Suplemen PJJ 18-24 Februari 2018

Bahan            :Amos 5:4-6

Thema           :”Dahilah Tuhan Maka Kam Nggeluh”

Kata Perlebe

Amos nabi si ngelai Tuhan sekitar tahun 760 SM. Ia kalak Yehuda tapi nehken sora kenabin seh man kerajan Israel Utara. Situasi politik ibas masa Amos si terjadi kalak si erkuasa nggeluh ibas kesenangenna saja, kebijakenna bagi ate-atena. Israel nggeluh ibas perbahanen dosa si mesangat; kalak bujur itindih, ngalo duit sisip ia, janah kalak musil iolang-olangina gelah ola idatca kebujuren ibas pengadilen. (5:12). Kalak bujur si la ngasup nggalar utangna idayakenna, janah kalak musil iergaina asa erga sepasang selop ngenca, kalak kote iperjakina, kalak musil si erdalan ibas dalan ijemjemkenna. Anak dilaki ras bapana erlua-lua ras sada budak diberu, ibas rumah Tuhan minem-minem anggur ia (2:6-8). Erkiteken kejahatenna ras pemberontakenna nandangi kebenaren Dibata, maka reh me rawa Dibata si mesangat man Israel si isehkenNa arah nabi Amos. Nina Amos, “Tuhan erdengum i deleng Sion nari; soraNa erlenggur i Jerusalem nari. Sora Tuhan si merawa e erbahanca mbal-mbal jadi kerah, dukut deleng karmel melus kerina”. (1:2). Sora Tuhan e igambarkena bagi sora singa si paksa merawa erdengum (mengaung) nandangi imbang-imbangna. Kenca singa erdengum ijerngemna me imbang-imbangna e alu rawana si mesangat. Bageme ate Tuhan ilakokenNa i sion nari nehken pengadilenNa man Israel. Lanai lit dalan Israel nilah, lanai lit ingan Israel cebuni, ibunuh Tuhan me ia erkite-kiteken dosa ras kejahatenna.

Pembahasen

Kata persinget si rehna ibas Dibata nari si isehkken Amos tempa-tempa lanai bo lit ammpunen nari, Israel pasti ndatken hukumen Dibata si mesangat. Tapi Dibata e perkeleng kap. Ibas kerina kejahaten manusia kekelengen Dibata labo pernah surut. Belina ras tetapna keleng ate Dibata labo itentuken perbahanen si nembah Ia, tapi Ia kap kekelengen e. E maka ibas keadaan si tempa tempa enggo mendesak, tempa tempa lanai lit dalan pulah man Israel “pengumumen-persinget” si isehken Amos e arusna erbahan Israel sengget ras ertobat, menyadarken dirina kerna situasina paksana erdalan ibas dalan keruntuhen ras maut. Erkiteken si e nina Tuhan arah Amos “Marilah dahi Aku, maka kam nggluh..”. Dahilah Aku ibas bahasa Indonesia “carilah Aku” si ertina pindomin pengajaren man bangKu=sungkun Aku, maka kam nggeluh. Ibas Tuhan lit arapen dalan pulah ibas hukumen kematen nari.

Ibas masa si e kalak Israel sibuk ngelakoken upacara penembahen man Dibata ibas ingan-ingan si badia (tempat-tempat suci) i Betel ras i Gilgal, tapi si ilakokenna labo nembah Dibata, labo ndahi Tuhan tapi nggeluh ibas “gaya hidup badia” (kesalehan si palsu) si tujunna pesenang-senangken bana labo erpenembahen mpermuliaken Dibata. Ciga iakap Tuhan perayan-perayan Israel si hanya pesenangken bana e, si la erdampak mperobahi lagu langkahna kubas tujun ndalanken si mehuli. Nina Tuhan “Mutah Aku ngidahsa” enggo itulak Tuhan persembahen tutungen ras persembahen gandum Israel. Persembahen tutungen e me persembahen pengampunen dosa tapi ciga ate Tuhan sebab la isehken alu pertobaten. Persembahen gandum e me persembahen ucapen syukur, e pe itulak Tuhan sebab rehna ibas kejahaten nari ras tujunna kemulian bana (kesombongenna) si ipertontonken. Enden enden pujin si isehken Israel lanai bengket ku bas pusuh Tuhan, tapi enggo gejek iakap Tuhan, sebab si ngena ate Tuhan la idalanken Israel. Si ipindo Tuhan gelah Israel ngelakoken kebujurun alu erburak-burak desken lau sumbul, desken lau belin si la pernah kerah. Si ipindo Dibata gelah Israel nadingken gana-gana si isembahna. (Bd. 5:18-26), ciga min ate Israel si jahat, janah erngena ate ngelakoken si benar, ndalanken kebujuren ibas pengadilen, gelah mekuah ate Tuhan man bana (5:15).

Gilgal ras betel e ingan si badia (tempat suci) tapi labo ingan si badia e Dibata. Si arus ilakoken Israel adi ersembah dahilah Tuhan jumpai Ia. Ingan—ingan si badia e la tetap, hanya lokasi janah adi ihancurken Dibata ingan e hancur lesap me kerina raduken ras kalak Israel si sangana ersembah i je. Ibas ayat 6, sekali nari iulihi Amos “Dahilah Tuhan maka kam nggeluh”. Lit denga arapen, lit denga ibere Tuhan sitik waktu sebab adi Israel la reh erpenungkunen man Dibata, maka bagi api si gurlah me Tuhan reh ndahi Israel, nutung keri bangsa e ras ku Betel ngeradasken kerinana ras penduduk kuta e.

Aplikasi

Payo nge e maka Dibata si sembah kita e Dibata si kejam, isehkenNa rawaNa alu mesangat, la kecuali man bangsaNa pilihenNa adi bangsaNa e erbahan dosa ras pemberontaken? Tuhan e eme Dibata si perkeleng, niNa mpetandaken diriNa ras nehken perentahNa “Aku Tuhan si erdolat, la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah Ia nggeluh”. Tole niNa ”O Israel, ngadikenlah kejahatenNdu. Engkai maka nggiten kam mate?” (bd.Esekiel 33:11). Tujun Dibata ibas nehken ukumen man kalak si perdosa labo guna menikmatisa, tapi gelahna kalak si perdosa e jera ibas dosa ras kejahatenna nari ras ndalanken kebujuren. Erkiteken si e Tuhan nuruh suruh-suruhenna mperisingeti, menegor kalak si nggeluh ibas dosa gelah jera. Artina Tuhan mereken waktu si bias gelah kalak si nggeluh ibas dosa ertobat.

Kalak si nadingken Tuhan, si erpenembahen ku dibata-dibatana si deban maka geluhna ras pengertinna kerna kebenaren labo banci reh ulina. Adi kalak reh dauhna ibas Tuhan nari ras reh deherna ku tujun pribadi entah kelompokna maka ibas ngelakoken hal hal si mehuli entah ngelakoken upacara keagaman pe dasar ras tujunna ngelakokenca labo payo, si mehuli ras sikap ibadah si ilakokenna e ngadi guna kemulian dirina saja, si ilakokenna e ipertontonkenna (idemonstrasikenna) demi pengakun ras kesombongen diri. Kerembaken ras Tuhan nge si iperluken manusia si ndarami kedamen nggeluh. Kalak si ertutus ate erpenungkunen ku Tuhan ibas ia la kurang pemetehna guna ndalanken si benar, janah ibas ia kata Dibata jadi rambu-rambu si njaga perbahanenna gelah tetap erdalan ibas kebenaren Dibata. Adi bage kerehen wari Tuhan labo jadi kebiaren man bana, labo cilaka entah kegelapen tapi jadi keriahen si itimai penggenapenna.

ewg

Suplemen Bimbingen PJJ Tanggal 11 – 17 Pebruari 2018

Thema            : Pulahilah BangsaNa

Nats    : Lukas 4 : 18 – 19

1. Ibas rumah pertoton i Nasaret, Jesus ngogeken Jesaya 61:1-2. Lit pengaturen Tuhan ibas ibereken petugas rumah pertoton e Kitab Nabi Jesaya man baNa. Ije tangkas tersurat kerna tanda-tanda Mesias sinandangi reh e, maka arusna lanai lit alasen ngataken “la meteh tah pe la nandai” di kune Mesias e reh. Apai ka ikataken Jesus maka “Sendah nggo seh isi Pustaka Sibadia si ibegindu ndai” (Luk. 4:21). Arusna meriah ukur kalak simbegiken Kata Dibata ras penggenepen nubuat kerna Mesias enda. Sebab Mesias me sinipadanken Dibata guna membebasken bangsaNa.
2. “Kesah Tuhan lit i babongKu”, ituriken Jesus maka Kesah Sibadia alu serta ringan ibaboNa, la bagi nandangi nabi-nabi atau raja-raja ngaloken Kesah Sibadia alu kapasitas siterbatas. Adi iperdiateken alu megermet maka kerina tanda-tanda perkenanen Tuhan lit ibas Jesus, la lit rencana sigagal tah si la tergenepi. Nina Jesus erkiteken Ia ipilih (diurapi) ras iutus guna ndalanken Peraten Bapa. Ertina tep-tep kalak siate Tuhan nehken dahin sinisuruhNa iperlengkapi-Na. Tep-tep kalak sipake Tuhan, guna mbereken pengesahen alu pendilo, iperlengkapi ras iutusNa. Jadi melala tanda-tanda simenyertai utusen Tuhan guna ndalanken peraten Tuhan.
3. Berita simeriah sinipeseh Tuhan Jesus eme nehken pembebasen. Bagi berita sini peseh nandangi bangsa Israel ibas perbudaken Mesir maka Tuhan mulahi bangsaNa. Berita e iterusi alu tindaken pembebasen bangsa Israel alu ngangkat Musa selaku pembebas. Bage me Tuhan Jesus selaku Mesias ngelakoken kerina peraten Tuhan guna mulahi arah perbudaken dosa.
4. Berita simeriah ipeseh man kalak musil, kalak sitertaban, kalak sipentang ras kalak si itindas. Ipetangkas Tuhan maka labo Ia senang nandangi kemusilen, perbudaken, kebodohen, penipun entah pe bentuk-bentuk kejahaten sinebu-nebu kalak sideban. Berita simeriah enjemba kita guna jadi pelopor-pelopor kebenaren ras keadilen. Kebenaren ras keadilen erdalan secara beriringen/ sendalanen, ija ilakoken kebenaren ije me terjadi keadilen. Maka berita simeriah sini beritaken Jesus pe nehken kebenaren simembebasken arah erbage-bage masalah kegeluhen.
5. Kerehen Tuhan Jesus me tahun Tuhan mulahi bangsaNa. Tahun Yobel sibiasna ilakoken ibas tahun pelimapuluhken, ertina arus itimai paksana 50 tahun sekali. Tapi kerehen Tuhan Jesus sekali ras rasa lalap berlaku tahun perkuah ate Tuhan. Kalak-kalak singaloken Jesus enggo ngaloken pembebasen e sekali seh rasa lalap.
6. Tuhan encidahken diriNa selaku pembebas, dingen nikapken/ ngutus pembebas. Dingen labo kalak Israel saja siipake Tuhan guna mbebasken. Termasuk raja Kores pe ipake Tuhan guna mbebasken bangsa Israel arah pembuangen Babel nari. Jadi labo lit kearusen man banta guna memilih “saudara seiman” saja, sebab ise saja pe danci ipaken Tuhan guna nehken peraten-Na. Saja kita perlu hikmat bas Tuhan nari guna nandai ise-ise saja sipake Tuhan, tah pe lit tanda-tanda selaku sekalak pembebas si mempunyai keprihatinen nandangi kalak si lemah.
7. Ibas PILKADA serentak bulan Juni 2018 enda, perpulungen perlu megermet guna memilih pemimpin-pemimpin kepala daerahta masing-masing. Labo kerina kalak singena ate Tuhan, dingen masyarakat daerah setempat sini ipakeken Tuhan guna milihsa. Salah mbereken suara ibas bilik suara sada lima menit, danci erbahan erkadiola sedekah lima tahun. Emaka nehenlah tanda-tanda tah pe karakter-karakter singena ate Dibata ibas kalak siman sipilihenta. Selamat berpartisipasi ibas mbereken suara pilihen ibas PILKADA enda.

Pdt. Sura Purba Saputra

GBKP Harapan Indah

Suplemen Bimbingen PJJ Tanggal 04 – 10 Pebruari 2018

Thema            : Kinirugin Kap Kerina Rimbangken Kristus

Nats    : Pilipi 3 : 1 – 11

1. Paulus tuhu-tuhu erkeleng ate man perpulungen maka megenggeng ia nehken pengajaren Kata Dibata, segelah perpulungen ula itebu-tebu pengajaren sipapak, segelah perpulungen megenggeng ibas pengajaren si benar.
2. Siterutama ipeseh Paulus segelah “meriahlah iakapndu erkiteken persadanndu ras Tuhan”, sebab ibas persadan ras Tuhan enda me kunci kiniteken situhu-tuhu. Tanpa hubungen sibenar ras Tuhan, uga pe tutusna ate sesekalak erkiniteken, kerina sinilakokenna hampa ras sia-sia.
3. Lit kalak si reh ku perpulungen mbaba pengajaren si tempa-tempa mehuli. Emaka ikataken Paulus segelah perpulungen “Metenget”, ertina perpulungen arus megermet emperdiateken pengajaren sinibaba kalak. Lit idah Paulus biak si jahat ibas pengajaren si reh ku Pilipi, maka igambarkenna pengajar e me biang, maksudna kalak enda ngereng ras engkarat bagi biang. Sabab kalak enda mengutamaken agama lahiriah alu ngajarken kearusen sunat. Nina Paulus “Kita labo ernalem nandangi adat-adat si teridah.” Siterutama persadan ras Kristus me sunat batiniah si tuhu-tuhu, lanai iperluken tanda jasmani.
4. Kita la danci ernalem/ bermegah/ mengandalken tanda-tanda siteridah. Ibereken Paulus perbandingen kerna dirina jine, “Aku isunatken asum umurku waluh wari. Aku tubuh selaku kalak Israel, suku Benyamin, janah kalak Heber asli me aku. Kerna ndalanken Undang-undang, kalak Parisi kap aku.” Kerina enda labo ianggap Paulus keuntungen, tapi melala mbaba kerugin man bana. Sabab kinitekenna sindekah mabai ia kubas pesega-sega kalak sierkiniteken. Dingen ibas sesekalak ngagahken dirina alu gambaren kiniteken sidekah enda, mbabai ia erdauhna ras Kristus.
5. Kerinana perlu iperbandingken ras Jesus Kristus. Paulus emperbandingken kegeluhenna sope nandai Kristus ras kenca nandai Kristus. Sope nandai Kristus kegeluhenna terbaba kubas fanatisme radikal, erpengakap maka kinitekenna sibenarna, tapj ternyata ia salah. Kenca ia jumpa Kristus maka iantusina kesalahenna, dingen ia berbalik kubas kegeluhen si benar. Erkiteken Kristus mbereken kiniteken sibenar man bana. “Erkiteken Kristus, enggo kuambekken kerinana, janah kupedirep si e kerina sampah-sampah, gelah banci kudat Kristus dingen. Tuhu-tuhu ersada aku ras Ia.”
6. Gel-gel e Paulus ndalanken kiniteken sierpalasken usaha manusia, manusia sindarami Tuhan. Tapi genduari sebalikna, Tuhan sindarami manusia. “Dibata jine si enggo ngerembakken aku kempak diriNa erkiteken kinitekenku.” Bahwa upaya manusia gagal, tapi upaya Tuhan pasti berhasil. Kai sinilakoken Tuhan erbahan kegeluhenta meherga, sabab Tuhan erbahan kita enggeluh erkiniteken. Alu kiniteken si erdahin ibas kegeluhenta me erbahan kegeluhenta la empermelaken Tuhan, justru kita empermuliaken Tuhan.
7. Emaka enggo idatken Paulus tujun kegeluhen si benar, “Sada ngenca sura-surangku e me gelah kutandai Kristus dingen kugejap kuasa kekekenNa janah ikut aku ngenanami kiniseranNa, dingen bali ras Ia i bas kematenNa, alu pengarapen maka aku ipekeke Dibata i bas si mate nari ku kegeluhen.” Sinimaksudken Paulus bahwa kematen ras kekeken Kristus enggo empemate kuasa dosa ibas diriNa, emaka keke me Ia guna encidahken kemenangenNa. Ibas kita ngenanami kematen Kristus, ije me kita pe ngalahken kuasa dosa, bahwa dosa/ peraten daging lanai erkuasa nandangi kita. Kuasa kekeken Kristus eme si perlu kel kita guna sinanami ibas kegeluhenta ibas paksa gundari ras ibas wari pendungi pepagi.

Pdt. Sura Purba Saputra

GBKP Harapan Indah