Ogen : Ulangen 6:20-25

“Tuhan Mbebasken Bangsanta”

Peringeten wari kemerdekaan Indonesia 17 Agustus 1945 seh pentingna man generasi paksa enda sebab arah perayaan e ngingetken kita kerna sejarah kemerdekaan bangsa emekap ndarat arah penjajahen Belanda telu setengah abad ras i bas penjajahen Jepang sidekahna telu setengah tahun. Sejarah ngajarken kita kerna keberhasilen ras kegagalan para pemimpin masa lalu, kuga sistem perekonomian si pernah lit, bentuk-bentuk pemerintahen, ras arah sejarah kita banci mpelajari kai-kai saja simpengaruhi kemajunras kemunduren sada bangsa ntah peradaban gelah banci jadi pelajaren ku masa depan.
Ibas kamus besar bahasa Indonesia nina, sejarah mengandung telu pengertin e me :

1. Kerna asal usul entah silsilah,

2. Kejadin ras peristiwa siterjadi i masa si nggo lewat,

3. Pemeteh kerna turi-turin si pernah terjadi i masa lalu. Alu bage maka sejarah e ertina peristiwa si pernahterjadi bas masyarakat i bas paksa si nggo lewat. “Jangan sekali-kali meninggalkan sejarah”enda isingkat alu kata “Jasmerah”, eme semboyan si pernah ikataken Soekarno i bas pidato terakhirna 17 AGUSTUS 1966.

Ulangen 6 : 20 - 25 siorati kita pe ngerana kerna pentingna nuriken sejarah man generasi penerus bangsa. Sejarah keselamaten bangsaIsrael ndarat i bas perkawanen nari ku taneh kemerdekaan si nibereken Dibata. Adi nungkun anak-anakta kerna engkai maka kita harus ngikutken kerina undang-undang-Na maka orang tua perlu nuriken sejarah keselamaten e man anak-anakta turun temurun. Maka nina orang tua ku anakna, “mbarenda kami budak raja Mesir, tapi Tuhan nggombebasken kami alu gegehna simbelin. Nggo iidah kami alu mata kami jine ilakokenna tanda kuasa ras ibahan-Na kejadin-kejadinsi erbahanca mbiar bangsa Mesir bagepe rajana ras kerinapegawaina. Ibebasken-Na kami i Mesir nariguna maba kami ku jenda janah ibereken-Na man kami negeri enda sue ras padan-Na man nini-nininta. Kenca bage iperintahken Tuhan gelah kita ngikutken kerina undang-undang-Na. Adi siikutken ntah pe patuh kita man undang-undang-Na maka i pasu-pasu-Na kita.Bageme sejarah si harus ituriken bangsa Israel man anak-anakna secara turun-temurun.

Ibas ogenta (Ulangen 6) enda, erkemalangen man Dibata ertina ndalanken kerina undang-undang-Na (Ulangen 6 : 2) ras ngkelengi Ia asa ukur, tendi ras asa gegeh (ayat 5). Bas hubungenta ras Tuhan maka kekelengen ras erkemalangen man Tuhan titik temuna e me kepatuhen man undang-undang Tuhan. Kepatuhen entah ketaaten nandangi undang-undang Tuhan merupakan kunci lako ndatken pasu-pasu ras kemalemen ate e me :

1. Cawir metua (ayat 2),

2. Mbue anak/jadi bangsa si mbelin (ayat 3),

3.Kinibayaken sebab ngiani taneh mehumur (ayat 3), ras 4. Peningkaten perekonomian ras kemakmuren (ayat 10-11). Em pasu-pasu si ijanjiken Dibata man bangsana si patuh. Kepatuhen man Dibata sebagai pengataken bujur sebab ia nggo mulahi bangsa enda bas taneh perkawanen nari menuju ku taneh perpadanen si dem dadih ras tengguli. Kekelengen Dibata ibalas alu kepatuhen man Ia(1 Yoh. 4:19).

Pesan sejarah ibas kitab Ulangen enda perlu iterusken ku generasi penerus gelah ia pe ula lupa kerna perluna kesetiaan man Tuhan alu ndalanken undang-undang-Na. Sejarah pe mencatat uga akibatna adi bangsa e lapatuh. Israel banci ngiani taneh perjanjin ras ipanna ulihna latih asal ia tetap patuh man Dibata tapi adi la patuh man Dibata amin gia ia tading i Israel tapi la banci ia nggeluh dame sebab gangguen e reh i bas bangsa e sendiri ras i bas bangsa sideban. Bukti ketidak patuhen i bas sejarah e me pembuangen Isrel Utara bas tahun 722 ras pembuangen Israel Selatan ku Babel 586, enda merupakan akibat kelapatuhen Israel nandangi undang-undang Tuhan. .

Pdt. I. B. Manik

Mazmur 52:10-11

“Momokenlah Kiniulin Dibata”

Ngataken bujur (bersyukur) e me salah sada tema utama kitab Mazmur. Bahan ogenta enda eme sada bagin kitab Mazmur isina pengataken bujur man Dibata erkiteken Ia nggo mulahi bangsana ibas musuh-musuhna nari, jenari ngataken bujur erkiteken kiniulin ras pemeliharaan Dibata si la erngadi-ngadi nandangi bangsa enda. Ngataken bujur erkiteken Dibata enggo mulahi bangsa enda I bas perkawanen nari rikutpe ras kiniulin bagepe pemeliharan sinigejapkenna e maka nina bangsa enda I bas Mazmur 52 : 11 “Rasa lalap ateku ngataken bujur man baNdu erkiteken kai si ibahanNdu O Dibata. I tengah-tengah perpulungen kalak siertutus ate man baNdu kumomoken kiniulindu”.

Adi si oge kerina ibas Mazmur 52:1-11, Pemazmur ngidah lit dua tipe manusia e me sipemena kalak fasik (si la erkemalangen man Dibata), sierpenalem man gegehna jine misalna pemeteh, erta ras kekuasanna. Gambaren kalak fasik enda teridah bas diri si Doeg kalak Edom. Bangsa Edom e me keturunen Esau ras nina pemazmur ia sekalak pahlawan Saul sebab ia memata-matai Daud bagepe munuh kerina imam Dibata I kuta Nob ekiteken Abimelekh pemimpin para imam nampati Daud. Tentu si Saul pe tergolong fasik sebab teken ia man kalak Edom asangken man si Daud si nggo naluken si Goliat panglima perang kalak Filistin. Labo terjeng segat atena ngenen Daud tapi pe ayak-ayakna Daud lako munuhsa atena. Jadi kalak fasik siniwakili Doekras Saul ncidahken tipe manusia si la erkemalangen ras mengandalken kekuasanna.

Tipe sipeduaken eme manusia sierkemalangen man Dibata. Bas perikop pengogenta enda menunjuk pada diri Daud ras Abimelekh. Si Abimelekh pimpinen para imam bas paksa si e la mbiar nampati Daud. Abimelekh meteh maka lit resiko simbelin erkiteken penampatna man Daud, tapi ia la mbiar membela kebenarena min gia mbelin resikona. Daud sebagai kalak sierkemalangen man Dibata tentu melukahkel akap nanaluken Saul (Goliat pe italukenna) tapi erkiteken ia meteh aturen kerna kewajiban mpehaga kalak siniurapi Dibata amin gia itehna perbahanen Saul nggo lanai bagi arusna,tapi tetap ipehagana Saul bagi sekalak raja.

RENUNGEN
Pemazmur mempehadapken pembacana ku bas dua pilih e tipe manusia e me tipe kalak fasik ras tipe kalak sierkemalangen man Dibata, apa isiikutken ? Adi pemazmur ngatakenca, adi sipilih tipe kalak fasik maka sijadi e me kehancuren ras kematen. Bas ayat 7 nina pemazmur, maka Dibata ngkernepken ia seh maka masap kehaganna. Sinen sejarah Saul sigugur bas peperangen rikut pe si Doeg ikut kernep ras tuanna Saul, bagem kedungen geluh kalak fasik simementingken kesenangen sikentisik tapi rate mesui ras kernep rasa lalap. Tapina kalak sierkemalangen man Dibata ersabari bas penderitaan erkiteken kebenaren i pehaga bagi si Daud jenari ibereken Dibata kehagan jadi raja nggantiken Saul janah ibereken Dibata kepercayan lako ermomo ntah ersaksi kerna kiniulin Dibata.

Daud nggambarken dirina ibarat batang zaitun simbur bulungna ras meramis buahna i halamen rumah Tuhan. Batang zaitun man kalak Timur Tengah ibarat batang tualah man kalak Indonesia simbelinkel manfaatna janah kerina kalak mbutuhkenca (contohna minak zaitun si berguna sebagai minak goreng, obat, rsd), bageme kalak sierkemalangen man Dibata siteridah arah perbahanena ras tergejap manfaatna man kalak sideban.

Pohon Zaitun e me symbol Israel baru dalam arti hidup yg bermakna man Dibata bagepe man manusia. Kegeluhen siberarti man Dibata bagepe man manusia lit telu tandana rikutken Mazmur52 :10-11. Pertama : Tetap ngataken bujur (bersyukur) sebab Dibatasi tetap nampati ibas geluhna. Dibata ngidah perbahanen simehuli siniban anak-anak-Na,sierkemalangen man bana ras tetap ngasup ndalanken kebujuren kebenaren ras keadilen (erdiakonia). Peduaken : Ermomo kerna kiniulin Dibata (ersaksi) ibas kegeluhenna. Ras peteluken : Tetap ersada irumah pertoton ras teman-teman sisada kiniteken ibarat pohon zaitun si meratah bulungna i halaman rumah pertoton (tetap ersekutu). Kata Zaitun pe ibuat untuk gelar kategorial lansia eme ‘Saitun” gelah ibas umur si nggo metua pe tetap bermakna ras tetap ngataken bujur ras tetap ermomo (ersaksi) kerna kiniulin Dibata.

Pdt. I. B. Manik, M. Th, D. Min

Tema :

Mamre Simelumbar Mere

Tujuan : Gelah Mamre :
1. Meteh maka biak Mamre eme melumbar mere.
2. Ngasup mere alu meriah ukur.

Metode :

Aksi

I. Kata Penaruh
Nggeluh ermalem ate ntah pe ndatken pasu-pasu eme sura-sura, arapen ras perayaken umumna kerina jelma. La ketadingen Mamre, perbapan GBKP pe ersura-sura gelah nggeluh ermalem ate. Bahken seh ku nggeluh malem kal ate. La lit jelma, la lit perbapan ersura-sura ras ndarami gelah nggeluh mesera dingen rate mesui. Bicara lit kin pe enggo banci ibaba ku dokter jiwa gelah iperiksana. Kerina si ipikirken kita, si isuraken, si irencanaken, si idahiken ras usahaken kita tujunna gelah si dat malem ate. Saja megatisa nggeluh ermalem ate e ibatasi kalak terjeng erta, duit ras kinibayaken ngenca. Adi mbue kenca serpi ras kebayaken jelma, minter ikataken atau icap ia sebage kalak si ermalem ate. Nggeluh ermalem ate la kepe terjeng melala duit, mbue kiniliten ras kebayaken materi ngenca. Pustaka Si Badia ngajarken dampar si deban kerna kemalemen ate janah ituduhken dingen iajarkenna kerna kemalemen ate si tuhu-tuhu. Kemalemen ate si tuhu-tuhu idatken ras ialoken kalak si mehamat ras erkemalangen man Dibata. Uga maksudna kalak kalak si erkemalangen man Dibata nge si ndatken kemalemen ate si tuhu-tuhu? Guna lebih jelas dingen tangkasna, marilah si pelajari dingen si siksiki Kata Dibata arah PA ta.

II. Isi/ Tafsiren
Erkemalangen man Tuhan ertina tek man Tuhan, erpengendes man baNa, ernalem ras erpengarapen tetap man baNa. Erkemalangen man Tuhan seri ertina ras ermeriah ukur ngikutken perentah-perentahNa. Erkemalangen man Tuhan ertina lanai mengandalken gegehna si sada, lanai perayakenna terjeng doni saja ngenca tapi terlebih man Tuhan. Kalak si ngaloken Jesus Kristus jadi Tuhan ras JuruselamatNa ialokenna kap biak Dibata. Biak-biak Dibata e me: bujur, adil, perkuah dingen perkeleng (ayat 4) jadi biakna si mbaru. Emaka kalak si erkemalangen man Tuhan igelari pe kalak bujur, adil, perkuah ras perkeleng. Kita bujur labo erkiteken kebujurenna, tapi kebujuren Dibata ntah pe Dibata si bujur ras benar si erbahanca ia jadi kalak bujur. Emaka man kalak si enggo ngaloken biak Dibata enda ndai me maka ersinalsal terang ibas si gelap nari.
Kalak bujur teridah arah melumbar mpepinjamken, melumbar mere. Malem kal atena erkiteken melumbar ia pepinjamken dingen bujur ibas kerina urusen (ayat 5). Kalak bujur la ngukurken dirina ras sekerajangenna saja. Erkiteken si e kalak bujur asa ndigan pe labo ia guling, ia tetap iinget rasa lalap (ayat 6). Kalak bujur la perbiar. La ia mbiar ngaloken berita si la mehuli sabab kinitekenna paguh dingen ernalem ia man Tuhan (ayat 7). La ia mbiar dingen la aru atena, tek ia maka talu kap imbang-imbangna (ayat 8). Erkiteken ia mbiar man Dibata emaka lanai ia mbair man kai pe. Payo kal kata enda. Ise si mbiar man Dibata maka lanai perlu mbiar man kai pe si banci jadi bas doni enda. Sabab Tuhan enggo kap naluken kerinana. Sebalikna si la mbiar man Dibata, geluhna dem ibas kebiaren. Mbiar ia megi berita si la mehuli, aru atena kerna geluhna, ras mbiar ia talu ibahan imbang-imbangna. Melumbar pemerena man kalak si kekurangen. Kinibujuren kalak bujur lalap lit, ia ermulia dingen ihamati (ayat 9).

III. Aplikasi/ Pengkenaina
1. Payo kal maka kalak si erkemalangen man Tuhan eme kalak si ketuahen (ipasu-pasu Dibata). Si enda enggo ipetangkas Tuhan Jesus ibas khotbahna i uruk (Matius 5:3-11). Nina Tuhan Jesus, “Ketuahen kalak si nggejap maka ia labo kai pe ertina i lebe-lebe Dibata; sabab man bana me Kinirajan Surga” (Matius 5:3). Adi ateta nggeluh ketuahen (ermalem ate, ipasu-pasu Dibata mari dage erkemalangen tetap man Tuhan. Dibata rembak kap ras kita si erpengendes ras ernalem man baNa. Dibata si nemani ras nampati kita katawari paksa pe. Dibata me si jadi ulu geluhta. Lanai gegehta, beluhta ras pemetehta saja.

2. Kita si erkemalangen man Tuhan, biakNa jadi biakta. Kita jadi kalak bujur ras benar. Kalak bujur teridah arah nggit mere ras melumbar mere. Kita mere erkiteken tek kita ras si gejap pe maka Dibata enggo leben mere man banta. PemereNa si mbelinna man banta eme keterkelinenta ibas ukumen si rasa lalap nari eme kematen pertendin (Joh 3:16). Janah la terjeng pasu-pasu pertendin ngena iberekenNa tapi pe pasu-pasu jasmani guna keperlun kegeluhenta si tep-tep wari.

3. Sebage anak-anak Dibata si mehuli milikilah “mental berkelimpahan” bas kita. Ula “mental kekurangan” si asuhi bas geluhta. Mental kelimpahen me si erbahanca geluhta ngasup ngataken bujur man Tuhan, ngasup muji ras mpermuliaken Dibata. Mental berkelimpahan me si ngena ate Dibata dingen si ipindoNa bas kita nari. Mental berkelimpahan erbahanca kita ngasup mere bagi si ngena ateNa. Mental berkelimpahan erbahanca ersuruh ukurta mere ras melumbar dingen meriah pe si akap mere man kalak si perlu, membutuhken (2 Korinti 9:7a).

4. Lit program Mamre si enggo si sepakati bersama si igelari “Beasiswa Mamre”. Arah beasiswa Mamre enda me kita Mamre nampati anak-anakta bas gerejata GBKP sedoni si la mampu orangtuana nekolahkenca. Tutus kal atena sekolah, lit kengasupenna erlajar gelah erpemeteh. Tapi tertobeng sekolahna perbahan la ngasup orangtuana si mupus ia. Ibas si e Tuhan nuruh kita lako ndudurken tanta guna nampati ia. Bukalah dompetta bereken penampatta. Malem me ateta ibas kita nggit mere lako nampati arah beasiswa Mamre enda. Malem ateta banci kita nampati. Malem ateta kita jadi saluren pasu-pasu arah pasu-pasu si enggo ialoken kita. Malem ateta adi anak-anakta si man sampaten e pagi seh sekolahna, erpemeteh ia, pentar ia janah datna pendahin si mehuli.

5. Teklah keleng ate, kiniulinta ras pemereta arah kita muat bagin mere alu melumbae e la pernah sia-sia. Keleng ate e tahan seh rasa lalap. Keleng ate me si mbelinna (1 Korinti 13:13). Banci saja labo anak-anak si sampati kita e pagi ersimulih man banta. Banci jadi labo si tandai pe anak-anak si isampati kita arah program beasiswa enda janah ia pe labo nandai kita. La masalah. Si penting kita enggo jadi penampat man bana. Dibata jine alu caraNa si la terukuri kita si ersimulih man banta. Tetaplah jadi pancur pasu-pasu man si perlu penampat ras pemereta.

Pdt. Juris Tarigan, MTh

(GBKP Depok – LA; 081316879945)