Tanggung Jawab Ibas Jabu
(Kolose 3:18-21)

Kata Penaruh
Jabu eme “persadan” simetuana ijadiken Dibata. Jabu eme persadan si kitik menentuken kerina keadaan kegeluhen, erbangsa ras ernegara, ermasyarakat ras ergereja. Adi kerina jabu banci ngaturken anggota jabuna alu mehuli, dingen nggeluh bagi arusna maka lanai lit “kinigutulen” ras kebiaren ibas geluh enda.
Emaka ibas tradisi kalak Yahudi “pendidiken bas jabu” jadi pilar pembentuken bangsa si megegeh. Fungsi jabu lebih asa fungsi sekolah ras gereja ibas nuanken “pemeteh ras prilaku nggeluh”. Adi si baca ibas Ulangen 6:4-9 maka pendidiken si terpenting eme nuanken “kemalangen man Tuhan”, sebab erkemalangen man Tuhan eme ulu kerina pemeteh ra kepentaren (bd. Masmur 111:10; Kuan-kuan 1:7) . Janah kerna sie labo ipercayakenna man pihak lembaga si ngurusi kerohanian, tapi jadi dahin si “penting ibas jabu”, emaka nina “ajarkenlah e alu mulih-ulih, sanga kam kundul-kundul, sanag kam bas perdalinen, sanga kam medem-medem. Harus iiketkenndu ibas tandnu, ras tamaken e ibas perdempakenndu, tulisken ibas binangun pintu rumahndu ras tiang pintu gerbangndu.
Arah bahan perpulungen jabu-jabunta sendah ipersingeti ka kita uga maka kerina anggota keluarga e banci ndalanken tanggung jawabna, sebab adi kerina anggota keluarga ndalanken tanggung jawabna, lanai kai pe lit si jadi persoalen.

Tanggung Jawab Ibas Jabu
1. Ndehara (ay. 18)
Tanggung jawabna eme “patuh man perbulangen”. Ijenda banci mis kita si jababen ban moria e, “banci kami patuh adi .... “
Tapi erpalasken Pustaka Si Badia, maka sekalak ndehara harus patuh man perbulangenna sebab perpulangen nge takal ndehara bali ras Kristus takal perpulungen( Epesus 5:23), terdauhen ituriken ibas 1Petrus 3:1”Patuhlah man perbulangen, gelah adi perbulangen “ la tek” nangdangi Kata Dibata, banci ia tek. Ijenda igaris bawahi adi lit perbulangen “la tek man kata Dibata” ijenda igambarken kepatuhene labo erkiteken perbulangen e enggo “sempurna” tapi justru kepatuhen ijenda gelah maba pertobaten man perbulangen. Alu bage lanai lit si begi istilah “banci aku patuh adi memang layak ipatuhi adi lang uga pe lah ningen kami patuh”. Ibas kitap Epesus 5:21“patuhlah sekalak man si debanna erkiteken kam mehamat man Kristus”. Jadi kepatuhen e erpalasken “kiniteken” labo erpalasken cocok siakap entah lang.

2. Perbulangen (ay. 19)
Ngkelengi ndehara ras Ula kasar man bana. Ngkelengi ijenda mbue jenisna. Perbulangen harus engkelengi ndeharana bagi Kristus engkelengi perpulungen. Tanggung jawab perbulangen ijenda eme mereken geluhna “totalitas” guna ndehara bagi Kristus “totalitas” ngendesken geluhna guna perpulungen. Kristus engkelengi perpulungen tersirat arah:
1. Mere man (bd. Yoh. 6:35) tanggung sekalak perbapan bas jabu eme encukupken keperlun kegeluhen.
2. Mere kenyamanen, kesejuken ras kepuasen, seh maka lani muas (bd. Yoh. 4:14), kejahaten-kejahaten si terjadi ibas geluh enda erkiteken ndarami kepuasen sebab kerina “muas/haus”. Tanggung jawab sekalak perbapan bas jabu uga maka kerina isi jabu e “puas ras lanai muas” seha maka kerina isi jabu e lanai terjebak ibas ndarmi kepuasen-kepuasen i darat rumah.
3. Mereken “terang” (Yoh. 8:12) tanggung jawab perbapan ibas jabu eme uga maka seisi jabu e la “tertukutuk, la tersesat” ibas ndalani dalan kegeluhen. Terang e pe sekaligus mereken semangat (motivasi) man sisi jabu guna terang ngidah ku masa depan.
4. Mereken keteladanen nggeluh, gelah ieteh anak jabu e arah dalan siapai si harus idalanina, gelah seh kubas kegeluhen si damai ras senang (bdk. Yohanes 14:6) .
5. Jadi permakan (bd. Yoh. 10:11)sekalak perbapan terus njagai anak jabuna nggeluh ibas dame ras keriahen (bd. Mas. 23), mabasa ku mbal-mbal, ertina ngelepasken perberkat anak-anak alu pertoton, bage pe ibas karaben wari mabasa mulihi ku karang (ku rumah) je nari adi lit si lalar idarami, iperiksa sada-sada entah lit si terluka, gelah banci itambari ras ibaluti lukana. Ban buena kesibukenta selaku perbapan lanai kap si eteh pe katawari anakta berkat ras mulih kurumah, lanai si eteh entah enggo lit luka (pusuh) sebab adi luka jasmani uga pe mis ia ngata man banta jenari mis si tambari, tapi luka pusuh si ibahan dosa megati lanai sempat kita nungkuninsa, padahal kematen si meratna labo ban luka jasmani tapi luka pusuh siibahan dosa.
6. Ngelai ras ngendesken Kesahna (Mat. 20:28) tanggung jawab sekalak perbapan eme “uga maka banci malem ate anak jabuna ras uga maka kerina banci terkelin” arah kata sienda maka sekalak perbapan lanai banci mengorbanken anak jabuna erkiteken “kesenangen pribadina”, harusna kai pe ilakoken gelah jabu e banci terkelin.

3. Anak (ayat 20)
Megati is begi istilah “anak pe nganaki” encidahken kesetresen orang tua ibas ngajarken anak. Ngidah buena anak si lanai terajarken, emaka megati kel ibahan orang-orang tua seminar-seminar pendidiken man anak, seminar “kenakalen-kenakalen anak remaja”, tapi jarang kel si begi seminar “kenakalen orang tua”. Banci jadi erkiteken la kita ngasup ndalanken tanggung jawabta bagi si datas ndai “ndehara pe la patuh man perbulangen, akapna ia rusur kepala e, ia atena rusur ibegiken, la kenca bage berjut, merawa rsd. Perbulanegn pe la ka totalitas mereken kegeluhenna guna kemalemen ras keterkelinen jabu, terjebak kubas ndarami kepuasen-kepuasen pribadi, piah dungna anak pe ndarami kepuasenna saja.

Arah renungenta sendah maka selaku anak harus patuh man orang tua, sebab orang tua me wakil Dibata mereken kegeluhen man anak, orang tua me wakil Dibata encukupken kerina keperlun anak, jadi wakil Dibata maba anak e kubas keterkelinen. Perlu pe ieteh anak-anak maka labo lit orang tua si ersura-sura encelakaken anakna, emaka adi lit peraturen-peraturen si ibahan orang tua ula ka akapna e “merampas kemerdekaanna, tapi igejapnalah e sada usaha pendisiplinen ra pembentuken karakterna, ula ka iakap anka-anak adi salah ia irawai enggo menjajah hak azasina. Sebab adi la kin irawai orang tua nakna si ersalah, isampatina kap meneken anakna e (bdk. 2 samuel 14 “Aku jadi bapana, janah ia jadi anakKu. Sanga ibahanna salah, Kuukum ia bali ras sekalak bapa ngukum anakna; Kuan-kuanen 23 :13-14 “Ola kam biar-biaren ndidik anakndu, adi ipekpekndu ia labo ia mate, tapi selamat”)

Kesimpulen :
Jabu si ndatken kemalemen ate eme jabu si anggotana kerina nggeluh ibas ndalanken tanggung jawabna. Ijenda labo perlu si ukuri ise si mberatna tanggung jawabna ras ise si menanhangna tanggung jawabna. Tapi masing-masing harus rukur uga maka kerina naggota keluarga e ndatken kemalemen ate.
Sada anggota kelurga la ndalanken tanggung jawabna maka kerina anggota keluarga e rate mesui (kena imbasna).
Ijenda tempa tanggung jawab perbapan si mbelinna ibas jabu, janah memang kin bage nge arusna, saja man ndehara sebagai mitra perbulangen maba jabu e jadi persembahen si merimna man Tuhan, maka kai ka si isuruh perbulangen maka ia pe harus ka patuh. Alu bage enggo ka mbue turunen patuh ndai, emaka lit kalak si nulisken makalebih kurang lit 40 tanggung jawab ndehara bas jabu. Enggo termasuk tanggung jawab sebagai ndehara ras tanggung jawab sebagai nande (bdk. Kuan-kuanen 31 :10-30)

Pdt. Saul Ginting

GBKP Runggun Bekasi

Pilih Kalak Si Erpemeteh Ras Pentar
(Kejadian 41:33-36)

Kata Perlebe
Ibas paksa enda rusur si begi istilah “Ganti Presiden”, secara positif kita nanggapisa, sie erkiteken ketedehen si mbages litna sada pemimpin si banci “mengakomodir” kerina sura-sura kalak si nggeluh ibas bangsa enda. Jujur kel siakui maka peran sekalak pemimpin e tuhu-tuhu menetuken nasib bangsa. Saja adi si ganti “presiden” ise gantina ? lit kin si lebih mehuli, adi lit ya ganti saja, adi lalit mari si dukung si enggo jelas.

Kerajaan Mesir iperhadapken kubas 2 masa si saling bertolak belakang, eme “masa berkelimpahen (masa page perngis)>< Masa kekurangen (page si lambang). Dua situasi enda pe mewakili kerina keadaan kegeluhen ibas doni enda. Kalak si banci memanfaatken “situasi berkelimpahen (rani si mbue) alu mehuli maka banci ngenanami kemalemen ate ras kecukupen (bahagia) ibas paksa “kekurangen (la rani) ”. Klaka si terlena ibas masa “kejayaan” la mempersiapken masa sulit, pasti terpuruk ras maba kubas kehancuren.

Perlu kel pemimpin si erpemeteh ras pentar si banci maba bangsa kubas kemakmuren, aminna pe situasi kegeluhen enda terus mengalami perubahen. “lit pandangenna si ndauh ku lebe, si labo ngkeriken kerina “sumber daya” ibas zamanna alu la ngukurken masa depan bangsa e. Erkiteken sie tiap ganti “presiden (pemimpin)” tambah rusur utang negara. Adi tambah utang negara erkiteken lit pembangunen wajar, sebab pembangunen e guna kesejahteraan masyarakat. Pembangunen infrastruktur tentu e jadi sada aset (infestasi) si banci jadi sumber income negara ibas paksa si reh.
Terdauhen uga kita milih pemimpin “Erpemeteh ras Pentar ?” mari si gargari Kata Dibata si jadi renungen bas PJJ-ta Minggu enda.

Nggargari Isi Ayat Renungen
Ay. 33 , Erpemeteh ras Pentar
Ibas terjemahen bahasa Indonesia “Erpemeteh = Berakal Budi ras Pentar = Bijaksana. Terjemahen Bhasa Ingris : Disceet dan wise
Sinonim adjektiv Discreet ....
1. careful, circumspect, cautious, wary, chary, guarded, tactful, diplomatic, prudent, judicious, strategic,politic, delicate, sensitive, kid-glove
2. unobtrusive, inconspicuous, subtle, low-key, understated, subdued, muted, soft, restrained
3. discerning
4. circumspect

Kata “Wise” ertina bijaksana
Si ipindoken Yusuf man raja Firaun guna milih kalak si tuhu-tuhu “erpemeteh (cerdas secara intelektual entah rusur si begi alu istilah IQ adi ibas bahasa inggris kalak si bage megati igolongken kubas kalak si lit ibas ia “knowledge =pengetahuan ras skill =keahlian) ras pentar (akal budi =bujur si megati ikataken kubas “kecerdasan Emosional (SQ) ras kecerdasen spiritual (SQ), banci si definisiken em kalak bujur = la berat sebelah (bijaksana). Sebab kalak pentar la berakal budi (bujur) pasti terjebek kubas tindaken si membahayaken sebalikna berakal budi (pentar) la ka erpemeteh erbahan suasana jadi mate, lalit dinamika ibas kegeluhen.

Bas kegeluhenta melala si jumpai kalak si “erpemeteh”, adi gelar akademina mbue menyandang gelar profesor doktor, tapi erkiteken kurang “pentar (berakal budi) justru erbahan negaranta enda lit ibas ambang kehancuren, sebab ipakena pemetehna guna meperjuangken sura-surana.
Emaka ibas kita milih pemimpinta mari “sipilih” kalak si erpemeteh bagepe berakal budi, lit ibas ia kebujuren, si labo saja ngukurken dirina sendiri. Kita milih pemipin si “sejalan/seimbang antara “otak ras pusuhna”, cerdas secara intelektual, bage pe cerdas ka emosi ras spiritualna. Alu kata si deban pilihlah pemimpin si “jago, cerdas, terampil (erpemeteh) ras bijaksana, bujur (pentar (berakal budi).
Ay.34-36. Pemimpin Visioner, Strategi ras Sinergi

a. Visioner
Gambaren pemimpin si “erpemeteh ras pentar” eme lit pengidahna ku lebe(visioner) si igambarken bagi Yusuf si banci ngidah kai si terjadi ibas paksa si reh. Visi e eme turah arah kepekaan rohani )istilah kalak karo “megermet/sense belonging”. Kepekaan rohani e turah arah uga kita ngidah kai ate Dibata si ilakokenNa ibas paksa si reh. Tuhan banci ngerana arah nipi, arah tanda-tanda alam. Jusuf banci ngidah rencana Dibata nangdangi bangsa Mesir arah ngertiken nipi raja Mesir. Alu ngidah kai si terjadi ibas paksa si reh tentu ngasup erbahan sada tindaken antisipasi gelah kegeluhen tetap lit ibas “kemakmuren”. Visi e turah banci saja arah pemeteh, alu ngukuri kai si lakoken gundari guna menyongsong paksa si reh, ijeme pentingna (pemeteh).

b. Strategi
Visi tanpa strategi tentu sia-sia, seri ras biang natap gayo, tehtehen je, tehna entabeh nari nge gayo e tapi la ia pang nangkapsa, erkiteken la tehna cara nagkapsa. Ijenda Yusuf enggo ngidah kai si bakal terjadi (7 tahun masa mbuah page ras 7 tahun masa la mbuah page), emaka nina “Pepulung 1/5 ulih peranin ibas masa eriba-iba”. Pemimpin si iarapken eme pemimpin si banci “mengubahken pola pikir masyarakat” gelah banci tek ras nggit ngelakoken kai si ikatakenna. Jadi kai siikataken Jusuf alu wewenang raja maka kerina ialakoken rakyat Mesir, seh maka tuhu-tuhu negeri e itandai jadi “lumbung pangan” ibas paksa sie. La saja banci ncukupi keperlun rakyatna tapi pe enterem bangsa-bangsa si deban ngelegi nakan ku Mesir.

c. Sinergi
Strategi si mehuli tanpa lit pengawasen si mehuli ibas ndalankenca tentu la banci erdalan alu mehuli. Emaka pemimpin si perlu si pilih eme pemipin si ngasup “bekerja sama” ras rekan-rekan sekerjana, la “one man show (single figther). Lit sitik kelemahen perkembangben kepemipinen ibas kalak karo, la atena lit kalak si “lebih hebat” asangken ia, erkiteken sie terjadi “kegagalen regenereasi (gagal kaderisasi)” bandingken ras jurus-surus persilaten, setiap guru engkurangi sada jurus, sebab mbiar guruna jagon pagi muridna asangken ia, piah dungna persilaten ndai tading tari-tari bintangna.

Kata sinergi ibas dunia oragnisasi, lait si erpengakap “dirina” lebih penting (hebat), tapi rukur kerna “pentingan peran kalak si deban ibas nehken tujun” ije terkandung sada makna tanpa kalak si deban la akapna ia banci erbahan kai pe. Pemipin si menganut “sinergitas” la terjebak kubas sada perasaan “persaingen” tapi justru saling melengkapi, seh maka ermeriah ukur adi lit ibas tim kerja e si “menonjol entah hebat. Ijenda me pentingna unsur “kepentaren (akal budi)” ibas sekalak pemipin. Pemipin si bijaksana eme ngergai setiap “potensi” dingen banci merangkai potensi e guna menggerakken “bangsa ” si ipimpinna. Seh maka enggo banci jadi sada “mesin/motor” si terus erdahin guna maba kibas tujun. Ibas Masmur 111:10 Bena-bena kepentaren e me erkemalangen man TUHAN . Man kalak si erkemalangen man baNa iberekenNa kap pemeteh si mehuli. Terpujilah Dibata seh rasa lalap.

Pointer Aplikasi
1. Mari sipake hak pilihta guna milih pemipin si erpemeteh ras pentar
2. Guna banci meteh siman pilihen “erpemeteh ras pentar” maka labanci lang kita harus aktif ndarami entah berdiskusi kerna “rekam jejak” siman pilihen
3. Kita pe harus jadi pemilih si “erpemeteh ras pentar” ertina la cukup sieteh kerna rekap jejak si bakal ipilih kita, tapi pe ibas milihsa harus si pake akal budi (bijaksana) la saja ngukuri “untung man banta pribadi” tapi si perlu si ukurken eme “nasib sebangsa, senegara ras setanah air.

Pdt. Saul Ginting

GBKP Runggun Bekasi

PERSEMBAHKEN SI MEHULINA
(KEJ 4 : 3-7, HEBER 11 : 4)

Kata Perlebe
Persembahen eme wujud (bukti) kinihamaten si ersembah man si sembahen. Sebagai bukti kinihamaten, maka si nembah harus mereken persembahen si mehulina ras ibas ukur si meriah. Persembahen si mehulina labo saja inilai ibas kai siibereken kita, tapi pe itentuken alu motivasi kita mereken persembahen.
Uga kin ikataken Persembahen si mehulina si ngena ate Tuhan dingen meriah akapNa ngalokenca, ras persembahen si la negena ate Tuhan ras la ka meriah akapNa ngalokenca, mari erlajar kita arah bahan renungen perpulungen jabu-jabunta.

Isi
Kej.4:3-4a Persembahen Kain Ras Abil
Sada hal si perlu si contoh kerna keluarga Adam ras Hawa, eme ibas ia nuanken tanggung jawab mereken persembahen men Tuhan. Nuanken taggung jawab mereken persembahen ibas jabu, sekaligus nuanken man isi jabu e “ngakui kedaulaten (kuasa) Tuhan, Kinihamaten man Tuhan erbahan jadi manusia si tertib, ngasup ngataken bujur (ngergai perbahanen Tuhan).

Persoalen nggeluh ibas zaman enda, lania lit kehamaten man Tuhan, seakan-akan kai pe banci ibahan tanpa campur tangan Tuhan. Erkiteken sie mbue manusia nggeluh ibas “embang percuban”, adi sukses ndabuh kubas kesombongen sebab akapna ban kehebatenna (gegeh ras pemetehna), ras sebalikna adi gagal akapna ban liah ras kebodohenna (menyesali nasib). Tentu sie enggo bertentangen kel ras kai si ikataken ibas Rom. 8:28 “si mehuli ras si la mehuli banci maba kubas kiniulin”, tapi sebalikna man kalak si la ngakui campur tan Tuhan ibas kegeluhenna justru “ susah-senang erbahan dabuh kubas dosa.

Mbiasaken diri mereken persembahen mabai bana kita jadi pribadi si la “egosentris”, rukur rusur kerna untung rugi, emaka melala kalak terjebak jadi “preman rohani” mindo pasu-pasu Tuhan mesek-sek kel, tapi adi enggo ngaloken pasu-pasu la ingetna mereken persembahen pengataken bujur man Tuhan.
Bage me ibas renungenta enda Kain ras Abil enggo isuanken man bana karakter si ersembah (mereken persembahen). Kain mereken persembahen ibas hasil jumana nari, Abil pe mereken persembahen, igelehna biri-birina si pemena tubuh.

Kej 4:4a-7 Tuhan “Menilai” Kerina Persembahen Si Ibereken Man Ba-Na
Mereken persembahen man Tuhan, la cukup hanya terjeng memenuhi “tanggung jawab (kewajiben), sebab Tuhan “menilai” kerina persembahen si ibereken kita man bana. Emaka ibas nats enda ikataken “ngenan ate Tuhan man Abil ras persembahenna (ay.4b). Tuhan labo menilai “jenis ras jumlah” persembahen si ibereken man ba-Na. Labo erkiteken Kain merken hasil juma maka la ngena ate Dibata persembahenna, labo erkiteken Abil mereken anak sintua bas asuh-asuhenna maka ngenan ate Dibata man bana asangken Kain.

Memang sitik agak menarik nats enda guna si gar-gari, sebab adi si baca nats enda, seakan-akan “keberjuten Kain erkiteken persembahenna la ialoken Dibata. (ay. 5 “ tapi Kain ras persembahenna la ialoken TUHAN . E maka merawa ia, jutjut ayona perbahan nembehna atena”). Seakan-akan ijenda labo ban jut-jut ayona sanga mereken persembahen man Tuhan maka la ialoken Tuhan persembahenna, tapi sebalikna ban la ialoken Tuhan persembahenna maka jutjut ayona dingen merawa ia.
Adi si dramaken ia, banci nge siang kel ayo Kain sanga mereken persembahen man Tuhan, saja ngenca tehna persembahenna la aloken Tuhan maka isadarina labo banci kepe “terbuali” Tuhan alu senyumen, entah ayo si pesiang-siang. Sebab ijenda ituriken Tuhan terdauhen ibas ay. 7. Adi mehuli perbahanenndu, tentu cirem kam. Tapi erkiteken perbahanenndu jahat, dosa ngerimrim i lebe-lebe pintun. Ikuasaina atena kam, tapi kam arus naluken ia." Jelas informasi enda man banta maka ope denga Kain mereken persembahenna enggo lit “pergumulen bas pusuhna (bd. Dosa enggo nerimrim ibas pintun, TB : Tetapi jika engkau tidak berbuat baik, dosa sudah mengintip di depan pintu; ia sangat menggoda engkau”. Emaka ibas kain mereken persembahenna, cirem nge ayona, saja enggo mulai itakar-takarna asakai buena si harus ipersembahken, adi si dramaken. Enggo ibuatna asa siatena ipersembahkenna, jenari tatapna ka buesa ka akapna, emaka ikurangina ka, sitiksa ka akapna emaka tambahina ka, enggo ka mbuesa akapna emaka kurangina ka... tapi ayona cirem, saja cirem ayona e erkiteken banci ikapna Tuhan ipermainken.

Jadi ibas kita mereken persembahen man Tuhan, asa meriah ukur si “pemena turah ibas ukurta lanai banci ikuragi, saja adi itambahi tentu ermeriahna ukur Dibata ngalokenca. Bageka me pe Minggu-minggu enda kita mengketi “minggu Kerja rani”, si tetapken ukurta lako mereken persembahen kerja raninta erpalasken “kinihamatenta man Tuhan selaku ulu kerina sinasa lit” ibas kita. Emaka ope denga netapken asakai kerja raninta, babai lebe kerina anka jabunta “erbahan perenungen uga belinna pasu-pasu Tuhan man jabunta sada tahun enda” (ukurenna : asakai si enggo si pakaiken kerina pemere Tuhan “biaya nggeluh, biaya sekolah, gawah-gawah” ula ukuri asakai nari sisana sebab : Pemere Tuhan = jumlah si enggo pake + Sisa si lit ibas kita. Terdauhen pemere Tuhan e situhuna labo terkira kita sebab lit ka ge si enggo si pake fasilitas kegeluhen si ibereken Tuhan si bebas kita makesa (matawari, oksigen, udan rsd). Kenca ngukuri si bage tetapken asakai dage “metunggung persembahen kerja ranita tanda kita mehamat ras ngergai Tuhan. Ketetapen pertama si enggo ibahandu, ulanai ikurangi, tapi kenca iukurindu ka tambahni nari maka banci. Endame ikataken persembahen sebagai “korban” ertina enggo melala ibas jumlah tapi meriah akap merekenca erpalasken pengakun bas Tuhan nari kap kerina sinasa lit e. Situhuna asakai pe si bereken labo cukup nggalari kai si enggo ibereken Tuhan man banta. Emaka ibas mereken persembahen harus ibas ukur si meciho ras pusuh si meriah, sebab kita “ngulihken sada bagin si enggo ibereken Tuhan man banta”.

Heber 11:4 Palas Mereken Persembahen
Sada dilema adi kita encakapken persembahen si megati si pertentangken “jumlah ras keriahen ukur”. Lit si ngataken mbue gia sibereken persembahenta adi labo meriah ukurta, ma pangen sitik tapi meriah ukur, janah iboboti ka alu ayat Alkitab “Tuhan ngaloken persembahen ibas ukur si meriah labo paksaan. Si Lebih ekstrim ka adi negrana kita kerna persembahen nina ka perpulungen e, si pentingna bagi si kataken Roma 12 “endeskenlah kulandu man Dibata saja selaku persembahen si nggeluh” terjeng je pas dega tapi ibumbui perpulungen e ka , emaka labo “senta” Tuhan labo perlu sen, si perluken Tuhan eme kegeluhenta enda.

Megati si potong-potong Kata Tuhan e, erpalsken “kepentingenta”, labo ngukuri ukur Dibata. Emaka ibas kitab Heber enda iterangken man banta kai dage palas ibas kita mereken persembahen. Palas mereken persembahen e eme “KINITEKEN”. Adi tek kita, kita lit erkiteken Tuhan, kita nggeluh erkiteken Tuhan, kita erdahin erkiteken Tuhan, kita ndatken rezeki erkiteken Tuhan, kita sehat erkiteken Tuhan, maka enggo pas si kataken Paulus “Endesken kulandu man Dibata saja selaku peresembahen si nggeluh” ertina totalitas kegeluhen jadi persembahen man Tuhan. Tapi labo bagi singuda-nguda anak perana paksa kasmaran, reh nina sekalak anak persana tare temanna :”Aku serahkan seluruh hidupku kepadamu, hujan badai akan kuhadapi, mati di ujung keris aku rela demi si hitam manis”, reh ka nina si nguda-ngida ndai : “oh setianya dikau mas, aku tersajung mendengarnya” je nina singuda-nguda ndai “adi kerina kel kegeluhenndu e endeskenndu man bangku bang, tukur si tik pisang goreng ah yah ”, mis ka nina si dilaki ndai : “eh ula dek mbatuk kam kari pisang goreng ah mbue kel minakna. Mis ka ialoi singuda-nguda ndai :”ndai kuserahkan hidupku kepadamu” nindu gombal, pisang goreng saja pemberatsa nge akapndu.... ah enggo me bang ‘putus saja kita”.

Kita pe megati nge ninta “Tuhan kupersembahkan hidupku, jadi persembahan yang hidup” , je bas kantong persembahen “kerja rani” pe pang denga kita namasa Rp. 50.000, persembahen 1X setahun. Payo denga kinlah e ? mari si renungken, adi payo siakap erpalasken kinitekenta terusken, sebab enda pertanggungjawabenna man Tuhan nge, saja adi lanai siakpa payo, ya berubahlah.

Jadi ibas merken persembahen enda harus erpalasken kiniteken, sebab adi erpalasken kiniteken tentu labo banci kita meros merekenca (labo bagi mere man pengemis, meriah siakap merekence erkiteken lalit siakap si kurang ibas kita).Mere ibas kiniteken “mereken si terbaik” alu pusuh si meciho ras kiniteken maka Tuhan ka nge si encukupken kerina kebutuhen geluhta.

Aplikasi
1. Mari arah kerja Rani enda si suanken kebiasan “mereken persembahen” man isi jabunta, emaka ibas pesta kerja rani, perlu ka kita melibatken anak-anak guna merken persembahen
2. Merkeken persembahen erpalasken kinitekennta kerna “pemeliharaan Tuhan nangdagi jabunta, netapken erpalsken “keriahen ukur Tuhan” ula keriahen ukurta saja si ukuri.
3. Berkenleah persembahen Kerja Ranita alu pusuh si dem keriahen, erkiteken Tuhan enggo masu-masu kerina pencarinta.

Pdt. Saul Ginting

GBKP Runggun Bekasi