Pekan Doa Wari VII Sabtu 19 Mei 2018, Ogen I Tesalonika 5:17-18

Invocatio  :

Erkiteken sie ertotolah min perpulungen situtus, tupung ia ibas kiniseran. Gelah adi reh galumbang kesusahen,la seh man bana.Masmur 32;6

Renungen :

I Tesalonika 5 : 17-18

Tema :

Tetaplah ertoto

 

Ertotolah katawari pe, janah katakenlah bujur man Dibata ibas sikugapana pe. Enda me singena ate Dibata ibahanndu ibas geluhndu selaku kam kalak si enggo ersada ras Kristus Yesus”.

  1. Ertotolah katawari pe=”Tetaplah berdoa”=”Berdolah sennatiasa”(BIS).Kata “kawaripe” ijenda labo berarti, melasken pertoton lalap segedang-gedang wari tapi gelah perpulungen lalap ertedeh ate reh ndahi Tuhan, labo hanya ibas paksa-paksa tertentu. Adi meriah ukur dahi Tuhan, adi seh sura-sura dahi Tuhan. Bagepe banci saja ibas susah kal ije teridah tutus kal ate ndahi Tuhan. (Biasana ibas Ruang ICU ijem situtusna kal ertoto).

Ertotolah katawaripe ertina ula sempat bosan ertoto.

Ertoto = kebutuhen labo kewajiban. Tuhu kita kalak sierkiniteken harus ertoto tapi labo e kewajiban

  1. Piga-piga pengajaren Rasul Paulus kerna ertoto:

Fil 4:6 “Ola aru atendu kerna kai pe, tapi ibas kerina pertotonndu, pindolah......rstna”

Kolose 4 : 2 “Tutuslah ibas ertoto, janah sanga kam ertoto ersikaplah dingen katakenlah bujur man Dibata

Efesus 6 : 18 “Bahanlah sie kerina alu ertoto, mindo penampat man Dibata....”

Kerina enda encidahken sikap geluh erpengarapen ras erpengendes man Dibata singaturken kerina ibas kegeluhenta.

  1. “Katakenlah bujur man Dibata ibas sikugapana pe”, ngataken bujur labo tergantung kubas situasi tapi ngataken bujur man Dibata aminna kai gia jadi ibas kegeluhen.

Dua kata “ertoto” ras “ngataken bujur” Enda me siarus ilakoken adi ninta kita ersada ras Yesus.Alu kata sideban adi ninta kita kalak sierkiniteken labo kita tutus ertoto janah teridah kita jungut-jungut, kelsehen, merawa katawari pe, labo tuhu kita kalak sierkiniteken.

  1. Banci siperdiateken, cara guna ermalem ate eme alu tetap ertoto. Kita pasti lebih ermalem ate adi kita lebih mbue ertoto. Kita harus tetap ertoto ibas waktu-waktu si itentuken, janah e harus silakoken terus-menerus. Kita harus lalap ertoto, alu la ermedu-medu. Ertoto la erngadi-ngadi, seh maka pertotonta e jadi sada bentuk pujin man Dibata. Labo berarti maka kalak la banci erban kai pe erkiteken ertoto ia lalap, tapi si enda mpersingeti kita gelah ula e siban jadi alasen si erbanca lanai ateta ertoto man Dibata. Ertoto nampati kita guna lebih mpeturah kinitekenta, labo jadi penghambat kegeluhenta ibas erkiniteken, kerina pendahin si ibereken Dibata tuhu mehuli.
  2. Adi kita ertoto la erngadi-ngadi, maka labo kita kekurangen alasen guna ngataken bujur man Dibata ibas kerinana (bnd. Plp. 4: 6). Kita harus ngataken bujur ibas kerina keadaan, bahkan ibas kesusahen ntah pe ibas kemakmuren. Keadan geluhta mungkin labo bage kal burukna bagi si ukurken kita, tapi banci ka nge jadi lebih buruk. Kita ibereken mbue kesempaten guna nehken perbebenta alu meteruk ukur man Dibata, emaka labo lit alasenta mengeluh man Dibata, janah lalap lit alasenta guna ngataken bujur man Dibata.
  3. Seh ija ngen pentingna pertoton ibas kegeluhenta? Si sehken pertotonta ibas gelar Jesus Kristus, janah sieteh maka lit kuasa si seh kal belinna ibalik sada pertoton si seh kal sederhanana, adi pertoton e isehken tuhu-tuhu arah pusuh si mbages nari ras kiniteken sipaguh. Sieteh e payo, tapi seh ija nge aplikasina ibas kegeluhenta? Mbue kalak labo penting akapna ertoto. Ertoto ia adi la akapna sibuksa dahinna. Erdahin e penting, ngurus keluarga penting, bersosialisasi ras sidebanna penting. Tapi ertoto merupaken sada hal si pentingna kal ibas geluh enda janah la banci inomorduaken apai ka itadingken. Pertoton merupaken salah sada sarana komunikasinta ras Tuhan si seharusna menempati posisi ibas uruten si paling meganjang. Adi sangana kita sibuk harus kita berhati-hati gelah ula tergoda guna berkompromi secara pribadi ras Tuhan. Banci kita terjebak guna lebih mementingken ndungi pendahinta lebe asangken mereken waktunta guna megiken sora Tuhan. Kesibukenta banci ipakeken iblis guna melemahken ras membujuk kita gelah reh dauhna kita ras Tuhan e. Erbage-bage kearun ate nandangi kebutuhen-kebutuhen geluh i doni enda banci jadi celah si ipake iblis guna nehken sura-surana mpesirang kita ras Dibata. Kerina kearun ate ras kebiarenta merupaken pintu masuk si banci ipakeken iblis adi la kita terbiasa ngendesken kerinana man Tuhan arah pertotonta. Tuhan Jesus jine mengalami hal enda sanga Ia erpusa 40 wari 40 berngi i padang gurun. Sanga igejapNa melihe ije me iblis e melanacarken serangenna guna ncubai alu menawarken kerina hal si mungkin banci memuasken kebutuhen-kebutuhen arah sisi manusiawi (bnd. Mat. 4: 8-9). Tapi Jesus la tergoda janah tegas itulakNa pengajuk iblis (ay. 10). Arah peristiwa enda banci kita erlajar guna ngidah gelah ula kita terpengaruh ibas kemewahen ras kai si itawarken doni enda si erbanca buta/pentang kita secara rohani janah ngadi kita ngukurken perkara-perkara si rasa lalap (bnd. Mat. 6: 19).
  4. Andar Ismail ibas bukuna si erjudul “Selamat Berteduh: 33 Kumpulan Doa” ije ikatakenna ertoto e merupaken percakapen ras Tuhan. Pemahamen sibagenda pernah lit ibas ibadah gereja mula-mula (abad ke 2 s/d abad ke 5) fungsina sebage salah sada bentuk pendidiken agama kristen kalak dewasa (PAK Dewasa). Pertoton enda labo terjeng ibelasken tapi terutama guna irenungken, ertina merenung janah ertoto bagepe ertoto janah merenung. Dua tindaken enda ipaduken ibas pusuhta si mbages nari janah seh ibas intina eme sada kebutuhen dasar tiap jelma, eme merasa tenang, merasa dame, rsd. Sebab nggeluh eme ingan ndarami ketenangen, kedamen, keteduhen, rsd. Eme sebabna kita berteduh/cio kempak Tuhan (bnd. Msm. 90: 1). Ertoto labo gelah kita “bermanis mulut” man Tuhan, tapi berterus terang ngataken perbeben kegeluhen si dalani kita. Ertoto iandingken bagi kalak si ndatken ingan cio ibas lasna matawari, angin meter ras galumbang si merawa si nderpa kegeluhenta. Kristus kap si mereken kita ketenangen, emaka ku Ia kita ngadu arah pertotonta (bnd. Msm. 71: 3). Emaka tetaplah kita ertoto.

Pdt. Iswan Ginting Manik, M.Div, MM

GBKP Pondok Gede

Pekan Doa Wari VI Jumat 18 Mei 2018, Ogen Habakuk 3:17-19

Renungen :

Habakuk 3:17-19

Tema   :    

Ertoto kerna bencana

Pemena

Senina ras turang...

Perdalinen kegeluhen manusia siidalanina la pernah terlepas ibas erbage perbeben kegeluhen. Ibas menghadapisa megati kang menam putus asa erkite - kiteken beratna perbeben. Tentu sebagai kalak sierkiniteken, itehna ingan ia ernalem, eme man Dibata Bapa, alu usur ia ngerana arah pertotonna, sebab itehna maka gegeh toto erkuasa mpergegehi ia ibas menghadapi perbeben e.

Isi

 Nabi Habakuk (memeluk/bergumul) nggeluh ibas zaman bangsa Israel lit ibas penindasen arah bangsa musuh musuhna nari. Labo hal simesukah man bana guna banci terus tetap megegeh ertahan ibas menghadapisa. Masa masa sulit ija musuhna alu terus menerus menindassa, seh maka segala aspek kegeluhenna ibas bangsa Israel pe tuhu tuhu terpengaruh. Juma simerupakan ingan sumber gegeh ras sumber penghasilen man bana lanai nari mereken ulih, enggo ceda kerina. Bagepe asuh asuhen sijadi sumber kinibayaken man bana, kerina enggo kiam ibas karangna nari. Lanai nari lit arapen sumber guna kebutuhen kegeluhenna si tep tep wari, padahal kebutuhen nggeluh tetap iperluken selama ia nggeluh denga.       Kerina enda erkiteken perbahanen bangsa Israel sijahat. Dibata ngendesken bangsa enda kempak kalak Kasdim (bangsa Babilon) guna mpersingeti bangsa enda. Tapi sanga nabi Habakuk ercakap cakap ras Dibata ibas pertotonna, iturikenna isi pusuhna alu penungkunen penungkunen man Dibata, jenari jawaben jawaben Dibata erbahansa ipahamina kai sura sura Dibata. Emaka sanga Dibata nehken sura surana nabi Habakuk memahami kerina perbahanen Dibata tuhu tuhu adil. Seh maka gia siterjadi man bangsa e siterburuk ia tetap ermeriah ukur.

Penutup

   Senina ras turang.. megati kita la memahami perbahanen Dibata seh maka lit ka sinadingken kinitekenna man Yesus Kristus. Perlu kita erlajar arah kai siibahan nabi Habakuk,

  1. Ipindona jawaben ibas Dibata (2:1). Ibas keraguanna nabi Habakuk la ia sinik tapi ipindona jawaben ibas Dibata nari. Megati manusia bas menghadapi perbeben la nggit ertoto man Dibata hanya mengandalken nembeh ate, jungut jungut, merawa rsd. Ibas menghadapi perbeben ibutuhken ketenangan hati jenari ertoto mindo gegeh ras nimai ipetangkas Dibata kerna perbebenna e. Pada prinsipna lalit masalah terjadi tanpa seizin Dibata. Kalak Kasdim labo banci menindas bangsa enda tanpa seizin Dibata. Tapi sie kerina terjadi tujunna guna pendewasaan iman ras nggeluh alu lebih reh ulina man Dibata.
  2. Tek man Dibata alu sepenuhna (3: 17 - 19). Kedungenna nabi Habakuk tek nandangi kai siibahan Dibata man bangsa Israel aminna gia idahna Dibata ngukum kalak sijahat bagepe juma ceda ras sinuan kerina sierbahanca kehancuran ekonomi ibas bangsa enda. Tapi ia tetap ngataken bujur ras tek man Dibata. Erkiniteken man Dibata tentu labo erpalasken pasu pasu siiberekenNa man banta, labo erpalasken situasi ras kondisi tapi tek nandangi Dibata e, alu membina hubungen silebih rembak ras Dibata arah reh usurna ertoto. Pilipi 4:12, Kueteh nge kai ertina nggeluh ibas kekurangen, janah kai ertina nggeluh ibas kelebihen. Enggo dat aku rahasiana, seh maka ija gia ntah katawari gia, malem ateku subuk paksa aku besur bagepe paksa melihe, subuk paksa aku kelebihen bage pe paksa aku kekurangen. Amin

Pdt. Nur Elly br Tarigan

GBKP Rg. Karawang

Pekan Doa Wari V Kamis 17 Mei 2018, ogen Nehemia 1:4-11

Tema  :

Ertoto kerna masyarakat, bangsa ras Negara

Bahan :

Nehemia 1:4-11

1. Kata perlebe

Kegeluhenta selaku kalak Kristen, la terlepas ibas kerukunan masyarakat ras kedamain ibas bangsa ras negaranta. Sebab keadaan sekitarta tentu lit pengaruhna nandangi kita. Kita akan lebih tenang ibas ndahiken aktifitasta sehari-hari. Saja adi sinen genduari realitas keadaan masyarakat, bangsa ras negaranta enda. Ija masyarakat nggeluh ibas kemiskinen, ketidakadilen ras sidbanna. Hal enda nggo tangkas siidah, uga dage sikap siharus silakoken khususna ibas pekanta sipelimaken enda.

2. Isi

Bagi radu ras sieteh maka kitab Nehemia erat hubungenna ras kitab Esra. Sebab radu ras nuriken kerna kemulihen bangsa Israel ibas pembuangen nari. Saja kitab Nehemia lebih focus kubas pembangunan tembok Yerusalem sienggo runtuh.

Nehemia eme sekalak Jahudi siertugas sebagai pelayan pribadi raja artahsasta. Ia tading I kuta susan, si tupung e sebagai ibu kota Persia. Sewaktu senina Hanani reh ngunjungin ia emaka isungkunna kerna senina-senina kalak Yahudi sienggo mulih ibas pembuangen nari ras Yerusalem ( Neh 1:2). Janah Hanani ngataken maka bangsa Israel sangana ngenanami kiniseran simbelin janah tembok kuta Yerusalem enggo ka sontar ras pintu-pintu gerbangna lenga ipekena.( ay 3)

Megi kerna sie kundul Nehemia dingenna tangis. Lit piga-piga siidah bahwa ungkapen kesediahan hati yang mendalam alu kundul dingen tangis (Ezr 4: 7-23, Job 2:8, Maz 137:1). Engkai maka Nehemia she kel atena ceda ibas sontarna tembok Yerusalem ras pintu –pintu gerbangna ? erkiteken Nehemia eme sekalak si mencintai ras setia man Dibata. Ia ngidah bahwa adi tembok Yerusalem ras pintu-pintu gerbangna tetap sontar e nandaken maka kota e la megegeh. Nehemia keleng kel atena kutana terlebih arah kiniulin kuta Yerusalem teridah kemuliaan Dibata.

Nehemia la larut ibas ceda atena tapi ia lebih bersikap guna banci mabasa ibas totona man Dibata. E teridah ibas Ay 5-11 kerna ungkapen toto Nehemia man Dibata kerna bangsana Israel ras kerna sura-sura. Siidah bahwa Nehemia labo nutupi kerna kai siilakoken bangsa Israel sienggo erdosa erkiteken la patuh nandangi peraturen sini bereken Musa. Sinianggap e perwakilan Dibata. Ia la nutupi dosa bangsana tapi pe mindo perkuah ate Dibata gelah min mulihi mperdiateken bangsa Israel adi bangsa e enggo menyadari kerna dosa-dosana. Alu e Dibata pe nampati ia gelah raja artahsasta pe banci mekuah atena ngenehen kecibal bangsana ras kuta Yerusalem.

3. Pengkenaina  

Arah prikopta sendah lit 2 hal sibanci sipelajari

  • Perhatin nandangi keadaan masyarakat, bangsa ras Negara

Kita kalak Kristen situhuna kalak si peduli nandangi keadaan masyarakat, bangsa ras negaranta. Erkiteken kita rusur nge encakapkenca ibas diskusi kelompok, jabu-jabuta, ibas gerejanta. Saja rusuren terjeng cakap saja tapi kurang kel kita ngasup mendalamisa sehingga la teridah kel maun-maun ulih percakapenta e. Nehemia ibas perjumpanna ras senina hanani I Yerusalem seh metedehna guna megi berita seninana kalak Jahudi ras kuta Yerusalem. Nggo waktuna kita mereken perhatinta nandangi masyarakat, bangsa ras negaranta enda, baik soal kemiskinan, ketidakadilan, politik ibas bangsa ras negaranta. Sebab impilaksi iman adalah cinta ras senang akan kemajuan orang lain ras bangsa ras negarana labo sibuk hanya ngukurken kemajunta pribadinta saja ras jabuta tanpa peduli nandangi kalak sideban.

  • Sikap positip

Melala kalak ngidah keadaan bangsa ras negarata enda bersikap cuek ras apatis. Seakan-akan tidak akan mungkin terjadi perubahen kai-kai pe. Adi kuan-kuanta ngatakenca sia-sia latih saja siakap. Seakan-akan masyarakat, bangsa ras negaranta enda ikendaliken oleh beberapa orang rikut peraturenna silabo banci nari iruntuhken. Memang tempa lit perpayona tapi labo tentu bage kebenarenna. Kita erlajar arah Nehemia ija tupung paksa e sangat tidak mungkin banci ia maba kiniulin man bangsa Israel. Tapi sikapna la apatis tapi justru ia ertoto ras erpuasa. Janah adi siidah Nehemia mewakili bangsana ngaku akan dosa-dosana ras mindo gelah mekuah mulihi ate Tuhan nandangi ia ras bangsana Israel. Ia njadiken dirina wakil bangsana mindo ras ncidahken pertobaten. Alu e siidah Dibata nampati ia. Kita pe sebagai jabu-jabu Kristen terus maba keadaan masyarakata, bangsa ras negaranta ibas totonta man Dibata.

  • Membangun rencana guna kiniulin masyarakat, bangsa ras Negara

Nehemia kenca ia megi berita kerna seninana kalak Jahudi ras tembok Yerusalem, ceda kel atena. tapi la ia larut bas sie tapi ertoto ia janah ibas totona e ipesehna sura-surana gelah ekuah ate raja kempak ia. Jadi ia tidak hanya berhenti didalam sedih dan berdoa tapi ia pe muat rencana kai atena ilakokenna. Jadi kit ape la terjeng prihatin nandangi bangsa ras negaranta enda tapi pe ikut aktif muat bagin guna kiniulin masyarakat, bangsa ras negaranta.

 

Pdt. Kristaloni Br Sinulingga

GBKP Rg. Yogyakarta

Info Kontak

GBKP Klasis Bekasi - Denpasar
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate

GBKP-KBD