SUPLEMEN PEKAN DOA GBKP 2022 WARI III, MAZMUR 71:5-6

Invocatio :

"Kupindo man Dibata gelah italangiNa pusuh peratenndu gelah terang pengangkanndu.Alu bage banci ietehndu kai si banci iarapkenndu i bas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak- anakNa. (Epesus 1. 18)

Khotbah  :

Masmur 71. 5-6

Tema  :

Ertoto Ras Erpengarapen

 

A. BENA KATA

Judul perikop Masmur 71 enda, “Pertoton kalak si nggo metua.” Bagi nina bas ayat 9, “Tupung aku  nggo metua ula min buangNdu aku, ula aku itadingkenNdu adi nggo keri gegehku.”

Masmur enda ibas piga-piga cataten ningetken maka sinuratkenca eme Daud. Tapi lit ka sumber sideban singatakenca maka enda Masmur si itulis Yonadab bage pe lit ka si nuratkenca maka Masmur enda itulisken angkaten si pemena si nggo ndarat bas pembuangen nari (Tafsir Kitab Mazmur 1-72; Marie Claire Barth dan B. A. Pareira, hal.625) tapi intina Masmur enda eme mindo gelah Tuhan mperdiateken ia ibas kiniseranna terlebih-lebih ibas umurna si nggo metua.

Ope denga nas khotbahta ibas ayat 1-4 lit piga-piga hal penting si isehken Pemasmur man Tuhan.

1. Tuhan me inganna cicio dingen jadi benteng si nteguh (1,3).

Kam kap Tuhan inganku cicio si aman jadi benteng si nteguh ras jadi kubu pertahanen. Igejapken Pemasmur maka Dibata nge si ngasup ngkawali kegeluhenna ibas kebiarenna nari.

2. Pemasmur mindo gelah kebujuren Tuhan jadi ibas geluhna (2,4).

Bebasken min aku sabab bujur kap kam, dengkehken min aku janah pulahi min. I bas ise nari Pemasmur mindo ipulahi eme I bas kuasa kalak jahat dingen si kejam. Adi ngerana kerna Tuhan bujur ertina maka kalak si salah la banci lang iukumna janah kalak si bujur la  banci lang ibebaskenNa dingen isampatiNa. E maka adi nggo pang Pemasmur mindo gelah Tuhan si bujur e bertindak maka ia nggo yakin maka bas peristiwa si adapina labo lit ibahanna si jahat ntah pe si la mehuli.

 B. PENJELASEN TEKS

Arah nas khotbahta banci sirenungken piga-piga hal:

1. Tuhan kap ingan pengarapen.

Kam kap pengarapenku, man baNdu kap aku ernalem kitik-kitikku nari. Ngkai maka Tuhan ijadiken Pemasmur inganna erpengarapen sabab nggo itandaina Dibata ibas kitik-kitikna nari arah pengalamen kegeluhenna. Janah Dibata e erkuasa guna mulahi ibas kebiaren nari kalak si erlebuh ertoto man baNa. Man baNdu kap aku ernalem kitik- kitikku nari, ertina ibas usia si nguda denga Pemasmur nggo ernalem erkiniteken man Tuhan janah nggo idahna perbahenen Tuhan ibas geluhna. E maka tetapkal ukurna erpengarapen man Tuhan sabab Tuhan ngasup mulahi ia ibas kebiarenna nari, ibas musuh-musuhna si rusaha erbahan si jahat ntah munuh ia. Man bandu aku ernalem kitik-kitikku nari enda ngatakenca maka nggo teruji ibas ibas geluhna maka Dibata ngasup nampati ras mulahi ia ibas kerina kebiarenna.

2. Tuhan kap sekawal situhu-tuhu

Mulai tubuhku ndube ku Kam aku ertunande, i kawaliNdu aku mulai kin i bas bertin nandengku nari e maka lalap Kam kupuji. Dibata si itandai Pemasmur eme Dibata si nggo ialamina bas geluhna Dibata si nggo rusur ncidahken kuasa ras keleng ateNa ibas ngkawali Pemasmur baik bas musuh- musuhna nari bage pe I bas erbage-bage kebiarenna nari.

Ungkapen Pemasmur mulai kin tubuhku ndube, mulai kin bas bertin nandengku nari negaskenca maka ibas segegdang-gedang geluhna Dibata inganna ertunande, Dibata sekawalna si tuhu-tuhu.

C. APLIKASI

1. Nina tema-ta ibas berngi III enda: Ertoto ras Erpengarapen.

Ertoto ras erpengarapen dua hal si labo banci sirang ibas kegeluhen kalak si erkiniteken. Ertoto eme sarana kalak si erkiniteken reh ndahi Dibata, nuriken pemindon, nuriken pengarapen ras banci pe ngataken bujur ras sidebanna. Pengarapen eme si suraken kita jadi bas geluhta. Pengarapen enda ngerana kerna masa depan, masa si reh si ateta isehken Tuhan man banta. Adi Pemasmur ijenda ku Tuhan ia ertoto nehken pengarapenna gelah ipulahi Tuhan min ia ibas musuh-musuhna nari, ibas kalak jahat nari. Ikawali Tuhan min ia gelah ula she sura-sura musuh-musuhna janah mindo pe ia gelah Dibata nehken kebujurenNa nandangi kalak si rate segat man bana.

Tentu ibas paksa enda selaku kalak si erkiniteken pe labo banci lang melala pengarapenta  man  Dibata.  Umpana  gelah  anak-anak  bas  jabunta  seh  pagi kerina sekolahna, jenari dat na ka dahin si mehuli. Man anak-anakta si nggo dewasa gelah ipejumpaken Tuhan ras jodohna. Adi lit keluarganta sakit erpengarapen kita gelah ibereken Dibata kemalemen ras kesehaten si mehuli rst.

Ngkai maka kita ku Dibata ertoto nehken pengarapenta, sabab tek kita Dibata ngasup nehi pengarapenta, sabab IA Dibata si erkuasa, Dibata si nggeluh, Dibata si bujur Dibata si nggit megiken pertotonta dingen nehi pengarapenta si mehuli si tujunna guna kemulian Dibata.

Ula kal kita erpengarapen man jelma (Jer. 17.5-7) tapi ku Dibata sajalah kita erpengarapen sabab Dibata ngasup nehi pengarapenta ibas geluhta.

 2. Toto ras Pengarapen man Dibata nandangi kalak si deban.

Ibas Epesus 1:18 Kupindo man Dibata gelah italangiNa pusuh peratenndu gelah terang pengangkanndu. Alu bage banci ietehndu kai si banci iarapkenndu i bas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak-anakNa.

Arah nas enda si idah Paulus ertoto ras erpengarapen man Dibata gelah italangi Dibata pusuh peraten perpulungen Epesus gelah terang pengangkanna kerna Dibata, khususna kerna kai si banci iarapken bas Dibata nari. Jadi ijenda jelas maka toto ras pengarapenta man Dibata labo saja man dirinta ntah kerna dirinta tapi banci pe kita ertoto ras erpengarapen man Dibata kerna kalak si deban.

3. Toto, Pengarapen ras tindaken.

Kenca kita ertoto ras nehken pengarapenta man Dibata la banci lang silakoken kai si arus si bahan gelah Dibata nehi pertotonta, nehi pengarapenta.

D. PENUTUP

Toto ras erpengarapen dua hal si la banci bene bas kalak si erkinteken. Dibata me inganta erpengarapen janah si sehken man DIbata kerna pengarapenta arah pertotonta. Sabab tek kita man Dibata si dem alu kuasa ras perkuah ate dingen nggit megiken pertoton anak- anakNa. Amin. 

Pdt. Sahabat Perangin-Angin-Rgn.Pondok Gede