SUPLEMEN PA MAMRE TANGGAL 11-17 AGUSTUS 2019, OGEN KUAN-KUANEN 23:25
Kuan-Kuanen 23:25
“Bahanlah Megah Iakap Orangtuandu”
Kewajipen si penting orangtua eme mereken man anakna pengajaren ras persinget si termasuk pendidiken Kristen. Orangtua harus jadi usihen ibas kegeluhen ras perbahanenna sebage kalak Kristen, janah lebih mperdiateken keselamaten anakna ibas pendahin, profesi, pelayanenna ibas gereja ntah pe status sosialna. Orangtua bertanggungjawab guna mereken pendidiken man anak-anakna sinuate mpersiapken ia guna nggeluh bagi singena ate Tuhan. Si terutama bertanggungjawab mereken pengajaren alkitabiah ras rohani man anak-anak eme keluarga, labo gereja ntah pe sekolah minggu. Gereja ras sekolah minggu terjeng nampati pengajaren arah orangtua.
Inti pendidiken Kristen eme: pusuh sekalak bapa harus seh ku pusuh anakna gelah banci mabai pusuh anak e kubas pusuh Juruselamat (bnd. Luk. 1:17). Ibas mpebelin-belin anak-anakna, segelah orangtua ula ncidahken sikap pilih kasih, harus mereken dorongen bagepe persinget, iukumna perbahenen anakna si kin memang ngelakoken kesalahen, ngajarken man anak kerna nggeluh meteruk ukur, lemah lembut, saber, pusuh si dem kekelengen.
Bahan PA ngataken, “Malem ate bapa adi anakna erkemalangen man Dibata; ersurak pusuhna adi pentar anakna”. Dampak arah sikap anak si patuh nandangi kebenaren, kepentaren, ras pengarajen ras pengertin isehken ibas kalimat motif ibas ayat 24 ras 25. Istilah bahasa Ibrani si ipake guna kata “ersurak” ibas ayat 24b seri ras si ipake guna kata “megah” ibas ayat 25a, janah istilah bahasa Ibrani guna kata “malem ate” ibas ayat 24a seri ras si ipake guna kata “malemlah ate” ibas ayat 25b. Erkiteken ietehna anakna nuate ndalani kegeluhen si benar janah lit ibas peraturen ibas kegeluhenna. Anak e labo terjeng benar, tapi iperlengkapi ibas kerina pemeteh si ibutuhken ibas kegeluhen, dewasa ia erkiteken ngasup ertimbang ras milih apai si benar ibas kerina si la benar. La terjeng ietehna kerna peraturen nggeluh, tapi keberhasilen ibas kegeluhenna. Bapa siapai nge si la malem atena ngidah anakna bertumbuh jadi anak si pentar bagi si ikataken ibas bahan PA Mamre enda.
Habis manis sepah dibuang, bageme peribahasa ngandingken desken man tebu, kenca keri launa si ntebu iambekken me sampahna, bagepe anak-anak si la ngergaken orangtua ibas kinituanna. Sebab kerina gegeh ras kiniliten orangtuanta tupung ia nguda, nggo ipindahkenna, ibarat bank, nggo itransferna kerina gegeh, kiniliten bagepe pemetehna man banta anak-anakna maka kita bagi si gundari enda. Bahan PA Mamrenta enda ikawitken ras HUT Saitun GBKP. Kita ipersingeti guna tetap ncidahken kehamaten ras kekelengen man orangtuanta amin pe ia nggo metua. Orangtua dalam arti si lebih luas selaku nenek moyang ibas bahasa Indonesia igelari pe “leluhur”, siertina yang diluhurkan, yang dihormati dan dimuliakan. Istilah enda mere pesan man banta maka siigelari leluhur eme kalak si ndalanken kegeluhen si mulia, luhur, medolat. Emaka selaku anak kita harus beluh mpehagaken ras memuliaken orangtuanta, janah tupung kita nguda pe, segelah metua metunggung pepagi igelari leluhur harus pe kita ndalani kegeluhen si ermulia dingen mehaga, sendalanen ras uga cara nggeluh kalak bujur. Selamat HUT Saitun pe-28-ken GBKP.
Pdt. Andreas Pranata Meliala-GBKP Rg. Cibinong
