SUPLEMEN PA MORIA TANGGAL 13-19 AGUSTUS 2023, PERBAHANEN RASUL 18:1-3; ROMA 16:3-4 (HUT Mamre GBKP)

Ogen : Perb. Rasul 18:1-3; Roma 16:3-4

Tema : SEPENGODAK SEPENGOLE

Tujun : Gelah Moria :

- Ngidah kiniersadan Persila & Akuila ngalaken perbeben geluh bage pe tetap tutus ngelai

- Tetap sepengodak sepenggole i bas jabu kerna kecibal nggeluh

 

PENARUH

Kerina kita Moria ersura-sura geluh i bas jabunta banci sepengodak sepengole i bas senang ras susah, terlebih i bas nehken pelayanen i tengah-tengah Gereja Tuhan. Sabab seh kel latihna adi ku japa pe kita rusur nonggal (sekalak). Padahal enggo kita erjabu. Ku gereja kita ngenca ras anak-anakta, ku kerja-kerja kita ngenca sekalak, ndahiken dahin i tengah jabu pe kita ka sekalak ndahikenca. Kurang lit kerja sama ras Mamre i tengah jabu. Tentu adi lit keluarga-keluarga si bage, seh kel latihna, dingen ersura-sura kita gelah banci iubahken Tuhan situasi si bage jadi lebih baik. Sepengondak sepengole i bas jabu, subuk senang susah, meriah ukur ceda ate. Bagi lit lagu Pop Karo alu judul “Perik Si Dua-dua” :

Adina banci Turang kusayangi seperpanganen mi pagi ateku kita

Seperukuren seperarihen kita duana

Bagi perik si dua-dua teridah sada teridah bage duana

Adina bagi Turang morah ate

Sepenggejapen min pagi ateku kita

Sepengodak sepengole kita duana

Bagi kerbo sada nioga ku ja sada ku je bage duana

I bas bahan PA Morianta sekali enda, erlajar kita ras siusih keluarga Akuila ras Persila.

MPEBAGESI PENGANGKAN KERNA OGEN

Enterem temen sekerja Paulus i bas meritaken Kata Dibata, salah sadana eme pasangen suami istri Akuila ras Persila. Duana gelar kalak enda mekatep isebutken ras-ras. Bagi isi lagu perik si dua-dua ndai, teridah sada teridah bage duana. I bas Pustaka Si Badia, lit 7 kali ayat i ja gelar kalak enda isebutken (Perb. Rasul 18:2, 18, 19, 26; Roma 16:3; I Kor. 16:19; II Tim. 4:19).

I bas perikopta ikataken maka itadingken Paulus kota Aten ras lawes ia ku Korinti. I Korinti kepeken jumpa ia ras pasangen suami istri Akuila si asalna bas Propinsi Pontus nari ras Persila ndeharana, i ja kalak enda mbaru denga reh Italia nari sabab kerina kalak Jahudi ipelawes Kaisar Roma, Klaudius. Kaisar Klaudius eme Kaisar Roma si pe-4-ken si erkuasa benaken 24 Januari tahun 41 seh kematenna tahun 54. Ertina, itadingkenna kota Roma erkiteken lit konflik politik, i ja mengharusken kerina kalak Jahudi lawes i Italia nari. Enggo pasti hal enda mpengaruhi kondisi ekonomi keluarga Akuila, i ja sedekah enda enggo mapan usaha tenda si idalankenna i Italia. Tapi hal si menarik si banci siidah, maka duana kalak enda, ersada arih ngalaken perbeben nggeluh. Subuk i bas membangun ras mengembangken usaha tenda i Korinti bage pe nampati dahin pelayanen mpembarken Berita Si Meriah.

Usaha si seri eme erbahan tenda erbahanca Paulus jumpa ras pasangen suami istri enda. Rikutken teks bhs. Karo, maka Paulus leben si njumpai Akuila ras Persila (ay. 2d, “idahi Paulus kalak enda ndai”). Bahkan i rumahna me Paulus kesilang. Rikutken penuturen i bas ay. 11, maka 18 bulan (sada setengah tahun) dekahna Paulus i bas kota Korinti, iajarkenna Kata Dibata man anak kuta e. Ertina, selama kurang lebih sada setengah tahun Paulus tading i rumah Akuila ras Persila. Piga-piga poin penting si banci siusih i bas jabu Akuila ras Persila :

1. Tetap setia i tengah keluarga i bas ngalaken tantangen si mberat, sabab banci erkiteken pergumulen si mberat keluarga e, la nari harmonis ras setia. Keluarga enda tetap saling mendukung ras menopang.
2. Perbeben si mberat, labo mpengadi (menghalangi) keluarga enda jadi berkat (pasu-pasu). Akuila ras Persila ngasup rukur positif, maka rejeki e rehna i bas Dibata nari. Emaka aminna mbaru denga tading i Korinti, mbangun usaha kembali dari nol, labo erbahanca keluarga enda mbiar ras eraru ate. Labo lit ukurna cian entah pe saingenna akapna Paulus i bas seri usahna. Bahkan saling bersinergi, untuk saling menopang i bas usaha si seri. I rumahna ka Paulus kesilang selama kurang lebih sada setengah tahun.
3. Ersada ukurna i bas nampati pelayanen Paulus. Banci jadi selama Paulus kesilang i rumah Akuila ras Priskila, kesempaten man bana erlajar kerna Kata Dibata ras mendampingi Paulus i bas pelayanenna. Ay. 18, “kenca pelayanenna i Korinti, iterusken Paulus ku Siria radu Persila ras Akuila, ras menetap ka i Epesus. Berkat Paulus i Epesus nari tapi Akuila ras Priskila tading i kuta e.” Ertina, Paulus enggo mempercayaken dahin pelayanen e i kota Epesus man Akuila ras Persila. Bahkan i bas ay. 26 asum ibegi Persila ras Akuila pengajaren firman Tuhan arah Apolos i ja lit si kurang lengkap (sabab peridin Johanes ngenca ietehna). Alu dem kekelengen ras la mpermaluken Apolos, ibabana Apolos ku rumahna je nari alu lebih tepat iperjelasna man Apolos kerna dalan kegeluhen si ituduhken Dibata.
4. Rumah kalak enda pe ipake guna ingan pulung perpulungen i bas erlajar kerna Kata Dibata (I Kor. 16:19).

Bahkan i bas kitab Roma 16:3 ikataken Paulus, maka Akuila ras Persila temanna sada dahin i bas dahin Kristus Jesus (terj. TB - LAI, “teman-teman sekerjaku dalam Kristus Yesus.” Terj. BIMK, “rekan-rekan saya yang sama-sama bekerja untuk Kristus Yesus”). Ertina i jenda Paulus mengakui maka Akuila ras Persila selaku teman sekerja (team work), senang susah, meriah ukur ras ceda ate i bas meritaken Berita Si Meriah. Bahkan nggit kalak enda ngasamken kesahna (berkorban) guna Paulus (terj. BIMK, “Mereka hampir mati”). Kai si ibahan Akuila ras Persila mereken semangat tole man Paulus seh makana la surut dahin si idahikenna i bas nehken Berita Si Meriah. Paulus mengapresiasi (mujiken) kai si enggo ibahan pasangen suami istri enda. Bahkan labo Paulus ngenca si ngataken bujur man duana kalak enda, tapi pe kerina perpulungen si labo kalak Jahudi.

PENGKENAINA

I bas jabu la lit istilah “superman”, “superwomen”, tapi si lit “superfamily” ras e enggo icidahken arah kegeluhen jabu Akuila ras Persila. Keluarga enda sepengodak sepengole, ersada arihna i bas ndalanken kegeluhen jabuna, subuk suka bage pe i bas ngalaken perbeben geluh, terlebih i bas ketutusen duana melayani Tuhan. Keluaga si jadi usihen dingen metedeh ateta bage ka kegeluhen jabunta. Rikutken temata “Sepengodak Sepengole” desken kalak si landek, maka i bas odakna seiring seirama, la lit situalen. Ras e enggo jelas ndai rikutken penjelasen bahan firman Tuhan i datas arah jabu Akuila ras Persila. Ersada arihna i bas ngalaken tantangen pergumulen si mberat. La lit istilah “ada uang abangku sayang, tidak ada uang abang melayang.” Sebab mekatep si terjadi asum senang e, banci setia man pasangen. Tapi ‘di kenca tumpur usaha, sakit pinakit nderpa, terkadang enggo luntur kesetian e. Arah kai si ilakoken keluarga Persila Akuila, perlu akap siinget mulih padan perjabunta ndube, “Aku si anu muat si anu jadi pasangenku. Janah aku erpadan tetap ngaloken kam subuk i bas paksa senang susah, meriah ukur ceda ate, sehat sakit. Aku tetap erpadan njagai kebadian perjabunta seh Dibata nirangken kita alu kematen.”

Sepengondak sepengole i bas nampati, nehken kekelengen (melumbar mere) bage pe i bas dahin-dahin pelayanen. Kadang si terjadi perbulangen melumbar, si ndehara perhitungen (pelit) bage pe sebalikna. Piah dungna erbuni-buni (la sietehen) i bas nampati keluarga bage pe dahin perpulungen. Puji Tuhan genduari enggo melala ersuruh ukur Mamre reh ku gereja. Tapi lit ka jabu, i ja Mamrena la enggo pernah idah bas dahin-dahin gereja. Moria ngenca ras anak-anak si aktif i bas dahin-dahin gereja. E pe sada pergumulen si mberat. Kurang siakap riahna ‘di kenca Mamre bas keluarganta lenga ukurna ersuruh i bas mendukung dahin-dahin pelayanen. Si parahna lit keluarga si ersada arihna i bas si la mehuli, radu mekisat i bas dahin-dahin gereja, radu pelit (kurang melumbar), radu la senang rumahna ipake guna ingan perpulungen, rsd.

Mari senina Moria, i bas HUT Mamre pe-28-ken ras-ras kita ertoto gelah ipasu-pasu Tuhan jabunta jadi jabu si harmonis, sepengodak sepengole i bas senang susah bage pe i bas ndahiken dahin pelayanen. Lebe latih dirinta jadi Moria si bijak, Moria si tutus, Moria si erpemere, Moria si mejingkat, Moria si senang melayani. Sibere dirinta guna jadi berkat subuk i tengah jabu, gereja, ras masyarakat. Emaka ertoto kita gelah raduken ras Mamrenta rikut ras anak-anakta banci kita sepengodak sepengole i bas ndalanken si ngena ate Dibata.

Pdt. Larena br. Sinuhadji (Nd. ReyRapha Tarigan)-Runggun Cikarang