PEKAN KEBAKTIN KELUARGA WARI - I TAHUN 2017

Invocatio               : Mehamatlah man bapandu ras nandendu, gelah banci kam ndekah nggeluh ibas negeri si Kubereken manbandu pagi. Keluaran 20 : 12

Ogen                      : Masmur 128 : 1 – 6

Khotbah                 : Jakub 1 : 1 – 8

Tema                     : Jabu si Dewasa ibas kai-kai pe

1. Dialog Jabu X Y

X : Kuga maka la entabeh ibanndu SAMBAL e?

Y : Mubue nari nge pandangenndu pe, maka enggo ietehndu situhuna aku NYESAL erjabu man bandu

X : Kai nindu e??? Adi aku ndatndu aku e KEUNTUNGEN man bandu tapi aku ndatken kam e MUSIBAH man bangku.

Masalah utama/Judulna situhuna eme SAMBAL, berubah jadi NYESEL, jenari berubah jadi MUSIBAH janah sitragisna berakhir ku CERAI.

Dialog enda salah sada contoh jabu si la dewasa.

2. Ibas Pengogen bagepe Ibas Khotbah) sijumpai kata “Sangap” (Ind.Bahagia)

Jakub 1       : “Sangap adi reh erbage-bage percuban”

Masmur 128 : “Sangap kal kalak simalang man Tuhan”

Sangap banci pe iertiken kai pe jadi ibas kegeluhenta, sekaligia labo bagi ukur, sekaligia siakap kita labo ngasup ngalakokenca tapi labo kita nalahken ise pe bas kegeluhen enda, tapi tetap mindo ras erlebuh man Dibata.

3. Tema Pekan Kebaktian Keluarga berngi I enda : Jabu sidewasa ibas kai-kai pe, erpalasken Jakub 1 : 1 – 8 piga-piga hal tanda-tanda Jabu sidewasa eme :

• “Tahan ngalaken percuban” // “Mengenggeng”

Penulis kitab enda la mereken penjelsen lengkap kuga kin sikap/contoh kalak simengenggeng tapi penekanenna kubas eme “maka kam dewasa dingen la kekurangen”(Bhs.Indonesia:”supaya kamu menjadi sempurna dan utuh dan tak kekurangan”).

Bdk. Roma 5 : 1 – 5 ; Pengarapen – Megah ate ibas kiniseran - Saber ate – Menang ibas Pengujin.

Rasul Paulus ibas 1 Kor 13 : 4, ningetken maka “megenggeng” eme ciri kalak sierkeleng ate.

• Mindo Kepentaren man Dibata arah pertoton

Pentar salah sada istilah sipenting ibas surat Jakub enda, kata enda ijabarken ibas Jakub 3:13-18. Terkhusus ibas ayat 17 isingetken maka “kepentaren sirehna ibas Dibata nari” kepentaren sini ijelasken ijenda lebih nekanken kubas cara rukur / sikap ibas kegeluhen siteptepwari eme: “bersih pusuh peraten, nggit erdame, lemah lembut.... rstna.

• “La monce-once” // “La bali ras galumbang i lawit” // “ngasup maut keputusen”(6-8)

Ibas ayat enda Jakub nalihken penekanen ibas sikap Dibata simelumbar dingen perkuah kubas sikap manusia simindo.

Tuhu Dibata e perkuah, iberekenNa kai siniperluken kita tapi kita pe arus aktif mindo janah ibas mindo e la kita ragu-ragu maka kai sinipindo kita pasti iberekenNa.

Adi kalak monce-once,ertupang ukurna......kalak sibage la pada arapkenna ndatken kai pe ibas Tuhan nari.

• “Anak Mehamat man orang Tua” (invocatio)

Adi anak-anak mehamat er-Orang tua enda pe merupaken Jabu si dewasa, teridah keriahen kemalemen ate ibas Jabu.

Pdt.IGM/Pondok Gede

0812-7020-9021

Renungen : Daniel 6:1-14

Tema          : "Ernalem Man Jelma Sienterem".

I. Bena Kata

Ibas pemerentahen raja Darius, Daniel umurna enggo 80 tahun. Daniel iangkat raja Darius jadi pejabat si meganjang ibas kerajaanna erkiteken lit kelebihen Daniel, eme tutus erkiniteken man Dibatana.
Daniel pe sekalak pemimpin si ber-integritas ibas ndalanken tanggung jawabna sebagai pejabat.(Daniel 6:4-5). Darius ngangkat Daniel jadi pejabat, sada tingkat iteruh Raja Darius.

Kekuasaan siibereken raja man Daniel mpeturah cian ate kalak si enterem, enterem kalak ersura-sura guna munuh/menyingkirkan Daniel,  erbage upaya ilakoken guna ndabuhken Daniel,  tapi la erdalan, erkiteken la lit/ la ijumpai kesalahen Daniel ibas jabatenna,  ia kalak bujur, bebas korupsi.

Kiniteken Daniel ras kedisiplinenna ndalenken aturen agama man Dibatana jadi alat musuhna guna ndabuhken Daniel, tapi Daniel la surut ersembah  ras ndalanken ibadahna man Tuhan ia tetap setia erkiniteken, tek Daniel maka Dibata pasti mereken penampat man bana ibas kesetiaanna ersembah.

Musuh-musuh Daniel makeken kekuasaan raja guna menjebak/ nidingi Daniel.  Ibahan me sada peraturen guna wajib ersembah man Raja dekahna 30 wari. Ise si la ndalankenca iukum itamaken ku gua singa (ayat 7-9). Raja Darius ngesahken peraturen e alu la ngukurken dampakna man Daniel.

Emaka Arah peraturen si isahken raja Darius, Daniel terdat ngelanggar aturen raja,  emaka Daniel harus iukum, itamaken ku gua singa. Enda erbahanca turah perbeben ibas pusuh raja Darius, erkadiola ia enggo ngesahken peraturen e,  sebab la isangkana Daniel si jadi korban peraturen e.

Refleksi.

* Kalak si tutus erkiniteken teridah arah ketutusenna ibas ndahiken dahinna. Bagi Daniel sekalak si tutus ndalanken tanggungjawabna ibas kerajaan Darius, enda ilakoken Daniel labo erkiteken hubungenna ras Darius tapi hubungenna ras Dibata arah toto ras ibadahna.

* Melala tantangen kalak si tutus ndalanken kebenaren ibas ndalanken tanggungjawabna. Ula tantangen e erbahanca surut ketutusenta ibas ndahiken dahinta, bahkan harus reh tutusna ndahiken dahin e.

* Ibas muat sada keputusen ras mereken pendapat, harus siukurken lebe alu mbages kerna dampak/ akibat/ ulih keputusenta e, kita harus ertimbang alu mbages, ula metersa muat kesimpulen arah megiken sada sisi/ opini publik, ula kari turah penyesalen/ perbeben bagi Raja Darius si erkadiola ibas keputusenna.

Pdt. Togu P. Munthe, M.Th

GBKP Cililitan

Renungen      : 1 Tesalonika1 : 6 – 10

Tema            : Kukelengi gerejaku

Perpulungen sikelengi Tuhan,

Gereja eme persadaan kalak sitek man Tuhan Yesus. Erkiteken gereja ersada ras Tuhan Yesus maka gereja harus jadi usihen sebagai pribadi-pribadi kalak kristen ntahpe secara ras-ras. Jadi usihen adi gereja tetap  bas kekelengen, bagi Tuhan Yesus ngkelengi doni enda.   Arah tema renungen sekalenda iperhadapken kita ku bas pernyataan : ula sungkun “kai si ban gereja bangku, tapi kai ku ban man gerejaku?” Alu pengharapen gelah kalak sitek man Tuhan Yesus,  tetap ngkelengi gereja.

1 Tesalonika1 : 6-8  “perpulungen /gereja singusih Tuhan jadi usihen “

Surat Paulus man perpulungen Tesalonika nuriken kerna kegeluhen kiniteken perpulungen e siteridah arah perbahanenna.  Keteladanan  Paulus sebagai perberita simeriah kuperpulungen Tesalonika, ras erkiteken perbahanen Tuhan man perpulungen e erbahanca, melala gia kiniseran erkiteken tek man Tuhan Yesus tapi tetap ngasup ngaloken berita simeriah alu meriah ukur. Keteladanan Paulus  teridah arah sikap nggeluhna siersaksi kerna Tuhan Yesus aminpe melala kiniseran si man bentasen. Ibas 1 Tesalonika 2 : 1- 15  iturikenna kerna kai si alami ras siidahikenna kutengah-tengah perpulungen Tesalonika, antara lain :

- Ope denga ndahi perpulungen Tesalonika, nggo leben isiksa,  igombang-gombangi kalak Pilipi.

- Paulus ngerana labo gelah ngena ate manusia tapi gelah ngena ate Dibata.

- Paulus labo ersura-sura gelah ipujiken kalak

- Amin pe lit hak mindo,  Paulus nggeluh erberita simeriah ras mereken dirina guna berita simeriah e. Teridah arah kelatihenna erberita simeriah bagepe kelatihenna erdahin suari ras berngi gelah ola jadi tanggungen perpulungen.

- Lagu langkah bujur dingen la salah.

Perpulungen  epe ngusih perbahanen Paulus seh maka perpulungen e pe banci jadi usihen man kalak sitek siringan i Makedoni ras Akaya. Berita simeriah mbar labo saja kubelang-belang daerah Makedoni ras Akaya, tapi mbar kujapape.

1 Tesalonika1 : 9-10 “ perpulungen e jadi  topik percakapen simehuli “

Paulus nuriken maka perbahanen perpulungen, jadi percakapen enterem jelma, ibas :

- Ngalo-ngalo ras asum reh ndahi perpulungen e.

- Nadingken sembah-sembahenndu guna ndahi Dibata jenari nembah man Dibata singgeluh dingen situhu-tuhu.

- Uga perpulungen e nimai kerehen Yesus Kristus   sipeduakaliken surga nari, simulahi kita ibas ukumen sinandangi reh ibas Dibata nari.

Perpulungen sikelengiTuhan,

Kukelengi gerejaku nina tema renungennta wari enda, kai dage siban man gerejanta ?

- Gereja banci min jadi percakapen “buah bibir“ simehuli. Turikenlah rusur kiniulin gerejanta ula situriken rusur kekurangenna, pala sibereken solusi ras nggit muat bagin pekenasa.  Gereja ula mbuesa ngerana ngenca, ntah pe erbahan keputusen-keputusen ras rapat-rapat simbue tapi kai siilakoken ibas perbahanen sinyata ibas erkiniteken ras kekelengen.  Nina   Eka Darmaputra:  “Perbuatan kasih itu lebih bermakna dari pada 1000 khotbah tentang kasih”.

- Gereja harus jadi usihen bas ketutusen erkiniteken man Tuhan Yesus. Adi keleng ateta gerejanta siberelah dirinta jadi perkakasna. Sebagai anggota jemaat sisetia ras tutus, ula jadi jemaat siterdaftar ngenca ntah paksa perlu maka reh. Jadilah kita sebagai “gereja yang berbuat untuk gereja “. Gereja yang bersekutu, bersaksi dan melayani.

- Mediate nandangi gereja ibas perbebenna. Bagi Paulus sitetap mpediateken perpulungen Tesalonika, gia arah surat ia ngerana, bage min gereja mediate min nandangi kecibal temannta sada kiniteken, bagepe nandangi perbeben gereja-gereja si megati ndatken hambatan ras tantangan.  Selamat, kukelengi gerejaku, mari sikelengi gerejanta…..Tuhan Yesus simasu-masu. Amin

Pdt.Karvintaria br Ginting, STh

GBKP Rg.Klender

HP : 08126359640