“IETEH RAS ISURATKEN MIN”

Nehemia 7 : 63 – 73

(Evaluasi sasaren pelayanen GBKP Tahun 2024: Berkarya dan berguna untuk orang lain; Transparansi keuangan, Pembinaan keuangan)

I. Kata Perlebe

Kenca kita erbahan evaluasi pemena arah PJJ ta kerna sasaren pelayanen gerejata GBKP 2024 eme “Berkarya dan Berguna Bagi Orang Lain” uga kina nehken suara kenabian, si ban ka evaluasi peduaken. Evaluasi peduakenta eme kerna transparansi keuangen sekaligus pembinaan keuangan. Transparansi ibas Kamus Besar Bahasa Indonesia (KBBI) ertina: jelas, nyata, terbuka, la itutup-tutupi, tembus sinar ras tembus pandang. Transparansi keuangan ertina jelas, nyata, terbuka, la itutup-tutupi ras tembus pandang man banta kerna kecibal keuangan si lit. Emaka seh kal tuhu perluna ras pentingna transparansi keuangan bas geluh enda. Adi jelas, nyata, terbuka, la itutup-tutupi ras kerina kita ngidahsa alu jelas tentu mereken kesedaren, keriahen ras ketenengen man kerinana. Ndauh ibas kerina kalak kerna penungkunen apai ka curiga sabab nggo tangkas ras terang man bana. Kai si ban gelah terjadi transparansi keuangan? Mari erlajar kita arah Kata Dibata palas PJJ-ta.

II. Isi

Kitab Nehemia eme kitab si isina ngerana kerna kalak Juda (Israel Selatan) mulihi ku kutana Jerusalem ntah Juda si ndube iangkut ku Babel erkiteken dosana. La radu ntah pe sekaligus kalak Juda mulih ku Jerusalem tapi piga-piga terpuk. Nehemia si iangkat raja Persia lako jadi pemimpin i Juda. Nehemia selain sekalak pemimpin si pentar ras pantas, ia pe pemimpin si tuhu-tuhu erkemalangen man Dibata. Tuhu-tuhu ia ernalem man Dibata bas mimpin bangsana Juda. Sada hal si penting jadi pelajarenta bas bangsa Juda mulihi ku Jerusalem eme kerna catatenna. Ertina, kerina si mulih e icatat beliganna rikut pe ras terpukna. Janah la jelmana ras terpukna ngenca icatat tapi pe asuh-asuhenna si ibabana. Bageme si idah bas ogenta uga terpuk imam kesusuren Harun pe icatat. Tapi lit terdat terpuk imam-imam si tersurat e la idatna ntah pe ietehna terombona. Nggo pe isiksiki ras isungkuni alu manjar-anjar bas ise nini-ninia tapi lalap la idatna. Gelar-gelar imam si la ietehna terombona e me: Halaya, Hakos ras Barsilai. Erkiteken la terkatakenca terombona emaka kalak enda ialoken jadi imam. Nehemia selaku gubernur ngelarang Halaya, Hakos ras Barsilai ngaloken hak-hak imam eme banci man pangan si ipersembahken man Dibata. Nehemia ngelarang kalak enda ngaloken hakna seh lit sekalak imam si banci make Urim ras Tumim. Teremna kerina kalak Juda si mulih i pembuangen e lit 42.360 kalak. Jenari icatat pe suruh-suruhenna si dilaki ras si diberu buena lit 7.337 kalak. Pemain musik dilaki ras diberu buena 245 kalak. La ketadingenna asuh-asuhenna eme kuda, kuda kitik (bagal), unta ras kaldena rikut belinganna. Jenari enterem kalak e mereken sumbangenna rikut cataten sumbangenna guna mpekena mulihi Rumah Pertoton.              

III. Pengkenaina

1. Nina bung Karno, “JAS MERAH” (Jangan sekali-sekali melupakan sejarah). Gelah ola kita lupa sejarah, subuk sejarahta, sejarah jabuta, sejarah gerejata, sejarah sukuta, bangsa ras negarata, mari si inget-inget. Kenca si inget minterlah suratken. Salah sada kelebihen kalak/ bangsa Jahudi eme nuratken/ nulisken kerina kai si perlu ras penting termasuk kerna terombo ntah pe silsilahna alu mehuli. Enda me si melala si idah ras si baca ibas Pustaka Si Badia. Piga-piga gelar ibas Pustaka Si Badia bagi gelar raja, imam, nabi, la terjeng gelarna ngenca isuratken. Gelarna e itulisken rikut ras gelar bapana. Deba gelarna isuratken seh ku bolang, ras empongna. Contohna eme Elkana suku Epraim nari, gelar bapana Jeroham, ninina Elihu, sada bagin ibas keluarga Tohu, terpuk Sup (1 Samuel 1:1); raja Hiskia anak Ahas (2 Raja-Raja 18:1); nabi Jesaya anak Amos (2 Raja-Raja 19:2); imam Esra kesusuren Harun (Esra 7:1-5). Si paling lengkap gelarna isuratken eme Tuhanta Jesus Kristus (Matius 1:1-17).
2. Tema: “IETEH RAS ISURATKEN MIN.” Biak ras kebiasan kalak Jahudi nuratken si perlu ras penting kal jadi biak ras kebiasanta pe. Ola tertaren-taren nuratken kai si perlu ras penting. Ola ninta kuinget nge, labo aku lupa. Daya ingetta lemah ras terbatas kap. Apai ka adi nggo kita berumur, kengasupen ngingetta reh urakna. Dungna banci kita lupa ingatan (demensia). Emaka sope lupa minterlah suratken. Ola timai erwari-wari seh lewat Minggu ras bulanna piah lupa kita. Lupa kita peristiwana dingen data-data si penting misalna: wari, tanggal, bulan,beliganna, rst. Suratken bas sada cataten si mehuli, mejile ras aman. Nduari banci pe si suratkan bas hp ta ntah pe media elektronik si ndauh lebih aman asangken isuratken ibas kertas.
3. Selain seh pentingna ras perluna nuratken terombota, sejarah jabu ras sangkep nggeluhta, penting kal pe kita nuratken keuangen. Secara khusus bendahara perlu kal nuratken keuangen gereja alu mehuli, tetap ras ratur. Keuangen gereja la banci inget-inget saja tapi ieteh ras isuarken ka. Sabab banci inget, banci ka kita lupa. Melala program ras kegiaten gereja si umumna kerina erkawiten ras keuangen. Alu ras arah nuratken perdalanen keuangen erbahanca si eteh asakai lit saldo/ duit. Tole pe si eteh ija nari rehna (uang masuk) dingen kuja lawesna (uang keluar). Alu kerina teridah terang, jelas ras tangkas erbahanca la lit ukur nungkun-nungkun ras la lit curiga sabab kerina terjawab ras terpertanggung-jawabken bendahara. Alu nuratken keuangenta alu mehuli ras payo erbahanca si eteh uga gegehta ras kai si perlu man bahanen.
4. Bendahara si nuratken keuangen alu jelas, nyata, terbuka, la itutup-tutupi ras tembus pandang, terus ras tetap patut ndatken pujin. Tuhan Yesus mujiken bendara si cerdik (bdk Lukas 16:1-9). Majelis ras kerina perpulungen pe la ketadingen ermeriah ukur dingen mujikenca. Bendahara si nuratken keuangen secara transparan mereken keriahen, kedamen ras kemalemen ate man perpulungen. Terpuji ras termulia Dibata arah nuratken keuangen gereja alu transparan, amin.

Pdt. Juris Tarigan, GBKP RG Bogor

“NEHKEN PERKATAN TUHAN”

2 Samuel 12 : 1 – 15

(Evaluasi sasaren pelayanen GBKP Tahun 2024: Berkarya dan berguna untuk orang lain, Suara Kenabian)

I. Kata Perlebe

Ope kita mulai ras mbenai sada dahin si mbaru, seh perluna ras pentingna kita erbahan evaluasi kerna dahin si nggo dung ntah pe si arah pudi. Alu ngelakoken evaluasi si eteh kai kekuatenta – kelemahenta, kai kelebihen ras kekurangenta. Alu bage si eteh kai si perlu si man pertahanken, kai si man tingkatenken, kai si man dahin dingen kai si olangen. La bas dahinta pribadi ras dahin ibas inganta erdahin/ erusaha ngenca perlu ievaluasi tapi pe ibas dahin gerejata eme kerna sasaren pelayanenta. Sasaren pelayanen GBKP tahun 2024 “Berkarya dan berguna bagi orang lain” nggo dung, bengket kita ku bas sasaren pelayanenta 2025. Aminna nggo dung sasaren pelayanen 2024 tapi jiwa ras semangat lako berkarya dan berguna bagi orang lain la banci peltep ras ngadi. Kita kalak si tek man Tuhan Jesus terus ras tetap erdahin ras erguna man kalak si deban segedang geluhta.

   II. Isi

Dibata nuruh nabi Natan ndahi raja Daud kerna dosana. Natan ngerana alu make perumpaman si erkawiten ras hukum lako mereken efek dramatis, si mahanca raja Daud kari mereken putusan ras hukumen (ayat 1). Natan make perumpaman kerna 2 kalak si seh kal bedana eme sekalak kalak bayak ras sekalak kalak musil. Kalak bayak e seh kal buena asuh-asuhenna; si musil ndai sada anak biri-biri ngenca lit bas ia. Ibahanna anak biri-biri e desken anakna sidiberu. Singkat cerita, itangkap kalak bayak e anak biri-biri kalak musil ndai guna temuena si reh. La atena ipotong asuh-asuhenna guna temuena (ayat 2-4). Megi si e pusuh raja Daud terkuit kerna kinilaadilen, kejahaten ras kekerasen si terjadi. Ibas rawana ibelakenna keputusen ras ukumen kerna kalak bayak e. Kalak bayak e arus mate dingen ngulihken kai si nggo itangkona 4 kali lipat (bdk. Keluaren 22:1). Kenca raja nehken penghakimenna, minter ikataken Natan maka raja Daud kap kalak bayak e. Jenari alu jelas ipeseh Natan uga Dibata nggo ncidahken perkuah ras keleng ateNa man Daud ibas erbage-bage dampar. Tapi raja la ngergaken kiniulin Dibata. Ilanggarna pedah Dibata (Keluaren 20:13-17). Daud munuh Uria (pedah peenemken). Daud erlua-lua (pedah pepituken). Daud nangko eme nangko ndehara kalak (pedah pe waluhken). Daud ermengga ate nangdangi ndehara kalak (pedah pesepuluhken). Daud nggo megombang man Dibata. Erkiteken si e Dibata ngukum ia. Kesusurenna la pernah lepas bas pedang nari (mate si bunuhen). Lalap lit reh kesusahen ibas keluargana erkiteken dosana (ayat 5-12). Megi si e Daud la mbela diri dingen ngelak ibas dosana nari. Iakuina dosana. Erkiteken si e Dibata ngalemi dosana. La ia iukum mate erkiteken nggo munuh (Imamat 20:11; Bilangen 35:16). Tapi anakna si mbaru tubuh arah nderahana Batseba la banci lang mate (ayat 13-15).              

III. Pengkenaina

1. Tema: “NEHKEN PERKATAN TUHAN.” Bagi nabi Natan isuruh mpeseh perkatan Tuhan, bageme pe kita kerina kalak si tek man Tuhan Jesus isuruh. Nehken perkatan Tuhan labo dahin serayan ntah pe si erdahin Tuhan ngenca tapi dahinta kerina. Nehken perkatan Tuhan seri ertina mpeseh suara kenabian. Nabi ngerana man sesekalak ntah sada bangsa la ngerana kerna dirina ras buah perukurenna saja. Nabi ngerana kerna ketuhu-tuhun, kebujuren, keadilen, kekelengen, kemeteruken ukur, rembak ras Dibata (Miha 6:8). Nabi mpeseh Kata Dibata. Nabi leben ngaloken Kata ibas Dibata nari. Bageme pe kita. Pusuhta kalak si tek nggo idemi ras iiani Kesah Si Badia. Kesah Si Badia singerana ibas pusuhta. Kesah e ka si ngajari kita guna si peseh man kalak selaku perkatan Tuhan.
2. Nehken perkatan Tuhan tentu saja la mesunah. Labo banci ibelasi saja, telpus-telpus ras pinter-pinter saja. E bahaya. Banci kari bagi nuan galuh tengah sabah, Akap tama ngaruh kepe tama salah. Nabi Natan selaku penasehat raja Daud (7:2) jadi usihenta bas nehken perkatan Tuhan/ sora kenabian. Natan bas melasken kata Tuhan labo telpus ras pinter-pinter saja tapi ibelaskenna kata Dibata alu pentar. Sabab lit kalak ngataken nina, “Ola belasken kata tuhu tapi kata tengteng”. Si enda secara kiniekenta tentu saja payo dingen mehuli. Adi kata tengteng ngenca ibelasken la maka kalak ku bas kesadaren, perubahen dingen kinijeran. Si payo eme melasken kata tuhu alu alu kata tengteng.
3. Mari si pake waktuta ras kesempaten si lit lako mpeseh perkatan Tuhan. Ola kita CARAM (cari aman) ras CARSEL (cari selamat). Ola erkiteken mbiar kita temanta lanai kari rembak ras kita ntah megelut ras merawa, piah la kita pang melasken perkatan Tuhan. Ola sinik bas si salah. Ola kem bas perbahanen dosa. Ola kura-kura dalam perahu, pura-pura kita padahal kita tahu. Nina Kata Dibata, “Belasken ras pesehlah kata Tuhan (berita) subuk tengteng ras la tengteng paksana terusken gelah beritaken. Cidahkenlah salah kalak, persingeti dingen pegegehi ia sanga iajarkenndu ia alu dem kesabaren” (2 Timotius 4:2). Ola pake kiat ABS (asal bapak/ ibu senang). Si man daramen ras man bahanenta e me uga gelah senang Bapata Si Nisurga.  
4. Alu melasken perkatan Tuhan kita nggo berkarya ras erguna man kalak si deban. Alu mpeseh perkatan Tuhan si dahiken dingen si terusken perbahanen si payo dingen mehuli man kalak si deban. Bas kita nehken perkatan Tuhna geluhta terus ras tetap erguna man kalak si deban. Erdahin ras erguna man kalak si deban labo ngenca arah perbahanen ras pendahin, tapi arah perukuren ras pengeranata. Nina kuan-kuan Persia, “Dilah manusia eme cambuk Dibata.” Perlu si pake dilahta selaku cambuk Dibata gelah kalak si salah robah. Alu bage ia selamat.
5. Mari terus ras tetap kita erlajar melasken perkatan Tuhan alu pentar. Terus kita berlatih mpeseh perkatan Tuhan segelah reh mehulina dingen reh payona wari lepas wari. Si garutlah dilahta gelah reh telapna, reh sikapna, reh beluhna ras reh pentarna kita ncibalken kata tuhu alu kata tengteng. Si pindo man Tuhan kuasa ras gegeh gelah pang kita melasken ras mpeseh perkatan Tuhan. Segelah ola dilahta entelap ku teruh (kalak si meteruk dingen musil) tapi metultul (tumpul) ku datas (kalak mehaga, erpangkat ras bayak), amin.

Pdt. Juris Tarigan, GBKP RG Bogor

ULANGEN 10: 12-22

TEMA :

NDALANKEN KEBUJUREN (Lembaga-lembaga Diakonia)

Pendahuluan :

Ulangan 10:12-22, ilatabelakangi rawa Dibata si mbelin erkiteken ke-la setian bangsa Israel, si nggo ipulahi Dibata ibas taneh perbudaken Mesir nari tapi tetap denga usur nundalken Tuhan ras ngelakoken perbahanen ngelawan Tuhan. Kiniulin Dibata ibalas alu jungut-jungut, penghianatan, ras nimbak kai siiperentahken Dibata. Terlebih tupung Musa nangkih ku deleng Sinai guna ngaloken 10 Perentah Tuhan, ije pe bangsa Israel ngelawan Tuhan dingen erbahan ceda ate Dibata alu erbahan gana-gana Lembu emas guna jadi sembahenna. Janah kidekah perdalanen i gurun pasir lalap nge idah Musa uga mekeng dingen lalap berontak man Tuhan. Menam kal ikernepken Tuhan bangsaNa erkiteken rawaNa ras cedana ate Tuhan nandangi bangsa Israel, tapi erkiteken erjimpuh dingen ertoto Musa man Tuhan emaka la surung idabuhken Tuhan ukumen ngkernepken bangsaNa (bdk. Ul. 9:1- 10:11)

Perikop si jadi ogen PJJ nta enda, Ul 10:12-22 isina eme pidato Musa man bangsana kerna kai siituntut Tuhan ibas bangsaNa nari. Janah berdasarken isina banci si idah maka lit dua pokok tuntuten ras pengajaren ibas Dibata man bangsa Israel, eme:

1. Ncidahken keleng ate man Tuhan alu : Erkemalangen dingen ersembah man Tuhan, ndahiken kerina perentahNa alu bulat ukur dingen ngikutken kerina Undang-undang Tuhan ( Ay. 12-15). Musa mpersingeti bangsana maka Dibata Israel belinen dingen ganjangen asangken kerina dibata-dibata si deban emaka arusna bangsa enda setia dingen lanai nembah man dibata-dibata si deban seyakatan man Dibata saja ngenca.
2. Ndalanken kebujuren ras ncidahken keleng ate man sapih-sapih manusia, sebab bage me biak Dibata si isembah bangsa Israel, si tetap bujur ibas kerina perbahanenNa dingen ngkelengi anak melumang, diberu balu-balu ras kalak pertandang. Jadi kai siituntut Dibata man bangsaNa eme usihen ibas biak Dibata sendiri, adi Dibata pe bujur ibas kerina perbahanenNa dingen la rayo-ayo ras kepade dingen mediate nandangi kalak si terpinggirken, emaka bangsaNa pe arus ngelakoken si bage rupana (ayat 18). Erkiteken bangsa Isrel pe nggo ngenanami uga suina jadi kalak pertandang i Mesir, emaka iperentahken Tuhan bangsa enda pe kepate, mediate ras ncidahken solidaritas man kalak si bage. Si imaksud kalak pertandang ijenda eme: kalak asing (di luar bangsa Israel), para pengembara si umum kal ijumpai ibas masa si e; kalak pertandang tupung paksa si e jadi kelompok masyarakat si sangat rentan kal ngenanami tindak kejahatan ras perlakuan la adil.

Aplikasi :

Kegeluhen beragama dingen erkiniteken man Tuhan arusna maba dampak ras perubahen geluh si signifikan ibas kegeluhen setiap kalak si tek. Dampak si teridah arah uga ia membangun relasi ras Tuhan bagepe ras temanna manusia. Janah enda me penekanen pengajaren si isehken arah pengogen PJJnta Ulangan 10:12-22.

Erkiniteken dingen erkeleng ate man Tuhan secara vertikal arusna berdampak ras berbanding lurus kubas relasinta secara horizontal nandangi temannta manusia. Keleng ate man Tuhan mabai kita ngasup mediate, kepate ras nehken keleng ate man kalak si deban, terlebih kalak si terpinggirkan, golongan kaum yang “termarjinalkan” si rentan ndatken perlakuan si la adil ibas masyarakat, bagi anak melumang, diberu balu-balu, kalak musil dingen pertandang.

Tuntuten ras perentah Tuhan man bangsa Israel ibas zamanna, enda pe tetap berlaku man banta genduari selaku umat Tuhan ibas zaman enda. Sue ras Tema PJJ nta “Ndalanken Kebujuren” , maka arah ogenta kita iajuk guna tetap nggeluh erkemalangen man Tuhan, nembah Tuhan ras ndalanken kerina siiperentahkenNa. Tandana kita erkemalangen dingen ngkelengi Tuhan, arus maka teridah nyata arah perbahanen ras pengkebet geluhta alu ngasup nehken kekelengen man kalak si deban sebab labo tuhu kita ngasup ngkelengi Tuhan si la teridah, adi temanta manusia siidah kita saja pe la terkelengi kita (bdk. 1 Yoh.4:20). Ibas gerejanta GBKP nggo lit ibentuk unit-unit Pelayanen Diakonia sebagai tanda maka gerejanta peduli ras fokus kubas dahin-dahin Pelayanen Diakonia, antara lain eme: PAK Gelora Kasih, PPOS, YKPD ALPHA OMEGA, Komisi Pelayanan HIV AIDS & NAPZA,Yayasan Ate Keleng, CUM, melalui unit-unit pelayanen enda me sicidahken ras sisehken kepedulian ras keleng ateta man kalak si kesusahen.

Mari si dukung tentuna unit-unit pelayanen Diakonia siikelola gerejanta GBKP enda alu ikut muat bagin tiap-tiap tahun mereken penampat man kerina kekelengenta si man sampaten si lit ije. Bagepe marilah si nehen ku sekelewetta, nterem kal kalak si membutuhken uluran tangan kita: kepatelah kita nandangi kalak si muas, melihe, si kelungunen, si ngenanami kiniseran ras kesusahen si lit i sekelewetta, sebab kai silakoken kita man kalak si bage ncidahken kualitas kiniteken ras keleng ateta man Tuhan, bagi kai si iajarken Yesus arah perumpamaanNa ibas Matius 25:40 : “Kai siibahanndu man sekalak si musilna ibas seninangKU enda, eme si tuhuna perbahanenndu man bangKU” .

Semangat Berdiakonia, Semangat ibas nehken kekelengen, Tuhan si masu-masu.

                                                                                    Pdt Jenny Eva Karosekali STh.M.Min

                                                           GBKP Rg. Harapan Indah