PEKAN KEBAKTIAN KELUARGA TAHUN 2019 wari 2, Khotbah Lukas 14:12-14

Invocatio :

“Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13)

Ogen :

Rut 2:8-9

Tema :

Jabu si Ermalem Ate

PERLEBE
Kemalemen ate (bahagia/sembuh/selamat/damai sejahtera) jadi daramen tiap jelma. La saja gelahna jadi keriahen man dirinta jine, tapi banci ka min igejapken kalak si deban khususna itengah jabu. Sabab jabu jadi ingan erlajar sipemenana ibas kegeluhen manusia. Ibas jabu sipelajari orat nggeluh, meteh mehuli, ngangkai cara nggeluh ras kalak si deban, sihamaten, sikelengen-kelengen ras nandai Dibata alu tuhu-tuhu. Emaka pengajaren ibas jabu arus erpalasken pengangkanna kerna ulu kemalemen ate si reh ibas Dibata nari, gelahna kerina isi jabu banci ndatken ertina ras ndalankenca alu payo.

Tantangenna, melala jabu si enggo kebenen erti ermalem ate. Salah sadana adi si nin ibas kegeluhen jaman gundari, melala jabu si enggo ndauh ibas biak ras palas kekelengen. Tep kalak enggo nggeluh ibas kepentingenna sekalak-sekalak. Anak la mehamat man orang tua, bagepe orang tua kurang mereken perhatin ras keleng ate man anak, bagepe sapih-sapih ersenina turang si melala lanai jadi teman arih, tapi imbang rubat. Ibas sie me pekan keluarga GBKP mabai penggertin man banta erti kemalemen ate ibas jabu eme nggeluh sikeleng-kelengen, ibenaken ibas jabu bagepe man kalak si deban.

ISI
Rut 2:8-9, biak keleng ate ipake Rut ibas kegeluhenna si teridah arah kehamaten ras kesetiaanna nandangi bibi/simetuana Naomi. Kenca itadingken perbulangenna, Rut enda permen Naomi si ngikut bibina seh ku kuta kemulihenna bagepe erpadan nembah Dibata siisembah Naomi (Rut 1:16). Rut mindo man bibina gelah banci lawes ku juma mumahi ruhi gandum gelah cukup pangan man bana duana. Lawes ia ku juma Boas, sekalak bayak si lit denga perkade-kadenna ras Naomi. Ije me perjumpan Boas ras Rut. Boas nampati Rut arah mereken ijin man bana mpepulung gandum, radu ras erdahin ras si ngemo. La saja sie, Boas pe njamini Rut gelah ola ise pe ngasgasi ia. Dikune muas pe banci Rut minem ibas bagin sierdahin.

Adi silanjutken ayat 11-12, eme jadi alasen engkai maka turah ukur Boas nehken keleng ate man Rut selaku ia diberu pertandang. Eme kerna enggo ibegi Boas kiniulin ras kesetianna si ibahan Rut nandangi bibina. Emaka tek Boas, Tuhan pe ersimulih ibas perbahanenna si mehuli e. Upah ras pengkawali Dibata jadi bagin kalak si erbahan bujur. Bageme si ilakoken Boas pe, maka kekelengen ras kemalemen ate sampur ku tengah kegeluhenna. Tek Boas, kiniulin si banci isehkenna jadi bagin Rut ras Naomi, siicukupken Dibata kerna nggeluh ia erpalasken keleng ate. Boas jadi perpanjangen tan Tuhan nehken kekelengen mperdiateken kegeluhen sapih-sapih ia.

Lukas 14:12-14, Ibas bagin enda Yesus mereken pengertin cara/sikap kegeluhen gelah kemalemen ate jadi baginta. Alu perumpamaan biak temue si reh ku kerja erdemu bayu, Yesus mereken kritik man kalak Parisi si rusur ibas kiniganjangen ukurna ngayaki kehormatan arah manusia tapi la ndalanken si ngena ate Tuhan. Kerja erdemu bayu ibas tradisi Jahudi cukup penting. Ibas sie pe labo erbahanca lit biak meganjang ukur, tapi mpeteruklah banta sada ras si debanna gelah Dibata si mpehagasa.

Bicara ibahanndu kerja suari ras berngi ula undang kalak si bayak gelah ula ia ersimulih man bandu. Tapi undanglah kalak musil, cempang, pangpangen ras pentang. Maka malem tuhu-tuhu atendu sabab la ia ngasup ersimulih man bandu. Dibata nge pagi ersimulih man bandu ibas wari kekeken si benar. Ije me Yesus mereken pengertin gelah sikap meteruk ukurta iadepen Tuhan banci teraplikasi ibas erdiate ras keleng nandangi kalak si deban khusuna man si kekurangen. Alu sie idatken kemalemen ate, sabab labo siarapken ulih arah manusia, tapi Dibata kap. Kegeluhen seh rasa lalap isikapken Dibata man kalak si nehken keleng ate sapih-sapih ia. Sabab bage me perentah Dibata man banta.

PENGKENAINA
Arah bahan ibas pekan wari si peduaken enda, salah sada bentuk ‘jabu si erbuah’ (tema umum pekan keluarga 2019) eme jabu si ngejapken kemalemen ate. Sie banci idatken adi kerina isi jabu nggit sinergi/sendalanen guna menciptakan situasi ibas malem ate. Palasna eme sapih-sapih isi jabu erkeleng ate. Sebage bapa, nande, anak-anak la lit si ndauh ibas pendalanken Kata Dibata. “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban.” (1 Korinti 13:13).

Sisehkenlah tanda ate kelengta, bagi kegeluhen Naomi, Rut ras Boas. Masing-masing ia mereken peran si nggit engkelengi kalak si deban. Naomi keleng atena Rut ibas mereken petunjuk ibas kai si ate Rut idalanken. Rut pe nampati ncukupken keperlun geluh alu nggit erdahin mumahi ruhi gandum. Boas pe icidahkenna keleng ate mereken Rut kesempaten erdahin ibas jumana janah mereken perlindungan man Rut. Sie kerina reh ibas palas kekelengen. Janah ibas pendalankenna, tentu igejapken kemalemen ate si ibereken Tuhan jadi ulih siilakoken man kalak si deban.

Adi isi jabu enggo banci erkeleng ate maka kemalemen pe jadi baginna sekalak-sekalak. Dibata si ersimulih nandangi kekelengen si erbuah arah pengerana, perukuren ras perbahanen. Sebage bapa ras nande banci engkelengi temanna nggeluh ras anak-anak alu tanggungjabab sebage usihen. Anak-anak pe keleng atena pedah kata ras keberadaan orangtuana uga litna. Ngasup ngaloken kondisi jabu alu mpekena perbahanen si lepak, mpersingeti ras ngalemi salah, mperjuangken si benar, erdiate janah mesayang.

Jabu si ermalem ate pe banci naksiken geluh si sempabu, janah kemalemen e la saja igejapken man isi jabu. Kemalemen ate teridah ras tergejap ka man sekelewetna. Turah kininggiten nampati kalak si deban, erdiate, erpemere alu keriahen ukur/tulus. Subuk man kade-kade seh man kalak si la itandai pe. Banci naksikenca itengah masyarakat gereja bagepe ku si lenga nandai Tuhan. Kerna arah keleng ate siisehken e, kemalemen ate maler ku sekelewetna. Eme si jadi kesaksin pe nandangi keleng ate Tuhan. Sabab Dibata nge mereken ulih perbahanen arah kemalemen ate man si nggit ndalankenca. Kemalemen ate ibas kegeluhen seh ku paksana pagi wari kekeken kalak si benar. Amin.

Pdt. Deci K. Br Sembiring
Runggun Balikpapan