SUPLEMEN PA MAMRE 27 MARET-02 APRIL 2022, KEJADIAN 2:8-17

Tema  :

Ngusahai Ras Njagai Batang Kayu

Tujun   :

Gelah Mamre:

• Meteh maka Dibata si nepa doni ras manusia si ngusahai ras njagaisa.
• Ertanggungjabab guna ngusahai ras njagai doni siitepa Dibata alu mehuli ras sempurna.

Metode   :

Diskusi

 

1. Lit telu negara si kerangenna menjadi perhatian PBB si menopang doni enda, e me: kerangen Amazon Amerika Latin, Afrika ras pe Indonesia. Em sababna Indonesia e me salah sada paru-paru doni enda. Adi ngerana kita kerna kerangen, tentuna menyangkut kubas ekosistem silit i bas, salah sadana e me bantang kayu. I bas piga-piga tahun sienggo lepas erlumba-lumba kalak memperluas lahan pertanianna bagepe menyulap kerangen jadi kebun sawit. E maka tingkat panas global melebihi ambang batas siberdampak kubas perubahan iklim silanai ertentun. Labo ngenca soal perubahan iklim siterjadi, bencana alam banjir, longsor ras sidebanna pe terjadi akibat perambahan hutan. Sekalenda i bas PA Mamre siorati me kerna salah sada ekosistem enda, e me batang kayu.

2. Uraian teks kejadin 2:8-17.

Manusia jadi pusat perhatin Dibata. Dibata njadiken manusia selaku mahluk paradoks. Manusia e me sada pribadi siijadiken tergatung kubas sinjadikennca. Amin bage pe manusia tempas Dibata, si memiliki kebebasen lako milih apai sibujur ras apai silang, sitentuna memiliki konsekuensi masing-masing. I bas kejadin 2:8, ije ituriken maka Dibata naamaken manusia i PekenEden. Peken eden sendiri e me ingan man manusia lako ngusahai ras njagai kerina sienggo ijadiken Dibata alu mehuli. Kata Peken (taman) i bas terjemahen Septuaginta iterjemahken alu kata paradise (firdaus), i bas bahasa Karo Pardis. Kata eden sendiri i bas bahasa Ibrani Eden siertina kesenangen ntahpe tanah bahagia. Enda secara nyata nuduhken sada ingan geografis, sada gelar ingan siertiken dataren subur. Amin bage secara geografis laiteh ija posisi ingan e. Saja peken e ringan i dataren lau Efrat ras Tigris (kej.2:14). I bas peken e ijadiken Dibata erbage-bage jenis batang kayu simehuli janah buahna pe simehuli situjunna eme guna manusia e sendiri. Tugas enda tentu la mesunah ndalankenca, uga manusia tetap njagai persadaan ras Dibata bagepe tetap ngikuti perentahNa sue ras KataNa situjunna lako nerusken keberlangsungen doni enda. Batang kayu simehuli mereken ketersedian pangan man manusia e, alu njagai ras ngusahaisa alu mehuli. Lau si silit i i Efrat ras Tigris melambangken tanda peradaban, sebab lau eme mereken kegeluhen. Tapi i bas ayat 9 siidah maka selain batang kayu simehuli man manusia e, lit ban Dibata batang kayu simereken kegeluhen ras pemeteh kerna sibujur ras sijahat. Litpe sijadi tujun ijadiken Dibata batang kayu silit itengah peken e eme segelah manusia tetap menggandalken kepentaren sirehna bas Dibata nari, aminnape ibere Dibata kebebasen man bana, alu arapen segelah manusia e patuh man Dibata alu menguasai dirina ras tetap megiken kata Dibata.

3. Adi sinen kubas tema PA mamre enda, ngusahai ras njagai batang kayu, tentu mabai mamre gelah tetap jadi duta lingkungen itengah-tengah ija ia tading. Tentunana menaken uga mamre ibabai sadar kerna lingkungen, inovatif i bas ngerawatsa, baik i rumahta bagepe i lingkungen gerejanta. Adi sinen i daerah perkotaan enggo mulai iban taman kota, nuan bantang kayu simenghasilken buah sibanci ipan, bagi batang mangga, lengkeng, ras sidebanna. Adi sinen kubas bahan oraten PA mamre nta jelas ibutuhken tanggungjababta guna njagaisa. Salah sada hal adi sinen ku daerah taneh kemulihenta i taneh Karo, enggo mbue kerangen i tabahi kayuna, simaun sadar atau la sadar kita megati mpeturah bencana terjadi longsor ras banjir. La sitik pe batang kayu i tabahi ras i sulap jadi ingan erjuma ras pe ingan tading. Tentuhal enda jadi dilema man banta, sebab lanai lit ingan ergegeh lako nuan-nuan. Saja nggo gia sisuan alu tanamen produksi, perlu kange selaku mamre tetap iajuk selain kita makeken jumanta lako nuan-nuan, perlu kange itepi juma ntah baleng jumanta sisuan batang kayu lako ingan serapen lau. Engkai kita perlu sadar kerna lingkungen termasuk nuan ras njagai kayu silit? sabab Dibata nggo njadiken kerina alu mehuli.

Pdt.W.Mazmur Ginting-Rg.Karawang