Suplemen PA Moria Tanggal 14-20 Juli 2019, Ogen Jesaya 28:23-29

OGEN :

Jesaya 28:23-29

TEMA :

KEPENTAREN DIBATA MABA KINIULIN

TUJUN : Gelah Moria :
 Ngangkai kepentaren Dibata i bas ngerancang kiniulin man manusia (rencana ngelola usaha/pendahin)
 Pang rusaha i teruh pasu pasu Dibata

METODE PA : Sharing

 

Kata Penaruh
Gelar Kitab Jesaya enda ibahan rikutken gelar sekalak nabi si mbelin, si ringan I Jerusalem ibas abad pewaluhken ope Kristus. Kitab enda ibagi ibas telu bagin emekap proto Jesaya (bindu 1-39), deutro Jesaya (bindu 40-55), trito Jesaya (bindu 56-66).

Bagin PA Morianta ibas minggu enda emekap Jesaya 28:23-29 si jadi bagin ibas proto Jesaya. Tupung paksa si e kerajaanJuda sangana iancam kerajaan Assur si megegeh. Ieteh Jesaya maka ancamen si tuhu-tuhu nandangi kegeluhen Juda labo gegeh kerajaan Assur saja, tapi dosa bangsa e jine sabab la ia erkemalangen man Dibata janah kurang kinitekenna man Dibata. Arah kata ras perbahanenna, Nabi Jesaya ngajuk bangsa e ras pemimpin-pemimpinna gelah nggeluh bagi si ngena ate Dibata janah ndalanken kebujuren. Ipersingetina bangsa e maka adi la ia nggit megiken kata Dibata ugapa pe bangsa e dat cilaka janah kernep. Tole inubuatken Jesaya maka lit me pagi paksana doni enda jadi dame, tupung kerehen sekalak kesusuren Daud si jadi ra ja si lanai kal lang-lang ulina.

Pembahasen Teks
Ibas bahan PA Morianta enda, Jesaya 28:23-29, isehken man banta kerina kerna “kepentaren Dibata”, si isehken ibas bentuk perumpamaan ibas bidang pertanian. Perumpamaan enda nehken kerna analogi (persamaan) si menggambarken kerna perbahanen Dibata man kerina bangsaNa.

Ayat 23 Begikenlah, Perdiatekenlah
Ijenda, Jesaya nehken “begikenlah katangku”, kata enda bali ertina ras “perdiatekenlah kai si kuturiken man bandu”. Teridah kel ijenda maka kai si ipeseh Jesaya man bangsa Israel she kel pentingna. Emaka itekenkenna kel segelahna bangsa arus min megiken dingen mperdiateken kai si ate Jesaya isehkenna man bangsa e.

Ayat 24-28 Gambaren Kerna Sekalak Perjuma
Ibenaken Jesaya me ijenda mpeseh katana man bangsa Israel. Isehkenna kerna sada gambaren kerna sekalak perjuma.Nina Jesaya: Labo lit perjuma si lalap nenggala ras ngeroka jumana.Enda encidahken maka sekalak perjuma, enggo ngangkai kerna kai si arus ilakokennasegelahna banci jumana e banci isuani.Lit masana ia nenggala, lit masana ngeroka jumana. Engkai maka perlu nenggala ras ngeroka? Segelah taneh i juma e banci isuani benih alu mehuli. Adi enggo mesai juma e, tentulah isuanken benih sinuan-sinuan, umpamana jera ras lenga. Ierdangkenna gandum ras dawa erteran-teran janah arah duru isuanna jaung.
Kerna perjuma si isehken Jesaya ijenda teridah maka pentar kel ia makeken waktu guna mpesikap jumana segelahna banci isuanken. Selain si e,guna ngaturken kai saja kin pe isuanken, enggo iangkaina. Ibasbagin enda isehken maka kepentaren perjuma e rehna ibas Dibata nari. Kepentarenna e labo terjeng ibas ia mpesikap juma guna isuan bagepe ibas nuankenca rikut pe ibas mpesaisa, tapi ibas mperanisa pe ibereken Tuhan nge kepentaren e.
Labo pernah ipakena palu-palu si mberat lako muat jera ntahpe buah lenga si nggo iperani; tapi ipakena ciken si menahang bagi payona. Sabab adi ipake palu-palu si mberat maka erbahanca jera ntah pe buah lenga e ceda, getem. Emaka ipakena me ciken si menahang bagi payona, segelahna ula sempat ceda. Bagepe sanga ngerik gandum pe labo lalap igegehina ngeriksa seh getem buahna. ietehna uga cara pedalan gereta arah babo gandum e gelah ula sempat ceda buahna.
Ijenda teridah maka kerina proses ibas mpesikap taneh juma, nuanken benih bagepe mperani juma idalanken alu mehuli, teratur bagepe sue ras seharusna ilakoken. Perjuma e ngelakoken dahinna guna mpesai jumana alu : nenggala, ngeroka, ngamburken benih, merdang bagepe rani tepat ibas waktuna. Bagepe ibas makeken peralaten guna rani, ipakekenna kerina sue ras si seharusna.Alu bage, teridah makaibas ia erdahin alu tutus ngusahai jumana e, mereken hasil si mehuli.

Ayat 29. Kepentaren Ibas Dibata Nari
Ibas bagin terakhir enda isehken maka Kerina kepentaren enda reh i bas Tuhan si Mada Kuasa nari. Kerina rencana Dibata dem alu kepentaren, emaka tetap nge seh rencanaNa e. Ijenda teridah kel maka ate Jesaya nehken man bangsana maka Tuhan si Mada Kuasa me si mereken man bangsa e kepentaren ibas nehken pendahinna selaku sekalak perjuma. Selaku perjuma si mehuli, enggo idahikenna dahinna alu tutus. Alu bage, bangsa e tetap banci encukupi keperlun kegeluhenna tep-tep wari.

Pengkenaina
Kepentaren Dibata Maba Kiniulin, enda me si jadi tema bahan PA Morianta ibas minggu enda. Banci si gejapken ibas kegeluhenta si tep-tep wari maka mbelin tuhu penampat Tuhan ibas encukupi keperlun kegeluhennta si tep-tep ari. Terlebi arah usaha entahpe pendahin si ilakoken tep-tep wari, tek kita maka erkiteken Tuhan si Mada Kuasa me maka tetap banci sidalanken pendahinta bagepe usahanta alu mehuli guna encukupi keperlun si tep-tep wari. Jabunta pe ndatken keselamaten secara perekonomian.

Ibas masa genduari enda, sue ras kemajun jaman, maka kebutuhen guna encukupi keperlun nggeluh pe terus meningkat. Subuk guna encukupi biaya man, minem, paken, persekolahen anak, ndahi kerja-kerja, ngikuti dahin-dahin gereja, arisan, wisata/liburan, perawatan kecantikan, ngelitken kendaraan pribadi, rsd. Alu bage, tentu saja arus iupayaken segelahna banci tercukupi biaya guna kebutuhen nggeluh, enda jadi sada hal si penting. Kuga carana ? Tep-tep kita, banci jadi kita selaku Moria, nande i tengah jabu, berusaha mengelola keuangen jabunta alu mehuli, sesuairas kebutuhen kegeluhen jabunta. Selain si e, lit ka nge kita Moria siikut serta menopang ekonomi jabunta alu erdahin entah pe erbinaga, rsd. Ijenda iarapken kerna keaktifenta ibas meningkatken ekonomi keluarganta. Masa genduari enda, melala tuhuusaha si banci ilakoken kita. usaha siilakoken kita pe arus terus berinovasi segelahnareh majuna dingen meningkat. Adi erbinaga kin kita, genduari masana maka erbinaga pe lanai terjeng ibas sada ingan usaha (toko,kede,warung) tapi segelah promosi barangta pe lebih itandai kalak banci arah media sosial silakoken baik fb, twiter, online shop, rsd. Harus ka pe siperdiateken kemasenna si menarik, sebab kemasen si menarik pe sangat menarik peminat barang si idayaken kita. Ibas usaha makanan. Misalna erbinaga makanan guna menambah perekonomian jabunta, apakah kue, kerpuk, peyek, cimpa, jaung labar, cimpa tuang, salad buah, rsd.Banci ka pe ibas erbinaga kosmetik, uis, peralatan masak dan peralatan rumah tangga lainna, tiket pesawat, rsd. Benakenlah ibas erusaha. Ibas usaha siilakoken kita enda, tek kita maka kepentaren ibereken Dibata man banta segelah banci kita ngaturkenca alu mehuli. Aminna gia enterem nge kalak erbinaga, tapi rejeki ibereken Dibata nge tetap man kalak si nggit erdahin ras erusaha alu erbintuas ibas penampat Tuhan. Pakeken rejeki alu mehuli erguna man banta bagepe kalak si deban, dingen ngataken bujur man Dibata. Alu bage, ekonomi keluarganta pe reh majuna, bagepe terpuji gelar Tuhan.

Pdt. Crismori Veronika Br Ginting Manik
GBKP Sitelusada