SUPLEMEN PA MORIA TANGGAL 12-18 FEBRUARI 2023, EFESUS 1:15-19

Bahan : Efesus 1:15-19

Tema : Enggo Ku Begi Kerna Kinitekenndu

 

I. KATA PENARUH

Nginget teman sada kiniteken merupakan sikap si mehuli. Apalagi lit waktuta guna nungkun beritana, berita keluargana terlebih berita kinitekenna. Beritana e banci nambahi pengangkanta akan kecibal temanta e. Banci mabai kita guna nampati ia entah pegegehi ia ibas geluhna. Tapi banci jadi berita keriahen man banta adi kune keadaan geluhna mehuli kerina. Saja ngenca arah bahan Pa moriata ibas minggu enda mulihi mabai kita guna mengevaluasi dirinta, apakah lit dengan nge waktuta nungkun berita temanta, mereken kata pergegeh man bana entah maun kita enggo sibuk ras dahinta saja.

II. PENJELASAN TEKS

Surat efesus enda itulisken Paulus sewaktu ia ibas penjara. Amin pe rasul Paulus sangana ibas penjara ia tetap nungkun berita perpulungen Efesus. Paulus tetap mesikel megi berita kerna kiniteken perpulungen Efesus

Kenca rasul Paulus megi berita perpulungen Efesus meriah kel ukur Paulus ras ikatakenna bujur man Dibata. “la aku erngadi-ngadi ngataken bujur man Dibata kerna kam”(Ay 16a). Rasul Paulus ngataken bujur man Dibata erkiteken kiniteken perpulungen Efesus ras keleng ate perpulungen Efesus man kerina anak-anak Dibata (ay 15). Kiniteken ras keleng ate e tentuna rehna ibas Dibata nari. Labo banci lit keleng ate simbages man kalak sideban adi la kin erkiteken kiniteken si mbelin man Dibata. Kiniteken epe teridah arah perbahanen. Emaka alu megi berita kerna kiniteken ras keleng ate perpulungen Efesus meriah ukur rasul Paulus.

Rasul Paulus ertoto man Dibata gelah ibereken Dibata kesah kepentaren gelah ipetangkas Dibata diriNa man perpulungen Efesus gelah itandai perpulungen e Dibata. “Kupindoken man Dibata Tuhanta Yesus Kristus, bapa siermulia, gelah iberekenna man bandu kesah kepentaren dingen ipetangkasNa dirina man bandu gelah itandaindi Ia” (ay 17). Ijenda rasul Paulus mindo man Dibata ibas pertotonna gelah Dibata mereken kesah Si Badia atau hikmat man perpulungen Efesus gelah kesah e sinampatisa guna nandai Dibata alu benar. Rasul Paulus mindo man Dibata gerelah kesah Si Badia e sinerangi perpulungen Efesus. Rasul Paulus mindo man Dibata gelah perpulungen e nandai Dibata alu payo. Penandai Dibata alu payo mabai sesekalak banci tumbuh ras erbuah kinitekenna man Dibata.  

Rasul Paulus pe mindo man Dibata kerna pengarapen perpulungen e man Dibata bage pe kerna erta-erta si mulia siisikapken Dibata man anak-anakNa. Rasul paulus ertoto gelah perpulungen Efesus meteh maka melala pengarapen sisikapken Dibata man anak-anakna eme pengampunan dosa, kegeluhen kekal, keriahen ukur, ersada ras Kristus. Erta-erta simulia siisikapken Kristus man Anak-anakNa. Bage ka pe gelah perpulungen e meteh maka seh belinna kuasa Dibata erdahin ibas kalak si tek man Kristus. Rasul Paulus ngarapken gelah perpulungen Efesus e meteh maka mbelin kel kuasa Kristus mulai gel-gel nari seh genduari. Kuasa Dibata e ganjangen asangken kerina kuasa-kuasa silit ibas doni enda.

III. PENGKENAINA

Metedeh ate nandangi keadaan teman sada kinitekenta eme sada hal simehu siperlu silakoken ibas geluhta. Apalagi silakoken guna banci mendukung ia guna menyemangati ia ras notoken ia. Sebab alu bage tentu kinitekenta kerina banci reh mbagesna man Dibata. Lalit kita sitalu amin pe mbue perbeben geluhta. Temanta pegegehi kita, notoken kita. Kita pe pegegehi ia ras notoken ia. Lit piga-piga hal sibanci siusuh ibas rasul Paulus nari man perpulungen Efesus :

  • Isungkunna berita perpulungen amin pe ia ibas penjara
  • Berita perpulungen erbanca meriah ukurna
  • Berita perpulungen mabai ia notoken perpulungen gelah reh bagesna penandai perpungen man Dibata.
  • Erototo ia gelah perpulungen meteh erta-erta simulia ibas Dibata ras mbelinna kuasa Dibata.

Hal enda tentuta mehuli silakoken ibas perpulungenta masing-masing. Mari moria kerina saling memperhatiken kita ibas kinitekenta.

                                                                        Pdt Kristaloni br Sinulingga-Rg GBKP Yogyakarta

 

Info Kontak

GBKP Klasis Bekasi - Denpasar
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate

GBKP-KBD