SUPLEMEN PA MAMRE 20-26 FEBRUARI 2022

TEMA  : TUHU-TUHU MEHULI

OGEN  : KEJADIN 1: 31, MAZMUR 24: 1-2

 

1. KATA PENARUH

Ngerana kerna lingkungan hidup, berarti kita ngerana kerna inganta tading ras inganta nggeluh. Ise kin sierbahan inganta tading ras inganta nggeluh? Sada cakapta, eme Dibata, sebab Dibata kap sinepa langit ras doni bagepe kerina isina. Uga kin tinepa Dibata ndai wari ku wari? Reh ulina nge ntah reh cedana? Ras kai kin peran kita manusia siisuruh Dibata sehubungen ras doni tinepaNa?

2. ISI/TAFSIREN

Bahan ogenta Kejadin 1:31 merupaken bagin pendungi turi-turin Dibata nepa sinasa lit. Ogenta enda mabai kita guna nulih ku keadaan doni mula-mula tupung nggo dung itepa Dibata.

Menarik untuk sirenungi, ibas Pustaka Sibadia (Bahasa Karo), kenca Dibata ndungi tiap tinepaNa, ayat 4, 10, 12, 18, 25 itulisken……Idah Dibata maka siijadikenNa e tuhu-tuhu mehuli. Tapi adi sioge ibas Alkitab (Bahasa Indonesia) itulisken ……..Allah melihat bahwa semuanya itu baik, labo sungguh amat baik, berarti adi terjemahken ku Bahasa Karo baik = mehuli, labo tuhu-tuhu mehuli (bdk ras bimbingen PA Mamre halaman 19). Ibas Bible (bhs Inggris) itulisken… And Good saw that it was good (seri ertina ras terjemahen Bahasa Indonesia).

Tapi kenca Dibata nepa manusia, emaka ibas ayat 31 inilai Dibata ciptaanNa ndai tuhu-tuhu mehuli (Indonesia: sungguh amat baik, Inggris was verry good). Ijenda maka siidah nggo seragam ibas erti kata siigunaken. Tentu jadi perenungenta ngakai maka kenca dung manusia itepa Dibata maka inilaina ciptaanNa e tuhu-tuhu mehuli, sungguh amat baik, was verry good? Lit ije makna maka sope itepa Dibata manusia, tinepa sebelum manusia e mehuli, baik, good. Kenca itepa Dibata manusia maka tinepaNa e tuhu-tuhu mehuli, sungguh amat baik, was verry good. Teridah ije penonjolen peran ras fungsi manusia. Enda la terlepas ibas kai siitugasken Dibata man manusia ibas ayat 28 kerna naluken ras nguasai.

Jenari arah ogenta sipeduaken, Masmur 24 : 1-2 merupaken pengakun kiniteken Daud, maka arah ngidah kerina doni ras isina nambahi penandai ras pengakun Daud ise kin Tuhan e. Tuhan e kap simada doni ras kerina isina sebab Tuhan kap simajekkensa.

3. PENGKENAINA

Erpalasken kata Dibata oratenta maka lit piga-piga perenungen:

1. Dibata kap empu doni ras kerina isina erkiteken Dibata kap sinepasa.
2. Kerina tinepa e lit hubungenna sada ras sidebanna
3. Janah manusia ibere tugas guna mpekena-kena ras njagai gelah tinepa Dibata
4. Doni simehuli ndai harusna jadi tuhu-tuhu mehuli arah kehadiren ras peran manusia. Sempat doni si mehuli ndai labo jadi tuhu-tuhu mehuli arah manusia, malah jadi ceda, berarti e jadi sada bentuk pemberontaken terhadap sura-sura Dibata mere peran man manusia.

  

Pdt Pribadi S Meliala-Rg. Tambun