Renungen :

Hakim-Hakim 13:2-11 (Ertoto Ope Renungen)

           Tema :

“Ulih Jabu Si Ertoto”

Manoah, Bapa Simson suku Dan, i Zora nari. Ia nggeluh kenca masa pembuangen. Tupung e bangsa Israel erdosa man Tuhan, emaka ipelepas Tuhan bangsa enda ikuasai bangsa Pilisti empat puluh tahun dekahna. Amin bangsa Israel nggeluh i bas dosa, tapi Manoah ras ndeharana tutus ertoto man Tuhan. Emaka i bas jabuna nari sura-sura Tuhan tubuh sekalak anak dilaki si jadi Nasir eme si nerapken diri bas jelma si enterem nari, janah erpadan tetap nggeluh bagi sura-sura Dibata. Anak e me pagi si mulahi Israel i bas bangsa Pilisti nari. Labo rasa lalap pernembeh ate Dibata. Keleng ateNa ndauh belinen asa ukumen si isehkenNa, erkiteken si e ibahanNa tetap dalan maka bangsa Israel banci pulah bas kiniseranNa nari.

Guna sie malaikat Tuhan reh njumpai ndehara Manoah, iturikenna kai arus si ibahan ndehara Manoah bagepe kai si la arus ilakokenna tupung anak e lit i bas bertinna seh kenca ia mupus. Kai si idahna enda iturikenna man Manoah perbulangenna. Tole nari ate Manoah meteh kai arus ipesikap kenca anak e pagi tubuh, emaka ertoto ia man Tuhan alu dem kiniteruken ukur. Tek Manoah, adi e kin sura-sura Dibata uga kal pe ibegikenNa pertotonna. Teridah ije kiniteken Manoah eme ersura-sura tetap megiken sora Tuhan radu ras ndeharana. Kiniteken Manoah e la sia-sia. Ibegiken Tuhan pemindonna, alu nuruh malaikat njumpai ndeharana tupung ia kundul i juma. Minter kiam ndehara Manoah e njumpai ia gelah radu ras megiken kai si ikataken malaikat e. Ercakap-cakap Manoah ras malaikat e kerna persiapen ngalo-ngalo anakna si jadi Nasir Dibata.

Pertoton si erpalas ku bas kiniteken ulihna maba keriahen dingen ndatken ketenengen. Ertoto e eme dalanta ngerana-ngerana ras Tuhan dingen megiken sura-suraNa guna idalanken bas kegeluhen si teptep wari. Tupung sidalanken sura-sura Tuhan eme buah pertotonta. Budayakenlah ertoto e i bas kegeluhen jabunta.

       Renungen  :

Markus 14:32-42 (Ertoto Ope Renungen)

Tema :

       “Singabati Ibas Ertoto”

Labo kepe mesunah ertoto. Melala si ngabati ibas kita ertoto. Si ngabati kita ibas ertoto banci darat nari banci ka ibas dirinta nari. I darat nari banci arah suasana si la mendukung ibas ateta ertoto. Umpamana sora gejek si pinger erbahanca la kita banci tutus ertoto. Tapi si mbelinna kal singabati kita ertoto eme ibas dirinta nari jine.

Ibas Jesus bakal ngalaken kiniseran ras kematen i babaNa ajar-ajarNa ku Peken Getsmane. Ingan enda semal ipake Jesus guna ertoto. Paksa sie ceda kal dingen getem kal pusuh Jesus. Ieteh Jesus uga beratna perbeben si bakal si nanamiNa. Sienda erkiteken kerina dosa manusia idabuhken man baNa. Ibas ajar-ajar si sepuluh sada, (Judas enggo lawes ndayaken Jesus ateNa), ibabaNa ku Peken Getsmani. Ibas si sepuluh sada e, telu kalak ajar-ajarNa ibabaNa terbagesen ibas Peken enda eme Petrus, Jakub ras Johanes. IsuruhNa pe teluna erjaga ras ertoto gelah ula ndabuh ku bas percuban. Jesus lawes si sada terbagasen ibas Peken enda guna ertoto. Janah ajar-ajarNa pe isuruhNa guna erjaga-jaga ras ertoto. Telu kali isuruh Jesus ajar-ajarNa guna erjaga-jaga ras ertoto teridah maka telu kalina ajar-ajarNa tetap tertunduh. La ia ngasup erjaga-jaga ras ertoto justru ibas Guruna sangana ibas perbeben si mesangat.

Kejadin enda ngatakenca maka ertoto labo mesunah. Ertoto lit rusur si ngabati kita. Bagi ajar-ajar lit singabati ia ibas ertoto bage pe kita. Banci latihsa siakap erdahin lanai ngasup ertoto. Banci ka la siaturken waktuta guna ertoto. Sanga si inget, janah siakap perlu ngenca kita ertoto. Banci perban sibukna la siakap lit kesempatenta guna ertoto. Sabat siakap ertoto e perban lalana sura-sura si man ayaken si itawarken doni enda. Padahal adi ertoto kita man Dibata i bere Tuhan gegeh man banta, seh maka lebih asa kita ngasup ngukurisa banci terdahiken kita. Erdandanken sie maka uga latihna siakap erdahin, uga sibukna pe kita si litken ras siaturken waktuta guna ertoto. Si inget lit sada ungkapen nina:” Anda meraih lebih banyak satu jam bersama Tuhan, daripada seumur hidup tanpa Dia.”

TEMA UMUM :

“BEGIKEN MIN PERTOTONKU” (Masmur 102:2)

      Renungen    :   

Perbahanen Rasul-Rasul 10:1-8 (Ertoto Ope Renungen)

       Tema            :   

“Jabu Si Ertoto”

Bujur sikataken man Dibata erkiteken perkuah ras lias ateNa enggo iatankenNa kita bengket kubas Pekan Doa GBKP 2018 enda. Kenca Tuhan Jesus nangkih ku Surga ras nimai janji Tuhan Jesus nusurna Kesah Si Badia enda me si jadi palas bas kita ngelakoken Pekan Doa ibas GBKP. Kita pe menaken wari/berngi enda erban pertoton tep-tep wari seh Wari Raya Pentakosta eme nusurna Kesah Si Badia. Pertoton enda me ulu gegehta guna ndalanken kerina padan Dibata. Labo kita banci ndalanken kerina pedah Dibata bas geluh enda adi la kin kita nggeluh ibas pertoton. Pertoton e me gegehta ibas erbahan singena ate Dibata bas kegeluhenta.

Tema umum Pekan Doa GBKP 2018 eme : “Begiken Min Pertotonku” (Msm 102:2). Arah tema umum enda ibabai kita gelah tetap tek maka kai si itotoken kita man Dibata ibegikenNa nge. Ula pernah kita ragu kerna kuasa gegeh toto bas kegeluhen kinitekenta maka ibas IA ngenca lit tetap serpang pulah si iberekenNa man anak-anakNa. Tema si jadi renungenta ibas wari/berngi enda eme “Jabu Si Ertoto”. Arah teks Pustaka Si Badia (Perb 10:1-8) banci kita erlajar arah jabu Kornelius maka jabu eme persadan (“Komunitas doa”) bage pe banci kita ngusih kai si enggo ilakoken Kornelius bas jabuna.

Kornelius eme sekalak komandan bas pasukan tentara Romawi si igelari “Pasukan Itali”. Ia kalak si tutus ibas agama bage pe ia ras isi jabuna nembah man Dibata. Arah biak si icidahken Kornelius rikutken bahan renungenta enda maka teridah uga Kornelius nehken tanggungjababna nandangi jabu ija ia sebage kepala keluarga guna tetap mabai jabuna erkemalangen man Dibata bagepe kepate nandangi kalak si deban. Emaka arah pengenehenen (ayat 3) si idahna maka pertotonna enggo ibegiken Dibata bage pe enggo idahna kai si enggo ilakoken Kornelius nandangi kalak musil janah nggo iingetna Kornelius (ayat 4).

Arah bahan renungenta ibas wari/berngi enda ras-ras kita kerina bas jabunta guna tetap ngusih kai si enggo ilakoken Kornelius bas jabuna. Itengah-tengah kemajun jamanta, Kata Dibata siorati kita enda mereken persinget man banta guna tetap njadiken jabunta sekalak-sekalak tetap erkemalangen man Dibata, tetap la erleja-leja guna nehken pertotonta man baNa bagepe tetap kepate nandangi perbeben sinihadapi temanta.