SUPLEMEN PA MORIA 03-09 APRIL 2022, KUAN-KUANEN 23:1-3;LUKAS 15:13

Tema :

ANGKAR

Nats :

KUAN2 23:1-3; LUKAS 15:13

Tujuan  :

- Meteh maka nia-niaken erta maba kesusahen

 - Ngasup ngkuasai diri ibas erbage-bage kerincuhen.

 

Kata pendahuluan

Kerina manusia adi nggeluh denga tentu melala sura-surana, janah adi lenga tersehi kerina sura-sura maka melala kalak latih iakapna nggeluh ras lalap lenga ia ndatken kepuasen nggeluh. Sekalak filsuf ngataken: “kiniseran manusia si mberatna eme nehi sura-sura (kerincuhenna) ras ndatken kepuasen nggeluh, sebab sura-sura manusia la terbatas sementara gegeh guna ngusahaken ras ndatken sura-sura ras kepuasen nggeluh e terbatas kal”.

Bahan PA Morianta Minggu enda mpersingeti kita gelah kita bijak ndalani kegeluhen dingen ngasup ngkuasai dirinta (ngangkar bana) ibas erbage-bage sura-sura (kerincuhen) gelah la sijerumusken banta kubas kesusahen geluh enda.

Pembahasan teks

Kitab Kuan-kuanen ntah pe Kitab Amsal (Masyal) : eme Kitab si memuat kumpulan hikmat (kepentaren) ras pengajaren simabai gelah singogesa ndatken pemahamen geluh si payo dingen ngasup ndalani kegeluhen alu pentar (bijak). Inti ibas keseluruhan Kitab Kuan-kuanen eme : “Erkemalangen man Tuhan” jadi ulu kerina kepentaren ras pemeteh. Adi erkemalangen kita man Tuhan, mahan bana reh pentarna ras reh payona kita ndalani kegeluhen ibas kerina dampar, seh maka meriah siakap nggeluh ras bijak ngalaken erbage situasi kegeluhen.

Kuan-kuanen 23: 1-3 bagepe Lukas 15:13 si jadi ogen PA-nta enda mpersingeti kita kerna piga-piga hal:

1. 1 : Megermet ras Ula lupa diri (sadar diri/tahu diri)

Biasana adi kita iundang ras kundul man ras sekalak raja, e jadi kemegahen kal siakap, piah peturah kesombongen man dirinta sebab ndatken “keistimewaan” siakap banta. Bagin enda mabai kita gelah tetap “megermet” sebab isingetken ijenda; “perhatikanlah baik-baik apa yang di hadapanmu” adi bas Bahasa Karo: “ingetlah ise ia”. Ertina iajari ras ipersingeti kita gelah tetap megermet nandangi kai pe, bagepe sitandai banta ras ula kita lupa diri aminna gia sialoken kemewahan ras kenikmatan si itawarken sekalak biak raja. Sebab, kalak bijak harus menjaga integritas ras nilai-nilai si ianutna lebihen asangken kehamaten ras kemewahan siibereken man bana.

2. 2-3: Ola sangkar ras Tetaplah Metenget.

La terpungkiri maka kodrat alamiah manusia pasti merincuh kita adi isajiken man banta pangan si ntabeh, Emaka bagin ayat enda mpersingeti kita gelah meteh angkar, dingen ola sangkar sebab adi la si angkar ras sikendaliken kerincuhenta subuk nandangi pangan ras nandangi kai pe banci mahan bana maba kecedan man dirinta jine. Penulis Kitab Kuan-kuanen mpersingeti kita pe gelah tetap metenget ras hati-hati gelah ola tertipu alu pangan si ntabeh dingen jamuan kemewahen siibereken kalak man banta (ayat 3). Pesan pentingna: Kalak si pentar (bijak) ras malang man Tuhan, la ndigan pe nggit ndayaken status ras harga dirina demi pangan ntabeh ntah fasilitas ras kemewahen siitawarken man bana bagi Esau si ndayaken hak kesulungen, status ras erga dirina hanya erkiteken pangan (Kej. 25: 29-34). Tapi, kalak si pentar (bijak), alu kepentaren si rehna bas Tuhan nari pasti ngasup ngkuasai dirina, ngangkar bana dingen la tergoda nandangi kai pe siitawarken man bana, bagi Yesus si menang ibas Ia icubai iblis (Mat 4:3-4).

3. Lukas 15:13 : La bijak ibas mengelola Erta

Lukas 15:13 : juga mpersingeti dingen ngajarken kita kerna kegeluhen anak si nguda siikuasai sura-sura dagingna seh maka la bijak ndalani kegeluhen: nggeluh foya-foya, ndarami kesenangan nggeluh alu nia-niaken erta si jadi bagin hakna, siiberen Bapana. Kerincuhen daging anak si nguda e justru maba kehancuran ras erbahanca mesui atena.

 Aplikasi : 

1. Lit kuan-kuan kalak Karo ngataken : “adi ban buahna maka mesepak batangna, mesepaklah”, bagepe lit istilah ibas Bahasa Indonesia, nina: “menggali kuburan dengan sendok dan garpu” enda kerina merupakan ungkapan si ncidahken uga mekatep kita la ngasup “ngkuasai dirinta” ntah pe “nahan selera” ras kerincuhennta nandangi pangan. Tapi sendah ipersingeti kita alu tema “ANGKAR” gelah ula kita ikuasai sura-sura ras kerincuhen daginta, dingen la njadiken mata, babah, beltek, seleranta, jadi penggurunta, sebab banci mpeturah erbage-bage kiniseran man banta seh maka mesui ateta. Pola perpan ras caranta ngkuasai diri ras kerincuhenta menjadi salah sada hal si penting ka guna menentuken kesehaten daging kulanta.

2. La terjeng nandangi pangan ngenca perlu kita njagai kerincuhenta, tapi ngkuasai diri ras sura-sura ibas kerina hal, gelah ula latih siakap nggeluh, sebab adi erpalasken kerincuhen ras sura-suranta kita nggeluh labo lalap bias ras cukup sebab sura-sura ras kerincuhen manusia la terbatas sementara gegehta ras kengasupenta guna nehi sura-sura e sangat terbatas. Terlebih ibas kemajun jaman ras perkembangen tekhnologi enda, khususna ibas marakna belanja secara online jaman gundari enda. Bijak ndalani kegeluhen: ula “nafsu besar tenaga kurang”, mbuesa sura-sura dingen la menyesuaikan diri ras gegeh, ula lebih besar pasak dari pada tiang, ndabuh kubas gaya geluh konsumerisme, jadi “shopperholic” (gila shopping) sebab arah rumah nari saja pe banci kita belanja ras nukuri kai pe secara online sementara situasi geluh paksa enda sulit erkiteken dampak pandemi, tapi faktana justru belanja daring (online) justru terus mengalami peningkatan. Erlajar arah kegeluhen anak si nguda ibas Lukas 15 ndai, mari kita Moria jadi nande si bijak ras pentar ngaturken perduiten, ula nia-niaken kai si paksa enda lit ibas kita alu foya-foya, tapi ngasup kita ncukupken kai si lit ibas kita e ras makekenca ras mbelanjakenca erpalasken “kebutuhanta” labo “kerincuhennta” (shopperholic), ngasup “tahan selera”, ras ula sempat ndayaken harga diri, terlebih ndayaken kiniteken ras menhalakan segala cara hanya guna ndatken sura-sura ras kerincuhenta. Alu erkemalangen man Tuhan kita banci jadi Moria si pentar dingen ngasup ngkuasai diri ras sura-nta. Jadilah moria si pentar, meteh angkar, si la ngenca ngukuri dirina ras nehi sura-surana tapi ngasup ngukuri masa depan kerina isi jabu .

Pdt Jenny Eva Karosekali STh., M.Min

GBKP Rg. Harapan Indah