Invocatio :

“Batang-batang kayu i kerangen ersurak meriahlah i adep-adepen Tuhan sanga Tuhan reh merentah doni enda.” 1 Kronika 16: 33

Ogen :

Kolose 1: 15-23

Tema :

“Doni Enda Dem Alu Pasu-pasu Tuhan”

Penjelasan Bahan
Masmur 104: 10-15
Masmur “Pujin Man Si Mada Tinepa” eme sada ungkapan kekaguman pemasmur nandangi ulina tinepa Dibata. Kerina si itepa Tuhan e mehuli. IjadikenNa kerina enem wari dekahna. Janah enggo iukurken Tuhan pe kerna keberlangsungan hidup alu nikapken kerina siniperluken ibas sada ekosistem. Itepa Dibata rubia-rubia, la lupa IA leben nepa sumbul lau gelah lit inemen, kelde kerangen pe la muas. Itepa Dibata perik, leben itepaNa pohon-pohon ingan perik erban asarna. Manusia itepaNa, e pe la lupa Dibata leben nepa sinuan-sinuan ras pangan guna mereken gegeh man bana. Dem doni enda alu pasu-pasu Dibata. Pemasmur terpesona ngidah ulina si irancang Tuhan (104:1).

Sada bagian si paling penting ibas keberlangsungen kegeluhen eme lau. Adi kurang lau, kerina makhluk hidup pasti menderita kekeringan. Tuhan mereken lau ibas erbage cara: lit sumbul lau ibas baluren nari, lit lau anak ibas kelang-kelang uruk nari, i datas langit iusekenNa udan. Arah si e kita ngidah maka Tuhan tetap mereken si mehuli man kerina tinepaNa. Kerina enda ngajarken kita gelah engkelengi kai si enggo iban Tuhan. Tersedia ibas alam labo gelah banci ate-ateta makesa, tapi gelah banci dikelola alu payo gelah si mehuli iban Tuhan e tetap mehuli.
Kolose 1: 15-23

Ibas kai si enggo irancang Tuhan, manusia si jadi mitra, kawan sekerja. Tapi dosa erban jarak antara Dibata ras tinepaNa. Yesus Kristus Anak Dibata me si jadi kelang-kelang, si mpersadaken mulihi si enggo ceda iban dosa. Kol 1: 20 nina “Arah IA me pe itetapken Dibata ndamekin kerina si nasa lit ras DiriNa. Dibata mereken perdamen arah kematen AnakNa i kayu persilang, gelah si nasa lit, subuk i doni bagepe i surga mulihken man baNa.”

Refleksi/Aplikasi
1. Doni enda dem alu pasu-pasu Tuhan, tapi manusia kurang sadar. Tinepa Dibata eme kerina doni enda, labo manusia saja. E maka harus kita mpehaga Tuhan alu njagai doni inganta tading enda. Ula kita jadi manusia si serakah, piah doni enda pe ceda ibahan keserakahan manusia si la erbias-bias. Ibas situasi gundari bumi enggo reh cedana, la erkedungen adi ndarami ise si salah, apakah pemerintah, perusahaan-perusahaan si la ertanggung jawab muat hasil bumi, si paling ndeher banci si evaluasi eme gaya hidupta pribadi. Kita lebe si harus menaken hidup peduli lingkungan. Sendalanen ras tema umum GBKP ibas tahun 2019 enda, salah sada poin eme “Kepedulian Terhadap Kesehatan dan Lingkungan”. Benaken ibas kehidupan sehari-hari, contohna mengurangi pemakaian plastik dengan mengurangi pemakaian sedotan plastik atau dengan membawa kantong belanja sendiri saat berbelanja ke minimarket. Inisiatif pemerintah menerapkan larangan menggunakan kantong plastik di tempat-tempat belanjaan umum sudah diterapkan di Banjarmasin (sejak 2016) dan Balikpapan (sejak 2018). Contoh si bagenda rupa sederhana tapi mbelin pengaruhna.

2. “Doni enda dem alu pasu-pasu Tuhan”. Bagaimana kita tetap mengakui berkat Tuhan meskipun banyak bencana terjadi di sekeliling kita? Mungkin ngidah alam gundari enda si la bersahabat, turah erbage pendapat. Lit si saling menyalahkan. Lit si memanfaatkan situasi guna promosi diri (kampanye). Uga kita selaku kalak si erkiniteken? Melala ka sibegi khotbah-khotbah si menyerukan pertobatan. Mehuli nge, tapi labo min enda ertina kita menghakimi alu ngataken kerina bencana enda erkiteken dosa-dosa korban e jine. Adi bage kita ngerana, kita enggo meganjang rukur, sebab situhuna kita pe jelma perdosa kap. Seruan pertobatan enda lebih iarahken ku refleksi bahwa kegeluhen ibas doni enda lit limitna. Ras kuga kita tetap meteruk ukur sebab erta doni banci masap dalam hitungan detik. Gelah si teh min mpepulung erta-erta si la ermasap-masap. Situasi si uga pe la engkurangi, tapi nambahi kinitekenta. Tambah lalap paguhna kinitekenta ras kesetiaanta nandangi perentah-perentah Dibata. Bagepe kita memahami bahwa doni enda tetap iteruh kuasa Tuhan, alu bage tetap dem alu pasu-pasu. Kuga banci sigejapken doni enda ipasu-pasu Tuhan adi sekelilingta mbue kal bencana alam? Eme alu encidahken biak sisampat-sampaten ibas situasi sulit. Tuhan tidak lepas tangan, IA sedang menggunakan tangan kita untuk pekerjaanNya. Kita jadi alat gelah banci teridah karya Dibata si tangkas arah anakNa Yesus Kristus. Tuhan Yesuslah jadi usihenta.

Pdt. Yohana br Ginting
GBKP Rg. Samarinda

Invocatio :

Tapi nina Jesus man kalak Jahudi e, “Bapangku erdahin kap lalap; emaka Akupe arus erdahin.” (Johanes 5:17)

Ogen :

Perngandungen 3:22-24

Tema :

Dibata Njadiken Mbaru Dingen Mehuli

I. Penaruh
Dibata enggo nepa doni enda seh maka jadi me kerina isi doni enda mbaru dingen mehuli. Gambaran kiniulin tinepa Dibata enda, ibahan jadi sada bentuk pujin man Dibata emekap : KEE No. 260. “Oh Andiko Jilena”
Ah andiko jilena, tinepa Dibata. Subuk pertibi enda, ras isina k’rina
Deleng si meratah kerangen, Perik-perik rende kabangen
Andiko jilena si banNa, seh kel kap ulina.
Emaka tangarlah min kita jelma, Olamelasang, ola meturdaksa
Lit tenah kata pedah ni Dibata, Jaga kelengi, k’rina tinepaNa

Di bage kin tuhu mehulina tinepa Dibata, kai nge ndia si banci ilakoken kita sebage tanda kita selaku sekalak si tek man Dibata ? Mari kita erlajar arah bahan Pekan Penatalayanenta wari si pemena enda.

II. Pembahasen Teks
1. Invocatio : Johanes 5:17
Tapi nina Jesus man kalak Jahudi e,
“Bapangku erdahin kap lalap; emaka Aku pe arus erdahin.”

Erdahin. Jesus ngangkai kerna kegeluhenNa emekap gunaerdahin. Sekalak filsuf Perancis si tergelar Descartes ngataken makaCogito ergo sumartinya "aku berpikir maka aku ada". Maksud kalimat enda emekap encidahken kerna keberadaan manusia. Sue ras teori Descartes enda, banci pe si bahan sada pemahamen emekap “aku erdahin maka aku lit”. Alu bage ibas kita nggeluhken kegeluhenta i doni enda arus maka kita erdahin. Nina Jesus man kalak Jahudi e, “Bapangku erdahin kap lalap; emaka Aku pe arus erdahin”. Ijenda ipeseh Jesus man kalak Jahudi maka IA arus erdahin, bali ras BapaNa pe erdahin kap.
Engkai maka Jesus nehken kata “Bapangku erdahin kap lalap; emaka Aku pe arus erdahin”man kalak Jahudi ? Kalak Jahudi encikep alu nteguh pandangen maka la banci ndahiken kai pe ibas wari Sabat. Tupung paksa si e, Jesus mpepalem kalak si sakit si enggo 38 tahun dekahna ia sakit. Jesus mpepalem kalak si sakit e tupung wari Sabat kalak Jahudi. Jesus ngidah maka ndauhkel lebih penting kegeluhen kalak si sakit enda ibandingken undang-undang wari Sabat emekap kerna la banci erdahin tupung paksa wari Sabat. Emaka ipepalemken Jesus kalak si sakit e. Enda encidahken maka Jesus selaku Anak Dibata erkuasa ibas wari Sabat e.

2. Ogen : Perngandungen 3:22-24
22.Lenga bo keri keleng ate Tuhan, perkuah ateNa tetap nge lit. 23. Keleng ateNa mbincar tep-tep erpagi-pagi, bali tetapna ras matawari si pultak arah Timur. 24.Tuhan kap baginku emaka man baNa ngenca aku erpengarapen.

Ibas bahan ogenta enda isuratken kerna kiniteken man Dibata dingen pengarapen nandangi wari si pepagi. Penulis kitab Perngandungen enda emekap Jeremia encidahken man banta maka ibas kita nggejapken erbage perbeben entahpe kecedaan ate bagepe kesusahen (Perngandungen 3:1-19). Ngukuri keadaan si bagenda rupana, getem kelpusuh Jeremia.

Jeremia ngangkai maka arus lit cara pandang si mbaru ibas geluhna. Enda banci siidah ibas ayat 20c-22, ije Jeremia encidahken maka lanai bo ia hanya berfokus kubasperbeben sisangana igejapkenna, tapi pe ngasup ngidah keleng ate Tuhan man kalak si nggejapken kesusahen (ayat 22-24). Keleng ate Tuhan tetap isehkenna man bangsaNa jine.Sada kepastin icidahken ijenda emekap kerna Keleng ate Tuhan si mbincar tep-tep erpagi-pagi, bali kape tetapna ras matawari si pultak arah Timur. Keleng ateNa e, isehkenNa pe man kerina jelma. Bali pe ras terang matawari guna kerina manusia. Hanya saja, apakah kerina manusia nggit ngaloken keleng ate Tuhan e? Lenga bo kerina kalak nggit ngaloken keleng ate Tuhan ibas kegeluhenna. Lit ka nge kalak si nulak Dibata. Tapi Jeremia nggejapken maka Tuhan kap ngenca jadi baginNa emaka man Dibata ngenca ia ernalem. Cara pandang si mbaru si lit ibas Jeremia emekap ibas kegeluhenna ia fokus ku Dibata, labo ku perbeben si igejapkenna erkiteken Dibata pengarapenna. Alu bageipengasup Tuhan ia ndalani perbeben ibas kegeluhenna.

3. Khotbah : Kejadin 1:1-31
Teks Kotbahta ibas Kejadin 1:1-31 emekap kerna Dibata nepa doni enda ras kerina isina alu mehuli bagepe dem kiniraturen. Adi si perdiateken doni enda bagepe ras isina kerina, maka siidah seh kel ulina kerina tinepa Dibata enda. Alu kataNa jine, itepa Dibata doni enda ras kerina isina.
“Mula-mulana ijadiken Dibata langit ras doni. Doni lume denga, la lit tempasna…”(Kejadin 1:1-2). Kerina si enggo itepa Dibata i bas doni enda encidahken kemulianNa. Dari ketiadaan, kekosongan, dan ketiadaan bentuk, Allah mencipta, mengisi dan mengatur alam semesta ini. Banci si idah maka Dibata emekap sekalak Maestro Karya Seni, si ngidah maka kerina tinepa si enggo ijadikenNa tuhu-tuhu mehuli.
Lit pitu kali Dibata nehken maka tinepa si mbaru, si enggo itepaNa e “tuhu-tuhu mehuli” (ayat 4, 10, 12, 18. 21, 25, 31). Ibas Dibata nepa doni ras kerina isina tuhu-tuhu mehuli. Adi siperdiateken tinepa Dibata, i langit lit bintang si terang, lit matawari tupung waktu terang wari, lit erbage-bage rubia-rubia, lit erbage-bage nurung, perik-perik kabangen, tuhu-tuhu mehuli kerina tinepa Dibata e. Adi Dibata saja pe enggo ngidah maka kerina tinepa si itepeNa e tuhu-tuhu mehuli, emaka kita manusia selaku tinepa Dibata e, arusna pe ngasup ngidah kiniulin ibas tinepa Dibata e seh maka banci sijagai alu mehuli tinepa Dibata e.

III. Pengkenaina
“Dibata Njadiken Mbaru Dingen Mehuli”, enda me temanta ibas Kebaktin Pekan Penatalayanen wari si pemena. Ibas Dibata enggo nepa doni enda ras kerina isina, Dibata njadiken mbaru dingen mehuli alu dem kiniraturen. Alu mehuli IA erdahin sue ras kai si enggo irancangkenNa (iprogramkenNa). Alu ratur idahikenna sada-sadai dahin e. Enggo ipesikapNa bagepe enggo ijadikenna doni ras kerina isina alu mehuli (penciptaan wari si pemena seh pelimaken), emaka ibas wari si peenemken, Dibata nepa manusia. Manusia si enggo itepaNa e arus maka erdahin alu mehuli ibas encidahken kegeluhenna i doni enda. Manusia emekap penatalayan si ertanggungjabab. Menatalayanken alu mehuli doni si enggo itepa Dibata. Alu bage lingkungennta banci terjaga alu mehuli bagepe banci meminimalisasi terjadinya kerusakan lingkungen.

Selaku sekalak si tek man Tuhan, si enggo itepaNa alu tuhu-tuhu mehuli, emekap guna menatalayanken doni enda, emaka i bas tahun si mbaru enda, eme tahun 2019, si bengketi ka pelayanenta alu semangat si mbaru si rehna ibas Dibata nari. Ndahiken dahin tep-tep wari bagepe pelayanen gereja alu dem kiniraturen. Aminna pe gia lit tantangen ihadapi tetap ngasup ngidah maka keleng ate Tuhan si tetap, si mpengasup kita menghadapi erbage tantangen si bakal ihadapi ibas dahin-dahin pelayanennta.

Soli Deo Gloria.

Pdt. Crismori br Ginting
GBKP Rg. Sitelusada

Invocatio :

Anak e reh belinna dingen reh gegehna; Pentar Ia janah tetap ipasu-pasu Dibata. ( Lukas 2:40)

Ogen :

Masmur 24:1-10

Tema :

“Jabu Si Ngaloken Ketubuhen Jesus”

Kata Penaruh
Ibas ngalo ngalo ketubuhen Jesus arus sitandai lebe alu pasti ise kin Jesus e. bahan renungenta Pekan Kebaktin Keluarganta ibas wari/berngi si pepituken enda jabu-jabunta iajuk ngaloken Jesus alu penandai si jelas ise kin Jesus e, kuasaNa ras asalNa gelah sieteh ras ngasup kita mpermuliaken Ia. Jesus e me Dibata si jadi manusia, Ia si nepa ras si mada doni enda ras kerina isina. Ia Dibata si Badia si hanya banci isembah kalak si bersih perukurenna ras perbahanenna, si la nembah gana-gana.Dibata e masu-masu kalak si setia erpenembahen man baNa. Kalak si ngalo-ngalo Ia arus nadingken cara nggeluh si ndekah maka Tuhan e nggit nggeluh ibas ia. Tuhan e arus ialo-alo sebage Raja si Pemenang, raja si mbelinna, bagi si ituriken ibas pengogenta Masmur 24:1-10. Tole nari mari si nen kinibelinen Jesus e arah renungeta ibas turi-turin ketubuhen Jesus.

Pemberitan
Ibas turi-turin asum malaikat nuriken kerna ketubuhen Jesus hubungen Jusup ras Maria ibas masa pertunangen e me masa Jusup ras Maria enggo nehken janji perjabunna, janah sedekah sada tahun masa pertunangen e masing-masing ia arus njaga diri la banci mencemari pertunangenna. Adi pertunangen i langgar maka terjadi perceraian ras adi lit perbahanen dosa si mencemarisa hukumenna e me ibenteri salu batu i pintu gerbang kota seh mate. Erkiteken enggo mehuli kula Maria ibas masa pertuangen e ia ngadapi tantangen si mberat, resiko si mberat, e maka labo iberitakenna situasina e man Jusup. Pastilah la melukah iakap Maria nuriken ia paksana natang tuah, bagepe labo melukah man Jusup ngalokenca. Saja ibas Malekat enggo njelasken ma Mariasituasina natang tuah ras Maria pe enggo ngaloken keadaanna natang tuah emaka ia enggo sikap ngaloken kerina resikona, tapi kesiapen Jusup ise metehsa? Labo melukah ngaloken beritana adi teman ertunangen e rempet mehuli kulana padahal labo lit ilakokenna kesalahenersadan kula. Erkiteken si e ertimbang-timbang Jusup adi isirangkena Maria alu resmi maka pulah me Maria ibas hukumen mate e nari, tapi labo melukah nirangken Maria tunangen si ngena atena e. Seharusna berita kerna teman pasangena natang tuah jadi berita keriahen tapi ibas Maria natang tuah jadi kegelisahen ibas ukur Jusup, bageme erga si mbelin ibas Jusup ngaloken situasi e, kegelisahen.

Ibas paksa Jusup ertimbang-timbang e, Malekat njelasken situasi Maria man bana.Maria natang tuah erkite-kiteken kuasa Kesah si Badia.Malekat nuruh Jusup muat Maria jadi ndeharana, sabab anak si ipupus Maria pepagi sekalak anak dilaki si nebusi bangsana ibas dosa-dosa nari. Mungkin adi nina Malekat anak si ipupus Maria pepagi jadi kalak hebat, mbelin ras bayak entah meriah kal min ndai ukur Jusup ngalo-ngalosa. Tapi berita kerna Jesus ikatakenMalekat maka Jesus e pagi jadi si nebusi bangsaNa, seri kap e ras ngataken anak si tubuh e pagi bagi biri-biri, entah lembu ras binatang si debanna si biasa ipersembahken sebage persembahen korban penebus dosa. Ijenda banci si idah maka Jusup tuhu-tuhu sekalak anak perana si erkiniteken ras mbiar man Dibata. Iukurkena mbages-mbages kerna keputusen si arus ibuatna, labo ia ngukurken bana saja, tapi ikutkena sura—sura Dibata, ibuatna keputusen ngikuti, kata malekat e, nggenapi bagi janji Tuhan arah nubuaten nabi-nabi.

Labo hal si sulit man Jusup ngertiken sura-sura Dibata, Jusup ngangka sura-sura Dibata ras alu meriah ukur ngalokensa. Nggit ia ngaloken pilihen si sulit, nggit ngalaken tantangenna si sulit ras sulit njelaskensa bagepe ngalokensa. Erkiteken si e melala kalak la ngaloken Jesus jadi Tuhan ras Juruselamatna. Jusup ngaloken Maria jadi ndeharana; mulai paksa si e nggeluh ia ras-ras, man ras-ras, minum ras-ras, tunduh ras-ras tapi ijagana bana maka la ia ersada kula, e me bukti kesetian rohani Jusup ras Maria man Dibata.
Jesus ikataken sinusur Jusup padahal Jesus tubuh arah Maria nari ras ulih pendahin kuasa Kesah si Badia.Secara budaya ras hukum ibas jaman si e Jesus payo anak Jusup sebab sekalak anak ndatken pengakun sebagai anak si sah arah bapana si labo situhuna e me arah bapana e ngaloken anak e ras mreken gelar man bana. Bageme Jesus jadi anak si sah men Jusup, sebab ialokenna Jesus ras iberekenna gelar Jesus (25).
Kesimpulen ras Perenungen
Sijadi perenungen man banta ibas ngalo-ngalo ketubuhen Jesus:
Teks Kata Dibata enda nuriken maka Jesus tuhu-tuhu anak manusia si reh ibas Dibata nari, arah kai si enggo ijanjiken Dibata kerna keselamaten manusia ras doni enda, maka iberekenNa Jesus AnakNa si tonggal e tubuh labo erkite-kiteken peraten sura-sura daging. Kemanusia Jesus e nuduhken kerna Dibata si nggenapi janjiNa ras Dibata si nggit menderita, nadingken surga ras jadi manusia si jelas asal usulna, nggeluh itengah-tengah manusia perdosa.Jesus eketurunen Daud e me raja si populer si ndahiken kesejahteran ras kedamen ibas masa pemerintahenna.Jesus e anak Jusup bagi kerina jelma umumna ibas jaman si earus jelas asal usulna.

Asal ketubuhen Yesus penting kal man kalak Jahudi guna njelasken kemesiasen Jesus, kesesuaianna ras nubuaten si enggo isehken nabi-nabi. Man kalak Jahudi bukti si otentik seh kal e perluna. Saja kenyatanna enggope ijelasken tapi labo ialokena seh maka isalibkenna ka Jesus. Jadi tangkas kali bas ngalo-ngalo Jesus labo bias terjeng asal usulna si jelas saja tapi uga kita erkiniteken alu mpersiapken perukuren si bersih ras perbahanen si ngena ateNa gelah ngasup kita mpebelin Jesus e ibas kegeluhen jabunta. Adi kalak ngalo-ngalo Jesus terjeng asalNa saja maka kalak si bage ngalo-ngalo Jesus sebage tokoh sejarah saja. Emaka ibas invocation ijelasken “Anak e reh belinna dingen reh gegehna; Pentar Ia janah tetap ipasu-pasu Dibata”. ( Lukas 2:40)Jadi sialokenlah Jesus si labo hanya bayi si tubuh ku doni tapi Jesus si reh belinna reh gegehna, pentar ras ipasu-pasu Dibata. Jesus e si mbelin ras ermulia, e maka kalak si ngaloken Jesus jadi mbelin ras mulia me ia ibas kegeluhenna, nggeluh sebage si pemenang, si tangguh si banci iandalken ibas keteladanenna.

Janji Dibata kerina igenapiNa, tapi lit waktu bagi sura-sura Tuhan si arus itimai, erkiteken si e perlu sipeteguhi isi jabuta turun temurun gelah tetap erkiniteken ras nggeluh setia iteruh janji Tuhan, sebab kerehen Tuhan si pedua kaliken bagi si ijanjikenNa pasti terjadi.

Pdt EWGM
GBKP Ckrg