SUPLEMEN PA MORIA TANGGAL 24-30 APRIL 2022, ULANGAN 28:43-46
Tema :
IKUTKEN TUHAN
Nats:
ULANGAN 28:43-46
Tujuan : Gelah Moria:
- Tutus ngikutken Tuhan gelah ula ikuasai penguasa ras pengusaha
- Pentar ibas rehna investor-investor ku inganna tading
Pendahuluan
Melala kalak Kristen si nginget ras mementingken janji Tuhan ibas sada sisi ngenca, eme janji pasu-pasu saja, janji ukumen mekatep ilupaken. Sementara ibas Kitab Ulangen 28 enda, situhuna ibas sada pasal tercatat alu lengkap kerna janji pasu-pasu sekaligus ras janji ukumen (kutuk). Teridah ijenda maka ukumen pe termasuk nge isi padan Dibata man bangsaNa. Arah bagin teks enda kita memahami Dibata secara utuh, Dibata si dem perkuah ate dingen adil, si mereken pasu-pasu tapi pe sekaligus mereken ukumen man bangsa siikelengiNa.
Pembahasan teks
Isi Kitab Ulangen si mbelinna eme kerna uga Dibata enggo mulahi ras masu-masu bangsa pilihenNa. Si enda arus iinget bangsa e gelah tetap erkemalangen dingen erkeleng ate man Dibata gelah ndatken pasu-pasu si la erkeri-kerin. Ibas Kitab Ulangen enda me Musa mpersingeti mulihi kerna erti Perpadanen Dibata ras bangsaNa dingen iajuk Musa bangsa Israel guna ertanggung jawab nehken kai siipindo Dibata ibas perpadanen e. Bagin si jadi ogenta eme persinget ras perentah siisehken Musa man bangsana i taneh Moab, kenca mentasi gurun pasir ras ersikap kuga arusna mengketi negeri Kanaan. Ibas iketen perpadanen Dibata ras bangsa Israel, lit konsekuensi logis si isehken Dibata man bangsaNa adi bangsa e la setia ras la patuh man Dibata, isehken Dibata me ukumen. Ibas bagin enda ituriken ukumen alu panjang lebar ras detail, ayat 1-14 eme detail pasu-pasu man bangsaNa adi patuh ngikutken Tuhan, sedangken ayat 15-68 eme secara detail ituriken kerna ukumen adi la patuh.
Ukumen ras sumpah ibas pasal 28 enda ijelasken ibas 3 bagin, eme: ayat 15-46,47-57,58-68. Ukumen ras sumpah e meliputi:
- Sumpah Dibata si mereken mara, keguluten ras kiniseran ibas pendahin, sumpah nandangi kuta ras juma, pendahin, usaha ras sinuan-sinuan, la ibereNa nterem tuah, la mbuah page, la merih asuh-asuhen, wari lego, angin si melas, udan abu ras kersik si ngkernepken bangsa e adi la patuh (ayat 16-24).
- Sumpah Dibata alu bentuk kematen ras talu erkiteken peperangan ngelawan musuh (ayat 25-26 dan 32-37), si mpeturah erbage-bage sakit penakit ras mesui ate (ayat 27-31).
- Secara khusus ibas bagin ogen PA-nta, Ay.43-44 njelasken kerna sumpah Dibata sierbahanca bangsa Israel ikuasai bangsa si deban, tertindas ras terlilit utang/pinjaman seh maka jadi tabanan ras iperbudak bangsa si deban.
Ay. 45-46 : Ukumen ras mara ku tengah bangsa Israel isehken Dibata dingen jadi man bangsaNa terus ku kesusurenna, seh maka generasi si ndarat i Mesir nari, si nggo ipulahi Dibata e, kernep kerina, adi la ngikutken Tuhan ras la encikep Undang-undang si ibereken Dibata man bana. Derajat bangsa Israel selaku bangsa pilihen pe, ipeteruk Dibata iadep-adepen bangsa asing. Janah adi bangsa Israel la bertobat dingen jera, ukumen Dibata e jadi man bangsa e ras sinursurna asa lalap seh asa lalap si banci engkernepken bangsa enda. Teridah ijenda kerna konsekuensi Kepatuhen ras Kelapatuhen si berdampak secara kontras nandangi bangsana: Patuh dat Pasu-pasu, La patuh dat palu-palu (ukumen). Emaka arah Khotbahna enda Musa mpersiapken bangsana ope denga bengket ras ngiani taneh siipadanken Dibata alu nginget perpadanenna enda ras Tuhan, aminna gia jadi kalak petandang i Kanaan, bangsa enda ituntut arus ncidahken kegeluhen si patuh, setia dingen ngikutken Tuhan gelah bangsa enda ngaloken pasu-pasu Dibata ibas erbage dampar kegeluhenna.
Aplikasi :
Pesan penting siipelajari kita arah teks ogen ras temanta enda, eme :
- Kepatuhen ras kelapatuhen man Tuhan erat kal kaitenna ras Pasu-pasu bagepe ukumen/sumpah. Teridah ijenda maka janji ukumen telu kali lipat buena (ayat 15-68) asangken padan/janji Dibata kerna pasu-pasu (ayat 1-14). Jadi mari sievaluasi dirinta, selidiki pusuhta, adi kai pe sidahiken kita la berhasil, kai pe sisuan la turah dingen la erbuah, kai pe siasuhi kita la merih ras la menghasilkan, latih siakap erdahin tapi kerinana la jadi pasu-pasu, ula salahken Tuhan ras situasinta, tapi mari sikoreksi banta, ntah mungkin saja lenga siikutken Tuhan ras kurang setia kita man Tuhan. Tapi adi kenca siukuri ras si evaluasi dirinta sisadari nggo kita sedekah enda tutus ras setia, berarti lit rencana ras sura-sura Dibata si terulin arah kiniseran siialaken kita. Teologi siianut kita labo teologi sukses, sebab tek nge kita pasu-pasu Tuhan pe banci hadir ibas kegeluhenta arah kiniseran.
- Penting jadi perenungen ras jadi persinget : kelapatuhen man Tuhan pasti peturah kesulitan/krisis ekonomi si erbahanca kita terjerumus kubas minjam sen man sada tah dua pihak. Situasi sibagenda banci peturah kiniseran reh bagesna tole, bagi ibas teks ogenta ndai, kita jadi terlilit utang/pinjaman seh maka selanjutna kegeluhenta ikuasai ras ikendaliken oleh pihak siminjamken sen (pengusaha/rentenir) seh maka kegeluhen semakin menderita. Tapi kepatuhen man Dibata, mahan bana bijak ras pentar kita mengelola keuangenta bagepe ipasu-pasu Dibata pendahinta. Taneh si itepa Dibata, siingani ras siusahai erpalasken kepatuhen man Dibata maka taneh siingani ras siusahai kita e pe ipasu-pasuNa. Pentarlah kita ibas mengelola taneh ras juma siipercayaken Dibata man banta.
- Janji Ukumen ras sumpah Dibata ijenda arusna peturah kebiaren man banta guna memotivasi kita gelah tetap ngikutken Tuhan dingen patuh nandangi perintah Tuhan, janah enda jadi tanda persinget man banta ras kesusurenta (ay. 46). Janji Pasu-pasu ras Ukumen ta ibas kegeluhen Bangsa Israel, tupung la ia patuh man Tuhan pasti ialakenna ukumen ras kiniseran, janah sejarah ncatatken maka enda ialami Israel dua kali. Bangsa Israel itaban ku Asyur ras bangsa Yehuda ibuang ke Babel selama 70 tahun. Janji Tuhan ya ras amin. Pilihenta ijenda dua ngenca: patuh ras ngikutken Tuhan, sialoken pasu-pasu, tapi sebalikna adi la patuh ndatken “palu-palu”, mara, sumpah ras kiniseran, Siapai dage pilihndu ?
Pdt Jenny Eva Karosekali STh., M.Min
GBKP Rg. Harapan Indah
