SUPLEMEN PA MORIA 17-23 APRIL 2022, I RAJA-RAJA 19:19-20
Tema :
KU AMBATI KIN KAM ?
Nats :
1 RAJA-RAJA 19:19-20
Tujuan : Gelah Moria:
- Meteh perbahanen Elia, nikapken Elisa jadi gancihna.
- Erlajar man Saitun, amin pe nggo metua tetap erdahin nikapken generasi jadi persuruhen Tuhan.
Pendahuluan
Ibas kegeluhenta sitep-tep wari mekatep kita iperhadapken kubas erbage-bage pilihen, si mengharusken kita guna muat keputusen si tepat. Proses ibas muat keputusan nandangi kai pe pasti erpalasken pertimbangan, ras teridah arah sikap ras tindakan. Keputusannta nandangi kerina pilihen si iperhadapken man banta pasti kita si nentukenca, labo kalak si deban. Keputusanta arusna ncidahken ketutusen ateta ras sue ras sura-sura pusuhta (bdk. Mazmur 119:30). Ibas ogen ras tema PA-nta sendah pe erlajar kita arah Elia ras Elisa. Elia nehken pendilo Tuhan man Elisa la alu paksaan tapi alu dem kebebasen guna muat keputusen si terbaik ibas ngaloken pendilo Tuhan.
Pembahasan teks
Ay. 19 : Elia eme sekalak nabi, persuruhen Tuhan si erdahin guna nehken sura-sura ras perentah Tuhan man bangsa Israel. Ibas penghujung pelayanenna selaku nabi, iperentahken Tuhan ia guna njumpai Elisa, anak Sarfat, anak kuta Abil Mehola, guna nggantikenca selaku nabi i Israel. Elisa paksa si e sangana nenggala i jumana (ay. 19). Icabinken Elia jubahna (jubah nabi) man Elisa: enda nuduhken sada pendilo sekaligus pengendesen tugas man Elisa guna ngikutken Elia.
Ay. 20: minter itadingken Elisa lembuna, kiam ia ngayaki Elia. Reaksi si spontan ibas Elisa ngaloi pendilo Tuhan arah nabi Elia, ncidahken keriahen ukurna ngalokenca. Sada ngenca pemindonna man Elia ope denga ikutkenna Elia, eme pamit man orang tuana.
Pendilo Dibata man Elisa arah teks ogenta enda mereken piga-piga point perenungen man banta, eme:
- Ise pe banci ipilih Dibata jadi suruh-suruhenNa, kai pe latar belakang kegeluhen ras pendahinna. Elisa sekalak perjuma labo kalangan bangsawan ntahpe kaum intelektual tapi tutus atena ibas ndahiken dahinna. Ketutusen ate dingen mejingkat eme si iutamaken Dibata ibas ndilo kita jadi suruh-suruhenNa. Selebihna Tuhan mperlengkapisa.
- Sikap Elisa si spontan ngaloi pendilo Tuhan arah nabi Elia, enda pe jadi teladan si luar biasa. Pang dingen sitik pe la ia ragu muat keputusen penting ibas geluhna guna jadi suruh-suruhen Tuhan. Ngaloi pendilo Tuhan jadi sada keriahen man Elisa, emaka semangat dingen kiam ia ngayaki Elia. Labo ia perlu waktu ndekah guna ertimbang untung rugina, minter itadingkenna lembuna ras kesibuken dahinna, lebih asang si e ikorbankenna lembuna, igelehna dingen itanggerkenna guna ipan kerina kalak si nenggala ras ia ndube (ay.21). Enda ncidahken keriahen ukurna ngaloken pendilo Tuhan sekaligus ketetapen ukurna nadingken pendahinna selaku perjuma. Melala kita kalak si tek justru erkiteken kesibukenta maka erpenulak ras la kita siap ngaloken pendilo Tuhan, subuk jadi pengurus Moria, PJJ ntah jadi serayan, erkiteken kesibukenta maka la kita sempat muat bagin ibas dahin-dahin gereja (mis: PA, PJJ, erdiakonia, rsd) sementara dahin ras kesibukenta e pe sadar nge kita pemere Dibata.
- Melala hal si arus itadingken Elisa ibas ngaloi pendilo Tuhan, nadingken orang tuana, pendahinna, jumana ras ngkorbanken lembuna jadi tanda keriahen ukurna. La ia sangsi dingen mbiar kerna uga kegeluhenna selanjutna pagi adi itadingkenna kerina si lit ibas ia. Nggo nge bagi respon Elisa si secara spontan, semangat, dem alu sukacita, rela berkorban ras dem alu pengataken bujur, responta ibas ngaloi pendilo Tuhan? Ntah sebalikna, dekahen responta njadiken pendilo Tuhan e jadi sada beban, emaka si pekulah-kulah la sibegi, erpenulak dingen lit ka jungut-jungut ibas ngaloken pendilo Tuhan e?
- Elia mereken kesempaten man Elisa guna nehken kehamaten ras “pamit” man orang tuana ope denga ngikutken Elia. Kalimat “To mulihken! Ku ambati kin kam?”, ncidahken kebebasen siibereken Elia man Elisa guna muat keputusen penting ibas geluhna.
- Lit proses regenerasi ras kaderisasi ibas kerina tingkaten pelayanen. Ope denga Elia ndungi pendahina, itugasken Tuhan ia guna ndarami “kader” ras ngajari Elisa selaku suruh-suruhenna, si ibas waktuna pagi nggantiken posisi ras tugasna selaku nabi i Israel, bagepe Elisa nggit ngikutken Elia dingen bersedia jadi “pelayanna/ suruh-suruhenna” guna erlajar ibas Elia nari selaku guruna ope ia jadi gancihna.
Aplikasi :
- Pendilo Tuhan man banta eme sada anugerah labo beban, janah situhuna kerina kita idilo guna jadi alat Tuhan guna naksiken Ia man jelma si nterem arah kerina dampar geluhta bagepe arah kerina pendahin ras profesinta. Jadi suruh-suruhen Tuhan ibas konteksta genduari labo berarti harus jadi Pendeta, Guru Agama ntah pe Misionaris, tapi kerina kita banci jadi suruh-suruhenNa ras ngaloi pendilo Tuhan alu ngelai Tuhan rikutken talenta, potensi ras profesinta masing-masing. Emaka bagi Elisa si megah ras meriah ukurna ngaloi pendilo Tuhan dingen ndahikenca, enda pe jadi motivasi man banta gelah ermeriah ukur katawari pe ngaloken pendilo Tuhan ras ngelai Tuhan.
- Bagi Elia isuruh Tuhan ndilo ras mpersiapken Elisa guna nerusken dahin pelayanenna, bage ka pe kita selaku Moria iajuk guna ndilo dingen mpersiapken anak-anakta gelah ersuruh ukurna pe muat bagin ngelai ras naksiken Tuhan ibas kerina dampar geluhna. Ula justru kita si “ngambati” anak-anakta adi meriah akapna dingen sibuk ia ibas pelayanenna i gereja.
- Kerina kita ertanggung jawab guna ngelakoken proses kaderisasi ras regenerasi. Selaku Moria pe kita perlu ngusih Elisa si nggit “mpeteruk ukurna”, jadi suruh-suruhen Elia, njadiken Elia jadi penggurun. Aminna gia kita Moria nggo erpengalamen jadi pernanden, tapi tetap denga nge perlu erlajar ibas kalak si lebih metua (Saitun). Orang tuanta Saitun tetap si jadiken penggurunta sebab melala pelajaren si banci sidat kita arah buena pengalamenna. Bagepe tugasta meng-kader anak-anakta, ngajari dingen mengarahkenca guna banci reh ulina kegeluhenna.
Pdt Jenny Eva Karosekali STh., M.Min
GBKP Rg. Harapan Indah
