SUPLEMEN PJJ TANGGAL 16-22 JUNI 2024, ULANGEN 16:9-12
Tema :
Kubereken Si Metunggungna
Teks :
Ulangen 16: 9 -12
Tujun :
- Meteh erti ras makna kerja rani rikutken teks
- Ergiah-giah nehken kerja rani alu metunggung
Kata Perlebe
Kerja rani ntah pe pesta panen eme salah sada program si enggo rutin ilakoken itengah-tengah gerejata GBKP enda. Ibas dahin enda kita nehken ulih peraninta, ulih pendahinta simehulina guna ipersembahken ku rumah Tuhan.
Ibas berngi enda sope sidahiken dahin e, ilayasi lebe man banta kerna dahin e, segelah mbages pengangkanta kerna dahin e, janah ngasup kita nehken simetunggungna man Dibata.
Mpebagesi teks
Kitab Ulangen 16:9-12, eme perentah si ibereken Tuhan nandangi kalak Israel arah Musa kerna kerja rani. Aturen ibas padan si ndekah kerna dahin enda eme: beligai 7 minggu I bas kam menaken rani gandumndu, jenari harus irayaken kerja rani e, tujunna eme guna mpehagaken Tuhan, ibas kerina kiniulin Tuhan si enggo masu-masu bangsa enda.
Dahin enda, nginget uga nai bangsa Israel i taneh mesir jadi budak kalak mesir, 430 tahun bangsa enda ringan I mesir janah tupung paksa sie kadena pe labo lit.
Ibas perkuah ate Tuhan nandangi bangsana, bangsa Israel ibaba Tuhan ndarat I mesir nari, jangan itamaken Tuhan bangsana ringan I negeri Kanaan, negeri s idem alu susu ras madu. Erbage-bage pasu-pasu Tuhan isehken Tuhan nandangi bangsa enda, alu bage maka guna nginget sie kerina, kenca dung peranin, bangsa enda la banci lang erbahan pesta peranin, gelah arah pesta end ape iinget bangsa enda maka kegeluhenna tuhu-tuhu enggo ipasu-pasu Tuhan.
Bagepe pesta enda, itujuken gelah baik e kalak lewi, kalak pertandang, ras diberu mbalu-mbalu si tading ije banci radu ras ermeriah ukur nggejapken pasu-pasu Tuhan e pe man bana. Sebab kalak enda, kalak lewi, kalak pertandang, bagepe diberu mbalu-mbalu lalit tanehna.
Jenari ibas nehken kerja rani e, isingetken maka harus ipersembahken: si 1 eme alu keriahen ukur jenari si peduaken, Buena rikutken uga Buena pasu-pasu Tuhan e si ibereken Tuhan man tiap-tiap jabu.
Pengekenaina
Itengah-tengah gerejata, enggo itetapken maka ulih kerja rani e, ibagi dua, 40% isetor runggun ku moderamen GBKP, si tujunna eme guna menunjang kerina dahin-dahin ibas moderamen GBKP. Jenari si 60% tading ibas runggun guna menunjang kerina dahin pelayanen ibas runggun.
Labo baci sipungkiri maka arah dahin kerja rani enda, jadi salah sada sumber pendapaten terbesar gerejata. Janah adi la kita terkendala kerna keuangan, tentu pelayanen-pelayanen pe baci terbuen silakoken.
Misalna, itengah-tengah gerejata, mbue denga kel runggun-runggun si membutuhken pandita, hanya kengasupen keuangen gerejata ibas tiap tahunna hanya ngaloken 20-30 kalak vikaris ngenca. Terbatas kel kengasupen keuangen gerejata guna memenuhi dahin enda.
Alu bage maka, ibas minggu enda ipersingeti kita, janah iajuk kita gelah si sehken persembahen kerja ranita si metunggungna ku Dibata. Metunggung tentu labo ngerana soal jumlah, tapi ketutusen bagepe ketulusen pusuhta ibas nehken persembahen e. isingetken man banta maka ibas nehken persembahen e ula alu pusuh si jungut-jungut, tapi ibas keriahen ukur.
Janah situhuna pasu-pasu e, ulih peranin e enggom leben ibereken Dibata man banta, kita hanya ngulihken si jadi sikerajangen Dibata saja nge. Sigejapkenlah maka adi labo bekas pasu-pasu Tuhan kegeluhenta, labo mungkin sialoken kerina kinilitennta.
Selamat nehken Persembahen kerja Rani si metunggungna man Dibata.
