PEKAN KEBAKTIN KELUARGA WARI-V TAHUN 2017

Invocatio          : Kesusuren Raja Daud bali ras batang kayu si enggo itabah. Tapi bagi tunas si

                        turah ibas tongkehna nari, bage me pe ibas kesusuren Daud nari keke sekalak

raja. ( Yesaya 11:1 )

Ogen                : Mikha 5 : 2 - 5a

Khotbah            : Lukas 1 : 38 - 45

Tema                : Dewasa er advent

Pokok pikiran    : -     Ersikap ngalo-ngalo natal ( mental, spiritual, material )

• Ula jungut-jungut di kune mbue adangen natal
• Ngukuri sigel ukur ras teman guna banci purpursage

Model Liturgi     : Meditative, metode sharing kerna persiapan natal

PERLEBE

Advent ertina eme masa nimai kerehen Tuhan Yesus peduakaliken. Nama advent ibuat ibas bahasa Latin nari Adventus siertina Kerehen. Ibas advent kalak kristen nikapken diri mperingeti ketubuhen Tuhan Yesus ( natal ) ras ersikap ngalo-ngalo kerehen Tuhan Yesus pedua kaliken. Persikapen kai nge siperlu ilakoken ibas masa advent…? Tentu melala… mulai ibas pembentuken panitia natal, latihan-latihan natal, nikapken keperlun-keperlun natal ibas jabu bagepe gereja. Tentu si enda kerina membutuhken pikiren, kesiapan materi ras kesiapan mental dahiken dahin-dahin e alu pusuh si dame. Persikapen sipentingna eme pusuh si tetap erpengarapen man Tuhan bagepe nggeluh bagi singena ate Tuhan. Bahan pekan kebaktin keluarga wari-V enda mabai kita guna dewasa er-advent arah keteladan dua kalak diberu eme Maria ras Elisabet ermeriah ukur ngaloken pasu-pasu Tuhan man bana.

MPEBAGESI NATS

1. Ayat 38 : Kenca Maria ngaloken berita ibas malekat Tuhan nari maka mehuli kulana maka mupus anak Dibata ( Yesus ), maria ngaloi alu kata : “ kuendesken diringku man Tuhan, janah jadilah ibas aku bagi si nggo ikatakenndu e ! “. KUENDESKEN DIRINGKU enda mengandung erti berserah ( erpengedes ) man Tuhan, maka sura-sura Tuhan lah si jadi. Amin pe mberat pe siman alanken rikutken statusna singuda-nguda mehuli kulana, la erbahanca ia MENYERAH.
2. Ayat 39 : paksa Maria ngaloken berita maka mehuli me kulana, raduken si e pe ipebetehken man bana maka Elisabet kade-kadena pe nggo natang tuah pe enem bulanken. Ikataken kalak ia la banci mupus erkiteken ia nggo metua, la lit si metahat ibas Dibata. Keriahen ukur Maria megiken berita e erbahanca ia lawes ku kuta Judea i daerah si erdeleng-deleng. I je lawes ia ku rumah Sakaria. Janah sanga ia bengket ku rumah e ikatakenna man Elisabet “ Mejuah-juah “.

Dua kalak diberu ngaloken pasu-pasu simbelin ibas Tuhan nari :

• Maria ikaruniakan keriahen jadi nande anak Dibata ( Jesus )
• Elisabet natang tuah paksa nggo metua, iakap mandul tapi la lit metahat ibas Tuhan, ia ngaloken mujijat.

Keriahen ukur Maria erbahanca berkat ia ikota Nasaret idaerah Galilea nari, ndahi kade-kadena Elisabet, lawes ku sada kuta i Judea idaerah sierdeleng-deleng. Perdalanen sindauh la iakap latih erkiteken meriah ukur. Salam Maria man Elisabet eme “ Mejuah-juah” si seri ertina bhs. Ibrani : Syalom, bhs. Yunani : Irene : ertina sejahtera, damai ). Kerehen Maria ngataken selamat sejahtera ras damai man Elisabet.

3. Ayat 40-44 : asum ibegi Elisabet sora Maria, minter KEMUIT ( bhs Indonesia : MELONJAKLAH ) anak si lit ibas bertinna. Elisabet dem alu Kesah si Badia.   Megi sora nande anak Dibata, ternyata anak si bas bertin Elisabet merespon aktif janah Elisabet pe idemi Kesah si Badia ras belasken kata pasu-pasu “ kerina diberu kam me simbelinna daten pasu-pasu ! ipasu-pasu gelah anak si ipupusndu !. Elisabet pe mpeteguhi pusuh Maria maka anak si lit bas bertin Maria jadi pasu-pasu. Dua kalak diberu si paksa natang tuah saling mpeteguhi alu mere kata pasu-pasu.
4. Ayat 45 : Malem tuhu-tuhu atendu sabab TEK kam maka kai si iberitaken Tuhan man bandu tuhu-tuhu jadi. Kalak si tek eme kalak singaloken kata Tuhan, bagi Maria tek berita siipeseh malekat man bana eme dalanna ia lawes dahi Elisabet, jumpa dem keriahen erkiteken duana ia diberu si ngaloken pasu-pasu simbelin.

• Maria nande Jesus. Jesus jadi pasu-pasu simbelin man doni enda, Yohanes 3 : 16 “ sebab bage pengkelengi Dibata doni enda, e maka iberekenNa AnakNa Sitonggal, gelah ola bene ise pe si tek man Bana, tapi gelah dat kegeluhen si tuhu-tuhu si la erkeri-kerin.
• Elisabet nande Johanes. Johanes eme kalak simbelin i lebe-lebe Tuhan. La banci inemna lau anggur tah pe inemen keras si deban. Mulai tubuhna pe ia enggo dem alu Kesah si Badia. Arah ia nterem pagi kalak Israel mulihken erkemalangen man Tuhan Dibatana. Leben pagi ia reh asa Tuhan; ia megegeh dingen erkuasa bagi nabi Elia, idamekenna pagi bapa ras anak-anakna; ibahanna kalak jahat jadi bujur; alu bage isikapkenna man Tuhan bangsa simetunggung. ( Lukas 1 : 15-17 )

PENGKENAI ( APLIKASI )

1. Dewasa ertina nggo memiliki kematangan dan tanggunjawab simencerminken karakter mehuli. Sikap dewasa eme sikap mediate nandangi si mehuli. Nggit ndeher ras darami hal-hal simehuli. nggit ngaloken dingen patuh man pedah-pedah simehuli. Dewasa eradvent berarti bersikap   nggeluh bagi singena ate Tuhan, tetap erbahan si mehuli ibas paksa advent.
2. Kai pe dahin siibereken Tuhan man banta paksa masa advent sialoken alu tetap erpengendes man Tuhan, BERSERAH bukan MENYERAH. Jadi panitia natal, pelatih koor ras latihen-latihen natal, adangen-adangen natal sialoken alu TAAT man Tuhan. Lalit erpenulak tapi ermeriah ukur ngaloken dingen dahikenca. Si utama eme PUSUH SITAAT ibas perbahanen.
3. Gejabkenlah bagi Maria ras Elisabet ngaloken pasu-pasu Tuhan jadi nande simbelin, gia mberat siman alanken cakap kalak. Ibas dahiken persiapan natal mungkin melala cakap-cakap si mematahken guna suksesna perdalanen natal ula lit sangkut-sangkut ukur, tetap ermeriah ukur. Janah marilah sijaga cakapnta, tetaplah ngerana maba “ Mejuah-juah” man kalak si deban. Gelah nggeluh sejahtera ras dame kerina.
4. Ipilih Dibata Maria jadi nande anak Dibata tentu erbahanca meriah ukurna. Gia ibalik pasu-pasu simbelin e pagi igejabkenna bagi pedang sinustus bas pusuhna sebab ia naksiken Jesus isalibken guna keselamatan doni enda. Ipilih Dibata megati bagi ibere mahkota keriahen tapi sekaligus salib ceda ate ( lit pengorbanan ). Dibata labo memilih kita guna keriahen ras kesenangen guna dirinta saja , tapi lit tugas siarus idahiken alu pusuh erpengue, dahikenca alu tutus, berusaha ras berkorban. Bagepe ibas paksa advent enda, adi ipilih kita ndahiken dahin-dahin natal aloken e alu keriahen ukur gia lit pengorbanen. Keriahen ibas masa advent eme adi lit perbahanen simehuli ( sidahi-dahin/ berkunjung ku kade-kade, ku teman sada perpulungen si perlu   ipetetap ukurna ) bagepe sidahi-dahin/berkunjung guna mpeteguhi perkade-kaden ( persaudaraan ), pertemanan ( persahabatan ) ras persadan ibas gereja . Pengharapen tetaplah man Tuhan, nggeluh dame ras kerina manusia bagepe tinepaNa. Perayaan natal labo salah ilakoken, tapi tetaplah ibas keriahen ukur. Ula jungut-jungut mbue kegiatan natal, ula jungut-jungut lit adangen natal, ula jungut-jungut melala pengeluaran ( nukur baju natal, makanan natal, seragam natal, aksi natal ras sidebanna ) ula jungut-jungut ya…….? Amin    

Pdt Karvintaria br Ginting ,STh

GBKP Rg.Klender Klasis Jakarta Kalimantan

HP : 08126359640, WA : 082114574307

PEKAN KEBAKTIN KELUARGA WARI - IV TAHUN 2017

Invocatio           :  Nina Jakup , Lang, la banci bage ; adi payo kin mekuah atendu, alokenlah pemerengku e. Ngidah ayondu saja bali kuakap bagi natap ayo Dibata, perban ulina perbahanendu man bangku (KEJADIAN 33:10)

Ogen               : MATIUS 1:1-17

Khotbah           : KEJADIAN 50:15-21

Thema             : DEWASA ERSANGKEP NGGELUH

Bas kita kalak karo nggo iajarken, ajaren-ajaren ibas nggeluh enda. Emaka ibahan aturen-aturen eme lit sangkep nggeluh. Janah erpalasken sanggkep nggeluh enda me maka kita kalak Karo mehaga kel erkiteken kujapape kita lawes mis ije lit sangkep nggeluhta (Kalimbubu, sembuyak, anak beru). Arah litna sangkep nggeluh enda maka seh kal ulina perdalanen ras perkade-kaden nggeluh enda.

Emaka kujape kita lawes, ras pe dikune kalak ndahi kita maka mis kal iban sangkep nggeluhna, gelah lit mis pagi singaturken tah kai pe jadi man bana (susah tahpe senang), mis lit si ertanggung jawab.

teridah arah kedewasaan Jakub sienggo ndekah sirang ras senina Esau, emaka jumpa ia mulihken maka teringat masa lalu ope denga ia sirang erkiteken rubat/ersegat ate. Emaka Jakub lebih dewasa njumpai si Esau, maka ia hormat kel maka Esau alu ngataken. “Ngidah ayondu saja bali kuakap natap ayo Dibata, perban ulina perbahanenndu man bangku”. Dewasa neh ken sura sura, janah i je teridah Jakub ningetken Dibata, enda ncidahken lanai lit dendam ras ate segat diantara dia, endam salah sada dewasa ersangkep nggeluh, mehuli hubungenna ersenina, ersembuyak. Bagi Esau silanai tena segat seninana Jakub, bage pe Jakub meriah kel akapna adi jumpa ras Esau. (bnd invocatio).

Ras teridah uga hubungen perkade-kade si cidahken aarah ogenta ndai, maka kalak Jahudi jelas kal terombona, (terombo Jesus Kristus), i mulaina, Abraham seh ku Daud, Daud nari seh pembuangen ku Babel, ras pembuangen nari seh ku Jesus.

Emaka kerina lit 42 kesusuren (mulai Abraham seh ku Yesus)

Enda me termasuk garis keturunen seh ku Yesus, i jenda me kap sangkep nggeluhna. (perkade-kaden). Tentuna enda ngingetken kita gelah min sitandai perkade-kadenta, sebab arah kita nandai kade-kadenta maka megegeh kita ibas kerina paksa.(ogen).

Ibas peristiwa kematen Jakub, sada si mberatkel iakap senina-senina Jusuf, erkiteken i’ingetna perbahanenna sinandangi Jusuf sewaktu ia ras denga, ija itamaken kusumur ras idayaken ku pedagang Mesir. Janah akapna adi lanai lit orang tua, maka banci reh pembalasen nandangi ia arah Jusuf si lit kuasana. Lupa ia kai si pernah ibahan Jusuf man bana. (kejadian 45:14-15), Biasakal adi lanai lit orang tua terjadi perubaten.

I jenda si idah maka Jusuf dewasa ibas ersangkep nggeluh/keleng atena seninana, amin na gia lanai lit bapana, tapi Yusup enggo er tekad lalap la mobar kekelengen, sekali erkeleng ate tetap erkeleng ate, janah ia engkelengi la erdasarken lit je ras lalit je nge orang tuana. Sementara senina-senina mbiar kel ia jusuf erbelas (ay 15). Emaka irancangna kata-kata si tempa pedah bapana Jakub (ay 16). Emaka mindo maaf ia man Jusuf, hal enda secara manusia payo adi sigejap maka lepak kita, lit kesempaten mindo maaf man si pernah si sakiti (ay 16).

Tapi kerina enda la ialoken Yusuf, sebab ia sadar maka kai si terjadi bas kegeluhen enda, lit ije Dibata si meteh, janah dibalik sura-sura/rancangen manusia si jahat man manusia, kepeken lit rancangen dibata si terulin/mehuli. Emeka Jusuf alu tegas ngataken “Ula mbiar, labo banci aku ngancih Dibata ngukum kalak, jahat sura-surandu man bangku, tapi enggo isalihken Dibata e jadi simehuli”.(ay 19-20). Jusuf dewasa ibas ersembuyak, janah lanai nginget masa lalu, bagi Esau nandangi bapana Jakup

Kata-kata si melias si rehna ibas Jusuf nari tentuna erbahan malemkal ate senina-senina ras keluarga na kerina, emaka ibereken kesempaten ia tading i Mesir

Enda me si ikataken dewasa ersangkap nggeluh kerina kade-kadenta(terembo) nta enda me sangkepta, e maka kita ibas ndalani kegeluhen enda kita harus saling mengoreksi dirinta adi salah kita kai kin mberatna kita mindo maaf, ras adi kune kalak enggo sadar dingen mindo maaf maka kita terbuka gelah ngaloken Ia kuga Ia lit. Kalak si ersenina, erkalimbubu, ras er anak beru maka ia wajib nggeluh sikeleng-kelengen

Pointer.

1. Lepak- lepak jelma litnge si mehuli ibas ia. Janah mehuli-mehuli jelma lit nge lepakna. Emaka kita ngasup ngaloken kuga ia litna.
2. Bas kegeluhen ta enda maka sibudayakenlah ngkelengi kalak amina gia la bagi ukurta, simulai ibas sangkep nggeluh ta nari
3. Hal-hal si enggo ndekah lanai perlu si inget-inget, sebab kita sada ibas Tuhan, dosanta enggo isasapna.
4. Tetaplah siandalken Dibata (bagi Jakup ras Jusuf)
5. Ula lit dendam bas kita bagi Esau lanai ia dendam nandangi Jakub, nandangi seninana
6. Mari kita nginget sangkep nggeluh ta, gelah meherga kita ilebe-lebe kalak sideban. Bagepe tetap sipupuk kiniersadaan berdasarkan keleng ate Tuhan.

Selamat er pekan Keluarga

Pdt Andarias Brahmana.

PEKAN KEBAKTIN KELUARGA WARI - III TAHUN 2017

Invocatio         : “Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabab sieteh maka wari Tuhan, e me wari kerehenNa, reh me.” (Heber 10:25)

Ogen               : 2 Raja-Raja 4:8-13

Khotbah           : Heber 12:23-29

Thema             : Dewasa I bas Perpulungen

            Ibas wari pe-3 ken enda, ibaba kita bas sada tema: “Dewasa I bas Perpulungen”. Ngerana kerna kedewasaan lit sada ungkapen si rusur i kemukaken: “usia tidak selalu menentukan tingkat kedewasaan seseorang”. Enda ngatakenca man banta maka kedewasaan e labo saja i ukur erpalasken umur ngenca. Sebab la jarang, lit kang anak muda entah remaja denga pe ia enggo matang secara emosi. Emaka bagi nina bas psikologi perkembangen: semua itu memang tergantung dari pengalaman hidup yang telah diperolehnya serta sejauh mana kemauan orang tersebut untuk bisa lebih berkembang kedewasaan pemikiran dan emosionalnya.

            Ndai ikataken kedewasaan e tergantung pengalamen ras kemauan. Pengalamenta adi akap kami enggom menda melala. Bagi si ikataken ibas bahan khotbahta Heber 12:23-24; “kam enggo reh…”. Kita enggo ngikuti perpulungen Tuhan sedekah enda, enggo si tandai Dibata, Hakim kerina manusia, enggo si tandai Tuhan Jesus sebagai Takal ni perpulungen si jadi keang-kelang padan si mbaru, si maba berita si meriah (keselamaten) man banta si tek. Berarti pengalamenta lanai bo kurang. Si berikutna kemauan entahpe kininggiten kita berpengaruh ku bas tingkat kedewasaanta. Emaka i jenda cubaken kami ngertiken kerna pengertin dewasa e ku bas piga-piga hal:

1. Dewasa artina “nggit berproses menjadi dewasa”

Adi ngerana kita kerna Kekristenan entah pe iman Kristen rusur i gambarken sebagai sesuatu si nggeluh, turah, erproses entahpe dinamis bali ras sekalak danak-danak si tumbuh jadi dewasa, bagi batang kayu si turah ras rurat serta erbuah, (bd. Kolose 2:7). Batang kayu e adi turah ras erbuah atena tentu harus ndatken “asupen nutrisi” si memadai. E kerina erproses maka jadi “pangan” man bana. Proses e si i gelari proses fotosintesis. Bage ka pe kita perlu “nutrisi rohani” e me Kata Dibata. Emaka bas ayat 25 i kataken: “ibegikenndu Si Ngerana e”. Kata Dibata si jadi “nutrisi rohani” e harus sialoken ras si dalanken bas kegeluhenta gelah banci kita erdewasana bas kiniteken.

2. Dewasa artina “setia”

Ibas Kitab Heber, kedewasaan e i kaitken ras kesetiaan (Heber 6:4-6). Secara sederhana banci si kataken kalak si dewasa e me kalak si setia. Setia nandangi janji,prinsip, tujuan ras kinitekenna. Alu kata si debanna e me konsekuen ras konsisten. Heber 12:25-27 ngatakenca man banta gelah kita ola la mbegiken Si Ngerana (tetaplah mbegiken ras mperdiateken Kata Dibata) sebab lit konsekuensina adi la si begiken Ia e me la banci pulah ibas Ia nari bagi kalak si la mbegiken Ia I Deleng Sinai mbarenda (i jenda icidahken man banta kekonsistenen Dibata nai nari seh genduari). Kita iajuk gelah tetap setia seh kedungenna.

3. Dewasa artina ertanggung jawab ras berkarya

Taneh si ngaloken udan ras mehumur seharusna jadi taneh si peturah sinuan-sninuan si erguna man kalak sinterem (bd. Heber 6:7-8). Kalak si ngaloken pasu-pasu Tuhan seharusnanjadi kalak si mehuli ras erguna nandangi sekelewetna. Dibata ndilo kita labo saja jadi kalak si tek nandangi Ia tapi jadi kalak si berkarya, ersaksi ras muat bagin bas dahin-dahin Tuhan (bd. Perbahanen Rasul-Rasul 1:8, Yohanes 15:27). I jenda kedewasaan iidentikken ras tanggung jawab, karya ras kerja. Kalak si dewasa bas kiniteken ertina labo saja ngaloken pasu-pasu Tuhan ras makekenca man dirina saja tapi makeken nandangi kalak si deban ka. Ogenta si pemena ibas 2 Raja-Raja 4:8-13 ndai ncidahken uga Diberu Sunem ras perbulangenna makeken pasu-pasu Tuhan si lit bas ia guna nampati Elisa. “Egoisme” e me ciri danak-danak, adi dewasa tentuna lanai terjeng dirina ngenca iukurina tapina kalak si deban sekelewetna: keluargana, perpulungenna, masyarakat bahkan doni enda. Bagi kai si ikataken i bas Heber 12:28-29 kita enggo datken pasu-pasu Tuhan e me kerajan si la terugur (Kinirajan Surga, kegeluhen si rasa lalap entah pe keselamaten). E makana patut nge kita ngataken bujur man Dibata. Tentuna bentuk pengataken bujurta e me “si sembah Dibata bagi si ngena ateNa, alu mehamat dingen mbiar. Ndalani kegeluhenta alu ertanggung jawab ras tetap nginget man Dibatanta si ndilo kita labo terjeng tek saja man Ia tapi bagi Tuhan Yesus berkarya, erjuang ras megenggeng ngalaken kiniseran (1 Petrus 2:21; Filipi 1:29).

            Tentuna arah temanta enda siniarapken kedewasaan e teridah arah kegeluhenta i tengah-tengah perpulungen. Marilah kita radu ras kerina nggit berproses guna jadi dewasa alu tetap ngerembakken diri man Tuhan, setia bas mbegiken kataNa ras ertanggung jawab bas ndalanken kegeluhen selaku kalak si erkiniteken bagepe berkarya alu nggit kita muat bagin i bas dahin-dahin pelayanen tengah-tengah perpulungenta baik alu talenta-talenta si lit bas kita bagepe kinigiten kita ikut nanggung adangen-adangen guna ngelitken dana pelayanen sebab e tanggung jawabta ras-ras. Labo soal galang kitikna tapi soal kedewasaanta si cidahken i je. Setia kita bas perpulungen Tuhan, ertanggung jawab ras berkarya kita kerina tentuna guna ermulia gelar Tuhan. Amin.

Pdt. Andinata Ginting