SUPLEMEN PEKAN PENATALAYANAN GBKP TAHUN 2024-WARI II, KHOTBAH EPESUS 6:1-4

Invocatio :

“Adi la lit si mperdiateken kade-kadena, terlebih-lebih keluargana, enggo ipersokenna kinitekenna. Jahaten me ia asangken kalak si la tek man Jesus Kristus” (1 Timotius 5:8).

Ogen :  

Masmur 133 : 1 – 3

Tema  :  

“Jadi Terang Ibas Keluarga”

 

Kata Perlebe

Shalom ras mejuahjuah man banta kerina. Bujur ninta man Dibata Bapa ibas Tuhanta Jesus Kristus si nggo naruhken kita seh ku wari peduaken Pekan Penatalayanenta. Bas wari pemena arah tema, kita ipersingeti ras iajuk gelah erdalan ibas terang si ibereken Tuhan. Seh kal perluna, pentingna ras prinsipna erdalan bas terang si ibereken Tuhan. Si eteh maka Tuhan Jesus kap terang doni (Joh. 8:12). Alu ngaloken Ia dingen ngikutken Ia me maka si datken terang kegeluhen. Kalak si ngaloken dingen ngikutken Tuhan lanai nggeluh ras erdalan ibas gelap. Kebalikenna, kalak si la nggeluh ras erdalan ibas Tuhan Jesus, ia tetap ibas gelap, ibas dosa ras kematen. Kenca kita nggeluh ras erdalan ibas terang Tuhan, emaka bas berngi peduaken enda kita ipersingeti sekaligus isuruh gelah jadi terang ibas keluarga. Guna si e mari erlajar kita arah Kata Dibata.  

Isi/ Penjelasen

Nats kotbah Epesus 6:1-4 eme Kata kerna Anak ras orangtua. Perlebe rasul Paulus ngajar ras menasehati gelah anak bas jabu ngikutken ajar orang tua. Peraten Tuhan kap maka anak ngikutken ajar orang tua. Si enda sue ras pedah pelimaken bas 10 pedah Dibata (Kel. 20:20; Ul. 5:16). 10 pedah Dibata ibagi kubas 2 bagin: sipemena engkelengi Tuhan Dibata (Pedah I seh IV). Peduaken, engkelengi teman manusia (Pedah V seh X). Pedah pelimaken: nghamati orangtua me pedah si pemena ibereken Dibata bas perentah lako engkelengi orangtua. Anak si ngikutken ajar orangtuana eme anak si nghamati orangtuana. Tuhan erpadan mereken kejuahjuahen janah ndekah nggeluh man kalak si nghamati nande-bapana (ayat 1-3). Jenari Kata Dibata ngerana man orangtua. Orangtua ipindo gelah ola mpesega-sega anakna si erbahanca ia merawa. Asangken mpesega-segasa, orangtua isuruh mpebelin-belin anakna alu ngajari dingen negu-negusa (didiklah) bagi si ngena ate Tuhan (ayat 4). Itekanken kal gelah orangtua ndidik anak-anakna sue ras si ngena ate Tuhan. Kai si ukuri, ibelasken ras isehken orangtua man anak eme guna ndidik anakna bagi singena ate Tuhan.    

Arah ogenta Masmur 133:1-3 ngajarken ras ngingetken pentingna kiniersadan ersenina/ turang. Seh kal ulina ras senangna kalak si ersenina (jabu) ersada perarih. Jabu si ersada perarih me jadi si ipasu-pasu Tuhan. Pasu-pasu Tuhan e desken minak wangi si meherga bagepe embun. Syarat jabu ndatken pasu-pasu Tuhan eme adi jabu ersada perarih ibas si ngena ate Tuhan. Ija jabu sada perarih, ije me Tuhan erpadan mereken pasu-pasuNa eme kegeluhen si la erkeri-kerin. Jenari arah invocatio, icidahken uga lagu langkah anak-anak Tuhan. Jabu si erdalan ibas terang Tuhan eme jabu si mperdiateken kade-kadena, terlebih keluargana. Kalak si la mperdiaten ras mpekena-kena keluargana nggo ipersokenna kap kinitekenna. Kalak si la mperdiateken keluargana kalak jahat kap. Jahaten kalak si bage asangken kalak si la tek man Jesus Kristus (1 Timotius 5:8).

Pengkenaina ras Kata Penutup

• Lit terang ras lit gelap. Lit kalak nggeluh ibas terang. La sitik si tetap nggeluh ibas gelap. Aminna Tuhan Jesus selaku terang doni nggo reh ku tengah-tengah manusia, tapi la mahan bana kerina manusia erdalan ibas terang. Lit kalak tetap mpertahanken dirina nggeluh ras erdalan bas si gelap. Puji Tuhan kita si tek man Tuhan Jesus lanai nggeluh ras erdalan bas si gelap tapi ibas terang. Erdalan ibas terang si ibereken Tuhan ertina nggeluh bas kekelengen, ketuhu-tuhun, kebujuren, kemeteruken ukur, kepatuhen ras kesetian. Terang eme lambang kegeluhen, ketuhu-tuhun ras keriahen.
• Tema: “Jadi Terang Bas Keluarga.” Tek man Tuhan Jesus selaku terang doni njadiken kita jadi sira ras terang man doni enda. “Bagi terang si seh kal perluna ibas gelap, bage pe kam nangdangi doni. Kuta si lit i das uruk la banci lang teridah” (Mat. 5:14). Terang Tuhan erbahanca kita jadi terang man doni enda. TerangNa e mabai kita ndarat bas si gelap nari jenari bengket ku bas terangNa si lanai langlang ulina. Sope kita jadi terang man doni si mbelang enda perlebe kita jadi terang ibas keluargata. Nina sada kata bijak, “Charity begins at home” (kebaikan mulai dari rumah). Sibenaken kiniulin ibas rumahta ras keluargata nari. Emaka marilah si cidahken terangta mulai bas jabuta sekalak-sekalak. Babalah terangta e ku tengah-tengah keluargata. Bahanlah terangta e tuhu-tuhu terang, erkinar dingen ersinalsal man anggota jabuta.
• Kimaun ras megati labo kita jadi terang bas keluarga, justru jadi gelap. Si enda teridah arah bapa la engkelengi ndehara ras anak. Perbulangen la jadi imam si payo dingen mehuli bas keluarga. Nande pe la jadi terang bas keluarga sabab nggeluh la patuh man perbulangen, nggeluh hura-hura, nggeluh konsumtif ras konsumerisme. Orangtua la jadi terang bas jabu sabab isega-segana anakna si erbahanca anak merawa. La iajarina ras ididikna anakNa sue pengajaren Pustaka. Emaka mari bapa-bapa, jadilah terang bas jabu arah engkelengi anak jabuna dingen jadi imam i tengah jabu. O kam pernanden jadilah terang bas jabu arah patuh man perbulangen dingen jadi ingan tertande, ingan ndatken dame ras malem ate. Anak-anak pe jadilah terang bas jabu alu kam ngikutken ajar dingen mehamat man orangtua.
• Jabu si ersada perarih labo pecah ras sontar bas arih eme jabu si jadi terang dingen erdalan bas terang. Bapa, nande ras anak nggeluh sada perarih. Orangtua sada arihna bas ngajari ras ndidik anak-anakna. Seri ras sada perayaken ras tujun orangtua (bapa ras nande) bas ngajari ras ndidik anakna. Emaka totoken, usahaken ras bina kal keluargata gelah nggeluh ersada perarih ibas Tuhan. Baba ras bahanlah jabuta jadi keluarga Dibata eme keluarga si ngelai ras mpermuliaken Dibata. Bahanlah ras didiklah keluargata erdiate, kepate ras erkeleng ate sada ras si debanna. Ola sempat kita ras anak jabuta la erdiate ras mperdiateken keluargana.
• Kerina kita ermeriah ukur ras senang adi ikataken keluargata keluarga si ipasu-pasu, orangtua si sukses ras anak si sukses. Sada pe kita la ngarap jabuta ikataken keluarga si gagal. Orangtua si ikataken sukses eme orangtua si ngajari ras ndidik anakna erdiate, erkeleng ate, meteruk ukur, ersada ras si ergan pekepar. Anak si ikataken sukses eme anak si nggit megiken ras makeken kata ajar, si nehken kehamaten man orangtua. Orangtua ras anak-anak si bagenda me si ipasu-pasu Tuhan. Orangtua mpebelin-belin ras ngajari anakna ibas Tuhan me orangtua si ipasu-pasu Tuhan. Anak si megiken ajar orangtua dingen enghamati orangtuana me anak si ipasu-pasu Tuhan.

Pdt. Juris Tarigan, MTh-GBKP Rg Bogor