SUPLEMEN PA MORIA 27 MARET-02 APRIL 2022, JEREMIA 16:1-9

Tema : DENGKEHKEN KATA TUHAN

Nats  : JEREMIA 16:1-9

Tujuan  :

- Meteh kejadin si jadi adi bangsa Israel la ndengkehken Kata Tuhan

                        - Ngasup ngalaken pandemi alu patuh ndalanken Kata Tuhan ras aturen prokes guna keselamatenna.

 

Kata pendahuluan

Lit pemahamen ibas nterem kalak, maka kiniseran si reh kubas kegeluhen, mekatep kal ihubungken kubas dosa ras ukumen. Adi ibas teks PA Morianta sendah, memang jelas icidahken, maka kiniseran si mberat si seh man bangsa Juda, eme ukumen Tuhan erkiteken kelapatuhen bangsaNa. Tapi uga pengidah ras pemahamenta kerna pandemi Covid-19 si mpeturah kiniseran ras mengancam kegeluhen manusia ibas kerina ingan i belang-belang doni enda?

Tentu labo kerina bentuk kiniseran si reh kubas kegeluhen manusia banci sisimpulken sebage ukumen, sebab kiniseran pe banci ipake Dibata jadi alatNa guna ncidahken kuasa-Na man banta (bdk. Yoh. 9:1-3). Pandemi COVID-19 enda pe mari siidah sebage fenomena alam ras perkembangen virus penakit si terjadi secara alamiah, labo ukumen Tuhan, si penting uga carana kita ngasup ngalakenca.

Pembahasan teks

Nabi Jeremia tergolong kubas sekalak nabi si mbelin, si erdahin i tengah bangsa Juda, guna mpersingeti bangsa enda kerna ukumen si engkenai bangsana erkiteken la ndengkehken Kata Tuhan dingen nembah man berhala. Ukumen e jadi ibas paksa Jeremia nggeluh denga, bangsa Juda itaban ku Babel, janah Jerusalem iruntuhken. Ibas pasal 16 enda isehken Dibata man Jeremia kai si arus ilakoken Jeremia si jadi gambaren nandangi ngerina ukumen siisehken Dibata man bangsana.

Ay. 1-4: Jeremia iperintahkan Dibata la erjabu dingen la mupus, nggeluh la ersima-sima ibas negeri tabanen, bagepe arus mbatasi kegeluhen sosialna alu la banci ndahi kalak si erceda ate, ngandungi ras ngapuli bangsana. Kegeluhen Jeremia jadi alat peraga si nuduhken uga dahsyatna ukumen si inanami bangsa Juda.

Ay.5-9 Keleng ras perkuah ate Dibata ibuatNa ibas bangsa e nari, seh maka mesui nari ate bangsa enda, mate pe lalit si ngkuburkenca, ras si ngapulisa, mate ia erkiteken perang, kelihen, ras maitna ipangani perik-perik ras rubia-rubia, ipengadi Tuhan me keriahen, kesenangen ras kemalemen ate ibas bangsaNa sebab la idengkehkenNa Kata Tuhan ras itundalkenna Dibata.

Tapi dibalik ukumen siisehken Dibata, tetap teridah keleng ateNa, ibas paksana ibabaNa ka mulih bangsaNa si nggo ikerapkenNa, mulih ku negeri si nggo ibereken Dibata man bangsaNa ras nini-niniNa (ay. 14, 15). Teologi siisehken Yeremia ijenda nggambarken Dibata si perkeleng dingen dem perkuah ate, tapi sekaligus ka Dibata si ernembeh ate nandangi dosa alu mereken ukumen adi la ndengkehken KataNa dingen nundalken IA. Ukumen ras kiniseran ibas tabanen siibereken Dibata man bangsaNa ijenda, ipakeNa justru jadi awal si mbaru guna menghasilkan generasi si mbaru ibas bangsaNa, janah enda pe ilakokenNa ibas rangka ncidahken keleng ate nandangi umat siipilihNa secara khusus.

 Aplikasi

1. Kiniseran si jadi man bangsa Juda eme erkiteken la ndengkehken Kata Tuhan bagepe nundalken Dibata, enda mpersingeti kita gelah tetap setia man Tuhan ibas kerina kecibal geluhta sebab ketidaktaatan mpeturah rawa Dibata, tapi rawa Dibata man banta justru ibas rangka keleng ateNa ras guna nelamatken kita. Ibas kerina dampar kegeluhenta si tep-tep wari pe adi la kita patuh ras la nggit “megiken kata” pasti maba resiko /kiniseran, cth : Lit sakit asam lambungta janah nina dokter la banci kita terlambat man dingen lit pangan si arus si pantangken, adi la kita patuh dingen la sidengkehken nasehat dokter e, pasti dekahen kumat penakitta ras maba kiniseran man banta. Bagepe ibas pandemi Covid -19 enda, adi la kita patuh nandangi aturen ras ndalanken prokes pasti mpeturah kiniseran man banta. Emaka harus kita patuh nandangi aturen ras kai sikataken Pemerintah: wajib menerapkan ras mematuhi protokol kesehatan 6M: Memakai masker, Mencuci tangan dengan sabun di air mengalir, Menjaga jarak, Menjauhi kerumunan, Mengurangi mobilitas, Menghindari makan Bersama. Patuh nandangi kai si iaturken Pemerintahta, la terjeng guna njaga keselamatenta tapi pe njaga keselamatan kalak si deban, enda pe ncidahken kepatuhen man Tuhan. Selaku Moria kita pe idilo sendah arah bahan PA-nta enda jadi alat Tuhan guna mpersingeti keluarga, perpulungen ras kerina kalak si lit isekelewetta, bagi Jeremia si ipake Tuhan guna mpersingeti bangsana.

2. Kiniseran pe banci ipake Tuhan jadi alatNa guna maba perubahan geluh ras pertobatan man bangsaNa. Pandemi Covid-19 enda memang jadi kiniseran man banta, tapi banci jadi “blessing in disguise” (berkat si terselubung) sebab berdampak maba perubahan positif kubas cara geluhta. Melala perubahan si positif si terjadi pasca pandemic covid-19 enda si terjadi, mulai ibas cara geluh adaptasi baru siiterapken kita, lebih ketat njaga kebersihen, reh buena waktunta mbangun “quality time” ras keluarga sebab selama lebih kurang 2 tahun enda mbue kegiatenta silakoken i rumah nari, erdahin, sekolah, beribadah, secara online i rumah nari.
3. Kiniseran siinanami bangsa Juda seh kal ngerina, bagi situriken ibas teks-ta enda ndai: kalak bayak ras musil mate, lalit si ngandungisa, lalit si ngkuburkenca, bagepe lalit kalak man ras minem, lako ngapulisa (baca: ay.6-7). Bage ka me piga-piga waktu si lepas, situasi siialaken kita ibas awal-awal pandemi Covid-19, lit piga-piga perpulungen, keluarga, kade-kade-nta si mate nadingken kita la banci itaruhken keluarga, bagepe lalit kade-kade si reh ngapuli erkiteken keluarga siitadingken pe harus isolasi. Tapi Pandemi covid-19 enda labo sipahami sebage ukumen Tuhan, sebalikna justru ibas masa pandemi enda tole siidah keleng ate Tuhan si mabai kita semakin menyadari kelaberdayaanta seh maka reh mbagesna pengendesenta man Tuhan. Emaka gelah megegeh kita ngalaken pandemi enda, tingkatkan iman alu ernalem kempak Tuhan, tingkatken imunitas alu konsumsi makanan sehat, vitamin ras olah raga, bagepe tingkatkan disiplin alu patuh protokol kesehatan.

 

Pdt Jenny Eva Karosekali STh., M.Min

GBKP Rg. Harapan Indah