SUPLEMEN PA MAMRE 21-27 AGUSTUS 2022, KUAN-KUANEN 10:5-9

Tekno Pangan: pengolahan bahan baku menjadi bahan jadi sekaligus peningkatan hasil

Teks     : Kuan-kuanen 10:5-9

Tema   : JADILAH KALAK PENTAR GUNA KINIULIN RAS KESANGAPEN

TUJUN : Gelah Mamre

- Meteh maka kalak pentar ngasup erbahan kiniulin ras kesangapen

-Memahami alu payo maka tekno pangan penting ras erguna man kegeluhen


1. Kata Penaruh

Kitab Kuan-kuanen enda eme bagin arah Kanon, menarik erkiteken penggelarenna pe terjadi perubahen. Kitab Kuan-kuanen enda (Amsal) seharusna berjudul “misyle syelomoh” siertina Kuan-kuanen Salomo. Erkiteken ipersingkat kalak Yahudi jadi Misyle (Kuan-kuanen), emaka ibas Alkitab bahasa Indonesia kitab enda ibere judul AMSAL. Kuan-kuanen eme surat Amsal Salomo si isebut alu Liber Proverbiorum.

Manusia pada dasarna lit sifat hasrat guna meteh kerna kai pe, meteh kerna kiniulin bagepe sumber kiniulin e segelah manusia e jadi pentar (Bijaksana)[1] eme cikal bakal manusia erpemeteh bagi sitertulis “Permulaan pengetahuan ialah takut akan Tuhan” (Ams. 1:7). Manusia lit sifat kodrat cinta kasih ras ianugerahi potensi guna erbahan kiniulin ras mpedauh si jahat gelah banci jadi pentar ras ermanfaat guna kiniulin ras kesangapen (bdk. Ayb 28: 28). Manusia si bage iresapi me Kesah/Roh kasih ras pemeteh kerna si mehuli (Mzm. 111:10). Saja, labo kerina manusia ngasup ndalanken ras ndemi ibas pusuhna roh kasih e, erkiteken sura-sura daging simendominasi. Ibas si e kepentaren/hikmat rusur ngajarken uga ngkelengi sapih kita manusia (Ams. 3:27-31). Selaku manusia si nandai Dibata, melala me si ngolangi carata ndalanken kiniulin eme pengaruh lingkungen, peperangan rohani ras perukurenta[2]. Jalan untuk menjadi bijak, perlu bergaul dengan orang bijak (Ams. 13: 20). Kepentaren rehna ibas Dibata nari, emaka sipindo alu meteruk rukur man Dibata segelah iberekenNA kepentaren man banta[3]. Mindo guna iberekenNa man banta kepentaren eme arah toto ras nandai uga Dibata erdahin ras erkuasa. St. Montfort ngatakenca: “Sang Kebijaksanaan Abadi memberikan Roh-Nya yang seluruhnya terang kepada jiwa yang memiliki Dia.”[4]

2. Uraian teks

Kitab Kuan-kuanen eme kumpulen persinget/nasihat-nasihat ibas kegeluhen, nilai ibas kitab Kuan-kuanen enda banci ngerobah perbahanen/perilaku subuk ibas pengerana, perbahanen bagepe perukuren. Kepentaren ibas Kitab Kuan-kuanen enda ersifat praktis erkiteken ibangun ibas pengalamen empirik ras kerina itempatken alu bingkai pendidiken kiniteken ras perbahanen si ersifat ilahi ntahpe teologis. Alu bage, kebenarenna lit ibas dua dimensi: praktis dan teologis.

Kata hikmat/Pentar ibas bahasa Ibrani biasana igunaken alu istilah Hokma ras kata berhikmat alu istilah hakam si ertina kemampuan intelektual. Hikmat eme keterampilen si ibutuhken guna kegeluhen. Hikmat eme pengetahuan praktis sinampati manusia guna ndalanken ras mbelasken kata simehuli ras payo.

Ngidah kerna tema ibas PA Mamre enda, mari sipahami lebe uga kepentaren mereken manfaat man kalak sierkiniteken sope kita ku nats Kuan-kuanen 10:5-9. Ibas Kuan-kuanen 2:1-22 si seh kel relevan ras temata, ibas Kuan-kuanen pasal si peduaken enda ngingetken Mamre guna nggeluh alu pentar (Kuan-kuanen 2:1-4). Adi tep-tep manusia nggit megi kata ajar si mehuli ras ndalankenca, maka itandaina me kap Dibata si erngena ate man kalak si ndalanken kiniulin ras kebujuren, nggeluhna dem alu kejuah-juahen ras pengarak-ngarak ras pengkawali Dibata demi bas kegeluhenNa (Kuan-kuanen 2:5-8). Seh kel melalana si aloken ibas Dibata nari adi kegeluhen Mamre erpalasken kepentaren si ibereken Dibata, janah e pe erguna man kalak sideban.

Arah sudut pandang pemahamen secara biblika, kitab Kuan-kuanen e menekanken pembentuken karakter si erpusat ibas lingkungan keluarga. Mamre selaku “Imam” ibas jabu harus erpedoman ku kepentaren si rehna ibas Dibata nari. Dave Bland ibas artikelna si erjudul: The Formation of Character in the Book of Proverbs[5] ngatakenca maka pembentukan karakter si mendasar rehna ibas peran orangtua nari. Jadi nats ta berngi enda labo terjeng pembahasen ku Mamre saja tapi ngingetken Mamre guna ngajarken ras mempedomani kepentaren guna ngajar ken ku jabu. Alu kata sideban, “kurikulum berhikmat” harus me lit ibas jabu ras siajarken anak ibas jabu guna mindo ibas toto man Dibata.

Ibas Amsal 3:13-18 ngingetken kita maka adi lit ibas kita kepentaren e, kesangapen jadi sikerajangenta sebab lebihen ergana asangeken pirak ras emas, jadi siharus lit ibas Mamre GBKP enda eme kepentaren ras erguna ka mbaba kiniulin ras kesangapen man kalak sideban. Kesangapen e adi kalak sideban banci nandai Dibata arah kegeluhenta. Ibas Kuan-kuanen 10:5-9 eme jadi persinget ras studi perbandingen antara kalak si pentar ras kalak si lapentar. Bas perbandingen enda, mari sidatken piga-piga point ibas kita Kuan-kuanen enda:

  • Sipemena, erkemalangen man Tuhan eme dasar guna ndatken kepentaren. ibas Amsal 9:10. Takut akan Allah adalah pondasi hikmat yang sejati. Mari sipaduken kepentaren ras pemetehta guna ndalanken simehuli. Erkemalangen man Dibata labo ibas pengertin takut akan sesuatu yang mengerikan atau keniscayaan akan kuasa Allah, tapi lit turah ibas kegeluhenta rasa hormat, ras kiniteken si paguh.
  • Sipeduaken, harus me lit meteruk ukur ibas karakter kegeluhenta. Hikmat/kepentaren ibas Dibata nari labo banci iberena man kalak si meganjang rukur (band. Amsal 11:2). Adi kita meteruk rukur, la siakap ulin kita asangken kalak sideban, la siakap payon kita asangken kalak sideban, nggit kita ngakuken kinilabeluhenta janah nggit erlajar, maka kelayakan kita menerima hikmat lebih metunggung.
  • Sipeteluken, tetap mpelajari Kata Dibata/Firman Allah. Kata Dibata eme sumber pemeteh ras pedoman kegeluhen simereken pengangkan kerna sura-sura Dibata man banta lako siterapken kubas kegeluhenta si tep-tep wari.
  • Sipeempatken eme toto (doa). Adi kita mindo alu tutus/tulus kerna kepentaren/hikmat ibas Dibata si melumbar, maka Dibata mrekenca alu dem perkuah ate (Yakobus 1:5).
  • Si pelimaken, Jagalah kepentaren/Hikmat . kepentaren eme pemere Dibata, emeka patut nge sijaga ras sipakeken guna kemulian gelar Dibata. Ula sitangko kemulian Dibata, seakan-akan eme upaya ras kebeluhenta. Amsal 3:21 ngatakenca ola kel sirangi kepentaren ras pemeteh. Eme simereken kesenangen ras dame ibas kegeluhen.

3. Aplikasi

Selaku Mamre GBKP nggo sepatutna kita nggeluh alu erpalasken kepentaren ras pemeteh. Sebab arah kepentaren ras pemeteh sialoken me kemalemen ate ras kesenangen. Alu kepentaren ras pemeteh, Mamre banci bereksplorasi guna banci nampati ibas ndalani kegeluhen enda, labo terjeng man Mamre saja tapi man kalak sidebanna. Mamre jadi pelopor pendahin si kreatif ras inovatif. Mamre GBKP jadi gereja si ngasup mereken usihen ras ngasup produktif, inovatif bagepe berkreasi guna kegeluhen si mehuli.

Bahan PA Mamre ibas wari sisendah berhubungen ras Tekno Pangan. Teknologi pangan adalah aplikasi ilmu pangan ke dalam sistem seleksi, pengawetan, pengolahan, pengemasan, distribusi, dan pemanfaatan sumber hayati produk pertanian, perkebunan, kehutanan, perikanan, peternakan, perairan dan air, baik yang diolah maupun tidak diolah yang bersifat baik, aman, dan bergizi.

Erkiteken kepentaren ras pemeteh ibas Dibata nari mari kembangken potensi si lit isekelewetta guna banci kita jadi pasu-pasu man kalak sideban, selain menjadi income ibas pendapatan secara ekonomi, tapi banci kita mereken manfaat man kalak sideban. Tapi, sipentingna harus me iperhitungken kerinana, labo terjeng ndalanken sura-sura doni saja. Pedomani pemeteh ras dalani sistem manajemenna, ras ibabo si e pindolah kepentaren man Dibata. Selamat jadi pasu-pasu man kalak sideban Mamre GBKP.

Pdt. Anton Keliat-GBKP Runggun Semarang

 

[1] Kata pentar ibas pengertin bahasa karo labo terjeng beluh (pintar) saja, tapi nggo terkandung ibas kerna pemeteh guna erbahan kiniulin ras kesangapen.

[2] Bdk. Salman Habeahan, Membangun Hidup Berpolakan Pribadi Yesus, Yogyakarta: Yayasan Pustaka Nusatama, 2006, hlm. 65

[3] Berthold Anton Pareira, O. Carm, Jalan Ke Hidup Yang Bijak, Malang: Dioma, 2006, hlm. 75

[4] Louis Marie Grignion De Montfort, Cinta Dari Kebijaksanaan Abadi, (Terjemahan dari judul asli: L’Amour de la Sagesse Eternale), Malang: Seminari Montfort Pondok Kebijaksanaan, 2009, hlm. 143.

[5] Dave Bland, “The Formation of Character in The Book of Proverbs,” Restoration Quarterly Jil. 40, 1998

 

Info Kontak

GBKP Klasis Bekasi - Denpasar
Jl. Jatiwaringin raya No. 45/88
Pondok Gede - Bekasi
Indonesia

Phone:
(021-9898xxxxx)

Mediate

GBKP-KBD