SUPLEMEN PA MORIA TANGGAL 17-23 MARET 2019, OGEN I SAMUEL 16:1-7
OGEN :
1 Samuel 16:1-7
TEMA :
MPERSUKUTI DIBATA IBAS MILIH SERAYAN
TUJUN :
Gelah Moria :
- Meteh Samuel tetap ersukuten man Dibata ibas milih serayanNa
- Milih serayan erpalasken sura – sura Dibata
- Meteh maka dahin milih serayan Tuhan eme persuruhen Dibata.
KATA PENARUH
Sue ras pengelayasi (bimbingen) kerna pemilihen Pertua ras Diaken periode 2019-2024 salah sadana eme doa syafaat, segelah sura – sura Dibatalah si idat guna milih serayanNa. Sebab pertimbangen Tuhan la bali ras pertimbangen manusia. Emaka labo sada dahin sigampang guna nehken pertimbangen Tuhan untuk milih serayanNA. Perpulungen ipake Tuhan guna nehken sura – suraNa milih serayanNa, alu bage pemilihen Pertua Diaken enda, labo dahin siilakoken alu mekarus, sebab lit pertanggung-jawabenta man Dibata. Labo banci ilakoken alu cara – cara silamehuli, arih – arih guna milih sesekalak ras arih – arih guna la milih sesekalak, apaika guna maksaken diri segelah ipilih ras la ipilih. Siperlu silakoken kita eme ertoto man Dibata ras ngidah kesetiaan siman pilihen e rikutken persyaraten erpalaskan Kata Dibata. Sebab e krina ipertanggung jawabken man Dibata bagepe kinggitenta nikapken dirinta guna ipake ngelai dahin Tuhan.
MPEBAGESI PENGANGKAN KERNA OGEN
Samuel sebagai hakim i Israel,janah ia kang sinangkuhken Saul jadi raja sipemena i Israel. Bena – benana Saul kalak simehuli ras meteruk ukur (1 Sam. 9:21). Tapi kepeken Saul kedungenna jadi raja si la matuhi perentah Tuhan, seh maka ia itulak Dibata jadi raja nandangi bangsa Israel. Hal enda kepe erbanca ceda ate Samuel (ay. 1), emaka isuruh Dibata Samuel muat minak saitun jenari lawes ku Betlehem ndahi Isai, guna milih ras nangkuhken anak Isai guna jadi raja. Tentu saja Samuel mbiar guna ndahiken dahin e, sebab adi iteh Saul kerna rencana e banci jadi iolang – olangina ras ibunuhna (Ay.2). Tapi Dibata cukup cara guna nehken sura – suraNa, Samuel ngelakoken sue ras perentah Dibata lawes ku Betlehem sierbanca pemimpin – pemimpin kuta nggirgir ngalo – ngalo Samuel (Ay. 3-4). Iakapna Samuel nehken ukumen man kalak Betlehem perban kerehen Samuel si rempet ras harus erdalan ndauh ku Betlehem. Kepe Samuel maba dame ras erbahan lakon persembahen alu ngajuk kerina siikut ibas lakon e guna mbersihken diri bagepe Isai ras anakna (Ay. 5). Sanga bengket ia kerina, idah Samuel Eliab sicukup merupa, erwibawa ras gedang. Bas ukur Samuel enda me si ipilih Tuhan (Ay. 6). Tapi Tuhan ningetken man Samuel, gelah ula ngenen rupa ras gedangna. Perukuren Samuel lenga sendalanen ras peraten Dibata, terlebih siman pilihen e guna jadi sekalak raja bangsa Israel. Isai sen diri pe la memperhitungken Daud anakna, sebagai sekalak raja. Sebab pertimbangen Tuhan la bali ras pertimbangen manusia. Adi manusia ngidah tampilen luarna tapi Dibata ipernehenNa terus kubas pusuh manusia, Tuhan nulak hal – hal lahiriah. Uga maka Tuhan ngenehen kubas pusuh ? sebab, Pertama, pusuh eme inti ras totalitas nggeluh. Kedua, pusuh ngerana kerna ketulusen. Samuel ngikutken kai sikataken Tuhan (Ay. 7). Tuhan milih Daud ras isuruhNA Samuel nangkuhken Daud jadi raja bangsa Israel (Ay. 12) alu minak saitun jenari ia ikuasai Kesah Tuhan (Ay.13).
PENGKENAINA
Erpalasken Tata Gereja GBKP 2015-2025, Tata Laksana Bab XX, Pasal 91 ras 95 kerna Syarat – syarat jadi calon Pertua ras Diaken GBKP bagepe Kata Dibata si tersurat 1 Tim. 3:1-13 menjadi pertimbangen man banta ibas milih serayan Tuhan.
a. Lit panggilen guna melayani
b. Banci jadi usihen ibas kiniteken ras moralitasna kegeluhen tep – tep wari bagepe lit kengasupen guna memimpin ras ngelai perpulungen. Aktif ibas kegiaten Gereja.
c. Lagu langkah ras cara nggeluh anggota jabuna la jadi batu antuken.
d. Saber, terkuasaisa dirina janah ratur kegeluhenna. Lemah lembut, ngena atena kedamen, tutus, bujur, terteki, mehuli lagu langkahna, pertemue, la perampang, pemabuk, merangap, mata duiten, janah nggit ersada arih, nggit makeken waktuna guna Gereja.
Ibas milih serayan Tuhan tentu pertimbangen enda kerina jadi palasna. Labo memang lit si sempurna, tapi mendekati ibas pertimbangen enda menjadi acuanta guna milih Pertua Diaken untuk nehken sura – sura Tuhan. Segelah siipilih kita labo erpalasken pengenen mata secara lahiriah. Bagepe ibas milih serayan Tuhan ola sibahan menjadi ingan coba – coba, entah mawen kari ia robah lagu langkahna ras reh tutusna ia ku Gereja, emaka e jadi pertimbangen ibas kita milihsa. Tetap kita erpalasken sura – sura Tuhan ibas kita milih serayan Tuhan, alu bage ola erngadi – ngadi sibaba bas pertoton segelah sura – sura Tuhan banci tersehken.
Pdt. Nur Elly br Tarigan-Rg. Karawang
