SUPLEMEN PEKAN DOA GBKP 2022 WARI I, MATIUS 6:5-15

Invocatio : Pilipi 4: 6

Khotbah : Matius 6:5-15

Thema : Pengajaren Kerna Ertoto

 

I. Kata Perlebe

Kita ertoto erkiteken ateta ngataken bujur man Dibata erkiteken iberekenNa simehuli ibas kegeluhen enda. Kita ertoto erkiteken kitik siakap banta, la kita ergegeh, bagepe lit kebiarenta. Kita ertoto mindo pengalemi dosa, mindo pergegeh, berhubungen ras Dibata simereken kepastin maka kita la sisada. Kita ertoto erkiteken kita la banci ngadapisa. Kata “doa/toto” ibas Bahasa Inggris, prayer, akar katana arah Bahasa Latin precarious ertina eme keadaan gawat/genting/rapuh. Lit ka nge kalak ertoto erkiteken putus asa, erkiteken lalit ise pe sibanci ipindona penampat. Pertoton merupaken sada hal sisipatna universal erkiteken hal sie ngerana kerna kebutuhen mendasar manusia. Sekalak teolog Thomas Merton ngataken pertoton eme ekspresi dirinta, erkiteken geluhta la sempurna. Lit sinirangken bagepe lit kekosongen ibas dirinta emaka mindo kita gelah idemi, eme arah pertoton. Ibas pertoton sireh arah pusuh simbages nari sibeneken me kengasupenta mpeseh kata-kata man Tuhan maler ibas pusuh simbages nari. Situhuna manusia secara mendasar lit sura-surana guna nandai Dibata. Entah erkiniteken ras la erkiniteken, enda me sura-sura simbages ras erta manusia simehergana kal. Sieteh ka nge maka kita enda eme rupa Dibata arah Jesus Kristus, emaka arah pertoton me salah sadana kita reh bagesna nandai sura-sura Dibata e. Emaka pertoton e eme hak istimewa, labo kewajipen. Guna sie me pertoton perlu disiplin. Erkiteken nggeluh ras Dibata seharusna teridah bagi persahabaten asangken terjeng nehi kewajipen. Emaka adi pertoton merupaken ingan Dibata bagepe ingan manusia jumpa, emaka harus me kita meteh kai pertoton e. Erkiteken mbue pergumulenta lit ibas lingkaren kegeluhen silit ibas dua hal: ngkai Dibata la ngelakoken kai sinisuraken kita bagepa ngkai kita la ngelakoken bagi sinisuraken Dibata. Emaka toto eme titik ija dua hal enda ndai jumpa.

 II. Isi

Bahan Pekan Doa berngi sipemena enda ngerana kerna uga kin cara ertoton sibenar. Sebab adi siperdiateken bahan khotbah pekan doa berngi sipemena enda pertoton e cenderung e ijadiken perbahanen si formal ntah pe resmi saja, padahal makna pertoton la terjeng sie saja. Labo maka makna formal ibas ertoto isalahpahami secara negatif, sebab pertoton siisehken enggo cenderung jadi belas-belas si rulih-ulih kosong makna ije. Pokokna secara resmi ntah pe formal enggo ibelasken. Sebab ertoto la terjeng nehken kewajipen alu mbelasken rumus pertoton tertentu janah adi enggo lakokenna enggo akapna sehkenna kewajipen, tentu sie labo pertoton si benar. Ula ngidah pertoton sebage sada kewajipen formal, tapi nehenlah sebage sada perbahanen mpeteruk diri iadepen Dibata guna ndatken pasu-pasu Dibata. Ibas kita ertoto perlu siinget kiniulin Dibata

si luar biasa ibas kegeluhenta. Jesus erban penekanen maka pertoton sibenar harus isehken man Dibata. Kesalahen simbelin sinilakoken kalak Jahudi eme mayoritas arah pertotonna la itujuken man Dibata tapi man manusia. Jesus erban penekanane maka kita harus lalap inget maka Dibata sijadi alamat pertotonta eme Dibata sidem kekelengen, silalap nggit njabap pertotonta sope kita mbelaskenca. Emaka Dibata labo perlu ipaksa gelah mereken pasu-pasu ras kiniulinNa. Kita la ertoto man Dibata sitetap denga harus ibujuk, igoda, ntah pe ipaksa guna njabap pertotonta.

Ibas bahan Pekan Doa enda pe iajarken man banta kerina kerna isi pertoton Tuhan sirusur sibelasken ibas kebaktin-kebaktinta. Pertoton Tuhan eme pertoton siterjeng banci ibelasken arah kalak situhu-tuhu ngiketken dirina man Jesus. Pertoton e lit ertina man kalak sibage. Pertoton Tuhan banci ibelasken kalak situhu-tuhu meteh kai sibelaskenna; janah pemeteh e bakal idatkenna adi ia bengket bagepe itingkatkenna dirina jadi ajar-ajar Jesus/pengikut Jesus. Emaka ibas pertoton Tuhan lit ije telu pemindon silit ibas pertoton Tuhan. Telu pemindon sipemena lit hubungenna ras Dibata bagepe kemulian Dibata. Telu pemindon selanjutna erkawiten ras dirinta bagepe kebutuhenta. Hal sie berarti Dibata harus ibereken ingan si utama, janah kenca sie banci sibelasken keperlun, kebutuhen ras sura-suranta. Adi Dibata enggo ibereken ingan sibenar, maka kerinana pe bakal ndatken ingan sibenar. Pertoton la banci merupaken usaha guna nilahken sura-sura Dibata gelah sue ras sura-suranta. Pertoton harus lalap jadi usaha guna ngendesken sura-suranta kempak sura-sura Dibata. Bagin seterusna isi pertoton Tuhan eme bagin si erkawiten ras dirinta, keperlun ras kebutuhenta, enda merupaken sada kiniersadan si terhubung alu mejile. Bagin enda ngerana kerna telu kebutuhen dasar manusia ras telu suasana/waktu ija manusia nggeluh ras bergerak. Pemena bagin enda mindo pangan, eme bahan pokok siniperluken guna mpertahanken kegeluhen; alu pemindon e maka keperlun manusia gundari ibaba kuadepen Dibata. Peduaken, bagin enda mindo pengalemi dosa; janah alu sie maka masa lalu manusia ibaba kuadepen Dibata. Janah sipeteluken, bagin enda mindo penampat ibas percuban, janah alu sie maka kerina masa depan manusia iendesken kubas tan Dibata. Arah telu pemindon enda kita iajari guna namaken masa kini, masa lalu, ras masa depanta iadepen Dibata.

III. Pengkenaina

Sekalak teolog Norwegia   Ole Hallesby menempatken kata kinilangasupen sebage ringkasen terbaik kerna sikap pusuh sialoken Dibata sebage pertoton. Nina Ole Hallesby kalak si la ergegeh nge sibanci tuhu-tuhu ertoto. Ertina kita lit ibas hubungen ketergantungen man Dibata gelah kerina erdalan alu mehuli ibas pengaturken Dibata. Emaka pertoton mabai kita ngidah keadanta situhuna. Nina Henri Nouwen ertoto eme erdalan iteruh terang kekelengen Dibata, kita banci ngerana alu bebas. Emaka alu bage me perubahen terjadi, pemulihen hubungen situhu- tuhu. Mindo penampat eme akar pertoton: Pertoton Tuhan jine lit ije koleksi pemindon. Pertoton eme pernyataan ketergantungen man Dibata. Perlu ka nge itekanken maka ibas kita ertoto perlu kiniteruken ukur. Tapi kiniteruken ukur sinimaksud ijenda labo maka sisembah-sembah alu dua ukur Dibata e, bagi kebiasan pejabat istana i Asia erjimpuh ayona seh ku taneh iadepen kaisarna. Sebalikna, sie lebih berarti iadepen Dibata kita ndatken pengidah kerna keadanta sikin situhuna ibas doni enda, seh kitikna kita sanga ipetangkas Dibata kerina man banta.

Jesus jine ngajarken kita guna siandalken kerembakenta ras Tuhan. Ibas pertotonNa jine, ipakeNa kata Bapa, sada kata informal si la ipakeken ibas pertoton kalak Jahudi sope Ia. Cara simbaru ibas ertoton nggo turah, nina sekalak teolog Joachim Jeremias: Jesus ngerana man BapaNa alu alami, seh kal deherna ras nyaman bagi ranan sekalak anak man bapana. Alu bage lit me penungkunen, ngkai kita ertoto? Jawapna eme erkiteken Jesus ngelakokenca. Ipejumpaken Jesus pembatas antara manusia ras Dibata. Sanga Ia i doni, Ia jadi lemah, erkiteken kita pe lemah; itulak, erkiteken kita pe itulak; iuji, erkiteken kita pe iuji. Ibas tiap kasus, tanggapenNa eme ertoto.

Ertoto labo merupaken cara kita erban Dibata gelah reh, tapi ertoto merupaken caranta menanggapi kerehen Dibata simerupaken sada fakta, apakah kita banci metehsa ras lang. Bagi siikataken Rabi Jahudi Abraham Joshua Heschel hubungen ras Ia labo kengasupenta. Enda eme pasu-pasu, nusur man banta ibas ingan simeganjangna nari. Sope kita mbelasken pertoton arah babahta nari, perukurenta harus tek kempak kininggiten Dibata guna rembak man banta bagepe kempak kengasupenta guna mbersihken dalan ibas Ia rembak man banta. Keyakinen sibage eme ide simabai kita menuju pertoton. Emaka tiap kita merasa bersalah erkiteken pertotonta kurang sikap, ntah pe kecewa kita erkiteken pertotonta la ijawap Tuhan, iingetken me kita maka pertoton berarti njaga kebersaman ras Dibata singgo lit. Sebab adi sieteh inti pemena pertoton Tuhan eme kai sinisuraken Dibata arah kita nari. GelarNdu ipebadia min, reh min kinirajanNdu, seh lah min peratenNdu, Dibata atena kita gelah meteh sienda, guna mabai kegeluhenta ibas sura-sura Dibata enda. Amin pe kebutuhenta mabai kita guna ertoto, kepeken ibas pertoton simbages e kita berhadapen secara langsung alu kebutuhenta simbelinna eme: perjumpanta ras Dibata jine. Pertoton siipalasi hubungen labo transaksi mungkin merupaken cara paling bebas guna berhubungen ras Dibata sikin caraNa ngaturken doni enda la terukuri kita. Sebab nina Petrus mata Tuhan tertuju man kalak benar bagepe cuping Dibata meteh kai sipindo kita. Emaka hubungenta ras Tuhan ngenda perlu sipekena ibas pertotonta. La perlu sipajuh-pajuh Dibata alu berlebihen bagi kita majuh kalak perpangkat, kuasa setan, guna kita ndatken perhatian ibas Dibata nari, sebab nggo lit ibas kita palas hubungen erDibata.

Tujun utama pertoton labo guna erban geluhta aman ntah pe ndatken gegeh luar biasa, tapi guna nandai Dibata. Emaka menurut sudut pandang Jesus pertoton sebage sumber gegeh si mperlengkapi Ia guna jadi aron Dibata i doni enda. Jesus secara terbuka ngakui ketergantungenNa. Memang Bapa meteh kai siniperluken kita sope sipindo sie man Bapa. Kai maksud Jesus labo maka pertoton e la perlu, justru pertoton e me sumber gegehNa. Maksudna, kita la perlu mpekeri gegeh guna meyakinken Dibata gelah peduli man banta; Bapa e nggo peduli man banta, lebih asa sieteh kita. Pertoton labo persoalen mereken man Dibata informasi. Sebalikna, asangken nehken pemindon tempa-tempa Dibata la metehsa, mungkin lebih tepat sikataken bagenda, O Tuhan ietehNdu kap perlu kal aku sie. Mungkin bingung denga kita alu ranan Jesus Bapandu meteh kai siperlukenndu, sope kam mindokenca man baNa. Adi bage, ngkai maka harus repot kita ertoto? Kepeken arah persahabaten, sipahami maksudNa kerna kerembaken. Intina tuhu-tuhu kal kita enda ikelengi Dibata. Pertoton eme njaga hubungen ras Dibata.

Model pertoton siiajarken Tuhan Jesus tep-tep wari man banta eme: sura-sura Dibata, pangan, utang, pengalemi dosa, percuban, janah pertotonNa e jine ncidahken persadan si spontan ras Dibata Bapa, pertoton sikin sebelumna la pernah lit. Ajar-ajarNa pe, silabo mbaru kal memahami kerna ertoto, kagum ngidah perbedan makna ertoto siiajarken Jesus. Tapi, amin bage pertoton e la reh secara alami. Pertoton e merupaken perjuangen guna ngidah pertoton sebage dialog, labo monolog. Uga kita banci berkomunikasi ras Dibata si cenderung la make kata-kata ibas jawapenNa? Emaka payo me ertoto e merupaken salah sada latihen rohani. Sebab bagi siikataken Bunda Theresa rahasiaku sederhana saja: aku ertoto. Ertoto eme ngerana ras Dibata. Ia ngerana man banta: emaka sibegiken. Kita ngerana man baNa: Ia megiken.

Nina sekalak filsuf Kristen   Soren Kierkegard, pertoton la mengubah Tuhan, tapi mengubah kalak si ertoto. Sekalak filsuf Romawi Cicero mereken penilaian terus terang kempak tujun ertoton kalak si la nandai Dibata, kami la ertoto man dewa Jupiter guna erban kami mehuli, tapi guna erban kami ndatken keuntungen materi. Ibas kalak Kristen, kebalikenna siterjadi. Kita mungkin ndeheri Dibata alu niat guna ndatken keuntungen materi, mawen-mawen sidatken ka nge. Tapi ibas pertotonta kita pe mbuka saluren sibanci ipake Dibata ibas mengubah kita, erban kita mehuli. Pertoton simegenggeng mengubah kita guna nampati kita ngidah doni, sisadari maka lit ibas Dibata gambaren lebih jelas arah kai siniperluken kita asangken dirinta jine. Pertoton la mengubah Dibata, tapi mengubah kalak si ertoto. Mungkin mawen-mawen perubahen internal siidatken kita arah pertoton memungkinken jawapen singgo ndekah sidarami eme perubahen ibas Dibata adi kita ersura kerna sie. Pertoton silalap mabai kita kubas keadan rohani simbaru sinisuraken Dibata. Mungkin eme sebabna Abraham, Musa, Jakub, rsd ndatken dirina seh kal gegehna ia bergumul: pergumulen nyata berhadapen ras Dibata sangana berkembang ibas dirina, ibas kualitas rohani sinisuraken Dibata. Emaka nilai nyata arah pertoton simegenggeng labo maka kita ndatken kai sinisuraken kita, tapi kita jadi kalak siseharusna.

Kita kerina berbeda, baik ibas hal kepribadian bagepe situasi kegeluhen. Piga-piga diantara kita bakal ndatken maka waktu ertoto terbaik eme sanga ibas beraktivitas. Pertoton labo kontes perbandingen. Kalak sipaling la berpendidiken ras la terkenal lit kesempatenna siseri bahkan mungkin lebih guna jadi sekalak pendoa si handal bagi kalak silit jabatenna i gereja. Martin Luther, rata-rata ertoto dua jam per wari, mereken saran, reh sitikna kata-kata, reh mehulina sada pertoton. Luther bereaksi nandangi pendoa ibas jamanna, si formal ras ipamerkenna dirina, si mengarah kempak pekulah-kulah. Ertotolah ibas pusuh nari. Ukurken kerna Dibata, man ise sipeseh totonta, janah labo ngukurken kalak sideban simungkin megiken pertotonta. Aku la banci ertoto bagi Martin Luther. Aku lalit semangat bagi Bunda Theresa. Tentu kita setuju. Kita idilo labo guna meniru kalak sideban i doni, tapi guna menyadari diri kita si asli. Thomas Merton erban perbedan antara dirinta si palsu siate situduhken man doni ras dirinta situhu-tuhu sieteh Dibata. Selain syarat maka kita harus jadi dirinta jine iadepen Dibata, lalit cara khusus siharus ilakoken ibas ertoto. Masing-masing arah kita lit kepribadian, pengarapen, latihen, pemere, ras kelemahen si unik, sie pe lit ije pengalamen si unik raduken gereja ras Dibata. Bagi siikataken Roberta Bondi adi kita ertoto, kita nggo ngelakokenca alu benar.

Jesus ngajarken Pertoton Tuhan tapi pe mereken piga-piga aturen. Pengajarenna erpalasken ibas telu prinsip dasar: tetap bujur, sederhana, ras berkelanjuten. Secara keseluruhen, Jesus erban penekanen maka kita reh sebage anak siikelengi man sekalak Bapa singgo ngkelengi ras tuhu-tuhu mperdiateken kegeluhenta. Sungkun man orangtua kerna cara sitepat man anak-anak balita guna ndeheri anak balita e pasti me orangtua e bakal ngidah penatap si bingung. Apai nge cara sitepat? Jadi orangtua berarti kita ngelakoken siterbaik guna lalap lit man anakta bagepe menanggapi kebutuhenna. Bagi nina Jesus adi orangtua manusiawi mereken respon alu kekelengen janah labo permusuhen, apai ka Bapa sinisurga.

Mungkin lit nge kita enda merasa kata-katanta lalit ertina, turah kebingungen. Ertoto tempa jadi sada hal sibodoh, bahkan la masuk akal. Tapi kepeken njaga hubungen ras Dibata mencakup ndauh lebih mbue waktu asangken sipake kita ertoto tiap wari. Dibata nggeluh segedang wari, isekelewet bagepe ibas dirinta, ngerana alu sora teneng, bagepe alu cara sideban simungkin la sitandai. Dibata tuhu-tuhu la sinik, kita nge si la megiken, nina Teresa de Avila. Dahinta eme guna tetap metenget bagi sekalak penjaga si erjaga-jaga. Emaka sijadi penungkunen apakah kita ngayaki hasil arah toto asangken kerembakenta ras Dibata. Sanga Paulus ertoto gelah ipulahi duri ibas kulana, bena-benana ia teridah bingung erkiteken kurangna respon Dibata. Apakah la ibegiken Dibata? Emaka idatkenna pengenehen rohani simeherga: perbeben bakal memaksa guna terus mengandalken Dibata. Paulus mis erban penyesuain, erkiteken ia lebih ngergai kerembaken ras ketergantungen kempak Dibata asangken kesehaten kula. Emaka adi lit ibas kita situasi pertotonta tempa kata-katana lalit ertina, pakekenlah waktu e guna nikapken diri guna pertumbuhen ibas masa depan. Jesus erban syarat proses sibage ibas perumpamanNa kerna batang anggur: tiap ranting si erbuah, ibersihkenNa, gelah ia lebih mbue erbuah. Bagi sieteh perjuma anggur ntah pe mawar, pembersihen ranting si mehumur, sikin bena-benana teridah kejam ras ncedai, situhuna guna mbersihken tunas gelah turah lebih produktif asangken sebelumna. Perjuma anggur njelasken maka ia nulak guna niram anggurna erkiteken tekanen si isebabken erkiteken cuaca kerah menghasilken anggur simehuli bagepe ntabeh. Kepeken cuaca kerah erban urat anggur e bengket kubas, mpegegehi anggur guna kai pe sibakal ihadapina. Ibas kata-kata Henry Blackaby kita banci merespon keteduhen Dibata ibas dua cara. Salah sada respon eme kita bengket kubas depresi, rasa bersalah, bagepe numpahi dirinta jine. Respon sideban eme lit pengarapenta maka Dibata mabai kita kempak pemeteh silebih mbages kerna diriNa. Dua tanggapen enda berbeda.

 

Pdt. Andreas Pranata Meliala, S.Th-GBKP Rg. Cibinong