SUPLEMEN PA MORIA TANGGAL 03-09 MARET 2019, I SAMUEL 25:1b-3a; 14-22
OGEN :
1 Samuel 25 : 1b – 3a; 14 – 22
TEMA : PENTAR ENCIBALKEN DIRI
TUJUN : Gelah Moria :
- Ngidah kepentaren Abigail ibas situasi si man alanken
- Ngusih kepentaren Abigail : megermet, metenget ras mediate.
KATA PENARUH
Erbage bage tantangan sireh nderpa kegeluhenta, maun ngasup kita ngalakensa maun menam la ngasup kita ngalakensa. Perbeben pe nderpa kubas erbage bage dampar kegeluhenta alu pegancih gancih ras tumpang tindih. Emaka guna menghadapi tantangen, perlu kita pentar ngalakenca, sebab adi la kita pentar, tantangen sihadapi kita e banci erbanca kita bene. Kepentaren banci nelamatken kita arah mara nari ras njagai dirinta gelah kita ula papak bagepe mabai perukurenta, perbahanenta ras pengerananta reh ulina.
MPEBAGESI PENGANGKAN KERNA OGEN
Ayat 1b-3a, Ibas daerah taneh mesawang Paran, tading ije Nabal (ertina “kalak motu”) ibas terpuk Kaleb nari. Ia kalak bayak tuhu – tuhu, biri birina lit 3000, kambingna lit 1000. Ndeharana Abigail (ertina “Bapaku erbahansa ia ermeriah ukur) mejile janah cerdik, tapi Nabal kalak mediker, macik lagu langkahna. Paksa sie, Daud seh kudaerah e, mungkin perban Samuel enggo mate, maka Saul lebih bebas akapna guna terus ngayaki Daud seh maka keadaan Daud lebih berbahaya, emaka miser ia terdauhen. Keadaan Daud sebagai kalak simehuli labo lebih reh ulina tapi lebih memburuk. Sebab ibas padang inganna miser ras 600 prajuritna si setia tentu ia perlu man ras minem. Sementara daerah e padang si liar denga. Ingan ermakan asuh - asuhen Nabal. Daud ras prajuritna usur jumpa ras permakan – permakan nguda denga eme sierdahin Nabal. Situhuna gampang saja akap prajurit – prajurit guna muat biri – biri ras kambing Nabal, tapi sie la ilakokenna malah ikut ia njaga asuh – asuhen Nabal bagi tembok sipaguh, perban mbue binatang – binatang buas ras ndeher ku sarang pinangko (ayat 9-10).
Ibas paksa Nabal erbahan pesta pengataken bujur ras pengguntingen mbulu biri – biri bagi semalna nandangi siermakan ras kalak sideban, dikune lit kalak pertandang ku daerah e, emaka ialo – alo tuan rumah desken temue. Tapi Nabal, kasar perbahanenna nandangi 10 kalak anak perana si isuruh Daud guna nehken tenah kata mejuah – juah man Nabal. Ipelawesna suruh – suruhen Daud, nina Nabal “La aku nggit muat roti ras laungku ras asuh – asuhen si enggo kugeleh man singgunting biri – biriku, jenari merekenca man kalak si la kueteh ija nari rehna “ (ayat 11). Kenca ibegi Daud kata Nabal, Daud merawa janah iperangna atena alu mbentingken pedangna ras 400 kalak temanna. Abigail megi persoalen e arah suruh – suruhen Nabal. Sebab iteh suruh – suruhen Nabal bahwa Abigail lebih nggit megiken persoalen sinipesehna asangken Nabal. Abigail ngidah maka persoalen enda banci maba cilaka simbelin man jabuna, minter ia bertindak alu :
1. Ipesikapna kai siiperluken Daud ras suruh – suruhen, jenari mis ia lawes njumpai Daud (ayat 18)
2. La ilibatkenna perbulangenna Nabal sebab itehna maka Nabal sumber ibas persoalen e (ayat 19)
3. Erjimpuh ia ku taneh i tapak - tapak Daud mindo perkuah ate Daud, gelah ola ia erbalas kerna kai si enggo ilakoken perbulangenna nandangi ia (ayat 23 – 24).
4. Notoken Daud gelah Tuhan ngolangi Daud guna munuhi imbang – imbangna tapi Tuhan lah pagi singukumsa kerina imbang – imbangna ras kerina sierbahan jahat man bana (ayat 26), ras iangkat Tuhan jadi raja (ayat 30).
Abigail tuhu – tuhu berusaha menyelamatken jabuna ibas kinirawan Daud nari, ia pentar ibas encibalken bana guna ndungi persoalen simberat erkiteken perbahanen perbulangenna Nabal. Perbahanen Abigail enda, jadi pelajaren man banta moria ibas menghadapi persoalen.
PENGKENAINA
Pentar encibalken bana ertina terjemba guna ngelakoken kinibujuren, meteruk rukur ras mediate nandangi kalak sideban. Piga – piga hal sibanci i usih Moria ibas Abigail nari :
a. Nggit megiken alu pusuh terbuka kerna berita si la mehuli sekali pe, amin gia persoalen e sumberna ibas anggota keluargata nari.
b. Pentar menyikapi ibas ndungi persoalen e alu meteruk rukur ras alu mbiar man Dibata. La mesukah merawa, la pergelut, la bene ukurna, la per aru, janah mehuli hubungenna ras kalak sideban.
c. Ngasup ia engkelengi temanna manusia ras kerina tinepa Dibata sidebanna.
d. Kalak pentar tentuna ngasup ia rukur pentar, ibas ngalaken perbeben nggeluh, rananna banci mpetetap ukur anak jabuna bagepe kalak sideban. Sebab kepentaren arus ikawitken ras Kata Dibata.
Jadilah Moria si pentar ibas encibalken bana, sebab ndehara si pentar eme kebanggaan ibas jabuna.
Pdt. Nur Elly br Tarigan-Runggun Karawang
