Invocatio :

Adi kam ngerana ula sitik pe belasken cakap si la erturi-turin.
Tapi kata- kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa (Epesus 4:29).

Ogen :

Kuan-Kuanen 1:7-10

Tema :

“Jabu Si Megermet Ndalanken Si Ngena Ate Dibata”

1. Kata Perlebe
Kalak si nuan tentu ngarap ia gelah si isuankenna e turah mejile ras erbuah. Labo ise pe si nura gelah si isuanna e la erbuah. La terjeng erbuah saja, tapi meramis dingen entebu. Meramis ka dingen manis ka. Bagi sinuan-sinuan e, bage me pe arapen Dibata ras arapenta kerna jabuta. Gelah jabu si ipanteki kita jadi jabu si erbuah. Erbuah kata, pedah, peringet, pergegeh si nibelas subuk ibas diri bapa, nande ras anak-anak i tengah-tengah jabu. Erbuah ertina ibegiken, itinggelken, ipegejapken dingen idalanken ibas geluh si tep-tep wari. Megiken kata dingen ndalankenca enda me si imaksud erbuah.

2. Isi
Kerina arus metinggel ope pedas ngerana, apai ka sukah merawa (ayat 19-21) Surat Jakup igelari pe surat hikmat ibas Padan Simbaru. Ikataken surat/ kitab hikmat, erkiteken ibassa mereken nasehat/ pedah si banci minter ipakeken ibas kegeluhen si tep-tep wari. Ibas ayat renungenta Jakup mereken pedah praktis kerna megi dingen ndalankenca. Tuhu kerina manusia termasuk kalak si tek jumpa ujin dingen percuban (ayat 12-18). La man sungkunen apai ka man gogon engkai maka kita ikenai ujin ras percuban. Si penting uga ngalaken ras menyikapisa. Nina Kata Dibata si ipeseh Jakup maka kerina kita arus metinggel.

Tupung ujin ras percuban reh man banta, lit 3 kebiasan ras perbahanen si mehuli perlu ibas ngalaken ujin ras percuban eme sipemena, kerina arus metinggel. Begiken dingen dengkehkenlah lebe. La kap pentar adi kita mis ngerana sipe si tinggelken. Lenga si begi kai sababna, kai urat masalahna, kai latar belakangna, ras uga konteksna jenari minter kita ngerana la kap mehuli ras payo. Maka pentar, tinggelkenlah lebe. Tinggelken arah erbage-bage mbelah pihak nari. Mari kerinalah kita, ula lit si tading-tading ras nadingi ibas metinggel. Kerina kita iperentahken arus metinggel. Kata ‘arus’ ertina wajib, labo pilihen. Nina kuan-kuan Melayu, “Pikir dahulu pendapatan, sesal kemudian tiada berguna. Jiwa kuan-kuan enda ngataken gelah si tinggel lebe ibas persoalen si lit.

Gelah ola terjadi erkadiola. Ngerana ntah muat sada tindaken ope ninggel ras metinggel erbahanca reh serbutna masalah si lit. Sipeduaken, ola minter ngerana (lambat berkata-kata). Minter ngerana labo ndungi masalah ras perbebenta. Ukuri lebe alu teneng ras mbages. Litkenlah ras bahanlah paksa teneng. Ukurilah kai kira-kira nina Tuhan man banta kerna kecibal si lit e. Jenari tentukenlah kai cara si mehulina si man bahanen sope kita ngerana. Sipeteluken, ola sukah merawa. Ula pediat emosita engkuasai kita, tapi kitalah engkuasai emosita. Adi emosita engkuasai kita emosi e nentuken perbahanenta. Lanai akal sehatta si erkuasa. Emaka kuasailah emosindu, gelah perbahanenta pe terkuasaita (bdk invocation Ep. 4:29). Ola merawa ras sukah merawa jadi kebiasanta. Ingetlah, si biasa e lenga tentu mehuli; si mehuli e nge si man biasanken. Adi kita merawa, sukah merawa, biasana lanai bo si ukuri kai si man belasenken ras man bahanen. Piah kai si ndarat ibas babahta nari lanai bo si mehuli dingen pehuliken. Misalna ndaraten kata-kata rubia-rubai i si lit i Ragunan. Dungna sakit hati pasangenta ras anak jabuta. Banci merawa, tapi ula erdosa. Ola kal bapa, nande (orangtua) ras anak minter ngerana, ngeranai ras sukah merawa kune jumpa persoalen ras masalah. Ola masing-masing minter menempuh jalan sendiri. Tenenglah, jenari begikenlah alu manjar-anjar. Begiken ibas erbage pihak nari. Libatken Tuhan ibas kerina keadan jabu. Sungkun Tuhan kai si arus si dalanken ras si dahiken ibas situasi si bage rupana.

Ola megi-megi saja tapi dalankenlah (ayat 22-24)
Megi eme sada langkah si mehuli tapi lenga bias. Apai ka terjeng megi-megi ngenca. Memang ulin megi asangken la megiken. Tapi adi terjeng megi ngenca jenari labo idalanken e labo mehuli. Begikenlah alu mehuli, begiken alu payo, ras begiken alu ndeher (mendengar dari dekat). Adi si begi alu mehuli ras ibas ndeher nari maka jelas kap pemegita, si begi alu utuh, lengkap. Kenca si begi, jenari siksikilah (evaluasilah). Alu bagenda me maka kita menghindar ibas itipu kalak. Selain gelah ula kita itipu kalak, kita pe perlu metenget gelah ula kita nipu banta alu terjeng megi-megi saja. Banci ninta bas ukurta kita pengikut Tuhan Jesus kap erkiteken si begi KataNa. Tapi ingetlah bahwa kita labo pengikutNa adi lenga si dalanken kataNa (bdk. Joh. 14:23; 15:10-12). Arus maka si begi dingen si patuhi pedahNa.

Kalak si megi-megi saja tapi la idalanken desken kalak si ercurmin kap. Kalak si ercurmin jenari dung ercurmin tentu minter lupa uga ndai rupana e. Apai ka ndai ercurmin ia tupung erpagi-pagi tentu nggo ndauh kal beda rupana kenca ben wari. Megi penting, tapi la kap bias. Lit 2 cuping 1 babah. 2 tan ras 2 nahe. Ertina, kenca buen kita megi jenari marilah kita ndahikenca ras ndalankenca. La ngadi terjeng megi-megi saja tapi seh ku bas perbahanen. Begi + dahi = jadi mehuli.

Si mperdiateken ras mpergermetken Kata Dibata ipasu-pasuNa (ayat 25)
Kalak si mperdiateken pedah Dibata dingen terus mpergermetkenca, la terjeng megi-megi saja, kalak si bage ipasu-pasu Dibata kap ibas kerina pendahinna. La berarti kerina dahinta rasil, rulih ras kerina kena regana. Tapi bageme nina Tuhanta. Pasu-pasuNa me pendahin anak-anakNa. Ingetlah biak Kata/ pedah Dibata e: serta kap, ngasup mbebasken manusia, ras ngasup nelamatken manusia (ayat 21b).

Temata nina, “Jabu Si Megermet Ndalanken Si Ngena Ate Dibata”. Perdiatekenlah Kata Tuhan jenari terus pergermetken guna dalankenca si ngenaa ateNa. Kerina kita ersura-sura gelah ndatken ras ngaloken pasu-pasu Tuhan. Jabuta ipasu-pasu, kesehatenta ipasu-pasu, pendahinta ipasu-pasu, anak-anakta ipasu-pasu subuk ibas sekolahna, pendahinna, pergaulenna ras masa depanna. Kunci gelah jabuta ipasu-pasu Dibata eme alu mperdiateken Kata ras pedahNa ras terus mpegerketkenca guna ndalankenca. KataNa jadi tendang kegeluhenta, jabuta dingen pendahinta kerina (bdk Masmur 119:105).

Kata Perpudi
Megi, metinggel perlu ras penting. Megi la sembarang megi, terlebih megi Kata ras pedah Dibata. Tapi megi-megisa saja la cukup ras mehuli. Maka mehuli, megi, ukuri jenari ndalankenca ibas kegeluhenta si tep-tep wari. Perdiakenlah KataNa, pegermetken guna ndalankenca. Ketuahen kalak si megiken KataNa dingen si makekenca ibas geluhta si tep-tep wari (Lukas 11:28). Inget ya, tep-tep wari, ula sung ntah pe engkelangi, amin.

Pdt. Juris Tarigan, MTh
Runggun Depok-Lenteng Agung

Invocatio :

“Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13)

Ogen :

Rut 2:8-9

Tema :

Jabu si Ermalem Ate

PERLEBE
Kemalemen ate (bahagia/sembuh/selamat/damai sejahtera) jadi daramen tiap jelma. La saja gelahna jadi keriahen man dirinta jine, tapi banci ka min igejapken kalak si deban khususna itengah jabu. Sabab jabu jadi ingan erlajar sipemenana ibas kegeluhen manusia. Ibas jabu sipelajari orat nggeluh, meteh mehuli, ngangkai cara nggeluh ras kalak si deban, sihamaten, sikelengen-kelengen ras nandai Dibata alu tuhu-tuhu. Emaka pengajaren ibas jabu arus erpalasken pengangkanna kerna ulu kemalemen ate si reh ibas Dibata nari, gelahna kerina isi jabu banci ndatken ertina ras ndalankenca alu payo.

Tantangenna, melala jabu si enggo kebenen erti ermalem ate. Salah sadana adi si nin ibas kegeluhen jaman gundari, melala jabu si enggo ndauh ibas biak ras palas kekelengen. Tep kalak enggo nggeluh ibas kepentingenna sekalak-sekalak. Anak la mehamat man orang tua, bagepe orang tua kurang mereken perhatin ras keleng ate man anak, bagepe sapih-sapih ersenina turang si melala lanai jadi teman arih, tapi imbang rubat. Ibas sie me pekan keluarga GBKP mabai penggertin man banta erti kemalemen ate ibas jabu eme nggeluh sikeleng-kelengen, ibenaken ibas jabu bagepe man kalak si deban.

ISI
Rut 2:8-9, biak keleng ate ipake Rut ibas kegeluhenna si teridah arah kehamaten ras kesetiaanna nandangi bibi/simetuana Naomi. Kenca itadingken perbulangenna, Rut enda permen Naomi si ngikut bibina seh ku kuta kemulihenna bagepe erpadan nembah Dibata siisembah Naomi (Rut 1:16). Rut mindo man bibina gelah banci lawes ku juma mumahi ruhi gandum gelah cukup pangan man bana duana. Lawes ia ku juma Boas, sekalak bayak si lit denga perkade-kadenna ras Naomi. Ije me perjumpan Boas ras Rut. Boas nampati Rut arah mereken ijin man bana mpepulung gandum, radu ras erdahin ras si ngemo. La saja sie, Boas pe njamini Rut gelah ola ise pe ngasgasi ia. Dikune muas pe banci Rut minem ibas bagin sierdahin.

Adi silanjutken ayat 11-12, eme jadi alasen engkai maka turah ukur Boas nehken keleng ate man Rut selaku ia diberu pertandang. Eme kerna enggo ibegi Boas kiniulin ras kesetianna si ibahan Rut nandangi bibina. Emaka tek Boas, Tuhan pe ersimulih ibas perbahanenna si mehuli e. Upah ras pengkawali Dibata jadi bagin kalak si erbahan bujur. Bageme si ilakoken Boas pe, maka kekelengen ras kemalemen ate sampur ku tengah kegeluhenna. Tek Boas, kiniulin si banci isehkenna jadi bagin Rut ras Naomi, siicukupken Dibata kerna nggeluh ia erpalasken keleng ate. Boas jadi perpanjangen tan Tuhan nehken kekelengen mperdiateken kegeluhen sapih-sapih ia.

Lukas 14:12-14, Ibas bagin enda Yesus mereken pengertin cara/sikap kegeluhen gelah kemalemen ate jadi baginta. Alu perumpamaan biak temue si reh ku kerja erdemu bayu, Yesus mereken kritik man kalak Parisi si rusur ibas kiniganjangen ukurna ngayaki kehormatan arah manusia tapi la ndalanken si ngena ate Tuhan. Kerja erdemu bayu ibas tradisi Jahudi cukup penting. Ibas sie pe labo erbahanca lit biak meganjang ukur, tapi mpeteruklah banta sada ras si debanna gelah Dibata si mpehagasa.

Bicara ibahanndu kerja suari ras berngi ula undang kalak si bayak gelah ula ia ersimulih man bandu. Tapi undanglah kalak musil, cempang, pangpangen ras pentang. Maka malem tuhu-tuhu atendu sabab la ia ngasup ersimulih man bandu. Dibata nge pagi ersimulih man bandu ibas wari kekeken si benar. Ije me Yesus mereken pengertin gelah sikap meteruk ukurta iadepen Tuhan banci teraplikasi ibas erdiate ras keleng nandangi kalak si deban khusuna man si kekurangen. Alu sie idatken kemalemen ate, sabab labo siarapken ulih arah manusia, tapi Dibata kap. Kegeluhen seh rasa lalap isikapken Dibata man kalak si nehken keleng ate sapih-sapih ia. Sabab bage me perentah Dibata man banta.

PENGKENAINA
Arah bahan ibas pekan wari si peduaken enda, salah sada bentuk ‘jabu si erbuah’ (tema umum pekan keluarga 2019) eme jabu si ngejapken kemalemen ate. Sie banci idatken adi kerina isi jabu nggit sinergi/sendalanen guna menciptakan situasi ibas malem ate. Palasna eme sapih-sapih isi jabu erkeleng ate. Sebage bapa, nande, anak-anak la lit si ndauh ibas pendalanken Kata Dibata. “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13).

Sisehkenlah tanda ate kelengta, bagi kegeluhen Naomi, Rut ras Boas. Masing-masing ia mereken peran si nggit engkelengi kalak si deban. Naomi keleng atena Rut ibas mereken petunjuk ibas kai si ate Rut idalanken. Rut pe nampati ncukupken keperlun geluh alu nggit erdahin mumahi ruhi gandum. Boas pe icidahkenna keleng ate mereken Rut kesempaten erdahin ibas jumana janah mereken perlindungan man Rut. Sie kerina reh ibas palas kekelengen. Janah ibas pendalankenna, tentu igejapken kemalemen ate si ibereken Tuhan jadi ulih siilakoken man kalak si deban.

Adi isi jabu enggo banci erkeleng ate maka kemalemen pe jadi baginna sekalak-sekalak. Dibata si ersimulih nandangi kekelengen si erbuah arah pengerana, perukuren ras perbahanen. Sebage bapa ras nande banci engkelengi temanna nggeluh ras anak-anak alu tanggungjabab sebage usihen. Anak-anak pe keleng atena pedah kata ras keberadaan orangtuana uga litna. Ngasup ngaloken kondisi jabu alu mpekena perbahanen si lepak, mpersingeti ras ngalemi salah, mperjuangken si benar, erdiate janah mesayang.

Jabu si ermalem ate pe banci naksiken geluh si sempabu, janah kemalemen e la saja igejapken man isi jabu. Kemalemen ate teridah ras tergejap ka man sekelewetna. Turah kininggiten nampati kalak si deban, erdiate, erpemere alu keriahen ukur/tulus. Subuk man kade-kade seh man kalak si la itandai pe. Banci naksikenca itengah masyarakat gereja bagepe ku si lenga nandai Tuhan. Kerna arah keleng ate siisehken e, kemalemen ate maler ku sekelewetna. Eme si jadi kesaksin pe nandangi keleng ate Tuhan. Sabab Dibata nge mereken ulih perbahanen arah kemalemen ate man si nggit ndalankenca. Kemalemen ate ibas kegeluhen seh ku paksana pagi wari kekeken kalak si benar. Amin.

Pdt. Deci K. Br Sembiring
Runggun Balikpapan

Khotbah :

Mazmur 1:1-3

Thema :

Jabu si erbuah

1. Kata Perlebe
Tanggal 17 seh tanggal 23 november kita ngelakoken pekan kebaktian keluarga GBKP. Emaka ibas program pekan keluarga enda si terahir kegiatan sinilakoken ibas sector ras gereja enggo si akhiri, eme kegiaten 2019. Kenca dung pekan keluarga enda kita memasuki persiapen Natal ras pe kegiaten Natal. Emaka jumpa ka pagi kita ibas tahun 2020 si benaken ka pagi kebaktiaa Pekan Penatalayanen. Tahun enda Gerejanta GBKP ngakat Thema Umum Pekan Kebaktian Keluarganta eme : JABU SI ERBUAH.

Nina Tuhan Yesus : Adi melala buah ndu, kam me ajar-ajarku. Johanes 15:8a, arah temanta Pekan Keluaraga enda ngajak gelah kerina jabu-jabu kalak Kristen (warga GBKP) erbuah min ia, tentuna hal banci teridah kuga keluarga-keluarga ndalanken tanggung jawabna itengah-tengah jabu bagepe masyarakat. Enda banci teridah arah perbahanenta, bagi nina Yakobus : Adi kiniteken labo sue rikut ras perbahanen, kiniteken sibage mate kap (Yakobus 2:17b). Emaka arah pekan keluarganta tahun enda kerina warga GBKP banci ncidahken ras ndatken kai si mehuli, erguna ras ngena ate Dibata ibas kegeluhenna wari lepas wari.

2. Uraian nats
Mazmur pasal 1 enda eme Mazmur, sila itulisken na ise si nuliskenca, bagi Mazmur-mazmur si debanna. Tapi amina gia lalit gelar penulisna, tapi tek kita maka si nulisken Mazmur enda eme kalak si nggo tek man Dibata, janah enggo i dahna ras gejapkenna kuga perbahanen dibata e man ia, janah enggo inanamina kuga Dibata erbahan ras nehken si mehuli nandangi anak-anakna si enggo i tebusina guna ndalanken ras nehken si mehuli. Mazmur enda ibere judul kemalemen ate si tuhu-tuhu, adi ioratikal kerina manusia, baik si enggo eragama bagepe si la eragama, baik kita Kristen, kai nge si man ayakenndu bas geluh enda..?

Pasti jawabna guna ndatken kemalemen ate. Sebab kemalemen ate enda la kal tertukur seh ijange batas-batasna. Lit deba i ukurna arah kesehaten jasmani, lit deba i ukurna arah sukses pendidiken, sukses pendahin, lit deba i ukurna arah melala harta. Erbage-bagelah ukuren kemalemen ate. Bas Bahasa Indonesia i pakena kata berbahagia, seri ras si pake Yesus ibas awal khotbah i datas uruk, ipakena kata berbahagia, janah lit 8 kali ikatakenNa ukuren berbahagia enda. Tapi Bahasa karo i pakena alu kata ketuahen. Tapi akap kami kata bahagia e seringe ras kemalemen ate tah pe ketuahen, tujuanna eme ija kita jumpa kesangapen bagi nina kalak Karo : merih manuk ni asuh, mbuah page ni suan, jumpa matawari ras bulan, sehat jasmani ras sehat rohani, sempurna.

Tapi adi siperdiateken Mazmur 1:1-3 enda ndai lalit singgungna kerna : harta, tahta, dan kuasa, bagepe la singgungna bayak namura sehat jasmani. Emaka nina : malem me / berbahagialah kalak :
a. Si la megiken pedah kalak jahat
b. Si la ngusih perbahanen kalak perdosa
c. Si la erteman ras kalak si menggobang man Dibata. (ayat 1).

Nina per Masmur lit 3 kata kerja eme : sila megiken, si languish, ras si la erteman. Jabu si erbuah e , eme sitetap megiken, kata Yesus , ngusih perbahanan Yesus, ras tetap erteman/ bergaul ras Tuhan Yesus, anak-anak Yesus. Sepanjang kegeluhenna maka ia tetap erbahan simehuli, sebab keluarga Kristen eme sira ras terang (Matius 5:13-16) Ia tetap jadi saksi ras ersaksi, Doni enda gundari melala kal banci mabai kita papak, erkiteken ngikutken kai sini itawarken iblis (orang pasik – Ind)

Adam ras Hawa, ndabuh erkiteken megiken kata /tawaren iblis, erdosa ia (Kej 3) . Tapi Yusuf, Yesus la megiken kata iblis emaka ia jadi pemenang (Kej 39:8-10: mat 4 :1-11). Yusuf menang, Yesus menang, emaka kit ape jadi pemenang. Bagepe kita lanai ngusih-ngusih perbahanaen kalak perdosa , misalna : nangko, judi, selingkuh, pergaulan bebas, malas, ermusuhen ras sidebanna. Ras kitape harus menghindari dirinta/ anak jabunta ras kalak si megombang man Dibata, nina Paulus, dahinna perbau bau Dibata saja, emaka kalak enda enggo iindesken man iblis (1 Tim 1 ).

Biasana batang kayu e adi i tepi lau ia turah lalap meratah bulungna, erkiteken ia la kekurangen lau. Bagepe kita adi kita tetap nggeluh ras Yesus (lau kegeluhen) e maka kit ape tetap segar Rohani ras segar jasmani. Janah la ngenca turah, ras meratah bulungna , tapi pe erbuah kai a ibas musimna, katawari kita perlu je reh penampat, bagi Yesus ras ajar-ajarNa i Danau Galilea paksa angina ribut i pengadi Yesus. (Markus 4:35-41). Ajar-ajar si reh ras Yesus mpemedak Yesus, emaka i sergangi yesus lau ndai mis tenang.

Kalak si rembak ras Yesus la ia pernah aru ate (khawatir), sebap enggo ikataken lau kegeluhen e (Yesus), ula aru atendu, aku ras kam seh kedungen zaman enda (Mat 6:25;28:20). Janah sangap ibas kerina pendahinna, hal enda jelas maka kita hanya berusaha. Erdahin ras erbintuas, janah si erbahanca erbuah eme Dibata. Inget : totoken dahindu, dingen dahinken totondu, adi bagenda perlakuan bas geluhta tep-tep wari, kita i pasu-pasuNa bagi setiap kita dung ibadah, ngaloken pasu-pasu idur Dibata nari (Bilangen 6:24-26)
3. Renungen
a. Jabu si erbuah eme jabu si tetap nggeluh ngikutken kerina kai si iajarken Yesus man banta.
b. Jabu sienggo erbuah eme harus buahna entebu, dingen bancika inanami kalak si deban ibas kegeluhen enda
c. Buah si entebu ge , maka banci mabai anak jabu bagpe kalak sideban gelah banci erbuah.
d. Bergaulah ras Tuhan bagepe ras anak-anak Tuhan
e. Lawanlah kuasa jahat, alu makeken kuasa Tuhan Yesus Kristus

Selamat Pekan Keluarga
Pdt Andarias Brahmana
Ketua Klasis Jakarta Kalimantan