PEKAN PENATALAYANEN GBKP

Tgl. 24 Januari 2020 (Wari pe-6 ken)

Invocatio  : “Man kalak si erpemeteh, terang kap e kerina; man kalak pentar, seh kap tangkasna” (Kuan-Kuanen 8:9)

Ogen        : Keluaren 35:30-35 (ibabai simada jabu)

Khotbah   : Roma 10:14-17

Tema      : “Meritaken Berita Si Meriah”

1. KATA PERLEBE

Kerna “erberita” labo jadi sada istilah simbaru ntah asing man banta kalak Kristen, sebab nehken berita si meriah jadi sada keharusen ras persuruhen Tuhan man banta kalak si enggo tek dingen iselamatkenNa. Matius 28:19-20, jadi sada penjemba si rusur ikataken “amanat agung” guna ndahiken dahin dingen peseh berita si meriah e man kalak latih, kote, kelsehen dingen mberat baban geluhna. Dahin meritaken berita si meriah la banci ngadi idahiken kalak si tek seh asa gedang geluhna. Janah e tugasta kerina, labo terjeng serayan Tuhan si enggo itangkuhkenNa (Pandita, Pertua, ras Diaken) tapi ikut pe kerina ngawan perpulungen si enggo nggejapken maka geluhna enggo iselamatken Tuhan arah Jesus Kristus. Meritaken kata Dibata labo hanya ibas gereja tapi pe arah kerina dampar kegeluhenta si tep-tep wari, arah kerina pendahinta, profesinta, keteladanen/jadi usihen ibas kerina orat geluhta. Nehken berita labo terjeng arah bahasa verbal tapi pe arah non-verbal ntah arah kerina gaya geluhta (perdalan, pengerana, percirem ras tawanta) kerina jadi berita si meriah man kalak sideban bagepe doni enda.

1. ISI

Keterkelinen ibas Kristus eme “Injil” (berita simeriah), tapi engkai makana enterem denga kalak si lenga ngaloken berita simeriah e adi kerina manusia ngarapken dingen metedeh nandangi barita simeriah e? Paulus mereken dua jababen kerna si enda: langa kerina kalak pernah ntah enggo megiken berita simeriah e erkiteken la lit kalak si mpesehsa (ay.14) ras la kerina kalak nggit ngaloken berita simeriah/injil (ay.16). Emaka hal si perlu kal i je eme lit kalak si nggit guna meritaken berita simeriah e.

Ibas paksa nai, sekalak perberita sijadi utusen raja, pejabat ntah penguasa nari, peseh berita sinibabana khususna berita si meriah; kerna kemenangen ibas perang nari, penangkuhen raja simbaru. Berita enda ipeseh ibas ingan-ingan sienterem: i tiga-tiga, i serpang-serpang ntah ibas gerbang kota. Berita enda banci maba keriahen ras ketenengen man rakyat simbegikenca, maka lit sada pengarapen ibas berita sinipeseh suruh-suruhen e. Bagem Paulus nuriken maka meherga kal kalak simaba berita simeriah kerna Kinirajan Surga (Injil).

Ibas bagin ayat 5-13 enggo nuriken kerna uga keselamaten e ialoken arah kiniteken man Tuhan Yesus Kristus selaku penggenepen hukum taurat. Siniperluken manusia em kap erkiniteken man baNa, janah keselamaten e berlaku man kerina manusia si tek man baNa. Persoalenna labo ibas kualitas keselamaten ntah kadar keselamaten e, tapi persoalenna em kap la lit kalak si maba berita si meriah e. Kalak banci ‘erlebuh’ man Tuhan adi enggo leben ia nandai dingen ‘tek’ man Tuhan; kalak banci erkiniteken adi enggo ‘ibegina’ kerna Dibata, janah banci ibegina kerna Ia adi lit kalak si ‘meritakenca’ berita si meriah e; meritaken berita si meriah banci terjadi adina lit si nuruhsa. Dibata ersura-sura gelah kita nggit isuruhNa guna jadi perberita si meriah e, tapi la piga si nggit berkat jadi perberita simeriah e.

Kininggitenta dingen pemilihen Dibata man banta jadi perberita harus sialoken sebagai hak istimewa ras perkuah ate simbelin si enggo ibereken Dibata man banta. Dibata banci saja nelamatken kerina manusia si enggo ipilihNaalu la melibatken manusia guna peseh berita simeriah (injil), bagi Ia enggo nelamatken Paulus (Perb. 9) ija Dibata langsung “nangkap” Paulus guna iselamatken. Tapi arah lias ateNa Tuhan tetap make kita manusia guna ndalanken proyek simbelin eme keselamaten arah nehken berita si meriah si enggo ipeseh arah Yesus Kritus man kerina manusia. Janah ibas proyek keselamaten e Dibata milih kam ras aku guna muat bagin peseh berita si meriah e.

Amin pe perberita e enggo lit janah enggo erberita, tapi tetap denga nge lit kalak si labo tek dingen la ngaloken berita si meriah e (ay.16), tapi amin bage gia tetaplah erberita sebab secara prinsip maka banci kalak reh ndahi Tuhan dingen erkiniteken man baNa eme arah megi berita si meriah e. Eme berita kerna Yesus Kristus (ay.17). Kiniteken reh arah megiken berita si meriah arah Yesus Kristus. Alu kata sideban, Tuhan me singerana man banta sekalak-sekalak terus ku pusuh perukurenta arah penampat Kesah Si Badia (1 Kor. 2:12-14; 1 Yoh. 5:6). Adi la arah penampat Kesah Si Badia, bicara si peseh gia berita e maka labo lit tading ibas pusuhna dingen labo terantusina pe alu mehuli, “masuk kuping kiri, keluar kuping kanan”. Adi terjeng rangkaian kata ntah mutiara kata sinipeseh arah kinibeluhen perberita, maka sia-sia me berita e ipeseh. Tapi arah penampat Kesah Si Badia, aminna pe si pesehsa berita e labo beluh ntah ertorosen tapi isempurnaken Kesah Tuhan e.

Ibas Ogenta Keluaren 35:30-35, eme nuriken ija bangsa Israel si enggo ndarat ibas taneh Mesir nari jenari erdalan menuju taneh si enggo ipadanken Tuhan. Jenari Dibata mereken sepuluh pedahNa guna jadi gelemen ras pedoman nggeluh i adepen Tuhan bagepe hubungen ras teman manusia. Maka ilitken me sada kemah si badia guna ingan perjumpan Tuhan ras manusia erkelangken Musa. Guna si e iperluken tukang-tukang si beluh ras ahli gelah ipajekken Kemah Si Badia ndai, tapi la cukup terjeng beluh ras ahli, sipentingna kal emekap i tahirken dingen ipebadiaken Tuhan ia ibas ndahiken dahin e janah Tuhan singajari ras mperlengkapisa. Emaka ipilih me si Besalel anak Uri, bagepe Oholiap anak Ahisamah guna majekken ras nikapken kerina keperlun ras peralaten ibas Kemah Si Badia e. Guna si e Dibata enggo mperlengkapisa sekalak-sekalak alu KesahNa, janah iberekenNa kepentaren, kengasupen ras pengertin man bana guna ndahiken dahin e.

Bagepe kerina kita sindahiken dahin Dibata selaku perberita simeriah pasti iperlengkapi dingen iajariNa ibas kita nehken dahin simbelin e, guna peseh berita keselamaten ibas Jesus Kristus. Janah sada jaminen man banta ibas Mat.28:20b “Janah ingetlah! Aku tetap kap ras kam seh ku kedungen jaman”.

• APLIKASI

John Stott sekalak pengkhotbah, penginjil ras penulis i Inggris nari pernah ngataken, “Kristus mengirim pembawa berita, orang mendengar, pendengar percaya, yang percaya berseru, yang berseru diselamatkan”.

Ibas Perb.1:8 Jesus ngataken man ajar-ajarNa, janah kata e pe seh man banta kerina selaku kalak si enggo tek man baNa pe enggo ikataken ajar-ajarNa, nina “.....janah kam me pagi naksiken kerna Aku man kalak si deban”. Kata “Kam” sinisehken Jesus enda eme nuduh kempak aku, kam bagepe kerina kalak Kristen si enggo tek man baNa. Perintah Tuhan Yesus man ajar-ajarNa guna meritaken berita si meriah ibas Mat.28:19-20 jadi sada penjemba dingen semangat man banta guna ndahiken dahin meritaken berita simeriah e. Emaka mari dage sibuat baginta ibas meritaken berita si meriah alu erbage-bage talenta si pelain-lain si enggo ibereken Dibata man banta, sipakelah e guna ndahiken dahin meritaken berita si meriah i japape kita ringan dingen tading. Sabab guna si e me kita i diloNa dingen ipilihNa. 2 Timotius 4:2 “Pembarkenlah Berita e, subuk tengteng ras la tengteng paksana terusken gelah beritaken”.

Pdt. Irwanta Brahmana

Rg GBKP Surabaya

PEKAN PENATALAYANEN GBKP WARI PE- V KEN TAHUN 2020

Invocatio    : Ngaloi Maria, “Kuendesken diringku man Tuhan. Janah jadilah ibas aku bagi sienggo   ikatakenndu e!” (Luk. 1 : 38a)

Ogen           : 2 Korinti 8 : 10 - 12

Khotbah      : Ulangen 31 : 7 - 8

Tema          : “TETAPKENLAH UKUR DINGEN TEK”

KATA PERLEBE

Malem ateta dingen patut sikataken bujur man Tuhan ibas kerina penemani ras pengkawalina kegeluhenta seh bengket kita ku Tahun si mbaru enda lit ibas mejuah-juah. Erbage-bage hal si reh kubas kegeluhenta subuk secara pribadi, jabu bagepe ibas persadanta itengah-tengah gerejanta tapi si e kerina banci sibentasi ibas perkuah ate Tuhan. Labo erkiteken kita pantas ntah pe metunggung lako bengket kubas tahun si mbaru enda tapi sura-sura Dibata maka ipebengketna kita kubas tahun si mbaru enda guna tole ngenanami lias ateNa bagepe naksikenca itengah-tengah doni enda arah kegeluhen ras kinitekenta. Lenga sieteh kai si jadi pepagi ibas kegeluhenta, ibas si e me maka perlu kel sipetetap ukur ras pengarapenta man Dibata alu tetatp nggeluh ibas persadan sinteguh ras IA. Alu bage lanai lit bera-bera ibas ukurta guna ndalani wari-wari kegeluhen ibas tahun si mbaru enda sebab tek kita maka Dibata alu lias ras perkuah ateNa tetap nemani ras engkawali kita kerina.

PENJELASEN TEKS

2 Korinti 8 : 10 - 12

Ibas ogenta enda teridah maka Paulus nehken katana man perpulungen i Korintus, ija perpulungen enda bayak ibas pemere Dibata tapi ibas kinata kegeluhen ras kinitekenna lenga erbuah. Enda isehken Paulus sebagai sada motivasi segelah perpulungen e tetap min ikut muat bagin ibas dahin-dahin kinulin bagepe ibas nampati. Enda labo terjeng jadi motivasi tapi pe sebagai kritik si cukup meser man perpulungen erkiteken Paulus nuriken usihen-usihen sienggo ibahan perpulungen si lit i Makedonia (Filipi, Tesalonika, Berea, rsd). Ija amin pe perpulungen e lit ibas kiniseran bagepe perbeben tapi tetap icidahkenna kekelengenna alu mpepulung penampat / dana nandangi kalak si tek dingen musil i Jerusalem. Kiniulin ukur perpulungen enda baci jadi erkiteken Perkuah Ate Tuhan si njemba ia lako mediate ras kepate man kalak si deban. Perpulungen Korintus sampur kel ibas pemere-pemere Dibata : ibas ngerana, ibas kiniteken, ibas pemeteh, ibas ketutusen ibas kai-kai pe (ayat. 7), emaka ipindo Paulus pe maka perpulungen pe sampurkalah min keriahennna ibas dahin kekelengen bagepe ibas nampati. Jesus Kristus me arusna jadi usihen kegeluhen perpulungen, ija amin pe bayak IA tapi guna kiniulin anak-anakNa, ipemusilna baNa gelah arah kemusilenNa jadi bayak kita. Ieteh Paulus maka lit nge ukur si mehuli, ukur singgit nampati ibas kegeluhen perpulungen Korintus; tapi ukur simehuli e labo lit gunana adi la kin icidahken arah sada tindaken nyata. Emaka nina Paulus : teruskenlah, dungilah dahin sienggo ibenakenndu e (ay. 10-11). Ertina maka kiniulin ukur perpulungen e teridah arah keriahen ukur lako ikut muat bagin ibas nampati kalak musil. Ukur si mehuli bagepe pemere siisehken alu dem keriahen e tentu ialoken Dibata.

Ulangen 31 : 7 - 8

Ibas perdalanen bangsa Israel i taneh Mesir nari erbage-bage hal siterjadi si jadi pengalamen kiniteken man bangsa enda kerna penemani ras pengkawali Dibata bangsaNa. Musa selaku peminpin siipercayaken Dibata lako mabai bangsaNa enggo ndalanken tugas ras tanggungjawabna alu dem kesetiaan. Ibas perikopta ituriken maka bangsa Israel enggo seh igerbang taneh perpadanen e, eme Kanaan tapi Musa jine la ibere Dibata bengket kubas taneh Kanaan e. Josua me ipercayaken lako nggantiken Musa minpin bangsa Israel bengket ku taneh Kanaan. Lit dua masalah ibas bangsa Israel bengket ku taneh Kanaan eme : 1). Israel eme bangsa si ndarat ibas perbudaken nari, emaka labo lit persiapenna lako erperang ras bangsa si ijumpaina i taneh Kanaan. Labo lit pasukan perang ntah pe peralaten guna erperang; 2). Jasua pernah minpin bangsa Israel erperang ngelawan bangsa Amalek (Kel. 17 : 8 - 16) tapi e enggo 40 tahun si lewat, genduari Josua enggo metua. Ngasup nge ia minpin bangsa Israel bengket ku Taneh Kanaan e?

Labo lit ise pe si banci njaminsa maka Josua selaku manusia biasa ngasup mabai bangsa Israel bengket ku taneh Kanaan e. Tapi Dibata ngasup! Erkiteken si e, ipedahken Musa man bangsa Israel bagepe Josua selaku peminpin lako tetap ngendesken diri ras kegeluhenna iteruh kuasa Dibata. Dibata nge simperlengkapi Josua lako minpin bangsa e guna naluken bangsa Kanaan. Ula ngandalken gegeh ras kengasupen manusia tapi bangsa Israel bagepe Josua tetap ngandalken gegeh ras kuasa Dibata sebab kalak si ngandalken Dibata pasti la njuru ibas kegeluhen enda.

PENGKENAINA

1. Tek kita maka keleng ate ras perkuah ate Dibata nge sipebengket kita kubas tahun simbaru enda, emaka tek ka pe kita maka IA me tetap sinemani ras engkawali kita ibas ndalani tahun 2020 enda. Mbicara kai pe sijadi ibas kegeluhenta ibas tahun enda, ula bene kiniteken ras pengarapenta man Dibata sebab tek kita maka ibas kai pe Dibata tetap erdahin guna kiniulin anak-anakNa, dingen kai pe sijadi ibas geluhta enda la ngasup nirangken kita ras keleng ate Dibata (Roma 8 : 28, 38)
2. Tetapkenlah Ukur Dingen Teklah. Maka banci tetap ukurta ibas ndalani kegeluhen enda, payo min penandainta kerna Dibatanta. Kalak si payo penandaina Dibata siisembahna e lanai bera-bera, lanai aru atena ibas ndalani kegeluhen. Enda banci sialoken erkiteken persadanta ras Tuhan enteguh, lit tetap hubungen sipayo ras Tuhan, ketutusen ibas ersembah dingen kesetiaan lako nggeluh ibas kataNa.
3. Tek labo sekedar ngataken maka kita anak Tuhan, kalak Kristen sienggo itebusi Dibata arah Kristus.

Melala kalak si alu babahna muji Tuhan tapi kegeluhenna labo iendeskenna man Tuhan. Kalak si tek, kegeluhenna (ukur, pengerana ras perbahanennna) lit ibas “kendali” kuasa Dibata (band. Invocatio). Iberekenna dirina lako ipakeken Dibata nehken sura-sura Dibata dingen jadi pasu-pasu man kegeluhen enda. Lanai ia ernalem man diri, gegeh, pemetehna bagepe man doni enda tapi ernalem ia man Dibata; Dibata me sijadi peminpinna ibas ndalani kegeluhenna.

4. Tetapkenlah ukurta dingen tek maka ibas tahun 2020 enda pe pasu-pasu Dibata tetap nge lit dingen sampur kubas kegeluhenta. Emaka ula mbiar ibas ndahin-dahin simehuli, nggeluh berbagi man kalak si deban, nampati kalak si memerluken. Ula jadi kalak kristes si megegeh mindo pasu-pasu tapi metahat guna jadi pasu-pasu man kalak si deban. Sebab buah kinitekenta man Dibata epe salah sada banciteridah arah kengasupenta jadi pasu-pasu ku bas kegeluhen enda.

Pdt. Elba P. Barus, S.Th

GBKP Bandung Timur

Pekan Penatalayanen Wari Peempatken

Invocatio    : Manusia erdahin guna man ngenca, tapi la pernah bias (Peng. 6:7)

Pengogen   : Kuan-kuanen 10:2-7

Khotbah      : Kolose 3:22-24

Tema          : Erdahin Alu Tutus.

Kata Perlebe

Kerina manusia ibabo doni enda arus erdahin. Erkiteken erdahin menjadi hakekat manusia singgeluh. Bagi si tulisken Jansen H. Sinamo, “8 etos kerja”, si menekanken maka erdahin labo saja ipandang sebagai alat guna ndarami keperlun nggeluh tapi alu tangkas Ikataken maka erdahin eme bentuk alat ibadah/pelayanan (berkaiten alu hubungen ras Tuhan). Jadi labo melulu ercakap tentang hubungen ras manusia tapi pe lit hubungenna ras Tuhan.

Mpebagesi Pengogen

Bahan pengogenta sipemena eme persinget Salomo si alu jelas membandingken kegeluhen kalak pentar ras kalak lenge. Pembandingen enda iarapken mpengasup manusia guna nentuken dalan ibas kegeluhenna.

Kalak Pentar:

1. la ndarami kebayaken alu cara si jahat
2. pulah ibas kematen
3. La kelihen
4. Kalak mejingkat, kebayaken jadi ulihna
5. Rani ibas paksana
6. Ndatken pasu-pasu
7. Jadi kesangapen man kerina kalak

Sementara kalak lenge:

1. Ndarami kebayaken alu cara kejahaten
2. Bengket kubas kematen
3. La ipeseh Dibata sura-surana
4. Kemusilen
5. Medem ibas waktu peranin, erkiteken lalit siman peranin
6. Kata-katana banci munuh kalak
7. La jadi pasu-pasu janah lalit man inget-ingetten kalak

Jadi jelasken Salomo membandingken kegeluhen kalak si lenge ras kalak si pentar. Emaka kalak si pentar pasti pulah ibas kematen nari, ngaloken pasu-pasu bagepe jadi pasu-pasu man kalak sideban. Sementara kalak si lenge kegeluhenna bengket ku kematen siibentasi alu kemusilen, kejahaten bagepe la jadi pasu-pasu tapi sumber kiniseran mana kalak sideban. Emaka kalak si erdahin eme kalak si pentar.

Ibas kolose 3, Paulus ningetken kerna karakter nggeluh manusia simbaru eme ngasup ndalanken fungsi ras perananna masing-masing alu mehuli. Hal enda isingetken man jabu kalak kristen, subuk e bapa, nande, perbulangen bagepe budak. Khusus ibas pengogenta berkaiten ras keberadan sekalak budak entah pe hamba siarus tetap ngasup ndalani kegeluhenna sebagai manusia baru I tengah-tengah keberadan kegluhen si mesera. Paulus ningetken maka sekalak budak arus singgeluh ibas biak manusia baru, ngasup encidahken kepatuhen, ngelakoken pendahinna alu mehuli ras bulat ukur, erdahin alu tutus sebab erdahin e labo terjeng guna “tuan” si lit bas doni enda tapi pe guna “Tuan si tuhu-tuhu eme Yesus”, sienggo nikapken upah. Tentu memang sisadari pendahin sekalak budak labo mesukah, janah situhuna labo pantas pe ia mindo upah man tuanna, erkiteken kegeluhen sekalk budak eme sikerajangen tuanna. Tapi Yesus enggo mpesikap upah man kerina kalak si ngelakoken pendahinna alu mehuli, tutus, bulat ukur. La pe sipindo tapi enggo leben ipesikap Dibata, janah ngalo me kita ibas paksana. Aminna pe hanya sekalak budak tapi arus ilakoken alu mehuli. Sebab erdahin labo guna ndatken pangan saja tapi guna mpemuliaken Tuhan.

Aplikasi

Ibas kegeluhenta lanai hal simbaru man banta adi isingetken kerna erdahin. Sebab kerina manusia memang erdahin sesuai ras kengasupen ras pemeteh masing-masing. Jadi jelas ngataken maka labo banci seri kerina pendahin manusia, sebab gegeh ras kengasupenta pe pelain-lain. Janah labo lit dahin si mulia entah setengah mulia, emaka ula min sempat kita membeda-bedaken manusia erkiteken pendahinna. Kai pe pendahinta eme sada pemere Dibata man banta, emaka siergakenlah pendahinta e. Tandana kita ngergaken pemere Dibata eme alu ndalanken ras ndahiken pendahinta e alu tutus. Sebab ibas kai pe perlu kel ketutusen sebagai salah sada kunci kesuksesan. Tutus labo berarti la ngadi-ngadi, tapi beluhlah kita makeken gegeh ras waktuta. Sebab melala kel siidah genduari melala kalak menghabisken waktuna guna erdahin guna ngayaki ulkih simehuli, she maka mekatep la isadari ndabuh kubas biak kerangapen. Kerangapen labo saja berkaiten ras pangan tapi kerina perbahanen si melampaui batas kewajaren e pe enggo masuk kalak si merangap. Bagi ikataken ibas bahan invocationta, maka tujun manusia erdahin eme pangan, si la erbias-bias. Lupa kita maka enda hanya sebagai alat guna ngaloken pasu-pasu Tuhan, siarus si kuasai labo engkuasai kita. Emaka pendahin e seutuhna lit ibas kendali manusia, labo pendahin singatur manusia. Emaka tentu enda pe ningetken man banta bagi kalak pentar ras lenge ndai sibanci ndahiken pendahinna alu mehuli, jujur ras tutus,makeken waktuna subuk guna merdang, rani bagepe tunduh teridah, kualitas/gegehna bagepe ngasup njadiken dirina jadi pasu-pasu man kalak sideban.

Pdt Sripinta br Ginting

Rg GBKP Cileungsi