DIBATA NGATURKEN KULA ALU SERASI
I Korinti 12:20-26

Ibas sada bangunen Gedung si mejile ras kokoh, lit ije erbage-bage bahan bangunen si banci erbahanca bangunen e banci pantek alu mejile ras nteguh. Ibas kerina bahan-bahan e lit semen, batu bata, besi, kersik, seng, kayu, cat tembok, baut, batu galang, kerikil, paku rsd. Kerina bahan-bahan enda i persada guna banci pajek bangunen ndai. Ibas kerina bahan-bahan ndai megati lit iakap bahan si paling penting guna banci ndatken bangunen si mehuli. Umpamana semen na arus simejile ntah pe meherga, cat tembokna arus si paling mbaru. Padahal adi iukurken kai ertina semen si mejile adi kersikna la lit, kai gunana cat tembok si paling mbaru ibas gedung adi baut-baut na lalit, tentu bangunen e banci mbulak.

Ibas bahan Perpulungen jabu-jabu ta paksa enda Paulus nuduhken gambaren kula manusia arah lit na pengangkaan maka lit bagin-bagin kula tertentu simerasa kurang meherga ras la tama bagin ibas mejile na sada kula. Sendalanen ras sie lit ka bagin-bagin kula si “merasa” dirina sangat penting ibas kula, sierbahanca lanai ia perlu kula sideban. Paulus mereken penjelasan maka pengejapen sib age salah ras lanai sue ras tujun Dibata ibas mbuena bagin-bagin ibas sada kula.

Mata ras takal ibas ayat 21 i bandingken/ikontrasken ras tan ras nahe si ncidahken mata ras takal eme hal si meganjang ras tan ras nahe sada hal simetruk. Gambaren posisi kula enda nuduhken posisi kepeminpinen (tuan ntah kalak bayak), janah tan ras nahe nuduhken ku bas perpulungen si pendahinna buruh ntah pe budak. Enda sada contok maka lit pengejapen kalak si erkuasa ras pengejapen i kuasai kalak. Ibas Kor.11:17-34 i cidahken uga perpulungen si bayak “merendahkan” perpulungen si musil. Ibas Lakon Persadaan Sibadia, perpulungen si lit buatenna “merasa” la perlu perpulungen sideban. Kalak enda man ras minem sampai mabuk tanpa merasa perlu nimai kalak sideban. Lit sikap diskriminatif, membanding-bandingken ras milih-milih teman eme sumber perpecahen bas perpulungen.

Paulus ngajarken perpulungen I korinti maka bagin kula si iakap la meherga justru e nge si mehergana “ tapi sebalikna ring-ring si tempa-tempa la megegeh, e nge la la banci lang na” (ay.22). Alu kata sideban Paulus ngajarken bahwa penampilan si le ergegeh/lemah la berhubungen ras “nilai yang sesungguhnya: ibas bagin kula. Nilai si lit ibas kula la tergantung ibas posisi ras bentuk , tapi kerinana mereken fungsi si berbeda simereken kiniersadaan ibas megegeh ras paguhna sada kula. Bagi sada pepetah ngataken:Jangan menilai buku dari sampulnya.

Dibata ngaturken kerina alu serasi, ring-ring si la meherga siakap ibas kula, eme si lebih ipehaga, janah ring-ring simehangke ncidahkenca, si e nge lebih iuisi alu mehuli. Jnah gelah kula e la erbelah-belah, tapi sada-sadai ring-ring e radu seri mperdiateken ring-ring sideban. Kalak si lit ibas status sosial si meganjang menurut ukuren doni (bayak), maka secara otomatis ia ngo ndatken perhatian ibas doni enda nari. Biasana doni enda melala mereken penghormatan, keistimewaan man kalak sim elala erta na, bahkan melala kalak si mengantungkan hidup ku bas kalak si melala ertana. Ibas konteks perpulungen Tuhan, kalak bayak (status sosial tinggi) lanai arusna ndarami, ndatken hal-hal (status sosial) ibas gereja/perpulungen sebab sienda enggo idatkenna ibas doni.

GBKP ibas tanggal 21 juli enggo 78 tahun njayo, ertina ngasup ngeluh mandiri ibas teologia, daya ras dana. Ngawan perpulungen ibas gereja labo seri, beda laatar belakang kegeluhen ras pendahin. Lit tading i kuta she ku kota besar, pendahi ta pe pelain-lain, lit erbinaga, ku juma, pegawai ras pengusaha. Ibas kerina si berbeda enda lalit si la penting man pertumbuhan gereja ta. Perbedaan si lit la jadi halangen untuk terus ndahiken dahin Tuhan. Taanda-tanda perpulungen Tuhan si dewasa eme mpebelin biak kiniersadaan, ras mpekitik perbedaan si lit. Dikune lit ibas runggunta sector-sektor si man sampaten, minterlah si sisampati, adi lit si kurang mari si sampati, ula sipandangi saja, sebab kai ertina lit ibas kita adi lakin radu ras si akapi kiniliten si lit ibas kita raduken ras kerina perpulungenta. Majeken kula Kristus bas perpulungen la banci lit si menonjol ras lalit si merasa la perlu, la pantas (la ngasup) kerina kita sada ring-ring guna majekken kula Kristus.

Pdt. Rena Tety br Ginting-GBKP Runggun Bandung Barat

PERBAHANEN KALAK PENTAR
Pengerana 11:1-6

Kitab Pengerana eme perukuren-perukuren sekalak pengerana tah pe perpilsapat, si enggo rukur alu mbages uga gendekna ras gulutna kegeluhen manusia, s idem alu kinilabujuren ras kecedaan ate. Ibas ujung perukurenna ikatakenna maka sia-sia geluh enda. La iangkana perbahanen Dibata singkuasai nasip manusia. Aminna bage pe, iajarkenna nge gelah igegehi dingen tutuslah ate manusia erdahin, janah nggeluh ia alu meriah ngaloken pemere-pemere Dibata.

Ibas ayat 1 ikataken “berekenlah ertandu man kalak sindauh ikepar lawit” ngatakenca benakenlah dahin e anem gia ndauh denga ndatken hasil entahpe mungkin la rulih, sipenting dahikenlah, ula minter arapken untung. Ula dekahen rukur asangken ndahikenca. Ayat 2 ikataken “tamaken duitndu ibas piga-piga usaha-tuhu ibas mbue usaha” ngatakenca tupung lit kesempaten erdahin ntah pe erusaha harus ipakeken alu mehuli, ula puas ndahiken dahin e alu cara-cara bsindekah, tapi kembangken pendahin, usaha alu cara-cara simbaru. Seh maka la hanya kita singakapi ulih pendahin e, tapi kalak sideban pe tersampat arah kai siidahiken. Ayat-3-5 ngatakenca makai bas erdahin ras erusaha la banci kita bersikap pasif, tapi harus aktif, tutus, anem gia lit tantangen tapi la banci ngadi ndahikenca. Tapi harus si inget kai pe si idahiken kita harus ersukuten man Dibata, sebab Ia kap singkuhi ras masu-masu pendahinta. Ayat 6 ngatakenca maka erdahinlah tupung lit kesempaten guna ndahikenca, baik erpagi-pagi ntah berngi, mejingkat ras tutus ate ndahikenca pasti lit nge ulih pendahin si idahiken. Lit si idah kalak sindahiken dua dahin sekaligus, umpamana sekalak pegawai tapi lit ka usaha sideban, e mrjuma ntah pe lit ka asuh-asuhenna. Erdahinlah tupung lit denga kesempaten, ula milih-milih dahin, dahin ntah pe usaha si kitik adi dahiken alu tutus, pasti berkembang (bdk.Luk.16:10).

Tema ta paksa enda eme perbahanen kalak pentar, nuduhken uga sikapta sebagai kalak sierkiniteken ibas makeken pendahin sebagai alat guna ncukupi kebutuhenta ras mpermuliaken Dibta. Sada sisi dahin eme sada hal siarus i perjuangken, latih, mbue pengorbanen, sisi sideban pendahin eme pasu-pasu Dibata si banci ialoken arah ulih pendahin. Engkai maka kita arus erdahin, erkiteken Tuhan jine pe erdahin. Ia njadiken langin ras doni enda ras kerina isina, ras mereken mandat man manusia guna njaga ras ngusahai doni enda, emaka kita harus erdahin. Ibas kita erdahin arus i lakoken alu bertanggung jawab, alu cara ngasup mengembangken pendahin, meningkatken pendapaten ibas ulih pendahin alu cara si payo. Ibas ndahiken dahin la banci itunda-tunda, tapi lit kenca kesempaten minterlah dahiken.

Ibas mengembangken diri ibas ndahiken dahin bagepe usaha tetap harus erlajar uga maka pendahin ras usaha si idahiken kita banci berkembang, ngasup njabab tantangen ras kemajuan zaman. Kreatifitas ibas ndahiken dahin guna ncukupi kebutuhen kegeluhen sangat ibutuhken. Umpamana sekalak moria lit ibas ia talenta guna erdakan masakan khas karo, emaka ibas ia mengembangken talenta enda ibuka na usaha (catering) khusus masakan karo. Ijenda ibutuhken kreatifitas guna mengembangken usahana, umpamana uga maka gulen si itangerken ntabeh, bersih, kemasenna arus menarik, ras la mesera guna ndatken masaken enda (promosi, banci idatken arah media sosial). Uga maka cimpa kalak karo banci laris bagi pangan khas daerah sideban (bandingken ras tape kuningan, brownies bandung) tentu kalak karo harus mengembangken kreatifitas na erban pangan enda. Uga maka tupung man cimpa la melket tan ta adi sipan, adi tape kuningen ntebu ras kitik emaka keri sekali ipan, banci ka nge iban cimpa ula galangsa gelah keri sekali ipan, ntah pe uga adi cimpa isina/inti la hanya gula tualah, tapi banci ka keju, kacang, strawberry rsd. Kalak si kreatif , idahna peluang kai si banci untung ibas usahana. Pang ia muat resiko, labo minter untung lebe iukurken tapi bas proses na git ia mengembangken diri ibas erdahin.

Pdt. Rena Tety br Ginting-GBKP Runggun Bandung Barat

NGERGAI DAHIN RAS SIERDAHIN
Kolose 4:7-14

Kolose 4:7-14 eme kata pendungi si isehken Rasul Paulus man perpulungen Kolose. Tupung Paulus nulisken surat enda, ia sangana ibas penjara (ay. 18), janah tujun nulisken surat enda eme guna petetap ukur perpulungen kerna dahin pelayanenna rikut ras kegeluhen teman-temanna si ikut muat bagin ibas meritaken berita si meriah. Situasi si inanami Paulus, anem gia ia ibas situasi penjara, tapi la ngadi guna meritaken berita si meriah. Bage buena tantangen si ihadapi Rasul Paulus ibas kegeluhenna, tapi engkai maka la ia surut nehken berita si meriah? Hal enda i pengaruhi keleng atena man Dibata si mereken kepercayaan man bana guna ngelai perpulungen gelah tek man Tuhan. Emaka uga beratna pe tantangen si lit ibas nehken berita si meriah, la ngkurangi semangat Rasul Paulus ras teman-temanna guna tetap erberita, mereken pergegeh ras semangat man perpulungen Kolose.

Keberhasilan Rasul Paulus nehken berita si meriah, la terlepas ibas penampat teman-temanna si ikut mendukung perdalinen pelayanen Paulus. Paulus ras teman-temanna jadi sada team si solid ras ikut ertanggung jawab. Enterem kalak enggo ngaloken Yesus Kristus sebagai Juru Selamat, ras enda bekas pendahin ras pelayanan Rasul Paulus, she maka gelar na itandai kalak sinterem. Ibas keberhasilen ras ketutusenna nehken berita si meriah Rasul Paulus la ngelupaken teman-temanna eme Tikikus si nampati Rasul Paulus naruhken surat-surat (bdk.Kol.4:7;Ep. 6:21); Erguna sekalak budak si enggo tek man Yesus janah jadi kalak si tutus. Aristarkus sienggo jadi perberita si meriah ras erkiteken pang ia ngelawan penembahen man Dewi Artemis ia itamaken ku penjara; Markus bebere Barnabas, sekalak simbue kal penampatna nandangi pelayanen Paulus; Justus si ipake rumahna i Korinti guna nehken berita simeriah; Epapras teman sada aron Rasul Paulus erkiteken pernah radu ras ipenjaraken; Dokter Lukas ras Demas sekalak si enggo tek man Yesus; Nimpa ibas Laodikea nari, sekalak diberu si beluh rende ras landek ras Arkipus si melala nampati ras ndungi dahin si ibereken Paulus man bana. Enda me gelar-gelar sinampati Rasul Paulus bas dahina meritaken berita si meriah, erbage-bage latar belakang kegeluhen si lit ibas kalak enda, tapi ersada arih ras ertutus ate ia kerina ndahiken dahin nampati Rasul Paulus ibas ndahiken dahin pelayanenna.

Tema ta ibas perpulungen jabu-jabu enda eme ngergai dahin ras si erdahin, maksudna ijenda eme uga perpulungen ras kerina serayan (pertua/diaken) ngergaken pendilo si enggo isehkenNa man serayan. Jadi serayan ibas meritaken Kebenaren Dibata i tengah-tengah perpulungen labo hal sigampang. Ibas setiap lagu langkah kegeluhenna ia harus jadi terang, gelah arah kai si ilakokenna terpuji gelar Tuhan (bdk. Matius 5:16). Jadi serayan Tuhan megati melala dahin pelayan si arus i dahiken, ngikuti pembinaan, ndahi kalak sakit, rapat, sermon, ras kegiaten-kegiaten si deban si megati harus nadingken pendahin bagepe keluarga. Megati ibas dahin pelayanen e turah ka konflik, persoalen i tengah-tengah perpulungen, janah serayan e isalahken. Ibas kerina persoalen si lit sekalak serayan tetap harus ndahiken dahinNa, la surut erkiteken lit persoalen, sebab labo manusia si mada dahin e, tapi Tuhan kap simadasa, serayan terjeng suruh-suruhenNa ngenca.

Ibas kerina latar belakang si lit ibas ibas serayan si meganjang sekolahna, si biasa-biasa pendidikenna, si bayak ras si biasa-biasa kegeluhenna kerina seri ibas Dibata guna ndahiken dahinNa. Ibas ndahiken dahinNa kerina meherga iadep-adepen Dibata. Ibas majekken kula Kristus lit kalak si ertutus ate mendukung temanna sada dahin guna tampil ibas pelayanen man jelma sinterem. Enda me si inanami Paulus, lit kalak siertutus ate, arah pudina, la itandai kalak, tapi Paulus sangat tergantung nandangi pendahin kalak si kurang ndatken peran penting ntah pe berasa di balik layer pelayanen Paulus. Pendahin ras pelayanen Rasul Paulus labo banci mejile tanpa dukungen teman-temanna.

Emaka mari siergaken dahin ras sierdahin Tuhan si enggo terpilih ibas periode 2019-2024 enda. Selaku anggota perpulungen meherga min siakap kerina serayan Tuhan anem uga gia latar belakang kegeluhenna, mbelin ntah kitik gia peran na ibas pelayanen itengah-tengah perpulungen la banci sibeda-bedaken. Sekalak serayan la banci menonjolkan diri ibas ndahiken dahinNa, ntah pe pekitik bana ibas tanggung jawab si arus ilakokenna. Selaku perpulungen mari sibereken penghargaan man “peminpin rohani” ta, sebab kesuksesen ngeluh, kemalemen ate si idatken kita la terlepas arah penjujuri Dibata arah pelayanen serayanna si ngajarken kita kerna kearusen nggeluh.

Pdt. Rena Tety br Ginting-GBKP Runggun Bandung Barat