Khotbah :

Mazmur 1:1-3

Thema :

Jabu si erbuah

1. Kata Perlebe
Tanggal 17 seh tanggal 23 november kita ngelakoken pekan kebaktian keluarga GBKP. Emaka ibas program pekan keluarga enda si terahir kegiatan sinilakoken ibas sector ras gereja enggo si akhiri, eme kegiaten 2019. Kenca dung pekan keluarga enda kita memasuki persiapen Natal ras pe kegiaten Natal. Emaka jumpa ka pagi kita ibas tahun 2020 si benaken ka pagi kebaktiaa Pekan Penatalayanen. Tahun enda Gerejanta GBKP ngakat Thema Umum Pekan Kebaktian Keluarganta eme : JABU SI ERBUAH.

Nina Tuhan Yesus : Adi melala buah ndu, kam me ajar-ajarku. Johanes 15:8a, arah temanta Pekan Keluaraga enda ngajak gelah kerina jabu-jabu kalak Kristen (warga GBKP) erbuah min ia, tentuna hal banci teridah kuga keluarga-keluarga ndalanken tanggung jawabna itengah-tengah jabu bagepe masyarakat. Enda banci teridah arah perbahanenta, bagi nina Yakobus : Adi kiniteken labo sue rikut ras perbahanen, kiniteken sibage mate kap (Yakobus 2:17b). Emaka arah pekan keluarganta tahun enda kerina warga GBKP banci ncidahken ras ndatken kai si mehuli, erguna ras ngena ate Dibata ibas kegeluhenna wari lepas wari.

2. Uraian nats
Mazmur pasal 1 enda eme Mazmur, sila itulisken na ise si nuliskenca, bagi Mazmur-mazmur si debanna. Tapi amina gia lalit gelar penulisna, tapi tek kita maka si nulisken Mazmur enda eme kalak si nggo tek man Dibata, janah enggo i dahna ras gejapkenna kuga perbahanen dibata e man ia, janah enggo inanamina kuga Dibata erbahan ras nehken si mehuli nandangi anak-anakna si enggo i tebusina guna ndalanken ras nehken si mehuli. Mazmur enda ibere judul kemalemen ate si tuhu-tuhu, adi ioratikal kerina manusia, baik si enggo eragama bagepe si la eragama, baik kita Kristen, kai nge si man ayakenndu bas geluh enda..?

Pasti jawabna guna ndatken kemalemen ate. Sebab kemalemen ate enda la kal tertukur seh ijange batas-batasna. Lit deba i ukurna arah kesehaten jasmani, lit deba i ukurna arah sukses pendidiken, sukses pendahin, lit deba i ukurna arah melala harta. Erbage-bagelah ukuren kemalemen ate. Bas Bahasa Indonesia i pakena kata berbahagia, seri ras si pake Yesus ibas awal khotbah i datas uruk, ipakena kata berbahagia, janah lit 8 kali ikatakenNa ukuren berbahagia enda. Tapi Bahasa karo i pakena alu kata ketuahen. Tapi akap kami kata bahagia e seringe ras kemalemen ate tah pe ketuahen, tujuanna eme ija kita jumpa kesangapen bagi nina kalak Karo : merih manuk ni asuh, mbuah page ni suan, jumpa matawari ras bulan, sehat jasmani ras sehat rohani, sempurna.

Tapi adi siperdiateken Mazmur 1:1-3 enda ndai lalit singgungna kerna : harta, tahta, dan kuasa, bagepe la singgungna bayak namura sehat jasmani. Emaka nina : malem me / berbahagialah kalak :
a. Si la megiken pedah kalak jahat
b. Si la ngusih perbahanen kalak perdosa
c. Si la erteman ras kalak si menggobang man Dibata. (ayat 1).

Nina per Masmur lit 3 kata kerja eme : sila megiken, si languish, ras si la erteman. Jabu si erbuah e , eme sitetap megiken, kata Yesus , ngusih perbahanan Yesus, ras tetap erteman/ bergaul ras Tuhan Yesus, anak-anak Yesus. Sepanjang kegeluhenna maka ia tetap erbahan simehuli, sebab keluarga Kristen eme sira ras terang (Matius 5:13-16) Ia tetap jadi saksi ras ersaksi, Doni enda gundari melala kal banci mabai kita papak, erkiteken ngikutken kai sini itawarken iblis (orang pasik – Ind)

Adam ras Hawa, ndabuh erkiteken megiken kata /tawaren iblis, erdosa ia (Kej 3) . Tapi Yusuf, Yesus la megiken kata iblis emaka ia jadi pemenang (Kej 39:8-10: mat 4 :1-11). Yusuf menang, Yesus menang, emaka kit ape jadi pemenang. Bagepe kita lanai ngusih-ngusih perbahanaen kalak perdosa , misalna : nangko, judi, selingkuh, pergaulan bebas, malas, ermusuhen ras sidebanna. Ras kitape harus menghindari dirinta/ anak jabunta ras kalak si megombang man Dibata, nina Paulus, dahinna perbau bau Dibata saja, emaka kalak enda enggo iindesken man iblis (1 Tim 1 ).

Biasana batang kayu e adi i tepi lau ia turah lalap meratah bulungna, erkiteken ia la kekurangen lau. Bagepe kita adi kita tetap nggeluh ras Yesus (lau kegeluhen) e maka kit ape tetap segar Rohani ras segar jasmani. Janah la ngenca turah, ras meratah bulungna , tapi pe erbuah kai a ibas musimna, katawari kita perlu je reh penampat, bagi Yesus ras ajar-ajarNa i Danau Galilea paksa angina ribut i pengadi Yesus. (Markus 4:35-41). Ajar-ajar si reh ras Yesus mpemedak Yesus, emaka i sergangi yesus lau ndai mis tenang.

Kalak si rembak ras Yesus la ia pernah aru ate (khawatir), sebap enggo ikataken lau kegeluhen e (Yesus), ula aru atendu, aku ras kam seh kedungen zaman enda (Mat 6:25;28:20). Janah sangap ibas kerina pendahinna, hal enda jelas maka kita hanya berusaha. Erdahin ras erbintuas, janah si erbahanca erbuah eme Dibata. Inget : totoken dahindu, dingen dahinken totondu, adi bagenda perlakuan bas geluhta tep-tep wari, kita i pasu-pasuNa bagi setiap kita dung ibadah, ngaloken pasu-pasu idur Dibata nari (Bilangen 6:24-26)
3. Renungen
a. Jabu si erbuah eme jabu si tetap nggeluh ngikutken kerina kai si iajarken Yesus man banta.
b. Jabu sienggo erbuah eme harus buahna entebu, dingen bancika inanami kalak si deban ibas kegeluhen enda
c. Buah si entebu ge , maka banci mabai anak jabu bagpe kalak sideban gelah banci erbuah.
d. Bergaulah ras Tuhan bagepe ras anak-anak Tuhan
e. Lawanlah kuasa jahat, alu makeken kuasa Tuhan Yesus Kristus

Selamat Pekan Keluarga
Pdt Andarias Brahmana
Ketua Klasis Jakarta Kalimantan

Invocatio :

Alu meseksek mindo aku man ba-Ndu, cidahken bangku perkuah ate-Ndu sue ras si enggo ipadanken-Ndu
(Masmur 119:58)

Khotbah :

Lukas 18:1-8

Tema :

Megenggeng IBas Ertoto

Kata Penaruh
Enda me wari terakhir kita erbahan Pekan Doa Tahun enda, kenca iawali alu 3 wari Pra- pekan doanta tahun enda, ertina enggo melala kita ngerana kerna ertoto.

Nina Calvin : toto eme kesah kalak Kristen. Ungkapen enda ngataken man banta maka la banci kegeluhen kalak Kristen ipesirang ras toto. Adi iandingken toto e seri ras kesah e ertina berhubungen ras ‘kegeluhen’, kalak si nggeluh eme kalak si erkesah tapi kalak si la erkesah e me kalak mate. Alu bage seteh maka toto e seh kel perluna, la banci isirangken ras kegeluhen kalak Kristen.

Pelaksanaan Pekan Doanta enda salah sada eme uga maka “kita nggeluh ibas pertoton ras pertotonta e nggeluh ibas kita”, alu bage seh kita kubas tema umum Pekan Doanta :”Ersada ras Erpengarapen Ibas ertoto” alu bage kerina warga GBKP lit ibas sada hubungen rohani si iiket alu pertoton.

Tema terakhir 10 wari ertoto tahun enda eme Megenggeng i bas Ertoto, kai kin ulihna adi kita megenggeng ibas ertoto ?

Ngargari Kata Dibata
Ay. 1. Ertoto Persuruhen Jesus
Jesus selaku Anak Dibata tuhu-tuhu menyadari maka pertoton e seh kel pentingna. Mengawali pelayanen-Na kenca IA iperidiken, 40 wari-40 berngi IA membangun hubungen si intensif ras Bapa si nuruh IA (Mat.4:1-11). Jesus ibas ndalanken pelayanena si melala kel tantangen ras siman dahinken, lalap ibaba-Na ibas pertoton-Na. Sebab igejapken-Na adi la kin IA mindo gegeh ku Bapa-Na labo IA ngasup ndalanken kerina dahin penyelamaten doni enda.
Mbue ayat-ayat Alkitab si nuriken maka ertoto e persuruhen Tuhan Jesus, misalna :
- Matius 7:7 “Mindo, ndarami dingen nuktuk”
- Lukas 26:41 “Erjaga dingen ertotolah gelah ola kam ndabuh ku bas percuban. Ukur manusia mehuli kap tapi kote kap dagingna!
- Lukas 11 :5-10 “Meseksek Mindo”
- Matius 6:5-15
- Rsd

Man banta selaku pengikut Jesus seharusna kai siikataken Jesus harus si dalanken, adi lang labo kita tuhu “pengikut” si setia. Bage ka me pe ibas ayat enda Jesus ngajari ajar-ajar-Na gelah ertoto, sebab ieteh Jesus labo lalap IA ras ajar-ajar nerusken dahin pebelangken berita si meriah. Ibas dampar si deban Jesus meteh uga beratna tantangen dahin pebelangken berita si meriah e. Jesus ngajari ajar-ajar ertoto gelah ula peltep pengarapenna.
Tentu enda ka me pe si harus si dalanken selaku pengikut Kristus. Tantangen geluh wari lepas wari tuhu erberatna, baik ibas ncukupken keperlun nggeluh, buena sakit-pinakit kerina e banci berimbas kuba kiniteken, erkiteken sie “megenggenglah kita ibas eroto, lah kita pe ula peltep pengarapen (putus asa).

Ay.2-7 Hakim Si La Bujur vs Dibata Si Bujur
Mbue kalak kisat ertoto, erkiteken akapna e lalit gunana, buang-bunag energi ras waktu. Lit kalak si erpengakap kai pe teh Tuhan nge, sebab lit ka kin ayat Alkitab si ngataken maka “ope denga ipindondu enggo leben ieteh Bapandu kai si iperlukendu (Mat.6:8). Ijenda Jesus ngerana kerna uga kita arus eroto gelah ula mulih-ulih, japi mbue kalak nangkap ertina sepenggel saja, seh ia kubas sada kesimpulen adi enggo ieteh Dibata kai kita perlu man kai kita mindo.

Jesus erbahan perumpamaan uga sekalak hakim si la erkemalangen man Dibata dingen la erkeleng ate man manusia, si merasa terganggu erkiteken sekalak diberu si enggo mbalu mindo penampat gelah perkarana ras imbangna idungi, seh maka aminna pe ia la erkemalangen man Dibata dingen la erkeleng ate man manusia dungan tergerak ukurna lako ndungi perkarana e, sebab mbiar ia irauk diberu balu-balu e.

Hakim si la bujur ras la erkeleng ate man manusia pe nggit ia mereken kai siipindo diberu balu-balu ndai gelah idungi perkarana ras imbangna, apai ka Dibata si bujur, tentu labo itimaina maka IA terganggu ras mbiar irauk maka ibereken-Na kai siipindo kita.

Arah perumpamaan enda Jesus ngataken man ajar-ajarNa maka labo lit pertoton si la ibegikrn Tuhan, alu bage labo lit pertoton si sia-sia. Sekaligus enda ngataken man banta maka ertoto e labo buang-buang waktu ras enegi. Emaka megenggenglah ibas ertoto Tuhan pasti mereken jawaben si tepat ibas waktu si tepat, erkiteken kebujurenNa.

Ay.8. Ertoto tanda bukti Kiniteken
Salah sada erbahan kalak kisat ertoto erkiteken la ia tek nangdangi pertotonna, sebab pertoton e berhumbungen kel ras kiniteken. Pertoton tanpa ibarengi ras kiniteken seri nge ras mantra-mantra (toto hafalen, rutinitas) tanpa roh eme pertoton si mate. Pertoton si labo ilandasi alu kiniteken labo ngerehken si mehuli.

Pertoton e labo kepe berhubungen ras mindo kerna keperlun-keperlun nggeluh. Pertoton e berhubungen kubas keselamaten. Lit kebiaren Jesus ibas kerehen Anak Manusia si isuruh Dibata e lit denga nge pagi erkiniteken i doni enda, sebab kune lang kerina bengket ku neraka.

Ertoto ras kiniteken e berhubungen erat la banci ipisahken jadi labo perlu sibahan penungkunen apai nge lebe, erkiniteken lebe maka ertoto entah ertoto lebe maka turah kiniteken ? adi menurut kami seri ras kalak si erlajar naik sepeda “sambil erdalan menjaga keseimbangen”, sebab labo banci si jaga keseimbangen sepeda adi la erdalan,adi bage uga pe lalap nge guling, adi erdalan saja la jaga keseimbangen mis kel kita ndabuh ku parik. Bage me pe ibas ertoto ibas kita ertoto erpaguhna kinitekenta ibas erpaguhna kinitekenta erulina pertotonta.

Megenggenglah ibas ertoto seh maka paguh kinitekenta, alu bage ngasup kita bengket kubas rancangen Tuhan ras ngaloken kerina jawaben Tuhan e si terbaik man banta.

Pointer Aplikasi
1. Ertoto eme persuruhen Tuhan
2. Setiap pertoton pasti ngerehken ulih si mehuli
3. Pertoton e labo saja ibas konteks pemenuhun keperlun geluh, tapi pe maba kita kubas si ngena ate Tuhan.

Pdt. Saul Ginting
GBKP Runggun Bekasi

Invocatio :

“Pertoton Daud. O Tuhan, dengkehkenlah pemindonku kerna kinibujuren, perdiatekenlah pertotonku mindo penampat! Begikenlah pertotonku, i bas biberku nari si la lit i je penipu” (Masmur 17:1)

Khotbah :

Pilipi 4:6-8

Tema :

“Ertoto Mpegegehi Kula, Ukur ras Tendi!”

I. PENDAHULUAN
Ibas paksa kita kote, ukur serbut erkite-kiteken melala perbeben, kecedan ate, sakit pinakit, ekonomi sulit, megati banci mabai kita jadi sada pribadi si ergegehna ertoto. Mabai kita erdeherna ras Tuhan. Tapi situhuna kegeluhen ertoto (aktifitas ertoto) labo hanya ilakoken tupung kita ibas ngenanami kegogon bagepe bas paksa melala perbebenta, tapi pertoton ilakoken ibas kerina paksa ras situasi kegeluhenta subuk sehat ntah sakit, subuk paksa kegogon ntah keriahen, pertoton harus tetap silakoken jadi tanda pengataken bujur dingen pengarapenta nandangi Tuhan.

II. PENDALAMAN NATS
Surat Pilipi eme surat sinitulis Rasul Paulus si sangana ngenanami kiniseran erkiteken ipenjaraken i Kota Roma ibas tahun antara 60-63 M. Amin gia Paulus sangana i penjara tupung ia nulisken kitab Pilipi tapi tema mbelin sinitulisken Paulus khususna Pasal 4 eme tetap ermeriah ukur ibas Tuhan amin gia melala perbeben ras aru ate si man alanken ibas kegeluhen.

Ibas ayat 6 ikataken, “Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur”. Selaku manusia Paulus pe tentu ngenani perbeben terlebih selaku Rasul Kristus si mbue ngenanami kiniseran, pernah menam mate erkiteken karam kapalna, ia pernah ipekpeki ras igudami, ia ipenjaraken tapi Paulus arah surat enda mpegegehi kerina kita si mbue ngenanami kiseran ras erbage-bage persoalen geluh. Emaka gelah kearun ateta bene sibaba kerina ku bas totonta man Tuhan. Ibas 1 Petrus 5:7 ikatakenna “Ampekenlah kerina kearun atendu man Dibata, sabap Ia kap si mperdiateken kam” (bhs. Indonesia, “Serahkanlah segala kekuatiranmu kepadaNya, sebab Ia yang memelihara kamu”). Lit ije kata ‘kerina/semua’ la setengah-setengah, labo seperteluna, labo ka 90 % tapi kerinana/semuanya, enda nuriken maka Tuhan tuhu-tuhu mperdiateken kita janah ngasuhi kita ibas kerina dampar geluhta. Ibas bahasa Inggris kata kekhawatiren iperinci alu ndauh nina: “all your anxieties, all yuor worries, all your concerns, once and for all” (semua ketakutan, kecemasan, kegelisahan, ketidaktenangan, segala yang membebani pikiran, sekali untuk selamanya). Ola nari ibaken entah tadingken kerina perbebenta tapi endesken/serahkan man Tuhan kerinana/semuanya, seh makana enggo menahang si akap ndalani geluh enda.

Ibas ay. 7 ikataken gelah ola mbiar janah ola aru ate kerna kai pe, ertina ibas kerina aspek geluhta em kap kula, tendi ras ukurta tetap i cukupken Tuhan adi kita tetap ernalem dingen nggit mindo man Tuhan ibas pertotonta. Emaka ulih ibas pengendesenta dingen pemindonta arah pertotonta man Tuhan, icukupkenNa dingen ijujuriNa kai siniperluken kita eme kap “Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus” (ay. 7).

Jenari gelah kita banci ndatken dame sejahtera ibas geluhta harus lebe sibeneken perukuren-perukuren si negatif jenari merubah caranta rukur kerna hal-hal si positif dingen mehuli, alu bage kegeluhenta pe banci jadi mehuli. Ay. 8 ngatakenca, “kedungenna o senina-seninangku, ukurilah kerna simehuli, e me kerna si bujur, mulia, benar, bersih, mejile ras kerna kerina si patut ipuji”.

III. APLIKASI
Jadi kalak kristen labo jaminen maka la nai kita ngenanami perbeben ntah masalah nggeluh, tapi jadi kalak kristen lit sada jaminen maka kita ipegegehi ngalaken kerina perbebenta arah kita erpengendes man Tuhan janah tek kita Tuhan nampati kita guna ndungi kerina masalahta. La nai kita erbebe sekalak kerna perbebenta alu ngandalken gegeh ras kemampunta tapi siendesken kerinana man Bapa si ni Surga. Siharus ilakoken kalak kristen ibas perbebenna em kap “reh ku adepen Tuhan”, amin gia melala denga kita adi lit perbebenta leben si dahi temanta, si teleponi janah curhat kita man bana sebab siakap banci kari iberena solusi tapi megati sebalikna banci ka nambahi si man tangkelen. Emaka si dahilah Tuhan bagi si ituriken bas Pustaka si Badia, “E maka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita” (Heber 4:16). Sabab tek kita i bas tan Tuhan kerina perbebenta la bo lit si mberatsa ntah menahangsa, bagepe tetap si gelem pengarapenta maka “mata Tuhan tetap nare kempak kita dingen mperdiateken kerina perbebenta janah Tuhan-ta ndauh kal belinen asangken perbebenta”.

Ibas sada tulisen thehealthsite.com, ikataken maka pertoton labo hanya sekedar uga caranta ngerembakken dirinta man Tuhan, tapi lebih asa si e ertoto mereken mbue kal manfaat subuk nandangi kesehaten kula, ukur ras tendi. Kegiaten ertoto pe banci mabai kita jadi pribadi si tetap rukur ras bertindak alu positif, lebih tenang ras terbebas arah erbage masalah kesehaten fisik ras psikis. Para ahli ngatakenca maka lit 4 ulih/manfaat sehat arah kita ngelakoken aktivitas ras kebiasan si teratur ibas ertoto :

1. Mencegah ras Mengatasi Stres
Ibas sada penelitin siilakoken para ahli psikis ibas tahun 2014 ngataken, maka ertoto mereken manfaat simbelin kal eme kap banci mencegah ras mengatasi stres. Seh makana arah gegeh pertoton banci mabai kita terhindar arah resiko depresi bagepe masalah-masalah psikis sideban. Pertoton banci mabai sekalak jelma reh tenengna ibas rukur, la mesukah putus asa tapi tetap rukur alu positif.

2. Ertoto Erbahanca Ukur Meriah (Membuat Bahagia)
Ulih ertoto la terjeng banci mencegah ras mengatasi stres tapi banci ka maba ulih erbahan perukurenta tetap meriah. Para ilmuwan mempublikasiken ulih penelitinna ibas JAMA Networks Journal ngatakenca maka kalak si aktif dingen tutus ngikuti kerina kegiaten-kegiaten ibadah/kebaktin ras disiplin ibas ertoto, maka jelmana teridah lebih bahagia asa kalak si labo tutus ngelakoken ritual keagamaanna. La terjeng man bana saja tapi perukuren si dem keriahen pe teridah arah anak jabuna, seh makana jabuna jadi jabu si sempabu ras ermalem ate.

3. Cawir Metua (Panjang Umur)
Ibas sada study penelitin siilakoken ilmuwan i Harvard School of Public Health ngataken maka kalak si religius ntah patuh eragama jenari ertoto secara rutin subuk i rumah ntahpe i rumah-rumah ibadahna sekalak-sekalak, secara umum nggeluh cawir metua ras gedang umurna geluh (memiliki umur yang panjang). Sebab kalak si tutus ertoto ras kegeluhen spiritualna pe sehat maka mabai dirina rukur alu teneng jenari enggeluh sehat, tenang ras bahagia.

4. Mpegegehi Kula (Meningkatkan Sistem Kekebalan Tubuh)
Kalak si tutus dingen disiplin ertoto banci meningkatken dingen lit ibas ia sada sistem kekebalan tubuh yang kuat. Arah pemikiren si tetap positif, rukur alu teneng ras nggeluh meriah ukur (bahagia) dingen disiplin ertoto lit ibas ia sistem kekebalen tubuh si megegeh ras kuat. Kalak si tutus ertoto, saber dingen geluh alu tetap erpengendes man Tuhan banci terhindar arah resiko serangen jantung bagepe tekanan darah tinggi.

Pdt. Irwanta Brahmana
GBKP Runggun Surabaya