Invocatio :

Jeremia 42:3

Ogen :

1 Samuel 8:19 – 9:2

Tema :

Dibata simereken kengasupensi lit ibas perpulungen

1. Setiap minggu kita reh ku gereja, seh pe lit torah istilah simenggambarkan aktivitas igereja eme “datang duduk diam dengar pulang”. Alu kata sideban kehadirenta igereja la ubahna bagi penonton, sekedar ngenehen ras komentarter kadang ikut ibas suasana euphoria tapi la lit rasa memiliki. Lebih bahayaka persembahen ia nggap sebage uang karcis bagi kalak siatena nonton konser, adi menarik ras menghibur nggit mere lebih mbue tapi adi la sesuai ukur maka kurang pemerena. Enda sikap sisalah sebab jelas maka kerina jemaat eme ringring ibas kula Kristus.

2. Perpulungen Korintus igelari Rasul Paulus sebage kula Kristus, simenggambarken kiniersadaan perpulungen walope erbage macam latar belakangna. Keberagamen enda arus ipahami sebage pemere Dibata janah setiap kalak sierkiniteken arus menyadari realita enda ibas ndalanken kegeluhen sebage bagin ibas kula Kristus. Identitas kalak Kristen eme kula Kristus, simerupakan karya Kesah Sibadia janah Dibata jine sienggo ngaturken kerina jemaat jadi sada kula (ay 13).

Itengah perpulungen ibere Dibatape karunia ras talenta sipelain-lain. Ringring kula Kristus la saja terbatas rasul, nabi, guru entahpe umat singaloken pemere khusus tapi kerina kalak singakuken dirina sebage pengikut Kristus merupaken bagian ibas kula Kristus alu fungsi sipelain-lain. Kerina anggota perpulungen I gereja la banci ngataken dirina “kami jemaat biasa nge ngenca” sebab kerina kita serayaan Dibata.

3. Ibas perpulungen mula-mula lit nggo itetapken jabaten itengah perpulungen eme rasul, nabi ras guru, labo kerina banci jadi rasul, nabi entah guru tapi enda merupaken jabaten si I anugerahken Dibata (Ef 4:11-13). Memang la bo kerina banci ngaloken anugerah jadi pelayan khusus tapi setiap jemaat iperlengkapi Dibata guna ngelakoken pendahin simehuli bagi sienggo leben irencanakenNa (Ef 2:10). Menurut Calvin, ibas gereja lit empat jabaten eme, pendeta, pertua, diaken, guru. Jabaten enda me si ibas gerejanta ngelakoken kerina fungsi pelayanen janah labo kerina jemaat banci menjadi pelayan khusus. GBKP setiap lima tahun sekali ngelakoken pemilihen pertua ras diaken, janah kerina ngawan perpulungen berhak memilih ras ipilih. Jabaten enda pe merupaken pemere Dibata amina pe penetapenna melalui proses bagi sienggo sisepakati ibas Tata Gereja. Tahun enda kita ngelakoken pemilihen pertua diaken janah iarapken kerina perpulungen maba proses pemilihen sehpe ku personal si man pilihen jadi serayaan ibas totona sekalak-sekalak (Jer 42:3).

Melala karakter ras talenta siman pertimbangen nandangi kalak siipilih kita jadiserayanTuhan. Sukat-sukat ibas kita milih ula terjeng kai siteridah saja bagi siterjadi ibas pemilihen bangsa Israel nandangi rajana sipemena, “rupana mejilekel, megegeh tuhu-tuhu, …gedangen sada takal asa kerina kalak sideban…, ia ka pesimejilena” tapi pilihlah siersura-sura guna ndatken pemere kesah siterulin eme sidem keleng ate man Tuhan ras teman manusia.

4. Pemere siterulin asa pepalem kalak sakit, kengasupen ngerana ibas cakap kesah entahpe kengasupen nuriken antusen cakap kesah eme keleng ate. Uga hebatna pe pemere Dibata ibas sekalak jelma adi la ia erkeleng ate maka pemere e sia-sia kap. Sebab si paling iperluken ibas gereja eme serayaan Tuhan sidem keleng ate, singasup mpersadaken perpulungen sierbage-bage latar belakang ibas keleng ate Tuhan. Sebage bahan pertimbangen kerna serayan silayak ipilih eme :
 Lit hubungen simehuli rasDibata (Yoh 15:1-6)
 Integritas, keterpaduan gaya hidup ras kiniteken (Ams 10:9, 11:13)
 Mbangun perpulungen (2 Kor 10:8; 13:10)

5. Proses pemilihen pertua diaken ibas GBKP ilakoken me ibas tahun enda mari kerina kita muat bagin alu ikut notokensa, mpersiapken diri guna ipilih bagepe muat bagin guna milih serayaan Tuhan ibas waktu sienggo itentuken ibas runggun masing-masing. Ula kita sekedar jadi penonton sebab Dibata me simpengasup ngawan perpulungen kerina guna jadi perpanjangen tangan Tuhan ibas milih serayan sijadi kawan sekerja Tuhan ibas peken anggurNa.

Pdt Erlikasina br Purba
GBKP Rg. Denpasar

Invocation :

ngaloi Maria, kuendesken diringku man Tuhan. Janah jadilah ibas aku bagi sienggo ikatakenndue ! kenca bage itadingken malaikat ndai ia.

Ogen :

Johanes 10:7-21

Tema :

Idilo ras iutus

Kata penaruh
Ise simeriah ukurna guna harus ngelai kalak ? enda me nina plato. Sebab mbue kalak ngatakenca meriah ukurna guna ngelai tapi ibas praktekna la bage. Malahen nina ibas ukurna “ise ka kin ia maka suruh-suruhna ka aku”.
Tuhan ndilo kita guna banci peseh kataNa ras iutusna ku tengah-tengah doni enda. Bagi Tuhan Yesus taat ndalanken persuruhen BapaNa bage ka pe kita ibas kita ndalanken pelayanen gerejanta enda. Kita ndalani panggilenta e labo sekedar rasa tertark saja ras labo perban ambisi pribadinta tapi erkiteken kita iutus Tuhan siempuna pendahin e.

Penjelasen teks
Perikopta ibas berngi sipelimaken enda ngerana soal pendilo Esekiel jadi nabi itengah tengah bangsa Isreal. Ija ibas pendilona jadi sekalak nabi eme pada masa sejarah perjanjian lama si paling gelap. Engkai maka masa paling gelap sebab ia idilo jadi nabi ibas tahun 593-571 SM. Ija tupung paksa e eme paksa nandangi masa keruntuhen bangsa Israel ras masa keruntuhen bangsa Israel erkiteken bangsa Babel reh nerang bangsa Babel. Ibas paksa sigelap e me Esekiel idilo jadi nabi. Situhuna ibas paksa e Esekiel sangana erlajar jadi imam erkiteken orang tuana eme imam. Tapi Tuhan ndilo ia jadi nabi.

Ibas pendilo Tuhan Esekiel jadi sekalak nabiNa, Tuhan ngerana man bana nina “o manusia si ermasap-masap”. Kata manusia ermasap-masap enda lebih 90 kali ikataken Tuhan ibas kitab Esekiel. Kata enda nekanken kemanusiaan ras kelemahen sekalak nabi sierbahanca ia harus tetap ernalem man Tuhan ibas ngelakoken pendahinna. Esekiel megi sora Dibata ibas ndilo ia, Esekiel langkem ibabo taneh si ngambarken kebiaren Esekiel nandangi Dibata. Tapi roh Tuhan menguatken ia alu mpatedis Esekiel.

Kenca si e maka Tuhan ndilo Esekiel guna jadi utusenna man bangsa Israel. Bangsa Israel ikataken Dibata eme bangsa pemberontak erkiteken bangsa Israel tupung paksa si e nggo nilah ibas Dibata nari. Bangsa Israel nggo nembah man berhala-berhala, la ndalanken keadilen ras erbahan perpadanen ras bangsa-bangsa sideban guna mindo penampat. Bangsa Israel lanai ernalam man Dibata. Isamping sie Tuhan pe ngataken maka bangsa Israel eme bangsa si mekeng emaka banci nge labo diatena pe min pe Esekiel ngarana kerna perintah Tuhan. Malahen nina TUhan maka banci nge pagi pengejapen Eskiel ngeluh itengah-tengah kacip gelang (bahasa Ind : engkau ddi tengah-tengah onak dan duri dan engkau tinggal di dekat kalajengking). Enda gambarken maka dahin sidahiken Esekiel jadi nabi labo dahin si mesunah tapi mungkin banci maba kinisuin atau kiniseran man bana.

Pendilona jadi nabi I tengah-tengah bangsa Israel, isingetken Tuhan gelah bangsa e meteh maka itengah-tengahna lit sekalak nabi. E ertina maka Esekiel harus ngataken kai siniperentahken Tuhan man bana. Ia labo perlu mbiar man kai sinikataken bangsa Israel man bana. Ia la banci kompromi ras bangsa Israel, ia harus taat nandangi perkataan TUhan man bana. Amin pe labo nggit bangsa e megiken kata Tuhan ia harus tetap setia meritaken kata Tuhan guna menegor bangsa Israel ibas dosa ras pemberontakenna man Dibata bage pe guna maba bangsa e setia man Tuhan.

Ngidah gambaren dahin sini man dahinken nabi Esekiel, kai nge sijadi responna ibas pendilo ras pengutusen TUhan e man bana ? ibas ayat 8b “ngangaken babahndu jenari panlah kai sikubereken man bandu”. Ay 9 ras 10 Esekiel ngidah sada tan si ndudurken sada gulungen kitab si isina eme tangis-tangis,nderkuh ras kata-kata mesui. Emaka ibas Esekiel 3:3b “kupan gulungen surat e, janah nanamna entebu bagi tengguli”. Kata kupan gulungen surat e nandaken Esekiel ngaloken berita persuruhen TUhan e man bana ras menyerahken dirina man Dibata sope ia meritaken kata e man Tuhan.

Pengkenaina
Tuhan ndilo sekalak nabi guna meritaken katana ibas situasi-situasi tertentu segelah bangsa Israel la papak ibas geluhna tapi tetap ernalam man Dibata. Situhuna ibas kegeluhenta enda pe kita idilo guna jadi perberita kerna kata Dibata subuk ibas pendahinta masing-masing baik kita si jadi PNS, Pegawai swasta, Pengusaha, ibu rumah tangga ras sidebanna. Ertina pendilo Tuhan secara umum e sehkenNa man kerina kita anak-anakNa sienggo itebusna. Uga nge jawabenta ? si ue ken nge entah lang erkiteken mbiar kita ngalaken tantangen ibas pendilota e sierbanca la sipakeken waktu ras kesempaten silit ibas kita. Entah lenga kita siap ban beratna tugas sinialoken kita e. Tuhan ngarapken kita ngaloken pendilo ras pengutusenNa e segelah tetap ermulia Ia ibas doni enda.

Isamping pendilo Tuhan secara umum man banta kerina anak-anakNa, lit pendilo Tuhan secara khusus eme pendilo jadi serayanNa sinilakoken kita ibas bulan april she bulan juli enda. Uga nge jawabenta ? si euken nge entah mbue kang alasenta guna nulaksa dengan alasen-alasenta misalna masa gelap kel genduari enda ertina masa yang berat, merasa lenga she waktuta jadi serayan TUhan, ras siddebanna. Adi Tuhan nggo ndilo kita jadi serayanNa erkelang-kelangken perpulungen, amin pe mberat siman alanken alokenlah sebab sue janjiNa man Esekiel bahwa TUhan tetap mereken gegeh ras kengasupen bage kang nge kari ilakokenNa man banta.

Saja me labo lit kalak si hanya sekedar tertarik saja jadi serayan entah hanya ambisi pribadina saja. Serbahanca ia pe secara pribadi latih pagi akapna sebab labo lit penyerahan diri ibas pendilo jadi serayan TUhan. Pada hal pendahin jadi serayan TUhan e mbue tantangenna. Banci nge labo nggit kalak megiken kata Tuhan sinisipeseh e, banci kang nembeh ka atena kita sebab sipandang ia ngelakoken dosa, entah isakkenna ras musuhina kita. Emaka siperlu ibas pendilo si khusus eme penyerahen diri ras mereken otoritas Dibata erdahin erkeleng-kelangken perpulungen.

Dari pada kari akapndu kenca itangkuhken e lit “si cuti panjang” ban la reh-reh, lit “hilang dari peredaren”diam-diam non aktif, “Ngambek” mengundurken diri perban la begiken sorana, lit “seksi enak”, “seksi repot”, “seksi capek”, lit ka deba “ateku je” kai pe silakokenna siakapna payo sisada. Kembali kita kubas pendilo Esekiel jadi nabi. Ia idilo ibas masa yang berat mungkin kit ape idilo ibas masa simberat ibas jaman enda tapi ialokenna pendilo e alu penyerahen diri man TUhan si ndilo ia. Kita pe ibas pendilo Tuhan man banta guna jasi saksina mari sibere dirina guna jadi perberita kataNa ras ibas kita ndahikenca kita pe tetap berserah man baNa.

Pdt. Kristaloni br Sinulingga
GBKP Rg. Yogyakarta

Invocatio :

Daniel 4:17B

Ogen :

Matius 4:8-11

Tema :

Pilihlah si Ngena Ate Tuhan

I. Perlebe
Mengawali pelayanenta ibas awal tahun baru enda, ibenaken me alu pekan penatalayanen seh me wari pe 4 ken. Tema man banta eme pilihlah si ngena ate Tuhan. Ngerana kerna memilih berarti berhubungen ras keputusen yang akan kita ambil. Umpamana : Adi ngena ateta ras butuh ka ibas sada barang misalna motor. Tentu lit usaha atau mungkin lit niat guna nukursa. Adi nggo bias senta tentu si putusken guna nukur barang e alu memilih barang simejile kualitasna, irit bensin, sporti rsd. Lit kriteria si enggo si persiapken. Emaka si tukur. Amin mbue tawaren-tawaren alu jenis barang si seri, tapi kerina keputusen lit ibas kita. Siapai ateta sipilih. Bagepe ibas geluh enda mbue nge pilihen si i tawarken man kita, lit tawaren si mehuli lit ka si jahat. Ibas wari/ berngi enda kita i ajuk gelah banci memilih si ngena ate Dibata.

II. Pebagesi kerna Teks
a. Ibas ogen Matius 4:8-11

Enda bagian cerita kerna percuban iblis man Yesus. Yesus Anak Dibata si dem alu Kesah Si Badia i ijinken Dibata i cubai. Lit 3 percuban man baNa. Si pemena sangana Yesus erpuasa 40 wari reh iblis gelah Yesus nalihken batu jadi roti. Erkiteken Yesus Melihe. Tapi Yesus la nggit ngikutken kata-kata iblis. Si peduaken, ibas teks enda ija Yesus ibabai Yesus ku anjung-anjung rumah pertoton, jenari isuruh iblis gelah Yesus ndabuhken baNa ku teruh. Isuruh Dibata kari malekat-malekat reh njagai diriNa. Tapi ibas tawaren iblis sipeduaken enda pe i tulak Yesus. Nina man iblis: Ola cubai Tuhan Dibatandu.
Selanjutna ibas ogenta sendah, ija i tulisken maka iblis mabai Yesus ku deleng si sehkel ganjangna. Jenari i tuduhken iblis kerina kerajaan doni ras kiniulinna man Yesus. Enda kerina i bereken Iblis adi Tuhan Yesus nggit erjimpuh man iblis e. Tawaren si peteluken enda eme kerina kinarajan doni ras kiniulinna. Piga-piga kali i tulisken maka iblis sebagai penguasa dunia (Yoh 12:31), penguasa kerajaan angkasa (Efesus 2:2). Ibas 1 Yoh. 5:19 ikataken kerina doni i kuasai si jahat. Kekuasaan kerajaaan doni si bagenda me i tawarken iblis man Tuhan Yesus.Padahal Yesus lahir sebagai Raja. Ia anak Dibata si mulia. Aminna pe Ia sebage Raja tapi la i pakeNa kekuasaan Na e alu sembarangen . Tetap IA nggeluh ibas jalur Dibata, taat ras setia Ia ndalanken kata Dibata. Ibas Matius 28:18 nina Enggo ibereken Dibata man banKu kerina kuasa i Surga ras i doni. Emaka nina Yesus jawab tawaren iblis enda : Laweslah iblis! (Enyahlah Iblis!) Lit kap tersurat ibas Pustaka si Badia Sembahlah Tuhan DibataNdu, Ia saja patut man sembahen. Tuhan Yesus emilih kai si ngena ate Dibata i putusken ras ilakokenNa. Aminna pe tawaren e secara doni menggiurken, menguntungken sementara, tapi banci maba penyesalen seterusna.

b. Ulangen 17:14-20
Ulangen enda mengisahken tentang bangsa Israel si atena ngangkat sekalak raja ibas bansana nari. Sebelum i angkat Raja sebagai pemimpin, Israel merupaken bangsa Teokrasi, ija Dibata tuhutuhu berdaulat, Dibata jadi Raja ibas bangsa enda. Banci i angkat sekal ak raja ibas bangsa Israel nari tapi alu aturen-aturen si eggo i bahan Dibata eme: Jaga maka kalak si ipilihndu jadi raja, kalak si enggo i pilih Tuhan ibas bangsa Israel nari.La banci melala kudana (sebagai lambang kekuasaan, kebayaken) guna i pake tentera. Labanci melala ndeharana erbahanca ia nundalken Dibata. Membelok dari firman Tuhan. La banci i pebayakna bana alu pirak entah emas. Janah sanga ia jadi raja isalin na Kitab Undang-undang ras pengajaren Dibata, i ogena gedang-gedang geluhna, gelah erajar ia mpehaga Tuhan ras ndalanken kata Dibata alu tutus. Enda jagai raja gelah ola meganjang ukurna. Dibata tetap i pujina.

III. Kesimpulen
Ibas tahun enda, kita pesta deokrasi Indonesia (pemiihan Umum) bagepei belang-belang GBKP ibahan pemilihen pertuadiaken. Tentu sebagai pemiih atau dipiih melala tuhu tawaren reh man banta. Banci jadi gelah si A sipiih iberekenna sen, keduduken jabaten rsd. Tentu kita berhikmat/pentar mengambil keputusen. Adi La Sue ras singena ate Dibata ula si ikutken. Panglah kita bagi Yesus, amin labo gampang ngelakoken kata Dibata tentu ibere Dibata gegeh kengasupen man banta. Ibas pemilihen e si pilih alu kriteria Dibata. Amin pe labo lit si sempurna minimal kita milih si erkiniteken ras mehuli, la pebayak bana tapi nggit berkorban, melayani man rakyat.(adi pemilu). Adi ibas GBKP, si siksiki apai calon pt/dkn si erkineteken, la semena-mena, la pebayak bana tapi nggit berkorban ras melayani jemaat bagepe keluargana. Tuhan simasu=masu kita kerina..

Pdt. Rosliana br Sinulingga
GBKP Rg. Bumi Anggrek