SUPLEMEN PEKAN KEBAKTIAN KELUARGA GBKP TAHUN 2023 WARI 6, KHOTBAH KUAN-KUANEN 3:27-35

Invocatio :

Matius 6:4 Labo perlu igejek-gejekken i bas kam mere e. Alu bage, Bapandu si ngidah perbahanenndu e mereken upah man bandu."

Ogen :

Galati 6 :1-10

Tema  :

Bahan Si Mehuli Man Kerina Kalak

 

I. Penaruh:

John Wesley ngataken: “Kerjakanlah semua kebaikan sebisa Anda, dengan segala cara yang Anda bisa, di semua tempat yang Anda bisa, setiap saat yang Anda bisa, kepada semua orang sebisa Anda, selama mungkin sebisa Anda”.

Perbahanen si mehuli jadi salah sada dalan menjalin hubungen bagepe empeteguhi hubungen ras teman bagepe kalak si deban, seh pe banci empeturah kesadaren maka ibas doni enda labo banci kita nggeluh sisada, gia kita erbeda sada ras si debanna.

Ibas litna hubungen antar manusia ije me sidat erti ras makna kegeluhen, janah ije ka me turah kemalemen ate (kebahagiaan yang sejati), emaka adi ate ndatken kegeluhen si dem kemalemen ate ula engkeriken wari-warinta guna ngayaki kebayaken, prestasi, jabaten saja, pakekelah waktu si lit erbahan si mehuli, engkelengi, nampati, ngalemi, rsd. Sebab perbahanen si mehuli erbuahken kemalemen ate.

II. Isi:

Kuan-kuanen 3 : 27 – 35 isina eme nasihat/pengajuk gelah si ngogesa ngelakoken perbahanen si mehuli. Nasihat si ibereken gelah kalak jadi bijak labo saja ibas cara rukur tapi pe ibas perlagu langkah. Perbahan kalak si bijak eme kalak si ngelakoken perbahanen si mehuli.

Erbahan simehuli man kerina kalak, alu la nahan-nahan hakna (3:27,28) Kalak si bijak/pentar eme kalak si tanna tetap terulur, ras pusuh peratenna lalap terbuka ibas erbahan si mehuli, alu la menunda-nunda waktu (adi si ipindona lit ras banci nge ia samptindu gundari) la nimai pagi sebab itehna ras sadar ia pagi banci saja lanai lit ibas ia, ras lanai ia ngasup, entah ibas wari sipepagi kalak ndai pe lanai perlu isampati. Emaka lit kuan-kuan nina Orang yang segera memberi berarti memberi dua kali lipat.

Kalak si pentar/bijak la nggit ndaram-ndarami alasen menghindar/menunda sebab la ngena atena kalak si deban ndekah ibas kesusahenna. Erbahan simehuli ula erbahan ceda ukur teman (invocatio), erbahan si mehuli alu kesadaren nandangi Dibata si empuna kiniulin (KEBAIKAN merupakan sifat Ilahi yang harus terpancar dalam kehidupan orang percaya).

Man ise kita erbahan si mehuli ? adi ngasup man kerina kalak bahan lah simehuli man kerina kalak, adi la ngasup bahanlah si mehuli man kalak si lit ibas lingkungenta keluarganta, gerejanta, serayan Tuhan.

Perbahanen si kitik megati siakap la lit nilaina. Mulailah erbahan si mehuli gia arah hal si kitik entahpe spele:

• Sada gelas air putih la lit ertina adi i sandingken ras inemen mewah, tapi segelas air putih sehkal ergana man kalak si muas i parpari las matawari.
• Ngambekken duri ibas dalan nari sada hal si kitik tapi adi la si ambekken banci erbahan lit kalak luka kena duri.

Tep-tep wari geluhta iperhadapken kubas pilihen, adi lit masalahta ras teman, kita punya pilihan ngalemi entah rubat, lit kalak si perlu penampat, nampati entah siban-ban la si idah, nandangi teman, bahan si mehuli entah si jahat, tapi kalak si bijak pilihenna eme si mehuli ras si ngena ate Tuhan.(Gal. 6:10 E maka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken)

Arah nasihat kitab kuan-kuanen perbahanen si mehuli e banci si lakoken arah

1. Nggalari lunas utangta (adi lit) tanpa kecurangan, penipuan, entahpe penundaan.
2. Nggalari upah kalak si erdahin ras kita tepat waktu.
3. Encukupi keperlun keluarga entape kalak si lit ras kita
4. Nehken tanggung jawab nandangi gereja, Negara.
5. Muat bagin ibas dahin-dahin kemanusiaan
6. Muat bagin ibas dahin-dahin sosial
7. La ngerencanaken si jahat (29) Kalak si pentar/bijak la pernah turah ukurna erbahan si jahat man kalak, tapi mburak ibas ukurna guna empehuliken teman, kalak si salah pe la jahat perbahanenna man bana tapi negu gelah si jahat e banci mulih ku dalan si mehuli (Gal 6:1) meriah ukurna pe guna sisampatsampaten sebab sadar ia maka setiap jelma lit baban geluhna si kadang lanai ia ngasup mbabasa si sada Gal6:2)
8. La nggit erjengil (30)
9. La mencimberu (iri hati) (31)
10. La ngusih perbahanen kalak si la bujur (31)

Nina kitab Jakup 4:17 : E maka erdosa me kalak si la ndalanken si mehuli si meteh kai patut idalankenna. JADI, JIKA SESEORANG TAHU BAGAIMANA IA HARUS BERBUAT BAIK, TETAPI IA TIDAK MELAKUKANNYA, IA BERDOSA.

III. repleksi:

Sekalak i pindo guna encet sada perahu, emaka idahikenna sue ras kai si ipindo pemilik perahu. Sanga i encet perahu e i dah na sada lubang kitik ibas lambung perahu, emaka ersuruh ukurna empekenasa alu nutupi lubang ndai.

Kenca dung ibereken pemilik perahu me upahna.

Piga – piga wari kemudian reh ka pemilik perahu iberekenna ka tambahen upahna ndauh belinen asanng kesepakaten upah ngecet si enggo ialokenna.

Si tukang cat gugup ras nungkun, ma enggo ku aloken upahku, enda kai ka enda ? reh nina pemilik perahu sange upahndu ngecet, ena upahndu nutup lubang si lit ibas perahu nina. E ena ma kitik saja ngena pa nina tukang cet.

Emaka cerita me si pemilik perahu, ku eteh lit lubang ibas perahu tapi lupa aku ngatakenca gelah ikut i pekenandu.

Emaka kenca kerah cet perahu ndai alu la ku eteh ibaba anak-anakku perahu ndai ku laut engkawil, sanga ku eteh enggo ibabana perahu engkawil, seh kal aku biarna, enggo me gedap, enggo me mate anakku ndai ateku, emaka ku ayaki ku laut, ku idah ia selamat, kepeken la pe ku suruh enggo i tambalndu lubang ibas perahu ah ndai, arah perbahanen si katakenndu kitik e ebahanca anakku selamat, kam enggo nelamatken anak-anakku, nina.

(E maka ola min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna. Galati 6 : 9)

Amin.