Pekan Doa GBKP Wari III 30 Mei 2017

 

Ogen   :  Masmur 133 : 1-3

Tema : Kemalemen Ate ibas Persadaan .

 

I.             Bena kata.

Lit Kuan Kuan karo “Bagi mberkis tanduk“ nina “ iket  arah datas, mosar arah teruh; iket arah teruh, mosar arah datas “.  Hal enda menggabarken  maka mesera erbahan persadaan/ kiniersadaan, lalap sitoganen. Janah la siangkan ibas perdalanen kegeluhen, baik ibas jabu bagepe ibas keluarga.  Nai-nai nari ibas kalak tertentu lit  rusur jadi perjengilen,  bahken seh asa gundari pe lit  denga bage. La siangkan antara  keluarga (senina ras turang), bahkan lit deba  siadun ia ku polisi gara-gara  perubaten tading-tadingen, piah sambarina sembuyakna, sambarina kalimbubu ras anak beruna.

 

Bagepe kalak karo ngit kel sitahanen/ sikeng-kengen emaka piah dungna rubati jadina. Hal enda me  merupaken perubaten sila payo terutama man banta si enggo ngaloken Yesus ibas  kegeluhenna. Ija nina Yesus bas pertoton safaat-Na : “O Bapa ertoto Aku man bandu gelah ersada min  ia kerina. Ersadalah min ia ras kita, bagi kam ersada ras Aku janah Aku ersada ras Kam. Ersada lah min ia kerina gelah tek doni enda maka kam me sinuruh Aku “ (Johanes 17 :21).

 

Yesus pe ertoto  gelah kita sienggo jadi  pengikutNa tetap ersada, sebab nina pepatah melayu : “bersatu kita tegu bercerai kita runtuh“. Ertina gegeh e situhuna lit bas kiniersadan kaipe banci ban, baban simberat jadi  menahang, tapi adi la ersada bahan simenahang e pe jadi mberat.

 

II.           Keterangan  teks.

Masmur  133 enda ibahanna  judulna keleng ate man senina. Janah Masmur enda merupaken  kelompok Masmur Ziarah, Daud empuna (nyanyian ziarah Daud). Lit 15 pasal Masmur ziarah (120-134). Janah pasal 133 enda me si pesepuluh empatken. Janah Masmur enda puji-pujian/ mujiken maka malem kel ate/ adi kalak si ersenina sada perarih. (Indonesia: Persaudaraan yang rukun).

Permasmur ngingetken man banta : Andiko ulina ras senangna, adi kalak  si ersenina sada perarih.  Ulina ras senangna,  dua kata enda eme si man ayakenta kerina, emaka melala kal kalak karo  erban gelar , Ulina ras Senang, gelah pagin bas geluhna bagi gelarna e.  Memang malem kin ate adi kalak  si ersenina e ersada arihna  bage pe si keleng-kelengen ia, janah kalak  sikeleng-kelengen  ibas geluhna enda nge si njumpai kemalemen ate. Nina Rasul Paulus: Erkiniteken man Tuhan, erpengarapen man Dibata, erkeleng ate man kalak sideban, janah  sipentingna ibas si telu e, eme engkelengi kalak sideban (1 Kor 13 : 13).  Janah kemalemen ate eme jasmani ras rohani, sebab kalak singelakoken perbahanen simehuli maka tetap ndatken keriahen si rehna idur Dibata nari.

 

Pemasmur nggambarken maka kalak si ersada perarih bali kap ras minak wangi  si meherga.  Minak wangi gambaren simehuli, sebab kerina kalak (nguda, metua, dilaki, diberu) ngarapken minak wangi simerim ras meherga enda. Bageme kepeken  kalak si ersenina sada perarih, maka ratengena jelma si enterem.

 

Janah  Dibata pe  erngena ate man kalak sisada perarih, emaka tetap  jadi percakapen kalak tentang hal-hal simehuli. Emaka kalak sitetap ibas kiniersadan  maka nilaina pe cukup tinggi/ meherga. Meherga dingen erguna man Dibata bagepe erguna man jelam si enterem. 

 

Bagi minak wangi icucurken ku takal harun, maler kujanggutna, ku kerahung baju jubahna.  Hal enda mengingetken Dibata nuruh Musa   guna nagkuhken Harun ras anak-anakna jadi Imam, emaka ipakeken paken ke-Imam-en (jubah) ras perlengkapen sidebanna, bagepe icur-curken minak wangi ku takalna, emaka maler kujangutna (Imamat 8 : 1-13; Imamat 21 : 5).

 

Harun eme imam si pertama itangkuh guna dahiken Tuhan ku tengah-tengah bangsa Israel. Bagepe igambarken “Bagi embun i deleng Hermon sinusur ku deleng-deleng Sion. Antar Hermon ras Sion ndauh sirang, sebab Hermon i utara Palestina ras Sion arah selatan.

 

Hal enda merupaken kiasan, tapi bageme kepeken perbahanen Dibata/pasu-pasuna nandangi keluarga si ersada perarih. Janah gambaren embun e, maka tetap menyegarkan, menyuburkan tanah emaka mehuli hasil panen.  Janah bageme pe kalak si ekiniteken, tetap sada perarih maka tetap isegarken Tuhan kegeluhenna, bagepe ialokenna pasu-pasu idur Dibata nari.

 

 

 

III. Kesimpulen/Renungen.

a.    Kegeluhen  kalak si enggo ngakuken Tuhan Yesus/ sienggo tek maka tetap nggeluh ibas kiniersadaan ras Tuhan bagepe kiniersadan ras keluarga bagepe ras sesama  manusia (Yohanes 17 : 20-21).

b.    Kalak si enggo tek, maka ia harus ncidahken simehuli, ras ndalanken simehuli, bagepe tetap menjadi pendoa-pendoa ibas kegeluhenna (Perbahanen Rasul-rasul 8 : 15 ; 16:25).

c.    Man kalak sienggo tek dingen tetap ibas pujian ras  toto maka lalit merasa lebih asa kalak, sebab kita seri ilebe-lebe Dibata.  Bagi jemaat mula-mula (Perbahan Rasul-Rasul 2 : 41-46).

 

                                                                                                                                           Pdt Andarias Brahmana

                                                                                                                                    Ketua Klasis GBKP Jakarta-Kalimantan