMEN PJJ TANGGAL 23 FEBRUARI-01 MARET 2025, LUKAS 10:38-42

“NGASUP NGIDAH RAS NGALOKEN SI MEHULINA”

Lukas 10 : 38 – 42

(Sasaren Pelayanan GBKP tahun 2025 poin I: Tidak alergi pada perbedaan)

 

I. Kata Perlebe

Cicero, sekalak filsuf ras negarawan Romawi nuriken maka lit 6 kesalahen manusia. 1 ibas 6 kesalahen manusia eme, “Mendesak orang lain untuk hidup dan berpikir seperti yang kita kehendaki.” Bagi ukurta min ateta teman ras si lit i sekelewetta. Bagi sura-surata min ateta kalak si deban. La terjeng bas pusuh ras ukurta tapi pe si desak gelah kalak si deban nggeluh ras rukur bagi kita. Lupa kita maka kerina jelma la seri. Kerina kita unik/ khas ras berbeda sada nangdangi si deban. Inget lirik lagu Kristine Panjaitan nina, “Biarlah yang hitam menjadi hitam, jangan harapkan jadi putih.” Si mbiring tetaplah mbiring. Si mbentar pe bage. Ola arapken apai ka paksaken si mbentar jadi mbiring; ras sebalikna.                             

II.   Isi

Berita Si Meriah (Injil) Lukas isuratken Lukas jine. Lukas e sekalak si labo Jahudi (non Jahudi). Tema utama Injil Lukas eme Jesus Juruselamat kerina doni. Jesus me si nggo nggenepi kerina padan (nubuat) Dibata ija ikataken maka keselamaten seh ku kerina jelma arah kesusuren Abraham (Kejadin 12:1-3). Tupung Injil isuratken bas abad pemena, kalak si labo Jahudi la ianggap subuk secara sosial bagepe agama. Kalak non Jahudi la dat bagin ras la lit inganna ibas Kinirajan Dibata. Kecibal si bagenda me erbahanca maka Lukas si non Jahudi e tuhu-tuhu mpelajari uga Tuhan Jesus tuhu-tuhu erdiate man kalak si la Jahudi. Injil Lukas pe tuhu-tuhu mperdiateken kalak si terabaikan, termasuk diberu-diberu, pemungut cukai, si gadamen/ kusta ras kalak musil. Maksud ras tujun Injil Lukas isuratken banci si idah ibas Lukas 4:18-19.

Turi-turin kerna Marta ras Maria ngelengkapi perumpaman kerna kalak Samaria si erkuah ate. Perumpaman kerna kalak Samaria ngerana kerna kiniteken si aktif, kiniteken rikut ras perbahanen. Sementara kisah Marta ras Maria ngerana kerna kiniteken si nggit megiken Kata Tuhan. Duana (kiniteken si aktif ras kiniteken si nggit megi) desken 2 sisi bas sada koin. Duana sada kinisersadan. Megiken Kata Dibata sebage palas kerina perbahanen. Arah perbahanen ras pelayanen Kata Dibata jadi lebih tangkas. Metemue/ keramahtamahan la kepe terjeng ngelai bas meja ngenca tapi pe kerna megiken ras ngaloi kata Tuhan Jesus. Marta ngalo-ngalo Jesus ku rumahna. Maria seninana minter kundul i deher nahe Jesus lako megiken Kata ras pengajarenNa. Marta justru kuskas nikapken pangan. Erkiteken kuskasna piah suhsah dingen gulut ukurna janah murkas ia. Jesus ipergogoina alu ngataken maka Jesus la mperdiateken uga Maria mpeturut ia sisada ndahiken kerina dahin nikapken pangan ras adumna. Tole mindo Marta gelah isuruh Jesus Maria nampati ia. Jesus njabab Marta alu lemah lembut. Ikataken Jesus maka Marta nggo nuhsahi bana ras ngguluti ukurna jine sabab melala atena ibahanna. Lupa Marta ngidah ras milih si mehulina eme megiken Kata ras pengajaren Jesus. Justru enda me si nggo iidah ras ipilih Maria. Si mehulina nggo ilakoken Maria janah enda lanai banci ibuat ibas ia nari.

III.     Pengkenaina

1. Nina sada kata bijak, “Nggeluh eme pilihen” (hidup adalah pilihan). Dibata jine benana nepa manusia mereken kehendak bebas man bana. Tuhan la pernah maksa, mendikte kita tapi iberekenNa kita kebebasen lako milih, nentuken pilihen kai ateta si pilih ras si bahan. Erkiteken si e perlu kal kita pentar. Gelah kita pentar tentu perlu kita terus erlajar, megermet ras metenget. Alu bage me maka payo ras tepat pilihenta. La kita salah pilih tapi pilihen si mehulina ras si mejilena si idatken kita. Bageme ndube Marta ras Maria pe nggo milih kai si bahanna man Tuhan Jesus.
2. Tema: “NGASUP NGIDAH RAS NGALOKEN SI MEHULINA”. Marta ras seninana Maria nggo nentuken pilihen, kai atena ibahanna tupung Tuhan Jesus seh ku Betani. Duana ia ngalo-ngalo Tuhan Jesus ku rumahna alu meriah ukur. Tapi duana ia ngelakoken tindaken si lain. Marta ngidah bahwa nikapken pangan ras adumna dingen erbahan melala hal lahiriah si perlu. Sementara Maria ngidah maka kundul ndeher ras Tuhan Jesus me si mehulina. Rembak ras Jesus dingen megiken pengajarenNa me si pentingna lebe ilakokenna. Kengasupenta ngidah si mehulina dingen ngelakoken si mehulina mahanca banci sialoken si mehulina. Metenget kita make mateta terlebih mata pertendinta gelah si idah si mehulina. “Mata kap tendang kula.Adi terang pengidahndu, kulandu pe terang kap. Tapi adi gelap pengidahndu kulandu pe gelap…” (Matius 6:22-23)
3. Sasaren pelayanenta tahun 2025: “Dewasa Menerima Perbedaan.” Kita warga GBKP ngasup ngaloken perbedan si lit subuk ibas jabu, perpulungen, lingkungen, ingan dahin, bangsa ras negara. La si seri ras kita ngenca kita ngasup ngalokenca tapi pe si la bali. La bas persaman ngenca kita dewasa tapi pe bas perbedan. Dibata nepa kita beda sada ras si debanna. Kita kerina berbeda subuk kerna: gender, suku, agama, ras/ warna kulit, golongen. Kita pe pelain-lain bas merga/ beru, kuta, budaya, adat/ kebiasan, kepribadian, pemeteh, gegeh, cara rukur, kiniliten ras kengasupen (bdk. Kolose 3:11). Kinierbagen ras perbedan sada ras si debanna eme kinata kegeluhen si la banci si tulak.    
4. Mari si aloken perbedan alu meriah ukur. Siaminken ras sialoken perbedan alu dewasa. Dewasa kita ngaloken bahwa kita ras teman, kalak si deban lain. Ola alergi nangdangi perbedan. Ola minter anti kune kita la seri ras si deban. Ola kita bagi Marta. La kenca bagi ia si Maria erbahanca suhsah akapna dingen gulut ukurna. Ola gulut ukurta kune kalak si deban lain ras kita. Ola pandangen, kelsehen ras jungut-jungut kita man kalak si mengambil sikap ras perbahanen si lain asangken kita. Asangken alergi pangen kita adaptasi ras mere apresiasi. ‘Tapi si pentingna kal, daramilah lebe KinirajanNa, janah dalankenlah si ngena ateNa, maka icukupkenNa kai si perlu man bandu’ (Matius 6:33).
5. Perbedan labo berarti nggo pasti bertentangan, pertentangen ras permusuhen. Berbeda labo berarti nongkahi (pembangkang), imbang ras musuh. Ola minter silawan ras simusuhi kalak si la seri ras kita. Perbedan e kinibayaken kap. Si la lit bas kita banci lit bas teman. Si la lit bas teman banci jadi lit bas kita. Perbedanta guna kita si kuhen. perbedanta guna kita banci si sampat-sampaten dingen si tumpak-tumpaken. Dage, marilah si rayaken perbedan si lit, amin.

Pdt. Juris Tarigan, GBKP RG Bogor