Invocatio       : “Paksa sie, lawes Jesus ku datas sada uruk-uruk; ije Ia ertoto

man Dibata seh terang wari.” (Lukas 6:12)

Renungen      : 1 Samuel 1:21-28

Tema            : “TUTUS RAS PATUH”

I.             Kata Perlebe

Megati pertoton e iakap terjeng mindo man Tuhan, alu la lit urusen sideban ras Tuhan. Enggo kenca dat pemindon e, enggo dung, lanai lit umputen pertoton e. Kecuali iumputi alu pemindon sideban.

Emaka perlu sipergermeti biak/ karakter kalak siertoto man Tuhan sidem alu tanggungjawab ras komitmen sienteguh ras Tuhan. Adi isehken Tuhan pemindonta maka kita pe arusna ngukuri ras ndalanken singena ate Tuhan.

II.           Pebagesi pengangkan Kata Dibata

Siperdiateken maka Hanna reh ku rumah pertoton mindo anak arah “tahun ku tahun” (ay.7), aminna ibas rumah pertoton e isaling-saling Penina kiduana erkiteken la ibere Tuhan pupus man bana, la erbahan ia ngadi ertoto. Itambahi Imam Eli si erpengakap maka ia diberu pemabuk, epe la nuruti ketutusenna mindo man Tuhan. Pusuhna lalap ipegegehina guna mindo man Tuhan. Sabab Tuhan Jesus ibas Matius 7:7-8 ngataken "Pindolah, tentu ngalo me kam; daramilah, tentu idatndu; tuktuklah, tentu italangi pintun man bandu. Sabap si mindo, ngalo, si ndarami dat me, janah si nuktuk, italangi pintun man bana”. Kata kerja aktif “pindolah… daramilah…tuktuklah” mengandung makna tutus ras setia, bertekun dalam doa, konsisten ras kontiniu ibas pertoton.

Pemindon Hanna ilengkapi alu perpadanen man Tuhan, Erpadan Hanna man TUHAN nina, "O TUHAN si Mada Kuasa, perdiateken min aku suruh-suruhenNdu enda! Nehenlah kesusahenku janah ingetlah aku! Ola lupaken aku! Adi iberekenNdu man bangku sekalak anak dilaki, erpadan aku maka kuendesken ia man baNdu kidekah geluhna, janah bukna ndigan pe la ipangkasna” (ay.11). Tuhu-tuhu penting kel pemindon Hanna enda man Tuhan, bahwa perlu ia mbuktiken maka keleng ate Tuhan man bana. Kentisik saja jadi sikerajangenna anak epe labo dalih, seterusna iendeskenna man Tuhan.

Kenca ialokenna pemere Tuhan, Hanna tuhu-tuhu ngakui pemere Tuhan alu gelar siniberekenna man anakna. Ibahanna gelarna Samuel, sabap nina, "Man TUHAN kupindo ia” (ay. 20). Arah gelar Samuel e jine enggo lalap ia empermuliaken Tuhan, asal ilebuhna anakna e ibegi kalak “Man TUHAN kupindo ia”. Kenca lepas minem anakna e iendeskenna ku rumah pertoton guna ngelai Tuhan. Sabab ingetna padan si enggo ibelaskenna man Tuhan.

Ibas ngendesken anakna e, ia ngelakoken persembahen man Tuhan. Ibabana me persembahen: sada anak lembu umur telu tahun, sepuluh kilo tepung ras lau anggur tare guci si ibahan i bas kulit nari. Dingen sipentingna ipersembahkenna anakna Samuel guna ngelai Tuhan seumur geluhna. Siidah maka Hanna ertutus ate segelah Samuel ngelai Tuhan. Terus nge iperdiatekenna anakna e, khususna alu nikapken uis ngelai Tuhan man Samuel. Arapen Hanna enda tersehi ibas diri Samuel, sabab rencana Tuhan pe mbelin nandangi Samuel. 1 Samuel 2:18-19 “Asum si e Samuel kitik denga, terus erdahin ndahinken dahin TUHAN . Pakenna baju si badia si ibahan i bas linen nari. Tiap tahun ibahan nandena sada baju kitik jenari ibabana man bana asum ia nemani perbulangenna nehken persembahen tahunen”.

Adi siperdiateken ibas kegeluhen Samuel ras Tuhan Jesus lit perbalina. Eme ibas 1 Samuel 2:26 ikataken “Samuel terus erbelinna janah erngenana ate TUHAN ras manusia man bana”. Kerna Jesus pe ikataken ibas Lukas 2:52 “Jesus pe reh belinna dingen reh tambahna pemetehNa, janah reh tambahna pe ngena ate Dibata ras manusia man baNa”. Samuel enda anak kitik denga tapi ia enggo ngelai Tuhan, ngena ate Tuhan nandangi pelayanenna. Jadi ialoken Tuhan pelayanen sesekalak labo erpalasken umur. Katawari pe ate sesekalak guna ngelai Tuhan, labo lit singudasa denga man Tuhan.

III.         Pengkenaina

Hanna eme karakter pendoa si erkomitmen enteguh man Tuhan. Bahwa ulih pemindonna man Tuhan, ipersembahkenna anakna Samuel guna ngelai Tuhan. Situhuna danci sikataken maka leben nge lit rencana Tuhan guna nikapken pengganti imam Eli. Rencana Tuhan enda ipedalan arah sekalak pernanden situtus ertoto man Tuhan. Man Tuhan ipindo Hanna maka ibereken Tuhan man bana perkuah ate Tuhan singangkatken dirina, arah sekalak pernanden simeteruk jadi pernanden simehaga. Maka ibas tersehi tujun Tuhan arah geluhta eme kehagan man banta.

Arah renungenta enda, mari dage siarahken pemindonta man Tuhan, pemindon silebih berkualitas eme pemindon tugas ras tanggungjawab. Sicidahken komitmenta man Tuhan arah tep-tep pertotonta sipenangkih kita man Tuhan. Lanai pertoton si erpusat kempak diri sendiri tapi sitertuju kempak Tuhan alu menselarasken pemindonta ras tujun Tuhan.

Ibas kita ngaloken pemere Tuhan sekalak anak kubas jabunta eme merupaken tanggungjawabta selaku orangtua guna empersembahkenca man Tuhan. Sipersingeti man anakta maka ia me pemere Tuhan man banta. Segelah anak epe ingetna maka ia rehna arah Tuhan nari dingen lit tanggungjawabna guna ngelai Tuhan. Bage pe sicidahken komitmenta guna ngendesken anakta e man Tuhan alu pertotonta guna ia, bage pe kalak-kalak siterlibat ibas empebelin-belin ras ndidik anakta e. Bahwa anakta e ibimbing alu tekun ibas pertoton. Inget tugasta notoken guru-guru sekolah mingguna, guruna ibas sekolah, teman-teman ras pergaulenna. Alu bage maka meherga kegeluhenta selaku orangtua siberhasil mengarahken anak-anakta guna mengutamaken Tuhan ibas kegeluhenna. Amin.

Pdt. Sura Purba Saputra, M.Th

GBKP Harapan Indah

Invocatio    : “Awang-awang ndai igelari Dibata "Langit". E maka ben me wari, jenari siang ka -- e me wari si peduaken” (Kej. 1:8).

Khotbah        : Kel. 3: 5 -15

Tema            : Kutandai Dibata si Kusembah

I.         Pendahuluan

Ituriken ibas sada negeri, ibahan me perlombaan melukis alu judul “damai”. Melala kel kalak si reh ras mendaftarken dirina ibas perlombaan melukis e erkiteken hadiah siijanjiken nandangi pemenang pe cukup galang jumlahna ras lukisen si keluar sebagai pemenang itamaken ku ruang tamu kerajaan. Tiap wari melala kalak si reh ras naruhken lukisenna, bagi gambar gunung dengan matawari ersinalsal, gambar perik-perik si kabang ibabo lawit, sekalak anak iteruh batang kayu janah bermain seruling ras sidebanna  ku meja panitia. La ketadingen pe sekalak anak remaja tanggung si alu percaya diri maba lukisenna ku meja panitia, emekap sada lukisen yang sipelain ras lukisen si deban. Lukisen e sada gambar anak kitik idas perahu si kitik i tengah laut si masangat kel ombakna ras angin si nderpa perahu e. Singkat cerita, kenca seh me waktu ipepulung lukisen e, maka iumumken me lukisen sebagai juara emekap lukisen sekalak anak remaja tanggung ndai. Engkai?

II.       Pembahasan

Tujun kitab keluaren enda guna menyatakan kerna perbahanen-perbahanen Dibata si bersejarah ibas penebusen/ penyelamaten bangsa Israel arah Mesir nari seh ku perjanjian nadangi Israel sebagai bangsa Dibata. Latar belakang kitab Keluaren enda kerna kesusahen bangsa Israel iteruh kekuasaan Mesir, emaka Tuhan nggo megi kerna pertangis bangsaNa ras nggo turah perkuah ate Tuhan nandangi bangsaNa Israel, emaka isuruhna me Musa guna mabai bangsa e ndarat ibas taneh Mesir nari. Emaka kitab keluaren (exodus) adalah keluaran atau keberangkatan  bangsa Israel ndarat arah taneh perbudaken Mesir nari.

Ibas perikop Keluaren 3:5-15 enda ngerana kerna percakapen Dibata ras Musa sebab Dibata nggo milih Musa jadi pemimpin nandangi kalak Israel si mabai kalak Israel ndarat ibas taneh Mesir nari. Ikataken maka paksa Dibata ngerana man Musa, minter iteh Musa maka si ngerana ras ia e emekap Dibata, emaka mis itamburina ayona erkiteken mbiar ia (ay.6). Hal enda merupaken sada sikap dekat ras hormat ibas Musa nari ku Dibata, sebab itehna maka Dibata e mulia janah la pantas kapna dirina guna banci natap Dibata.

Perpulungen kekelengen Tuhan, Musa emekap kalak si nandai Dibata ras ia tuhu-tuhu megermet nandangi perbahanen Dibata, sehingga ia meteh kuga seharusna bersikap paksa jumpa ras Dibata e. Emaka itamburina ayona ras mbiar ia, sebab itehna ia kalak si perdosa i lebe-lebe Tuhan. Pemilihan Musa, labo sada pemilihen si biasa saja, justru pemilihen Musa guna jadi pemimpin bangsaNa ndarat i Mesir nari, erkiteken hal si menarik lit bas dirina, emekap: kalak si nandai Dibata (ay. 6); meteruk ukurna (ay. 11), mengandalken Tuhan (ay. 13).

Enda me sierbahanca maka Musa ipilih Tuhan guna menjadi pemimpin bangsaNa, bahwa ia nandai Dibata ras ernalem man Dibata saja. Iandalkenna Dibata ibas dahin si ibereken man bana e. Sue ras tema “Ku tandai Dibata si kusembah”, melalui sikap Musa ibas ia jumpa ras Dibata, tandaina ise dirina, maka labo ia pantas guna petala-tala ras Dibata. Ibas ayat 11, nina : la kap lit ergangku. Uga banci aku ndahi raja e janah mabai bangsa Israel ndarat i Mesir nari? Maka nina Tuhan erjabab: Aku ras kam.. (ayat 12). La ngenca kerna njumpai Firaun, bahkan Musa pe nungkun kerna penungkunen bangsa Israel nandai dirina, janah Tuhan pe tetap empetangkas bahwa IA si ras Musa. Ijenda  teridah maka Dibata tetap ras Musa. La IA nadingken Musa. Melalui jawaben si ibereken Dibata e, tangkas kel man Musa maka Dibata si isembahna emekap Dibata si mbisa, si nggo lit nai-nai nari seh rasa lalap, tentu lanai lit kebiarenna guna ndahiken dahinna e.

Perpulungen kekelengen Tuhan, bagi Musa nandai, kita pe selaku kalak Kristen si nggo nandai Kristus, seharusna kita nandai dirinta i lebe-lebe Tuhan, maka kita enda kalak perdosa si nggo iselamatken Dibata, emaka labo lit dalanta guna meganjang ukur. Janah ibas pihak si deban, maka ibas kinilangasupennta e, Dibata ras kita kap, sehingga lalit arusna kebiarenta. Sebab IA ras kita. IA kap Dibata si nggo lit nai-nai nari, janah IA kap Dibata si nggo erbahan kerina si lit ibas doni enda.

Bagi sekalak anak ndai, melala kalak si la ngaloken kemenangen atas lukisenna. Tapi engkai maka lukisenna si terpilih? Gambarna ndai emekap sekalak anak idas perahu si kitik i tengah lawit si mesangat kel ombak ras anginna. Nina anak ndai: aminna gia ombak ras meter angin, anak e tetap tenang ras erpengarapen ia maka Dibata Bapana tetap ras ia, emaka tetap ia tenang ras ikendalikenna perahuna.

Jadi perpulungen kekelengen Tuhan ibas wari pekan doa si pertama enda, ngajarken kita ibas nandai Dibata si kita sembah e, seharusna mabai sikap geluhta pe tunduk nandangi kataNA ras tetap erpengarapen man baNA ibas kerina kegeluhenta aminna gia melala persoalen ras tantangen geluh enda. Ingetlah Dibata si kita sembah e, la pernah nadingken kita.

Pdt. Andreas Joseph Tarigan

Ketua Klasis GBKP Bekasi-Denpasar

Renungan : Perbahanen Rasul - rasul 2 : 1 - 11.

Tema : Pulunglah Min

Sope denga Jesus nangkih ku Surga, ipadankenNa Kesah Si Badia guna tetap nemani ras nampati kalak si erkiniteken man Jesus. Kesah Si Badia eme sinampati (Yunani: Parakletos) man kalak si erkiniteken man Tuhan Jesus. Bagi Tuhan Jesus enggo jadi Guru man kalak sierkiniteken, bage ka pe Kesah Si Badia jadi Guru man banta guna banci ngajari kita, mpersingeti kita kerna kai si enggo ikataken Jesus. Ibas Johanes 14 : 26, "Si nampati eme Kesah Si Badia, si isuruh Bapa pagi ibas gelarKu, iajarina kam kerna kai pe, dingen ipersingeti-Na kam pagi kerna kerina si enggo Kukataken man bandu". Pendahin Kesah Si Badia la terbatas kubas ruang ras waktu, Kesah Si Badia banci ringan ijapa pe, Kesah Si Badia si tetap nemani kita ibas kerina dampar kegeluhenta.

Sanga pulung kerina kalak si tek man Tuhan Jesus ibas sada ingan, rempet lit sora terbegi reh i langit nari bagi sora angin rembus erdeso. Kenca sie idah kalak ndai tempa-tempa bagi dilah api merap kujah kuje encinepi ia sada sada. Kerina sipulung e dem alu Kesah Si Badia janah ngerana ia ibas cakap sideban, bagi ibere Kesah e ia ngerana. Tapi kerina simegi cakap e ngangkaisa ibas cakapna sekalak-sekalak. Cakap si ibelasken kalak si tek man Jesus e eme cakap si mbaru, ija gunana mpersadaken, sabab kerina kalak si megisa ibegina ibas cakapna sekalak-sekalak. Ertina maka kalak si idemi Kesah Si Badia pengeranana ras perbahanenna eme mpersadaken ia nirangken entah erbahansa pecah. Kesah Si Badia eme si mereken kengasupen man ajar ajar bage pe man banta lako ersaksi kerna Jesus si enggo mate, keke ras nangkih ku Surga, Jesus eme Juruselamat doni enda. Tugas ersaksi labo hanya man ajar ajar, tapi pe man kerina kalak si tek sinaksiken nusurna Kesah Si Badia.

Kesah Si Badia nusur tupung kalak si tek man Jesus pulung ras-ras dingen ertoto. Enda ncidahken maka pulung ras ertoto e seh kel mbelinna gunana man banta. Jabu merupaken perpulungen sipemenana kel, eme bapa, nande ras anak-anak guna ras ertoto, ras rende ras ercakap-cakap kerna Kata Dibata rikut naksikensa bas jabu. Kesah Si Badia nusur ibas perpulungenta e, si erbahansa kita ersada, lit perdamen, lit ketedehen ate, lit kekelengen ras ndauh ibas perpecahen. Kesah Si Badia e mpedauh kerina perukuren perukuren si la mehuli janah ngajari kita erbahan simehuli ras pang naksiken Kristus ibas kegeluhenta.

Alu bage, marilah sibahan waktu pulung tep-tep wari bas jabunta. Ertoto, ngoge Kata Dibata ras naksiken Kata Dibata. Segelah bas jabunta nari, turah saksi-saksi Kristus sipang naksiken keleng ate ras kebenaren Kristus. Jenari ersada ka kita ras perpulungen igerejata, eme Kebaktin, PJJ ras PA-PA bagepe kegiatan kegiatan si lit ibas gerejatanta. Alu bage reh gegehna kiniersadanta ras reh teremna si pang jadi saksi Kristus. Amin

                    Pdt Nur Elly Tarigan

                     GBKP Karawang.