Tema :

“Pesikap Rumah Pertoton”

Hagai selaku sekalak nabi erdahin ia menaken bulan Agustus 520 sope Masehi. Nubuatna itujuken man kalak Yahudi singgo mulih I pembuangen Babil nari ras secara khusus man penguasa (bupati) paksa sie e me Yerubabel ras imam besar Yosua. Hagai termasuk si ikut mulih i pembuangen nari tapi kerehenna la bas gelombang pertama tahun 538 tapi bas gelombang sipeduaken tahun 520 kenca 18 tahun raja Koris mbere perintah segelah Yehuda mulih kukutana lako mpekena Rumah Pertoton ras kutana. Nubuat Hagai tepatkel bas paksa e, ia mendorong gelah pembangunen Rumah Pertoton misi terusken sebab palas pertama nggo ibenaken tahun 538 tapi enggo 18 tahun dekahna tetap langa dung.

I bas pemerentahen Raja Darius singgantiken raja Kores tahun 522-520, ije Nabi Hagai mpersingeti Bupati ras imam besar maka alasen langa mbangun Rumah Pertoton labo saja ngenca erkiteken lit perlawanen ras larangen I bas kalak Samaria tapi lit pengakap masyarakat kerna nubuat nabi Yeremia (Yeremia 25:11) maka ndekahna masa pembuangen lit pitu puluh tahun, sementara adi ihitung tahun 586 seh tahun 538 lit 48 tahun. Tempa-tempa alasen penundan pembangunen sebab lenga genep 70 tahun. Padahal menurut kebiasaan kalak Yahudi angka 70 e me angka simbolis untuk sada generasi tapi kalak simulih ipembuangen nari erban alasen erkiteken masa pembuangen lenga genap pitu puluh tahun.

Masa damai ras kemakmuren bagepe keriahen i nanami bangsa Israel kenca mulih i taneh pembuangen nari. Bangsa enda mengutamaken membangun rumahna sendiri ras mpejilesa (Hagai 1 :4), tapi membangun kembali rumah pertoton lenga akapna pas waktuna (Hagai 1 :2). Padahal arusna pembangunan Rumah Pertoton arus iperlebe asangken pembangunen rumah pribadi. Ije me Tuhan mpersadaken bangsaNa, si ngajari kita gelah ngasup sikeleng-kelengen ras si ajar-ajaren pekepar.

Adi sibandingken ibas jaman raja Daud bagepe Salomo. Daud la meriah ukurna tading iistana sementara Tabut Perjanjian ringan itenda, bagepe Salomo seh riahna ukurna sebab ibere Tuhan perintah man bana lako mbangun Rumah Pertoton.Tapi Yerubabel ras Yosua sebagai pemimpin politik ras agama ibas paksa si e la bagi Daud ras Salomo. Peletakan batu pertama Rumah pertoton nggo ilakoken ibas tahun 538 tapi sehtahun 520 tetap langa dung. Kenca reh nubuat nabi Hagai emaka duana pemimpin Yehuda enda mulihken tergerak ukurna lako ngiahken kalak Yehuda lako nerusken pembangunen Rumah pertoton.

Kai jadi ngaadi kita la perduli ibas ngelitken rumah pertoton?. Banci torah kejahaten, la tertadingken rumah mbue pinangko, la lit ketenangen idalin mbue perampok, anak-anak la mehamatku orang tua, pemerintahen pe korupsi, kalak beragama lanai jadi teladan, janah page pe la mbuahi bas pengertin kita si nuance kalak siperanisa (bandingken ayat 6). E maka pembangunen Rumah pertoton e seri pentingna ras pembangunen rumah pribadi, adi la bage rumah sinibangun e pe labo banci mbaba ketenangen man singianisa tapi lit saja rusur sinanggel, la siangkan ras la sikeleng-kelengen pekepar sebab ajaren Tuhan lanai nggeluh itengah-tengah jabu.

Ingetlah strategi Kores waktu ia jadi raja I Babel, tindaken pertama sinibahanna e me nuruh kerina bangsa jajahenna mulih mpekena kutana ras terlebih mbangun rumah pertotonna. Kores meteh adi kiniteken idalanken maka mental rakyatna jadi mehuli ras teratur dingen jujur sebab labo lit agama ngajarken si la mehuli man umatna. Bagepe Daud ras Salomo meteh maka pembangunen Rumah Pertoton adalah yang utama sebab arah e me Tuhan reh ngajarken simehuli man umat-Na alu bage lanai mesera akap raja membina ras mimpin bangsana.

Kalak Kristen si gundari pe i persingeti gelah ngergai ras ngerawat rumah pertoton disamping kita ngukurken ras membangun rumah pribadinta. Lit ka erpengakap adi rumah pribadi enggo lit enggo tenang,tapi kepe la saja e ngenca sipenting tapi harus ka si ukurken Rumah Pertoton ija kita beribadah sebab ije nge umat erlajar kerna kekelengen, keersadan, ras pelayanen sapih-sapih kita. Adi Rumah Pertotonta langa lit maka perlu siutamaken uga gelah lit janah adi enggo lit perlu siutamaken uga memeliharasa gelah tetap layak jadi ingan pulung mbegi kata Tuhan. Kenca bangsa e mbegiken kata Tuhan arah Nabi Hagai mis torah semangatna lako nerusken pembangunen Rumah pertoton seh maka tahun 515 entahpe 5 tahun kemudian nggo pajek Rumah Pertoton si layak.

Pdt. I. B. Manik

Tema :

“Bapa Si Paguh Erkiniteken”

Kitab Perbahanen Rasul-Rasul itulis alu tujun gelah berita simeriah ibagiken kubelang-belang doni labo terbatas man kalak Jahudi saja. Adi si oge ibas kerina si idahiken Rasul-rasul Ijelit gegeh si saling berhubungen sijadi penentu e me sipemena gegeh kuasa Kesah Sibadia ras sipeduaken gegeh pertoton. Manusia ertoto sebab mesikel ia ngangka kebenaren Tuhan jenari Kesah Sibadia mbegi janah ngangka isi pusuh kalak siertoto.

Bas jaman sie sekalak non Jahudi bengket jadi pengikut Kristus seh metahatna erkiteken kalak Kristen Jahudi erpengakap maka kalak enda harus bali ras kalak Jahudi emekap ngaloken kerina kebiasaan-kebiasaan ras adat istiadatna misalna harus sunat, erpantang macam-macam rsd.

Adat istiadat bagepe kebiasaan-kebiasaan Yahudi jadi penghalang man bangsa-bangsa non Yahudi jadi Kristen. Kesah Sibadia menembus ras ngeruntuhken tembok penghalang ras menggapai kai si la terjangkau manusia. Sebelumna, Rasul Petrus labo ia pang mbentasi baleng-baleng siigarisken kebiasaan kalak Yahudi misalna man pantangen-pantangen bagi rubia-rubia misalna babi, binatang melata rsd. Tapi bas paksa Petrus ertoto (pkl 12:00 waktu ertoto kalak Yahudi) I loteng rumah Simon penyamak kulit rempet iidahna langit terbuka jenari nusur me piga-piga jenis rubia-rubia siikatakan pantang bas kalak Yahudi, janah enda me i suruh segelah ipotong ras ipan Petrus (10:9-16). Bagekape kira-kira pkl 15:00 (waktu ertoto kalak Yahudi) siKornelius ijumpai malaikat, janah nina malaikat maka karina toto ras pemerentah pe persembahen siipersembahkenna nggo ialoken Tuhan. E maka isuruh malaikat Kornelius ngutus anak buahna lako ndilo Petrus kurumahna.

Arah ogenta enda banci siidah uga gegeh pertoton ras peranan Kesah Sibadia. Petrus ertoto pkl 12:00 ras Kornelius ertoto pkl 15:00, waktu kalak enda ertoto ije me kuasa Tuhan teridah. Man Petrus ibereken gegeh guna menembus kebiasaan ras pantangen kalak Yahudi segelah ola mbiar ia reh ndahi dingen ngajari Kornelius sindekah me enggo muas melihe kerna kebenaren Tuhan.

Arah pengogenta enda pe siidah uga ulih pertoton sekalak bapa sipaguh erkiniteken e me siKornelius. Amin gia ia erjabaten sebagai komandan Rumawi si membawahi 100 perajurit I Kaisaria tapi ia erkemalangen man Tuhan. Amin gia bagi si sulit ras melala tantangan untuk ngikut Dibata sebab selaku ia golongan non Jahudi tapi tetap ia paguh ras tutus ertoto..

Kalak non Jahudi sierkemalangen man Dibata bas bahasa asingna “proselit’. Proselit enda terbagi dua sipemena proselit saleh siertina kalak non Yahudi menganut agama Yahudi alu ngikuti kerina adat istadan ras kebiasaan-kebiasaan kalak Yahudi misalna adat sunat ras pantangen-pantangen. Sipeduaken proselit gerbang siertina ia ngikuti perjumpan-perjumpan rutin I darat gerbang Bait Allah I pelataren ingan kalak non Yahudi ngikuti ibadah Yahudi. Proselit gerbang tek man Tuhan janah ndalanken perintah-perintahna misalna ertoto ersembah ras erpemerentah nampati tapi la ngikuti adat istiadan ras kebiasaan-kebiasaan Yahudi. Kornelius termasuk proselit gerbang.

Adi labo kin erkiteken toto ras Kesah Sibadia labo banci Petrus reh ndahi entahpe ertemue kujabu kalak silabo Yahudi sebab hukumna Najis, tapi erkiteken ibukaken Tuhan matana ibas pengenehenen waktu I loteng rumah Simon penyamak kulit I je Petrus meteh maka kai sienggo itahirken Tuhan lanai banci inajisken manusia (10:15)
Pertoton ras kuasa Kesah Sibadia ngeruntuhken kerina tembok-tembok pemisah sierbanca manusia entah pe bangsa-bangsa terhalang reh ku Tuhan. Amin pe ia la kalak Yahudi tapi adi pusuhna memang mesikel tek man kebenaren Tuhan maka Kesah Sibadia mis ngutus anak-anak-Na lako njumpai ia segelah ndat pengajaren kerna kebenaren Tuhan, bagi Petrus I utus Tuhan kurumah Kornelius lako ngajari Kornelius ras karina anggota keluargana.

Kornelius sebagai gambaren bapa sipaguh ibas erkiniteken banci teridah arah gambaren e me : 1. Muas melihe kerna kebenaren Tuhan seh maka ia jadi sekalak ‘proselit’ padahal ia sekalak perwira Rumawi simembawahi 100 perajurit, 2. La ia mbiar terancam jabatenna sebab ia berbeda ras kiniteken kalak Rumawi sedeban, 3. Ia kalak simeteruk rukur teridah arah mungkuk ia seh ku taneh I lebe-lebe Petrus padahal I bas paksa si e bangsa Yahudi e me bangsa siiteruh kuasa Rumawi (10:25), 4. Ia erpemere rikutken peraturen agama Yahudi misalna persepuluhen, persembahen rsd, 5. Ia tutus ertoto sesuai ras waktu jam doa kalak Yahudi.
I bas menyambut HUT Mamre si pe 23-ken marilah sijadiken bapa sipaguh erkiniteken enda jadi usihenta segelah sentudu bagi semboyan Mamre e me “Mediate ras Erpemere.

Pdt. I. B. Manik

Ogen : Ulangen 6:20-25

“Tuhan Mbebasken Bangsanta”

Peringeten wari kemerdekaan Indonesia 17 Agustus 1945 seh pentingna man generasi paksa enda sebab arah perayaan e ngingetken kita kerna sejarah kemerdekaan bangsa emekap ndarat arah penjajahen Belanda telu setengah abad ras i bas penjajahen Jepang sidekahna telu setengah tahun. Sejarah ngajarken kita kerna keberhasilen ras kegagalan para pemimpin masa lalu, kuga sistem perekonomian si pernah lit, bentuk-bentuk pemerintahen, ras arah sejarah kita banci mpelajari kai-kai saja simpengaruhi kemajunras kemunduren sada bangsa ntah peradaban gelah banci jadi pelajaren ku masa depan.
Ibas kamus besar bahasa Indonesia nina, sejarah mengandung telu pengertin e me :

1. Kerna asal usul entah silsilah,

2. Kejadin ras peristiwa siterjadi i masa si nggo lewat,

3. Pemeteh kerna turi-turin si pernah terjadi i masa lalu. Alu bage maka sejarah e ertina peristiwa si pernahterjadi bas masyarakat i bas paksa si nggo lewat. “Jangan sekali-kali meninggalkan sejarah”enda isingkat alu kata “Jasmerah”, eme semboyan si pernah ikataken Soekarno i bas pidato terakhirna 17 AGUSTUS 1966.

Ulangen 6 : 20 - 25 siorati kita pe ngerana kerna pentingna nuriken sejarah man generasi penerus bangsa. Sejarah keselamaten bangsaIsrael ndarat i bas perkawanen nari ku taneh kemerdekaan si nibereken Dibata. Adi nungkun anak-anakta kerna engkai maka kita harus ngikutken kerina undang-undang-Na maka orang tua perlu nuriken sejarah keselamaten e man anak-anakta turun temurun. Maka nina orang tua ku anakna, “mbarenda kami budak raja Mesir, tapi Tuhan nggombebasken kami alu gegehna simbelin. Nggo iidah kami alu mata kami jine ilakokenna tanda kuasa ras ibahan-Na kejadin-kejadinsi erbahanca mbiar bangsa Mesir bagepe rajana ras kerinapegawaina. Ibebasken-Na kami i Mesir nariguna maba kami ku jenda janah ibereken-Na man kami negeri enda sue ras padan-Na man nini-nininta. Kenca bage iperintahken Tuhan gelah kita ngikutken kerina undang-undang-Na. Adi siikutken ntah pe patuh kita man undang-undang-Na maka i pasu-pasu-Na kita.Bageme sejarah si harus ituriken bangsa Israel man anak-anakna secara turun-temurun.

Ibas ogenta (Ulangen 6) enda, erkemalangen man Dibata ertina ndalanken kerina undang-undang-Na (Ulangen 6 : 2) ras ngkelengi Ia asa ukur, tendi ras asa gegeh (ayat 5). Bas hubungenta ras Tuhan maka kekelengen ras erkemalangen man Tuhan titik temuna e me kepatuhen man undang-undang Tuhan. Kepatuhen entah ketaaten nandangi undang-undang Tuhan merupakan kunci lako ndatken pasu-pasu ras kemalemen ate e me :

1. Cawir metua (ayat 2),

2. Mbue anak/jadi bangsa si mbelin (ayat 3),

3.Kinibayaken sebab ngiani taneh mehumur (ayat 3), ras 4. Peningkaten perekonomian ras kemakmuren (ayat 10-11). Em pasu-pasu si ijanjiken Dibata man bangsana si patuh. Kepatuhen man Dibata sebagai pengataken bujur sebab ia nggo mulahi bangsa enda bas taneh perkawanen nari menuju ku taneh perpadanen si dem dadih ras tengguli. Kekelengen Dibata ibalas alu kepatuhen man Ia(1 Yoh. 4:19).

Pesan sejarah ibas kitab Ulangen enda perlu iterusken ku generasi penerus gelah ia pe ula lupa kerna perluna kesetiaan man Tuhan alu ndalanken undang-undang-Na. Sejarah pe mencatat uga akibatna adi bangsa e lapatuh. Israel banci ngiani taneh perjanjin ras ipanna ulihna latih asal ia tetap patuh man Dibata tapi adi la patuh man Dibata amin gia ia tading i Israel tapi la banci ia nggeluh dame sebab gangguen e reh i bas bangsa e sendiri ras i bas bangsa sideban. Bukti ketidak patuhen i bas sejarah e me pembuangen Isrel Utara bas tahun 722 ras pembuangen Israel Selatan ku Babel 586, enda merupakan akibat kelapatuhen Israel nandangi undang-undang Tuhan. .

Pdt. I. B. Manik