SUPLEMEN PEKAN DOA GBKP 2022 WARI VII, JOHANES 14:113-14

 Invocatio :

“Adi tek kam, ialokenndu kap ibas Dibata nari kai saja si ipindondu man baNa arah pertotonndu.” (Matius 21 : 22)

Tema       :

“Ertoto Ras Kegeluhen” (Johanes 14 : 13-14)

 

1. Kata Perlebe

Menai renungenta berngi terakhir Pekan Doata, perlebe mari rende kita KEE 280:2

Man Tuhan pindo; K’rina si perlukenndu

Sehken arah toto; Labo perlu kam aru

Lah tetap ukur, Arapen la erkusur

Kekelengen Tuhan tetap labo luntur

Kekelengen Tuhan tetap labo luntur

Arah ende-endenta ngataken man banta maka TUHAN Dibata kap alamat pertotonta. Ku Tuhan si pindo kerina keperlun geluhta. Si sehken pemindonta arah pertoton. Tema umum Pekan Doa GBKP 2022 eme “Pengajaren Kerna Ertoto” (Johanes 14:13-14). Pengajarenta termasuk kerna hal si mendasar eme ertoto. Arah ngajarken kerna ertoto dingen nggeluh ibas toto si arapken maka ertoto e nggo jadi orat geluhta.

2. Renungen/ khotbah

Ope ayat renungenta, Tuhan Jesus ngataken kerna kelawesenNa man ajar-ajarNa. Kentisik nari ngenca Ia ras-ras jenari lawes me Ia (13:33). Si enda erbahanca ajar-ajarNa sedih, mbiar ras eraru ate. Aru ateNa sabab ibas perukurenna sirang me ia rasa lalap ras Tuhan. Iidah Tuhan Jesus kai si terjadi ibas pusuh ajar-ajarNa. IetehNa kearun ate ajar-ajarNa. Emaka ngerana Tuhan Jesus lako mpeteneng ras mpetetap ukur ajar-ajar. Jesus lawes kentisik saja. Jesus lawes ku Rumah Bapa. Jesus lawes lako nikapken ingan man ajar-ajarNa. Kenca sie reh Ia mulihi lako ngelegi ajar-ajarNa gelah ras Ia rasa lalap. Ia me dalan, ketuhu-tuhun ras kegeluhen. La lit ise seh ku Dibata Bapa adi la kin arah Jesus. Jesus jine ngatakenca maka Ia ibas Bapa, Bapa ibas Ia. Ia ras Bapa sada dingen ersada. Si ngidah Jesus nggo ngidah Bapa, janah si jumpa ras Jesus nggo jumpa ras Bapa.

Selanjutna Tuhan Jesus erjanji maka kai pe si ipindo ajar-ajarna ibas gelarNa iberekenNa me (ayat 13, 14). Mindo ibas gelar Jesus ertina mindo sue ras si ngena ate dingen misi Tuhan Jesus. Misi Tuhan Jesus jine eme maba Kinirajan Dibata dingen mpebelangsa i doni enda. Arah mindo si sue ras peraten dingen missi Tuhan pasti iberekenNa. Arah si e ermulia me Bapa ibas Jesus. Ayat enda la banci asal buat saja, ndarat bas konteksna nari. Konteksna jelas eme tupung ajar-ajar eraru ate kerna kesirangenna ras Tuhan. Tole la jelas man bana kerna kiniersadan Jesus ras Dibata Bapa. Ibas ayat umputenna icidahken maka ibereken Jesus pe Kesah Si Badia (ayat 16, 26). Jenari arah ayat invocatio ibas Mat. 21:22, ertoto man Dibata arus alu kiniteken. Syarat gelah ibegiken Tuhan pertoton dingen ngaloken kai si ipindo eme tek.

3. Pengkenaina/ aplikasi

• Tema: “Ertoto Ras Kegeluhen”. Temata ngerana kerna 2 hal. Sipemena: Ertoto. Jadikenlah ertoto jadi orat nggeluhta si tep-tep wari. Tuhanta Jesus jine ertoto dingen nuruh ajar-ajarNa gelah ertoto (Luk. 5:16; Mat. 7:7; 26:36-46). Jenari rasul Paulus nerusken dingen negasken kerna ertoto. Kalak si tek isuruh gelah ertoto katawari pe (Roma 12:12; Pilipi 4:6, 1 Tes.5:17). Ertoto eme ngerana, erhubungen (berelasi) ras erkomunikasi ras Dibata. Toto ras ertoto eme dalan jumpa, ersada ras ngerana man Dibata. Sipeduaken: Kegeluhen. Kegeluhenta la bage-bage saja, la datar ras statis saja. Kegeluhenta subuk secara pribadi bagepe secara ras-ras la banci ngadi.   Kegeluhen terus erdalan, terus berubah, dinamis dingen arus terulin asa si nggona. Kegeluhenta la kap terjeng doni enda ngenca, la terjeng kula saja tapi pe kegeluhen secara pusuh (jiwa), ras tendi. Emaka Kegeluhenta seh ku kegeluhen kenca nadingken doni enda pe. Erkiteken si e, kegeluhenta arus menuju ku kegeluhen si mehuli, payo, si ngena ate manusia terlebih Dibata dingen kegeluhen si tuhu- tuhu.
• Gelah kita seh kempak kegeluhen si ngena ate Dibata dingen kegeluhen si tuhu-tuhu, perlu ras penting kal kita ertoto. Gegeh, pemeteh ras beluhta terbatas kap. Arah toto si pindo man Dibata gelah iberekenNa pemeteh, gegeh/ kuasa ras kepentaren. Perlu ras penting kal si totoken kegeluhenta man Tuhan. Pindolah man Tuhanta arah toto gelah geluhta reh ulina reh dekahna, reh malemna ras sangapna kita reh dekahna.
• Ertotolah alu kiniteken. Tek maka ibereken Tuhan kai si ipindo kita. Teklah maka la lit si metahat man Tuhan. Ola ertoto tapi sangsi ras la kita tek totota e ibegiken ras ialoiNa. Ertoto arus alu kiniteken. Toto si erpalasken kiniteken erbahanca tutus ateta ertoto, semangat kita ertoto gia sekali la minter ibereken Tuhan kai si pindo kita. Toto si ipalasi kiniteken erbahanca megegeh ras tetap kita ertoto, la sungsung ras la engkelangi bagi manuk naruhen.
• Sendalanen ras ertoto alu kiniteken, ertotolah ibas gelar Tuhan Jesus. Ertoto ibas gelar Jesus ertina ertoto sue ras misi ras si ngena ate Tuhan Jesus. Misi ras si ngena ate Tuhan Jesus eme menghadirken Kinirajan Dibata gelah ermulia Dibata. Dage, la asal ertoto ras mindo saja. Apai ka ertoto alu tujun pesenangken dirita saja. Tentu labo ibereken Tuhan (Jakup 4:2, 3). Ertotolah gelah senang Tuhan dingen pe teman manusia, amin.

 

Pdt. Juris Tarigan-Rgn. Bogor