SUPLEMEN PA MAMRE TANGGAL 20-26 MEI 2018, OGEN KEJADIN 11:1-9

Tema :

ULIH TEKHNOLOGI SIENCEDAI ( NEGATIF)

I. KATA PENARUH
 Zaman genduari enggo ndauh kel majun asangken zaman si adi. Tapi wari-ku wari zaman genduari enggo ndauh kel merosoten asangken zaman si adi. Mulai kin arah kehamaten, kepatuhen, kehangken, kekelengen, rsd. Zaman si adi lit kebiasaan kalak Karo megiken turi-turin ibas nini-ninina nari sope lenga tunduh. Emaka adi angkaten zaman si adi melala kel sieteh turi-turin seh asa genduari. Bagepe bas SD adi nai pasti lit sada mata pelajaren mbaca cerita. Aminna gia turi-turin e sebatas dongeng tapi pendungi turi-turin e lit si dat pengajaren siituriken nini-ninita. Umpamana: Kelengi orang tua, mehamat man orang tua, nggeluh bujur man Dibata, rsd.
 Emaka kai siituriken ibas pustaka si Badia man bangsa Israel kerna pengajaren kata Dibata man anak-anak-anak subuk sanga kundul, erdalan, i juma, situhuna enggo ilakoken kalak Karo. Sebab kalak Karo nai sope lenga tunduh, orang tua entah nini na pasti nuriken cerita-cerita pengantar tidur anak-anakna entah kempuna, umpamana, cerita Kak si tangko Bunga, cerita Batu Renggang, rsd. Tapi zaman tekhnologi enda enggo terkikis janah lanai pernah ilakoken erkiteken enggo lit hiburen bas Televisi, bas internet, game on line, rsd, emaka lanai iakap menarik cerita si bage. Padahal pengajaren si mehuli e dungna mabai anak-anakta e nggeluh erkemalangen man Tuhan dingen jadi tambar man banta. Emaka arah bahan PA Mamre ta enda pe ituriken man banta ugange Tekhnologi si encedai (negatif).

II. PEBAGESI PENGANGKAAN KERNA TEKS
 Kitab Kejadin enda nuriken kerna Nuh ras keluargana nusur ibas bahtera nari alu sada bahasa. Kenca nusur bas bahtera nari kesusuren Nuh ertambah-tambah ras tentu bahsana pe sada denga. Kalak e tading ibas lembah Efrat ras sekitarna eme wilayah si umumna ikataken cikal bakal peradaben. Kalak Ibrani ngataken alu gelar Sinear, si bena-benana eme merupaken sada wilayah i Mesopotamia utara.
 Ibas Kejadin 10:32 ikataken maka arah anak-anak Nuh me merap kerina bangsa-bangsa i doni kenca peristiwa air bah. Ertina kalak e kerina ibedaken jadi suku-suku entah pe wilayah inganna tading. Sebab ingan e enggo reh sempitna man bana kerina, emaka arah kai sikataken Nuh entah pe kiniersadaan arih anak-anakna maka piga-piga suku entah wilayah arus nentuken arahna masing-masing, ibenaken ibas negeri si ersebelahen ras ia kerina janah irancang gelah banci iterusken ku daerah sideban gelah reh belangna seh asa kin siiperlukenna kerina guna inganna tading.
 Tapi anak-anak manusia la nggit menyebar ku ingan-ingan si ndauh. Menurut manusia e ingan siingani kalak e genduari ndauh kel sikapen ras lebih aman. Emaka manusia e berusaha gelah tetap tading ras-ras ras bermalas-malasen seh maka la ia lawes ku taneh si enggo ibereken Dibata man bana (Yos. 18:3). Manusia e erpengakap maka ia jagon asangken Dibata entah pe Nuh.
 Pertimbangen manusia e tetap tading ras-ras eme erkiteken enggo idapetina ingan si nyaman guna iingani (ay. 2), eme sada ingan i taneh Sinear, dataren si seh kel belangna seh maka banci nampung manusia e kerina. Janah taneh epe mehumur janah cocok ras jumlah manusia e ibas paksa e. Kawasen e ngasup mendukung kebutuhen siiperluken manusia e kerina, aminna gia manusia e la mpertimbangken ngasup nge ingan e nampungsa manusia e adi kune sada paksa pagi enggo teremna manusia e. Alu kata sideban, ingan tading si menarik hati ija kita tading genduari rusur kel terbukti jadi godaan kuat guna mengabaiken tugas ras kepentingen si menyangkut masa depan
 Emaka gelah tetap banci tading ras-ras kerina manusia e berusaha membentengi dirina , labo berusaha memperluas batas-batas ruang lingkup geluhna alu cara berkat alu dame ibas penemani Tuhan.Janah bali ras kalak si terus menerus menentang Sorga janah tetap bertahan. Emaka ersada kel arihna kerina majekken sada kota alu menara si menganjang.
 Seh kel semangatna manusia e erbahan kota si lit menarana e (ay. 3,4). Guna nehken sura-surana e manusia e tuhu-tuhu sisampat-sampaten sada ras sidebanna. Aminna gia taneh siinganina e datar janah labo lit ijumpai ije batu entah pe campuren semen ras kapur, la engkurangi semangat manusia e guna majekken kota si lit menarana e, emaka ibahanna pengganti batu alu erbahan batu bata ras lumpur entah pe jerami sebage pengganti semen.
 Manusia e mbangun kota e, eme guna ngelawan Dibata alu menyaingi Dibata. Manusia e ersura-sura gelah ia seri ras Dibata. Manusia e ersura-sura gelah banci deher ras Dibata labo erkiteken kinitekenna tapi erkiteken keangkuhenna. Arah mbangun menara e manusia e ersura-sura ndatken gelar gelah terberita.
 Manusia e mbangun menara e gelah ula ia merap marpar kerina tapi tetap tading bas sada ingan. Manusia e la patuh man perintah Dibata guna ndemi doni enda (9:1). Dibata nuruh manusia gelah niari dingen ndemi doni enda, tapi manusia e la nggit. Ibas sienda manusia ersura-sura pulah bas Dibata nari, manusia ersura-sura menentuken jati dirina sendiri manusia e la nggit patuh man Dibata.
 Erkiteken sie me maka reh rawa Dibata janah ipecahna cakap manusia e janah ikerapken Dibata manusia ndai ku belang-belang doni janah lanai teruskenna majekken kota e. Janah eme maka ikataken gelar e BABIL, erkiteken Tuhan nggo nggawer manusia, janah ijenari me Tuhan engkerapken manusia ku belang-belang doni enda.

III. PENGKENAINA
 Temata eme ULIH TEKHNOLOGI SI ENCEDAI. Ibas Kamus Karo Ulih ertina apa yang diperoleh, penangkapan, upah. Ibas Kamus KaroEncedaiberasal dari kata dasar ceda ertinarusak, cacat, hancur, terluput dari suatu kebiasaan atau tata susila. Encedai artina merusak, menghancurkan, rsd.Jadi arah tema enda mereken pengertin man banta maka ulih tekhnologi si ugakin e si banci merusak, menghancurkan bas geluhta enda.
 Tuhan si tuhuna enggo mereken kepentaren man manusia, janah situhuna Tuhan ersura-sura gelah alu kepentaren siibereken Tuhan man manusia ipakeken guna kemuliaan Tuhan ras sikeleng-kelengen sada ras sidebanna. Tuhan nuruh manusia guna njagai ras mpekena-kena tinepa Dibata (Kej. 1:28). Tapi rusuren kel kepentaren (Tekhnologi) si ibereken Dibata man manusia e merusak masa depan anak erkiteken litna Game On Line, rsd, si erbahansa anak-anak lupa tugas ras lupa waktu, merusak keharmonisan keluarga erkiteken suami, istri ras anak-anak enggo buen waktuna chating asangken ercakap-cakap ras keluarga, menghilangkan hubungan keakraban dengan sesama perbahan mudahna komunikasi jarak jauh dungna jarang jumpa.
 Bagepe secara umum kegeluhen manusia makeken kepentaren si enggo ibereken Dibata ipakena guna nehken sura-sura kedagingenna. Umpamana, manusia ngasup erbahan senjata, peluru, rudal, rsd, tapi ipake manusia sebagai alat untuk saling membunuh. Manusia makeken kepentarenna e guna saling menguasai satu dengan yang lainnya. Kemajuan tekhnologi enda pe banci ka erbahansa manusia semakin mudah erbual, erbahansa manusia malas sebab segala sesuatu enggo imudahken. Gelah tasak nakan tading icokken, penggeluh TV tading pencet remote, bahken genduari merincuh pangan, inemen, nukur, baju, nukur, sepatu, rsd, lanai perlu manusia e erdalan cukup pesan GOJEK minter tersedia kerina. Emaka pengaruh tekhnologi enda banci ka erbahansa manusia tempa-tempa lanai perlu teman sipenting lit sen kai pe banci ilakoken. Bahken genduari pe melala dampak tekhnologi enda erbahansa manusia kena kasus pidana erkiteken UJARAN KEBENCIAN arah Sosial Media.
 Sienda me teridah ibas manusia zaman Nuh, bahwa kepentaren si lit bas ia erbahansa ilawanna Tuhan, ipakekenna kepentarenna e guna menyaingi Tuhan, guna ngataken maka manusia pe ngasup ngelakoken siilakoken Tuhan, bahken manusia e merasa bahwa ia hebaten asangken Dibata.
 Marilah arah PA Mamreta enda, selaku imam bijaklah kita makeken tekhlogi enda. Ula kel tekhnologi enda erbahansa bene kebersamaanta ras ndehara entah pe anak-anakta, ula kel tekhnologi enda erbahansa lanai lit waktuta ras Dibata, ula kel kemajun tekhnologi enda erbahansa bene kinitekenta si akhirna mabai kita kubas dalan si gelap, ula kel kemajun tekhnologi enda erbahansa kita nakiti perasan kalak sideban, rsd. Tapi pakekenlah kepentaren si enggo ibereken Dibata e man banta guna kemuliaan Tuhan ras guna sikeleng-kelengen sada ras sidebanna. Tetaplah ersukuten man Tuhan kai pe silakoken kita arah kepentaren si enggo ibereken Dibata man banta, gelah arah kepentaren siibereken Dibata e ngasup kita nggeluh bagi singena ate Tuhan bas geluhta seh maka malem ateta nggeluh janah ermulia gelar Dibata.

Pdt. Jaya Abadi Tarigan

GBKP Runggun Bandung Pusat